Ioane 9

1Ina nou ta’uwa nou naibaha o’uwa, na’u dubu nouro naibaha eauri, idomai tato nou himia koroto naibari. 2Wia nou kitomudio mere Iesuido atodoumo naiba iaowaumo: Rabbi e, botiro idodiaiwa uba kidia, dubunu nourora e nou himia mamura abeara ora, mabu nouri nou idomai tato oroto. 3Iesuro naibaha imowameai: Dubu nouri wia nou himia mamura abeara ubauba kidia idodiaiwatoi biahai, na’u nou aio’uro Iehova tiaha kidodiai na’i nei pakeha iwaevia noumu. 4Mo nouro notiodoiro, nou himia kowaatii imoo kidodiaiwaiha idodiaiwamoi hiwio’i nouowa; duo o’uwa ina oubi iwaatimo raihe. 5Nou ta’uwa mo batibatiwa nemidiotuti movia batibati pidari. 6Ina nou naiba aro, nou haugeito hopu amoro wia hopu haugero kobokobo naibaha owai wia idomai tato dubu idomaiwa nouro kobokobo hopuito naibaha owateai. 7Wia nouro nouido naiba aro: Ta’u, taroduuti Silouma boboowa (nouri paina kowaeviari, Kotiodoi). Nouri nou naibaha o’uro wia nou naibaha araiwai idomaito meaha naiba iauriwa. 8Nouri nou himia oubii wia nou idomai tatowa keauri oubii, neiio naibaha iaowaumo: Dubunu noura opuito nou emidio nana hobo aibo noura imatorotuti? 9Amida naiba iaowaumo: Bowia nouri; amida naiba iaowaumo: Oo nou nou aibori; wia nou naiba aro: Mo nouri. 10Nouri nei nouido naibaha atodoumo: Taiba rirawodai ro idomaii? 11Nouro naibaha imowameai neido naiba iaowa: Na’u dubu, nou painari Iesu, hopu kobokobo ododiai wia mo idomaiwa naibaha owateai wia moido naiba iaowa: ta’u Silouma bobooito wia taroduuti; wia mo naibaha no’u naiba noroduutiwa wia doihabuo mo idomaito ainiauri. 12Ina nei nouido naiba iaowaumo: Touowai nou? Nouro neido naiba iaowa: Mo umo biahai.

