Mataio 17

1Wia hiwio 6 idaropoiioumo Iesuro Pitara, Iakobora, wia Ioane nou niamari, neibi nouro naibaha iaubuaibi wia tutu akabu barito naibaha iwaboiiabi, neibi gauwoha. 2Wia nou tiahaito owaeviaro neibi hohowa, nou hoho hiwio aibo naibaha imeivia, nou hipura auwo bohobohoiha naibaha oiti, pida aibo. 3Wia Mosera Eliara neiti neibido aiimowaetaimama; neiti Iesumu wade iaowaudo. 4Ina Pitaro naibaha omowameai, Iesuido naibaha iaowa: Nou meaha imeibi nouowa emidiobi; ina ro nirowa, duo daimo neewa na’u moro ainididaibi, na’u roido, ata Moseido, ata Eliaido. 5Ina nou ta’uwa nou naibaha iao, na’u auwo sovio bubu neibi naibaha iwatimaibi wia na’u wade bubuudo naibaha ipiotai, naibaha iaowa: Nouri mo auwo niro mereri, mo auwo geii nemahebidio nouido. Tarovidioumo nou. 6Ina kitomudio mereo wade nouri naibaha orovidiowabumo, neibi hoho goroito hopuwa naibaha oromooutiwabumo wia neibi tiaha tore imahebidiowabumo. 7Wia Iesu naibaha o’u wia neibi naibaha iatibodoibi naiba iaowa: Tairoiboabi, tatoabi, tore moa. 8Ina neibi idomai naibaha irawodaibumo wia iremeteutiwabumo neibio ata mereha eauribi biahai, Iesu nou himia gauwoha neibimu.

9Ina nou ta’uwa nei akabudo ioruowaumo, Iesu neibido wade modoboito aro naiba iaowa: Nouri rieibio kiauri na’i oubi amidaido rieibio orowaduutibi aue, ta’ui nouowa doo Oubiha‐mere koihiaudo aiwaro‐itorai. 10Wia nou kitomudio mere nouido atodoibumo naibaha iaowabumo; Titi oubi teiri nei riaodumo, Elia opuito ko’uiha umo’uro? 11Wia Iesu omowameai, neibido naiba iaowa: Naiheha Elia opuito aiwau‐ro’ui wia nana auwoha aiwaimeiiwotai. 12Ata mo rieibido niao: Elia tau o’uro wia neiio nou umo biahai; ina nouri nana nei niroi, neiio nouido tau idodiaumo. Nou aibo Oubiha‐merero temeteme nana aiwaiviai nei tuudo. 13Ina kitomudio mere naibaha umo da’itibumo, nouro Ioane Babatiso neibido naibaha owaduo.

14Wia nou ta’uwa oubi gemaido neibio naibaha o’ubumo, dubu na’u Iesuido naibaha o’u, nouido naibaha imohorai, naiba iaowa: 15Pai‐dubu e, mo mereido niainiai tamahebidio ro; nou koiioi mereri, wia nou tiaha temetemeri; nouri godogodo ta’uwa nou kupowa ratowodio, wia godogodo ta’uwa nou obowa rirohugudio. 16Wia ro kitomudio mereido moro nou neido hobo nowou, wia neiio nou mea batowaumo ina nei umo biahai. 17Wia Iesuro nei naibaha imowameai, naiba iaowa: Rio irovidio tato wia tumutumu oubio, mo taiba tutuito riomu ainemidiotuti; taiba tutuito mo riomu mubaha nemidiotuti? Nou tauwoumo moido. 18Wia Iesuro uba urio naibaha emodohiomai, ina uba urio mere aueudo ohuodidiowa, wia hagohagoha mere meaha naibaha oiti. 19Ina kitomudio mere Iesuido piroha naibaha o’umo, naiba iaowaumo: Teiri imoo omubiaumo tato? 20Wia Iesu neido naiba iaowa: Mabu nouri rioo iraramodioumo biahai; naiheha mo rioido ainaro, ina rio kiraromodio na’i airirahoodumo Sinapi mate aibo, nouri akabuido rioo aiwaimo‐aroi, Ro ito taiiariiai noudo, wia nou aiwauro’ui, wia rio idodiai tato na ata, ia biahai. 21Ata nouri na’i nou himiaro ohuodidio raihe, na’u ina dubu wade kirodumeaito arowa wia dou iho tato emidiomowa nouro aiwamubiai.

22Wia nou ta’uwa nei Galilaia hapuowa naibaha emidiotutiumo, Iesu neido naibaha iaowa: Oubiha‐mere haupoha aiwaimo‐ouwoi oubi tuito. 23Wia neiio nou aiwaimoepiai; wia hiwio neewa na’u nou aiwaurooroitorai. Wia nei duriduri auwori.

24Ina nei Kapenaumaito idao’umo, tana‐moto wiha moni kiwamedio oubi Pitaido naiba o’umo wia neiio naiba aroumo: Tana‐moto wiha moni, ro pai‐dubu wiha imaai tatora? 25Nou aiaro: Io. Ina nou ta’uwa nou motowa naibaha odorowa Iesu nouido wade opuito naibaha iaowa: Simona, taiba rararomo ro batibati pai‐oubi; tou oubi aueudo wiha moni e wiha nana neiio airimemeidumo? Nei himia oubi aueudora e douboi oubi aueudora? 26Peter nouido naibaha omowameaiwa: Douboi oubi aueudori. Iesu nouido naibaha iaowa: Ina mere nei wiha biahai. 27Ata nou mea biahai imetio nei gunuuni iwaitoi, nouri taimaiio auwo‐turito wia kimai taimaive wia opuito keruai na’i tavidiairo; ina roro nou maata tabooa, moni na’u roro airoweadai. Nou tamidai wia neido taimaai, moido wia roido.

Currently Selected:

Mataio 17: KXW1941

Highlight

Copy