Matiu 4
4
NA SOPENA 4.
1Tau Na Talume Tapu molavi Iesu me ra utahau sura tamate ivei oso ta-pusia. 2Tau mosahani na rani na havulavati me na pohi na havulavati tau, momarohati. 3Tau natamate monumai, moaso ta mea, Iniho va omatu i Atua, oiaso me ra sule naa tihamu. 4Maa motami, moaso, Moulia, Na tajua isamaraha hi na hanihani hasa, imaraha hi na leo vunuvunu Atua moaso. 5Tau na tamate molavia me na vanua tapu; mojuria ta na vusuhana pea hi na lotu, moaso ta mea, 6Iniho va omatu i Atua, oitivu tasivo: suria moulia,
Iaso ta me ra pilana enjel suriho:
Tihijitohoaho me ra havera,
Suria oisatahaloha emu ine na sule.
7Iesu moaso ta mea, Vahatea maa moulia, Oitena tapusi Iehova Atua himu. 8Vahatea maa, na tamate molavia me na vusuhana vuti sahe jua motea, mopisea ra vanua vunuvunu me na ulu, me ra sanu tahonae hira; 9tau moaso ta mea, Inau airahu ta meho ra sanu vunuvunu naa, va iniho oijovi tasivo, oilotu meau. 10Tau Iesu moaso ta mea, Oirovo, Setan: suria moulia, Oilotu me Iehova Atua himu, oive na pilana varao hasa. 11Tau na tamate molaho turea; tau ra enjel tenumai mea, temata inie.
12Tau morohoe telavi Jon tau, movano me Kalili; 13tau mojuri Nasaret tau, monumai momaraha me Kapernaam, me na para i tasi, motea hi ra vanua i Sepiulan me Navtalai; 14sura ve na leo hi na provet Aisaia mine motaraae, moaso,
15Na vanua i Sepiulan, na vanua i Navtalai,
Taroroi me na tasi, neeva jivi na pei Jortan,
Kalili hi ra vanua,
16Ra tajua lolopohitupu
Terena rani tahajia,
Ta me ra tajua tetetoho me na pohipohitupu, Na rani monumai mera.
17Majuri me na rani hina Iesu movaere lalaa, moaso, Otojomi; suria ra sanu hi na tailahi vahatea tinumai.
18Tau molaholaho me na valuna tasi hi Kalili, moreni ra tajua morua, Saimon, tejuria Piter, me tasina Antru, teraputuhe na maliu ta na tasi; suria na sipilararua varao na taitali maji. 19Tau moaso ta merarua, moaso, Oralaho tahuu, tau aiveiamurua orataitali tajua. 20Tau vileahi terajuri ra maliu, teralabo tahuna. 21Tau molaho ture na vanua nee moreni ra tajua morua maa, Jemes, matu i Sepeti, me tasina Jon, teratoho me na lolona ovo valui tamararua Sepeti, terareji ra pilara maliu; moorerarua. 22Tau vileahi terajuri na ovo, terajuri tamararua, teralaho tahuna.
23Tau Iesu molaho vasoosoo me Kalili vunuvunu, moaso pipisera me ra peara hi na lotu, molalaa na taveti tahonae suri ra sanu hi na tailahi, movei sori ra rojo vunuvunu se ra tajua. 24Tau na taveti hina movano me ra vanua i Siria vunuvunu: tau telavi ta mea ra taha rojo terojo hi ra sera rojo, ra tajua taha ra tamate tetetoho me na lolora, ra taha matemate i toa, ra taha havemate; tau movei mauri hire. 25Tau ra tajua ra tari taha huhurahi majuri me Kalili me Tekapolis me Jerusalem me Jutia me ra vanua neeva jivi na pei Jortan telaho tahuna.
Currently Selected:
Matiu 4: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