13Nouri dubu nou opuito idomai tatori neiio Parisea oubido naibaha owoumo. 14Wia nou Sabati hiwio’i ina Iesu hopu kobokobo naibaha owai wia nou idomai nouro naibaha iaerai. 15Ina Parisea oubi nouido ina naibaha atodoumo taiba ivia nou idomaii wia dubui nouro neido naiba iaowa: Mo idomai nouro kobokobo hopuito naibaha nowateai ina moro ainoroduuti wia moro ainiauri. 16Nouri Parisea oubi amidao naibaha iaowaumo: Nouri dubu nou Iehova mabudo ko’u biahai mabu nouri nou Sabati hiwio meaha eauri biahai; wia amidao naibaha iaowaumo: Teiri ubauba kidia dubu, tiaha kidodiai na’i nou aibo idodiaira? Wia nei himia himia aiorotatewaumo. 17Nouri idomai tato dubuido neiio ina naibaha iaowaumo: Teiri aro ro nouido, nouri nouro ro idomai naibaha iaerai? Nou naiba iaowa: Nou peroveta duburi. 18Wia Iudaia oubio araromodioumo biahai nou idomai tatori, ina idomai meaha irawodai. Opuito idomai meaha kirawodai dubu nou abeara mamura nei naibaha imorouwaumo. 19Wia neiio neiti naibaha iama’uotiumo naiba iaowaumo: Nou rieiti merera? Rieitio naibaha iaotutiudo nou idomai tato aroto? Teiri nou doihabuo meaha rirawo. 20Nou mamura abeara neitio naibaha imowameaudo naiba iaowaudo: Imeiti umori imeiti mere nouri wia nou idomai tato noroto; 21ata tou aibo reauridai imeiti umo biahai wia nou idomai boti duburo iaerai imeiti umo biahai; nou duburi, tatodoimo nou, nou himiaro airarodai. 22Nouri wade nou abeara mamurao naibaha iaowaudo nouri neiti Iudaia oubi tore iatiwaudo, mabu nouri Iudaia oubio, na’u imini ramu, naibaha iaowaumo; ina dubu amidao Iesu obodoiwa nou Kerisori, neiio nou sunagoudo aiwaimo‐iahoiuti. 23Nouri nou mamura abeara naibaha iaowaudo: Nou duburi, tatodoimo nou himia. 24Ina nouri opuito idomai tato dubui neiio naibaha otuaumo wia nouido naiba iaowaumo: Ro Iehovaido tamabiti, imo umori nouri dubu nou uba mereri. 25Nou neido naibaha imowameaiwa naiba iaowa: Ina nou uba merewa mo umo biahai, na’u na mo umori, opuito mo idomai tatori, doihabuo moro ainiauri. 26Nouri nei nouido ina naibaha iaowaumo: Teiri ododiai nou roido, teiri emaerai ro idomai? 27Nou neido naibaha imowameaiwa: Moro opuito tau naro rioido wia rioo orovidioumo biahai; tounai rio niro ina orovidiomoi; rio nou himia kitomudio merei nei nirora? 28Wia neiio nouido emaowaumo naiba iaowaumo: Rovia nou kitomudio mereri, imovia Mose kitomudio oubiri. 29Imo umori Iehova Moseido tau aro wia dubu nouri nou tou batiudo o’uro imo umo biahai. 30Dubu neido naibaha imowameai naiba iaowa: Taaurimo nouri kemaea na’i, nou tou batiudo o’uro rio umo biahai ina mo idomai nouro tau iaerai. 31Imo umori Iehovaro ubauba oubido irovidio biahai wia dubu nou Iehovaido oroboriatutiwa ina nouri nana nou niro nouro naibaha idodiaiwatuti, Iehovaro nou korovidiori. 32Batibati auwoha kowahoro ta’ui noudo oubio orovidioumo biahai dubu ata nou idomai tato dubu koroto hiwio nouowa, nouro nou idomai iaerai. 33Ina dubu nouri nou Iehovaudo o’u biahai nouro na ata ododiai raihe. 34Neiio nouido naibaha omowameaiwaumo naiba iaowaumo: Ro ubauba kidia ramu oroto wia ro imoido imatomudio’ira? Wia sunagoudo neiio nou naibaha aho’iutiumo.

35Iesuro naibaha orowai neiio nou kaho’iutii, ina nou nouro idawea, nou nouido naiba iaowa: Iehova mere nouido rora arararomodio? 36Nou naibaha omowameai naiba iaowa: Nou botiri ina mo nouido araromodioi? 37Iesu nouido naiba iaowa: Roro nou tau eauri wia nouvia romu wade riaodudo doihabuo. 38Wia nou naiba iaowa: Pai‐dubu e, mainararomodio; wia nou nouido naibaha oroboria. 39Wia Iesu naiba iaowa: Mo tau no’uro nouri batibatito kemeiwotatuti nana’i idodiaiwai. Ina nouri oubio nei eaurimo biahai neiio aiwaimoiauri wia oubio nei eaurimo nei idomai tato waimo‐oiti. 40Wia noumu kemidio Parisea oubi amida’i nouri kiao wade neiio naibaha irovidiowaumo wia neiio nouido naiba iaowaumo: Imo naiba idomai tatori? 41Iesu neido naiba iaowa: Ina rio idomai tatori rio ubauba kidia iworohoumo biahai ina doihabuo rioo airarodumo, Imo ainiauridumo, rio ubauba kidia nei airiadumo.

Currently Selected:

Ioane 9: KXW1941

Highlight

Copy