1 Atesalonika 3
3
1Phimaana, nihooryaka tho uvilela, niholakela uhala veekhehu wAtena, 2ni nihonveleeliha munnihu Timotiyu, nkaviheri a Nluku munhupini mwa Kristu, wiira oolipihereni ni oopisiheni nrima munroromeloni mwinyu mmo, 3wiira hikhale nohala usanka nlattu wo marikariko. Maana nyu nnaacuwela wiira yeeyo phithanleliyehu. 4Maana, ukati waarihu ni nyu, nahoohimeryani wahinaya, wiira ninaahala ucukulihaciya, ni khweli, yeeyo phikhumelenle, ni nyu nnaacuwela. 5Phimaana, wahooryanihilyaka nanlelo wuwehereryani, phirumilyaka waaviya ucuweliya ciryaya nroromelo ninyu nno, koovaka ulawihiya nyu ni mayottehatteha, ni nteko ehu ukhalaka woohi ifayita.
Ihapari coorera ca Timotiyu
6Nanso vano, waturuwilyawe Timotiyu akhumaka iriyari inyu, honiwiihera ihapari coorera co nroromelo ninyu ni nifento ninyu, ni cinkhalenyu nnuupuwelelaka woorera ukati wothene ni mphavelaka ni nyu unoona, toko hi ciicammo wa nyu. 7Ciicammo, asunnaka, unookhalaru ukukureehaciya ni misankiho, nihopepeciya mwa nyu nlattu wo nroromelo ninyu, 8maana nna va niri ratta, nlattu woocuwela wiira nyu nri mwa Apwiya. 9Vano ninhala usukuruni wa Nluku nlattu wa nyu, nlattu wotteeliya urinehu ukhumaka mwa nyu wamiithoni wa Nluku ihu? 10Hi ninaaswali uhiyu n'uthana, wo'kuru cinene, wiira niwooneni na asinene n'ulokihera itafawuti co nroromelo ninyu.
11Paahi, yooyo Nluku ihu uyo ni Athumwanihu, ni Yesu Apwiy'ehu, anihoolele iphiro mpaka warinyu. 12Ni Apwiya awunnuwiheni n'uwuncererani nnifentoni ntthu ni nkhwawe ni wa atthu othene, ni ciicammo hi ni nyu, 13wiira nrima enyu ucuwannye muttakattifuni, wohootheriya itthu, wamiithoni wa Nluku Athumwanihu, wanwaya Apwiy'ehu Yesu, na attakattifu awe othene.
Currently Selected:
1 Atesalonika 3: NNI
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
