Mphattuwelo 41

Yusufu naataphulela ittora ca Farawoo

1Wumaleloni wo myakha miili, Farawoo aholoha nttora awe. Ule aalohile neemenle nceresere mooloko Niilu. 2Vano cahokhumaca mmoolokoni mmo imope saapa coorera ni cooneneva, caalya nceresere mooloko. 3Wahoolo cahokhuma mmoolokoni mmo imope tho saapa, coonanaraca ni cowoottaca, caarweele utakaneela ni cikhunanaya nnye nceresere mooloko. 4Vano imope coonanaraca nnye ni cowoottaca nnye cahokhura imope cooreraca nnye ni cooneneva nnye. Vano Farawoo ahonwa. 5Ahohokoleela tho urupa ni aholoha tho nttora nikina. Macasi saapa, moolupale ni omaana, oocara ni oorera, yahothapuruwa ntathi mmoca. 6Vano yahophuwela tho macasi makina saapa, ooyevaca ni owuuma muntathini mmo, yaapahiye ni iphyoo yaakhuma wuuthakoni. 7Macasi ooyevaca ayo yahomirya macasi saapa oocara ni omaana ayo. Vano Farawoo ahonwa, ni ahoona wiira waari nttora. 8Wicisuru, cinancanre cowuupuwela coonkukuryeha, ahoruma wiihanaciya anahako ni acuwelaci o wIciipitu ni ahaattonkela mittora nnyo, nanso khaawo oonrye utaphulela.

9Vano nhooleli o mahutumu ahomwiirela Farawoo: Ilelo phinoopuwelaka caaliyanlyaka. 10Ikwaha imoca Farawoo wahorusiya na karumeya aa eeli ni waholamula utthukiya mi ni nhooleli o mayamikatthe uwannyawe nhooleli o mayorontta. 11Uhiyu mmoca, khula ntthu wa hi, aholoha nttora ni khula nttora wahaana mataphuleleliyo aya.

12Ahaawo ni hi mommo mmirawo mmoca nheperi, karumeya a nhooleli o mayorontta. Nahonttonkela mittora cihu nnye ni ule ahotaphulela, anihimeryaka wo khula ntthu maanaya nttora awe. 13Ni cothene cahokhumelela toko caanihimenryawe. Mi kihoturuseliya nteko aka ni nkina uyo ahotthukaceriya.

14Farawoo aholamula wiira eehaninye Yusufu eeraka: Akumihinye nkalaposo mmo ni awiihiye wowaakuvya. Nametthilene irori n'uwara ikuwo cikina aheethoonyera wa Farawoo. 15Farawoo ahomwiirela Yusufu: Kahaana nttora nimoca ni khaawo noorya utaphulela. Nanso kiheewa wiira we, weewaka nttora unawoorya utaphulela. 16Yusufu ahomwaakhula eeraka: Iyo khinkhuma mwa mi, nanso Nluku nawuvahani nyu ntaphulelo no nnema. 17Vano Farawoo ahonttonkela nttora ule Yusufu eeraka: Kiholoha kineemenle nceresere mooloko Niilu. 18Cahokhuma mmoolokoni mmo imope saapa coorera ni cooneneva, caalya ni mooloko uyo. 19Wahoolo cahokhuma cikina tho saapa coonanara ni cowootta. Akinoona imope coonanara mwiilaponi mothene toko nnyo. 20Imope coonanara ni cowootta nnyo cahokhura imope saapa cooneneva nnyo caakhumelenle woopacera nnyo. 21Hata cinakhunrene, khacacuwannyaa wiira cihokhura, maana caari yooyo nkhalelo uyo. Vaavale kahonwa. 22Wahoolo kaholoha tho nttora nkina. Kahoona macasi saapa, oocara ni oorera, yaathapuruwa ntathi mmoca. 23Vano yahophuwela tho saapa oonyaala ni ooyevaca, owuumihinya ni iphyoo yooviha yaakhuma muthakoni. 24Macasi ooyevaca ale, yahomirya macasi saapa omaana ale. Kihaattonkela acuweli, nanso khaawo oonrye utaphulela.

25Yusufu ahaakhula eeraka: Farawoo, mwaarina nttora mmoca. Nluku hoohimeryani itthu inhalawe upanka. 26Imope saapa coorera nnyo, ciri myakha saapa, ni macasi saapa omaana ayo, ciicammo ari myakha saapa, va uri nttora mmocaru. 27Imope saapa cowootta ni coonanara nnyo caakhumelenle uttuli waya cikina nnyo, ni macasi saapa oohicara ni yoomihiye ni iphyoo yooviha yaakhuma muthakoni, ciri myakha saapa. Cinhala ukhala myakha saapa co'tala. 28Phi ciicammo toko cuhimenryaka Farawoo, Nluku hoothoonyera itthu inhalawe upanka. 29Myakha saapa cooruweriya cihanle vakani uwa ilapo yo wIciipitu. 30Wahoolo cimmowa myakha saapa co'tala. Vano ukati wothene wooruweriya ummooliyaliya, kontha itala eyo immohasara ilapo yothene. 31Itala inhala uwa immokhala yootepa, woovikana ukati waruweriye khunhala wuupuweleliya tho mwiilaponi. 32Nttora uhooweela imaara piili Farawoo, kontha itthu ila iholakeliya ni Nluku ni immwa yakuvyaka. 33We Farawoo umphavele nlopwana oocuwelaca ni unhele ulamulela ilapo yo wIciipitu. 34Farawoo waahele atthu oowehaweha, anhala utotokaniha mphantte woneethanu wo coolya co wIciipitu ukati wo myakha saapa cooruweriya nnyo. 35Ayo anlamuliya utotokaniha iyolya yootosa inhalaya wooryaniha ukati wooruweriya uyo, n'usunka itiriku, ni we Farawoo unlamuliya uwehaweha ni usunkiha mmakhupini o mmasittatti. 36Yeeyo iyolya iyo inhala usunkiya eyo, phinhala ulaminya myakha co'tala cinhala uwa mwIciipitu mu, wiira ilapo ihihasaryee ni itala.

