Matiu 10

NA SOPENA 10.

1Tau moore ra uluo hina na havulatea na vana morua tenumai mea, morahu ta mera na hauhaua sura rahurahara talume oso, sura vei sori ra rojo vunuvunu mono.

2Na hisera uluo hina na havulatea ua vana morua ia: Na majihana, Saimon, tejuria Piter, me tasina Antru; Jemes, matu i Sepeti, me tasina Jon; 3Vilip me Partolomiu; Tomas, me Matiu, na taha lava sule hi na mata ra sanu; Jemes, matu i Alveas, me Tateas; 4Saimon hi ra Kenan, me Jutas Iskariot, inie na taha lavia ta mera. 5Iesu mosulara tajua na havulatea na vana morua naa, moaso hauhaua ta mera, moaso,

Toho na vano me na riora vanuara tajua lolopohitupu, toho na vano me na vanuara ta Sameria: 6maa otovano me ra sip taha peli hi Israel. 7Otovano toho mera, otolalaa, otoaso, Yahatea rasanu hi na tailahi tiuumai. 8Otovei mauri ra taha rojo, otove ra taha mate titamaraha, otovei voevoe ra taha leper, otorahurahara tamate: amiu otolavivuso ra sanu, motahonae otorahuvuso ta mera. 9Toho na lavi na mane taha majina, na mane taha voe, na mane taha maeto, me na pilamiu pauji; 10toho na lavi na taha sura rio, na visivisi morua, na su, na tiho: suria na tajua taha varao motahonae sura lava hana. 11Otovano me na vanua motea, ototiro ra taha tahonae ae; tau ototoho ae me na rani otolaho ae. 12Otoruhusahe toho me na pea, otoaso tahonae mea. 13Tau na pea va itahonae, motahonae na pilamiu aso tamautu inumai tauae: maa va isatahonae, motahonae na pilamiu aso tamautu itanumai liliu meamiu. 14Ra tajua taha salaviamiu, ra tajua taha saroho ra leo himiu, me na rani otolaho ture na pea neeno, otolaho ture na vanua neeno, motahonae otojojore na tano mena emiu. 15Aaso taharahu meamiu, Me na pohi hi Iehova ra tanoho me Sotom me Komora tirohoe tahonae jivi ra tanoho me na vanua neeno.

16Inau asula i amiu pala sip me na vuati hi ra pesi ila: suria, mo-tahonae otopala mata me na semiu pinisi, otopala mahi me na semiu toho tamautu. 17Maa otomata amiu suri ra tajua: suria tilaviamiu me ra varese me na vali, me ra peara hi na lotu mono tilosiamiu; 18io, tilaviamiu me ra varese me ra moli suriau, sura pisea ta mera, sura pisea ta me ra tajua lolopohitupu. 19Maa tilaviamiu mera tau, moso otoninima otoaso paleve, otoaso nasava: suria me na rani hina otopinisi otoaso nasava. 20Suria isa-amiu otoaso, maa Na Talume i Tamamiu iaso me na lolomiu. 21Tau na tajua irahu tasina ta me na ape, tata irahu matuna mono: ra matura tioso me ra tamara me ra tinara, tive ra tajua tivei meteira. 22Na lolora tajua vunuvunutihahara amiu suriau: maa itea va ihauhaua tuitui imauri pa. 23Maa tivei oso ta meamiu me na vanua motea tau, otorovo, otovano me ne vanua mositea: suria aaso taharahu ta meamiu, otosavano me ra vanua i Israel vunuvunu me na rani hi Matu i tajua inumai.

24Na uluo mosasale jivi hi na moli hina, na tajua hi na varao mosasale jivi hi na varese hina. 25Na uluo va ipala moli hina natuha motahonae, na tajua hi na varao va ipala varese hina natuha motahonae. Va ihire tejuri na varese hi na pea, Peelsepap, tijuri ra tajua hi na peana mono palahi. 26Toho na ine hire suria: suria saite sanu molopori horoe, isaraharahae; saite sanu mojurupunia, isapinisia. 27Ra sanu inau aaso ta meamiu me na pohi tupu, motahonae amiu otovetira ta me ra tajua me na rani: na sanu amiu otorohoe me na jalihamiu, motahonae otoaso majaraha nie ta me ra tajua. 28Toho na ine ra tajua taha pinisa vei mete na epemiu, tesapinisa vei mete na talumemiu: motahonae otoine itea na taha pinisa vei mete na talumemiu me na epemiu me na hapu. 29Tevoli ra manu taiti morua hi na mane taha maeto taiti motea, e mojoa? saitea hira ijovi ta na tano Tamamiu isa-pinisia: 30maa moevi na sivulura re-miu. 31Toho na ine suria; na volimiu motavere jivi na volira manu taiti ra tari. 32Suria, itea va iaso majaraha momejeau ta me ra tajua, inau mono aiaso majaraha amejeia ta me Tamau me na tailahi. 33Maa itea va isaaso majara-ha momejeau ta me ra tajua, inau mono aisaaso majaraha amejeia ta me Tamau me na tailahi.

34Moso otojuria tau inau asumai sura sula na toho tamautu me na ulu: asasumai sura sula na toho tamautu, asumai sura sula na jimi taha paravu. 35Suria asumai sura ve na tajua ijuijuli valui tamana, sura ve na hajae ijuijuli valui tinana, sura ve na hajae ijuijuli valui tina i tupuna: 36tau ratajua hi na sipeana tajua hire ra satuana. 37Itea va imeje tamana e tinana jiviau, mosatahonae meau; itea mono va imeje matuna lamane e matuna hajae jiviau, mosatahonaemeau. 38Itea mono va isameje na lavi na pilana hau palatusi, va isalaho tahuu, mosatahonae meau. 39Itea va ipasua na sena mauri, ivei pelea; itea va ivei pele na sena mahri suriau, ipasuae.

40Itea va ilaviamiu ilaviau, itea va ilaviau ilavia na taha sulau. 41Itea va ilavi na provet motea hi na hisena provet, ilavi na volivoli hi na provet; itea mono va ilava tajua taha tataholo motea hi na hisena tajua taha tataholo, ilavi na volivoli hi na tajua taha tataholo. 42Itea mono va irahu te mana pei hasa ta me motea hi ra paule taiti naa hi na hisena tajua hiu motea, aaso taharahu ta measijiu, isavei pele na volina.

Currently Selected:

Matiu 10: TLM9109

Highlight

Copy