Mphattuwelo 33

Ukumana wa Yakopi ni Isawu

1Yoole ukati ule, Yakopi ahoweha ni phamoonawe Isawu awaaka, nari na alopwana iminya cese. Vano ahaakawa asaanawe ayo anvahaka Leya, Rakeli na asaarawe eeli oohitteeliheraniya. 2Vano ahaahooliha asaarawe eeli oohitteeliheraniya na asaanaya ayo, ahomweesa Leya na asaanawe ayo uttuli waasaarawe oohitteeliheraniya Rakeli ni Yusufu phaari oomalihera. 3Wahoolo Yakopi ahaapwahaca n'ukhala uhoolo, ni ahooromela vathi imaara saapa mpaka waphilyawe wa munnawe.

4Vaavale Isawu ahontthimakela, ahonkapatta n'unvaha alaahuma n'unsalameeha, ni othene yahoonlaca. 5Wahoolo ahoweha ni ahoona athiyana na amirawo ni ahokoha eeraka: Ala phaasipani arinaa ala? Ule ahaakhula eeraka: Ala ph'asaana anvahilyawe Nluku wotthuna wawe karumeya aa. 6Vano yahophiyaca asaarawe eeli oohitteeliheraniya wamoca na asaanaya ayo ni yahooroma. 7Ciicammo ahophiya Leya wamoca na asaanawe, ni ahooroma. Wiimaliheroni ahophiya Yusufu ni Rakeli, na ayo yahooromaca.

8Nanlelo Isawu ahokoha eeraka: Unhala wiirihani mihuwo cothene ciphwanyilyaka ni iphiro nnyo? Yakopi ahomwaakhula eeraka: Keera kiphwanye nnema wamiithoni wa muulupale aka. 9Nanso Isawu ahomwiirela: Mwanhimaaka, mi kihaana mihuwo cinci. Cirinaa nnyo uhalaneke. 10Vano Yakopi ahomwaakhula eeraka: Mena, wakhala wiira uhaana nnema ni mi, ukuse itthuvo yuvahilyaka ela, phimaana koonaka ikhove aa, toko wiira koonne ikhove ya Nluku, kontha we uhokaakhelela. 11Kinawulepela ukuse iparakha aka iwaaneliyaa kontha wo nnema, Nluku hokivaha, ni kihaana cinci. Ni ahonkhanyereriha mpaka Isawu waakhelela.

12Isawu aheera: Nrwee neette. Mi kinaahoola. 13Nanso Yakopi aheera: Muulupale aka, kinawoona asaanaka ayo ukenkenyaca ni kihaana ikhontwaa ni imope cotothola naanano kaakuvihacaka, wo nihuku nimoca kinawoova ukikhwaacera cothene. 14Phatari uhooleke muulupale aka, mi kinaawa uttuli nwo keettaka vakani vakani. Kintthariha malonce o'nama ciri uhoolo nnya ni amirawo arinaka ala. Kinaawuphwanya uSeyiri.

15Vano, Isawu aheera: Kinawuhiyera atthu arinaka ala. Ule ahonkoha: Nlattuni? Wanaatosa mi kaphwanyaru nnema ni muulupale aka. 16Phimaana Isawu ahoturuwela iphiro yaweenlyawe ahokoleelaka uSeyiri. 17Nanso Yakopi ahopwahera arwaaka uSukoti. Uphiya wawe ahoteka inupa ni macici o'nama cawe. Phimaana wiihaninyaka nenno nipuro nno uSukoti.

18Paahi Yakopi ahophiya nari nkumi iparasa yo'Sikeni ni ilapo yo'Kanaa, akhumaka uPatan-Aramu, ni ahomaka wakhiviru ni iparasa. 19Ni ahothuma nthala naankhurutunlyawe heema munthalani na asaana a Hamori, athumwane Sikeni ni ncurukhu iminya imoca. 20Vaavale ahoteka ikhilompi ni ahovaha ncina na Nluku, Nluku o'Sirayeli.

Currently Selected:

Mphattuwelo 33: NNI

Highlight

Copy