Mphattuwelo 34

Nkhitto wa atthu o'Sikeni ni nrukulu na Yakopi

1Nkwaha mmoca, Tina, mwana a Leya aanyanryawe ni Yakopi, ahokhuma wiira aacuwelane athiyana o yeele ilapo ele. 2Sikeni, mwanawe Hamori, nhiviti, mwene o yoole nttetthe ule, ahomoona ni ahontuphela. 3Nanso nrima awe wahomphelyaa nlattu wa Tina, mwana a Yakopi, ni ule ahoncivela mwanthiyana ole ni ahomuulumana wonifento. 4Phimaana Sikeni ahorwaa waahimerya athumwane eerelaka: Nkuulumele ule nthiyana ole wiira akhale mwaaraka. 5Yakopi wacuwenlyawe wiira mwamwanawe Tina ahotankanyinya iharusi, asaanawe anari utakhwani waalihaya mihuwo. Phimaana ahomaala aawehereryaka uturuwaca. 6Vano Hamori, athumwane Sikeni yahorwaa woopa mwaha ni Yakopi. 7Ukati waaturuwacilyaya utakhwani asaana a Yakopi yahocuwelaca cothene ni yahocukulaca n'urusiya venci cinene, kontha Sikeni ahopanka itthu yowuulihaca muru uSirayeli, waanrupannyawe mwana a Yakopi; itthu ihimpankiya. 8Nanso Hamori aheerelaca: Mwanaka Sikeni hociveliya ni mwaninyu. Kinawuvekelani wiira munvahe akhale mwaarawe. 9Ni niyaranace nyu ni hi, nnivahaka asaanenyu asithiyana ayo ni hi ninawuvahani awihu ayo, 10ni nkhale wamoca ni hi. Nkhale woohi itwaana ila ilapo ela; mpanke marontta enyu ni nkhalane mathala. 11Vano Sikeni aheerela athumwane ni asunnawe mwanthiyana ole: Nkikupali. Nkivahe mwanthiyana oyo. Mi kinawulivani ihisapu yothene inhalenyu ukilamula. 12Mwatthuna mmwelihe ihisapu yoothela ni coontthuva mwali uyo. Mi kinaakumiha cothene cinhalenyu uhimya, nanso nkivahe mwali uyo kinthele.

13Vaavale, asaana a Yakopi yahonthepyaca Sikeni ni athumwane yeehaninya Hamori nlattu wootankanyaa iharusi ya Tina, mwanrokoraya. 14Ni yahomwiirelaca: Khaninlamuliya upanka commo, unvaha mwanrokorihu nlopwana oohuula icantto kontha iri itthu yowuuliha muru. 15Phimaana ninhala wutthunani nyu mwakhalaka toko hi. Mooliheke alopwana othene toko hi. 16Vano ninawuvahani asaanehu ayo wiira mwaatheleke, ni hi, asaanenyu ayo ninawathela. Ni ninhala ukhala wamoca ni amocaru ni nyu. 17Nanso mwaahiniiweleleke ni mwahuuleke icantto, ninaankusa mwanihu uyo n'uthama.

18Yaayo moolumo ayo yahoncivela Hamori ni mwanawe Sikeni. 19Sikeni khapicile n'upanka yeereliyawe iyo kontha ahoncivela venci mwana a Yakopi. Ni Sikeni phaari oofentiya venci wowaapwaha atthu othene yaariwo ntthoko na athumwane. 20Phimaana ahorwaa Hamori ni Sikeni waathukumaniha alopwana othene o'parasa ni waahimerya eeraka: 21Ale atthu ale ari o'salama ni hi, phimaana naahiye akhale ilapo ehu ila ni apanke marontta aya. Kinawoona ilapo ihu iyo iri yinci. Anaanivaha waathela asaanaya ayo ni hi ninawaavaha asaanehu ayo. 22Nanso ayo atthu ayo anhala ukupali ukhala ni hi ni ukhala amocaru, hi alopwana va othene noolaka icantto, toko ayo cuunlyaya. 23Nnoona cani, imope caya nnyo, ni nhakhu aya uyo, ni mihuwo caya nnyo, khacinhala ukhala cawihu? Neewanane paahi ni anaahala ukhala wamoca ni hi. 24Vaavale atthu othene yaavira nkhora wo'parasa, yahomwiiwelela Hamori ni mwanawe Sikeni, ni alopwana othene yaavira wa nkhora wo'parasa, yahoolihiya icantto.

25Waphilyaya nihuku noneeraru, ukati waryaya muhuvani ni yaaweryaka venci makhwatta ayo, asaana eeli a Yakopi, Simeyoni ni Levi, asirokorawe Tina, yahokusaca khula ntthu ikatana awe, yahokelaca mparasa mmwe ni yaheevakaca alopwana othene. 26Ciicammo yahomwiivaca ni ikatana Hamori ni mwanawe ni yahonkusaca Tina aari inupa ya Sikeni ni yahokhumaca. 27Asaanawe Yakopi yahophiyaca wa atthu ookhwa ni yahohukhaca mparasa mmo mothene kontha yanootankanyinya iharusi ya mwanrokoraya Tina. 28Yahokusaca ikhontwaa, imope, apuuru caari mparasa ni cothene caari mmattani. 29Yahokusaca mihakhu ni yahaavarakaca asaana na athiyana urwaa waapanka ipottha, ni yahohukhaca mmapaani mothene. 30Phimaana Yakopi ahomwiirela Simeyoni ni Levi: Mokivelaveliha, nhokiputaniha na atthu ankhala ilapo ela, ni annakanani ni maperesii ncuwelaka wiira hi niri vakani, anaahala ulattulana n'uhonona ntthoko nihu. 31Vano ale yahaakhulaca yiiraka: Mpaka uyo umpanka mwanrokorihu toko puuta?

Currently Selected:

Mphattuwelo 34: NNI

Highlight

Copy