Yusufu mwaakhula a Farawoo

37Ala moopuwelo ala yahoncivela Farawoo ni mayonlaka awe othene. 38Phimaana Farawoo ahaakoha eeraka: Nanso ninaahala umphwanya ntthu toko ula ookhalana Nnepa wa Nluku? 39Farawoo ahomwiirela Yusufu: Toko Nluku ciinryawe wowuthoonyera citthu nnya cothene, khaawo ntthu ankhili n'ucuwelaca toko we. 40We phi we unhala ulamulela inupa aka, ni unethi aka wothene unhala wiiwelela nlamulo naa, nanso wahiceni, phi mi muulupale wowuupwaha we. 41Ni Farawoo ahopwaherera wuulumaca eeraka: Kinawuvaha nenna va ulamulela ilapo yo wIciipitu yothene. 42Wahoolo, Farawoo ahonrula nnikokhoni nnela antthittelawe n'ummwariha Yusufu nnikokhoni mwawe. Aholamula uwarihiya ihancu yoovevyaala, ni ahommwariha nsiko nkuhu wo'wooru. 43Ni ahommweliha ikaaro awe yonayeeli yo umwene ni uhoolo wawe yahaawo anamakhuwela yeera: Nhule iphiro. Yusufu heesiya ulamulela ilapo yothene yo wIciipitu. 44Farawoo ahomwiirela tho Yusufu: Mi Farawoo, nanso woohi nuulumo naa, khaawo nolamuliya upanka itthu phi itthu mwIciipitu mothene. 45Farawoo ahonvaha Yusufu ncina na Safenate-Paneya ni ahonvaha nthiyana wiira akhale mwaarawe, Asenate, mwana a Potifera, mayasataka o Oni. Wahoolo Yusufu ahorwaa woonoona ilapo yothene yo wIciipitu.

46Yusufu aarina myakha talathini (30) ceyarelo wapacenryawe unvarela nteko Farawoo, mwene o wIciipitu. Uyo ahonhiya Farawoo ni ahorwaa woonoona ilapo yothene yo wIciipitu. 47Ukati wo myakha saapa cooruweriya, ilapo yothene yahaana iyolya yinci. 48Yusufu ahototokaniha iyolya yaalikeleliye usunkiya, yo myakha saapa cooruweriya wIciipitu ni ahosunka mmakhupini umaparasa khula iparasa ahototokaniha itiriku yo mmattani. 49Commo, Yusufu ahosunka itiriku yinci, toko nhaava wompharyaa. Uyo ahohiya waalikela iyolya iyo kontha khaawo tho oorya uphima mwa nlattu wowinciva.

50Cihinaya uphiya myakha co'tala, Asenate, mwana a Potifera, mayasataka o Oni, ahonnyarana Yusufu asaana eeli. 51Oopacer'oyo, Yusufu ahonvaha ncina na Manasesi, eeraka: Nluku hokiliyaliha mahuviho aka othene ni itthoko yothene ya apaapa. 52Mwana onayeeli ahonvaha ncina no Farayimi, eeraka: Nluku hokipanka o'cayra ilapo yahuvaka.

53Commo, cahophiya ummaleloni myakha cooruweriya wIciipitu, 54ni cahopacera myakha saapa co'tala, toko Yusufu waahoolelihenryawe uhimya. Yahovola itala ilapo cothene, nanso ilapo yo wIciipitu yahaawo iyolya. 55Wancenryaya uvola itala ilapo yothene yo wIciipitu, unethi wahanca unlepela Farawoo iyolya. Uyo ahaakhula atthu o wIciipitu, eeraka: Nrwee wa Yusufu ni mpanke inhalawe wuhimeryani. 56Wamwaryenlyaya itala ilapo cothene, Yusufu aholamula uhuliya makhupi ni ahopacera utumiha itiriku, aatumiheraka atthu o wIciipitu, maana itala yahotepa. 57Ni atthu ookhuma ilapo cothene, yammwa wIciipitu wiira yaathume itiriku wa Yusufu, kontha itala yaanvira itepaka ilapo cothene.

Currently Selected:

Mphattuwelo 41: NNI

Highlight

Copy