Mphattuwelo 42

Asunnawe Yusufu anarwaa wIciipitu

1Yakopi wacuwenlyawe wiira ihaawo itiriku wIciipitu, aheerela asaanawe: Isiyani umakelaka uwehanaca paahi? 2Aheera tho: Kiheewa yiiriyaka ihaawo itiriku wIciipitu. Nrwee wonwo mwathume itiriku wiira nipwaherere ukumi ni nihikhwe itala. 3Vano, asunnawe khumi a Yusufu yahorwaaca wIciipitu uthuma itiriku. 4Yakopi khantthunihile Pencamii, nhimawe Yusufu, wiira aatthukane ikwaha, kontha aanawoova unkhumelela itthu yoonanara. 5Asaana a Sirayeli yahaatthukana ikwaha atthu akina yaarwaca uthuma itiriku, nlattu wo'tala yaavonle uKanaa.

6Yusufu aari nlamuli olapo yo wIciipitu ni yooyo phaatumihera itiriku atthu othene. Phimaana uphiya waya asunnawe Yusufu yahomuramela mpaka upiiha iyuci vathi. 7Yusufu woona wawe, ahaacuwelela asunnawe, nanso aakhanle toko khaacuwenle ni ahoopopiha eeraka: Nyu nnokhumakhuma vayi? Yahaakhulaca yiiraka: Ninkhuma ilapo yo'Kanaa naawile uthuma iyolya. 8Yusufu ahaacuwela asunnawe, nanso ayo khayaancuwenle. 9Vano ahoopuwela mittora caalohilyawe nari na asunnawe ni aheerela: Nyu nri mayohottela! Mwaawile uhottelaca ilapo ehu ila wiira ncuwele nipuro nookhwyaa. 10Ale yahaakhulaca yiiraka: Mena, nkunya. Asaanenyu yaawile uthuma iyolya. 11Hi othene, athumwanihu ari amoca. Asaanaa ari atthu omaana, khaanakhala mayohottela. 12Nanso Yusufu ahaakhanyereriha eeraka: Mena! Nyu mwile uhottela wiira moonenele nipuro nookhwyaa ilapo ehu ila. 13Ni ale yaheeraca: Asaanaa yaari khumi n'eeli, othene athumwanaya ari amoca ilapo yo'Kanaa. Itthyako eyo ihanle uwani na athumwanaya ni nkina uyo hokhwa. 14Yusufu ahaakulela eeraka: Phi vaava kihimilyaka va. Nyu nri mayohottela. 15Nyu nnaahala ulawihiya. Kinalupela mwa ncina na Farawoo, nyu mu khannokhuma, mwahimmwaneke uno mwanhimenyu eetthyako uyo. 16Munrume mmoca anrweele mwanhimenyu uyo, nyu nhanle va nhotthukiya. Commo phinhalehu ucuwela wiira cinhimyenyu nnyo ciri citthu ceekhweli atthuna cowoothiya. Caahikhaleke ceekhweli, kinalupela mwa ncina na Farawoo wiira wanaahala ucuwannya wiira nyu khweli nri atthu oohottela! 17Ni ahaatthukela nkalaposo mahuku mararu.

18Nihuku noneeraru Yusufu aheerelaca: Mi kinamoova Nluku. Mwapheela woopwa, mpanke coo: 19Mwakhala wiira nyu atthu omaana, munhiye munninyu mmoca nkalaposo mu. Vano akina va nturuwaceke n'ukusa itiriku wiira mwalye uwani. 20Nkiwiihere va nhimenyu eetthyako uyo wiira acuwannyee moolumo enyu yakhala wiira eekhweli ni nyu phinhalenyu uhikhwa. 21Ayo yahotthuna upanka yaahiminye eyo ni yaheerelana: Khweli va ninattarusiya mwa nlattu weetthu impankilehu nhimehu uyo. Naammoonaka caacukula awe, ni waaniconttelelawe va, wiira ninhiye nkumi, nanso khanaantthunenle. Phimaana uniphwanyaka uno utapana uno. 22Rupeni ahaakhula eeraka: Akoohimenryeni wiira nhinhuvihe mmirawo uyo, nanso nyu khamwatthunne ukiiwa! Vano ninlamuliya waakhulela iphome awe eyo. 23Nanso ale khayaacuwela wiira Yusufu naweewa, kontha oolumana ni ntthu aataphulela ni nuulumo naya. 24Vaavale Yusufu ahothama ni wunla. Vano ahohokoleela tho ni ahoolumaca wiira atthukiye Simeyoni, othene amoonacaka.

Asunnawe Yusufu anaturuwa uKanaa

25Wahoolo Yusufu aholamula wiira icarihiye itiriku mmirupani mwaya mmo ni ituruseliye ipheeta yo khula ntthu munrupani mwawe, ni avahiye iphika coovira alyaka. Ni commo wahopankiya. 26Ale yahopakhira mirintti caya co tiriku mwa apuuru aya n'ukhumaca. 27Nipuro naamakilyaya nlattu wo wiileliya, mmoca uyo ahotthukula nrupa awe wiira ankumihe nankanka oonliha puuru awe, ni ahoona ipheeta umalakuni wo nrupa awe. 28Aheerela asunnawe: Kihoturuseliya ipheeta aka eyo. Ila mu munrupani mwaka mu. Yoovaka wanrimani waya ni attettemelaka yaheerelana: Isiyani ila Nluku inipankilyawe ela?

29Waaphilyaya wathumwanaya, ilapo yo'Kanaa, yahohimyaca cothene caakhumelenle, yiiraka: 30Nlopwana mwanene ilapo eyo honuulumacera ni honihela ukhala hi mayohottela. 31Nanso hi nihonroromeliha wiira khanihiwena atthu oohottela niri atthu eekhweli. 32Niheera tho wiira naari asaana khumi n'eeli athumwanihu ari amoca ni mwana mmoca uyo hokhwa, ni eetthyako uyo ri na athumwanihu uKanaa. 33Vano nlopwana mwanene ilapo eyo honiirela: Nrwee noone mwakhala wiira mw'atthu eekhweli: Nhimenyu mmoca nolamuliya uhala vaava ni mi. Akina ayo aturuweke ni akuseke iyolya yalyeke uwani na akhwaya. 34Nanso mwakiwiihere nhimenyu eetthyako uyo phinhalaka ukupali mi wiira nyu atthu omaana ni khannakhala mayohottela. Vano phinhalaka wuhokoloserani munninyu uyo ni wutthuniherani upanka marontta ila ilapo ela. 35Weetthiyaya mirintti nnyo, wo khula nrintti wahophwanyinya nhukho woocara ipheeta. Yakopi na asaanawe woonnyaya mihukho nnye, yahoovaca. 36Ni Yakopi aheerelaca: Nyu nnakimalihera asaanaka ayo! Kihanle woohi Yusufu, nna va kiri woohi Simeyoni, nanlelo nnopheela unkusa Pencamii? Masakha othene ankikhuna mi! 37Vano Rupeni aheerela athumwane: Kahinturuwaneke Pencamii uyo, mweevakace asaanaka oyeeli khaweetthu. Nkihiyere Pencamii uyo, thi mi kinhala unwacawaca. 38Nanso athumwane yahaakhula yiiraka: Mwanaka uyo khannonkusa. Munnawe hokhwa. Uyo phihanle. Itthu phi itthu yoonanara inhala unkhumelela munkwahani mmo, vano phinhalenyu uvitha ipwi caka nnyo mmahiye kinari ni icuku.

Currently Selected:

Mphattuwelo 42: NNI

Highlight

Copy