Matta 19
19
I'sayke xhunaşşe qaxiyles yeexheyeva qiyghan
1I'sa yuşan hı'ı ç'əvxhamee, Galileyeençe qığeç'u İordan damayne şargılyne Yahudeyeeqa ayk'an. 2Mang'uqab qihna geeb insanar qavayle. I'see manbı maa'ab yug qaa'anbı.
3I'saysqa fariseyar#19:3 fariseyar: Manbı I'sayne gahılin dindarar vuxha. qeepxha Mana siliys ı'xəsva qiyghanan:
– Nişil-alla qariy adamiys cuna xhunaşşe qaxiyles yeexheye?
4I'see manbışis inəxdun alidghıniy qele:
– Nya'a, şu qətqı' dişde, İpxhıning'vee ts'eppiykecab «adamiyiy zəiyfa ipxhın»#19:4 İnəxüd Mısa peyğambarne ts'ettiyne kitabee otk'un (Ts'ett. 1:27).. 5«Mançil-alla insanee dekkiy yed g'alyabaççe, xhunaşşeyka eyxhe. Adamiyiy xhunaşşe sa vuxhesva»#19:5 İnəxüd Mısa peyğambarne ts'ettiyne kitabee otk'un (Ts'ett. 2:24).. 6Həşde manbı q'öyre deş, sa vooxhe. Mançil-allad hasre Allahee at'iq'an hı'iyn insanaaşe curma'acen.
7Fariseyaaşe I'sayk'le eyhen:
– Nya'a manke Mısee insanaaşik'le uvhu: «Xhunaşşeyne xılyaqa qaxiyvunava kağız huvu, qaxiyles yeexhe»?
8I'see manbışik'le eyhen:
– Vuşun yik'bı g'ayebı xhinneva Mısee şosqa xhunaşşer qaxuvles hapsır. Ts'etta məxüd deşdiy vod. 9Zımee şok'le eyhen, şavaayiy zinayle ğayrı menne karal-alla cuna xhunaşşe qaxiyvu, merna xhunaşşe hey'ı, mana zina hı'ına xhinnecar eyxhe.
10Telebabışe I'sayk'le eyhen:
– Adamiynemee xhunaşşe hiveeciy manimee dağamın karxhee, xhunaşşe hidey'iycad mançile yugda eyxhe.
11I'see manbışik'le eyhen:
– Zı man uvhuyn gırgıng'usse ha'as əxəs deş. Şavusiy man Allahee huvu, mang'usse ha'as əxəs. 12Məxbınbı vobınbı, yedike vuxhayng'acab xadimba vuxha, məxbınbıb vobınbı, insanaaşe məxüb qav'u, sassanbışed Xəybışeene Paççahiyvalinemee xhunaşşe hee'ecar deş. Hasre şavusseyiy əxə, mang'veeyid he'ecen.
I'see uşaxaaşis xayir-düə hoole
13Mane gahıl insanaaşe I'saysqa uşaxar abayle, Mang'vee manbışilqa xıl gixhxhı düə hee'ecenva. Telebabışe manbışik'le cuvabbı eyhe ıxha. 14I'seemee manbışik'le eyhen:
– Uşaxar Zasqa qeepxhes havaasre! Manbışda yəq uvqımaaqqa! Xəybışeena Paççahiyvalla məxbınbışda vob.
15I'see manbışilqa xıl gixhxhı, düə hav'u, mançe ayk'anna.
I'sayiy karnana insan
16Sa insan I'saysqa arı qiyghanan:
– Mə'əllim, zı nəxbına yugvalane haa'as vukkan, zaqa exır ixhecenva?
17I'see mang'uk'le eyhen:
– Nya'a ğu Zake yugvaline hək'ee qidghın ha'a? Yugna Sa Allah vorna. Vas məxbına ı'mı'r vukkanxhee, Mang'une əmrbışil k'ırı alixhxhı, Mang'vee eyhen he'e.
18Mane insanee I'sayke «Nene əmrbışilyneva?» qidghın ha'a.
I'see mang'uk'le eyhen:
– Gimek'a, zina hıma'a, sixbı hıma'a, hıdi'ıyn karaı'dəən kar insanne gardanaqa gimiyxhe, 19dekkısiy yedis hı'rmat gyuvxhe, yiğne k'anena ıkkiykne, nəxüriy vas ğu ıkkan.
20«Zı man gırgın ha'anva, medın zas hucooyiy g'idiyxharva?» mane mek'vne insanee I'sayke qiyghan.
21I'see eyhen:
– Vas yiğın gırgın işbı yugunbı ıxha ıkkanxhee, hark'ın yiğın gırgın kar massa hele. Qiyğad çike ıxhayn pıl kar deşinbışis bit'al he'e. Manke vaqa xəybışee xaziyna vuxhes. Mançile qiyğa Zasqa sak'le, Zaqar qihna qora.
22Mane mek'vne insanıqa geed kar ıxhal-alla, I'see uvhuyn g'ayxhımee, mang'vee aq'va qı'ı mançe ayk'anna.
23Mançile qiyğa I'see telebabışik'le eyhen:
– Zı şok'le hək'edacad eyhe, karnane insanın Xəybışeene Paççahiyvaleeqa ikk'eç'uy dağamda vod. 24Zı meed şok'le eyhen, devayn veebayne q'əç'eençe ılğevç'uy, karnane insanın Allahne Paççahiyvaleeqa ikk'eç'uyle rəhətda ixhes.
25Man I'see eyhen g'ayxhı, telebabı mançile mattebaxhenbıcab. Manbışe qiyghanan:
– Şavussene manke g'attixhanas əxəs?
26I'sa manbışiqa ilyakkı eyhen:
– Man insanısse ha'as əxəs deş, Allahıssemee ha'as dəxən kar deşin.
27Pyoturee I'sayk'le eyhen:
– Haane, şi gırgın g'aletçu Vaqab qihna q'öö, mançil-alla şas hucoone ixhes?
28I'see manbışis inəxdun alidghıniy qele:
– Zı şok'le hək'edacad eyhe, dyunye ts'ed qıxhamee, İnsanna Dix#19:28 İnsanna Dix: I'see geedne nəqqee Cuk'le İnsanna Dixva uvhu. Məxür Daniyal peyğambaree qalesde Paççah Masihık'le eyhe. Mana Paççah gırgıne milletbışda xərna ixhes. Cune nurune taxtıl gyu'urmee, şu, Zaqab qihna qabıynbı İzrailyna yıts'ıq'öble (12) nasıl vuk'lek vukkeesva yits'ıq'öne taxtıl gyuv'aras. 29Şavaayiy Yizdemee xaybı, çocar, yiçubı, dek, yed, uşaxar, con cigabı g'ali'ı məxrıng'us vəş nəəqees mançile geed heles, gırgıne gahbışisda ı'mı'rıb mang'una vuxhes.
T'ımıllığne işçeeşine hək'eena misaala
30Tseppiynbışin gellesınbı, nekke qiyğiynbı vuxhes, nekke qiyğiynbıb tseppiynbı vuxhes.
Currently Selected:
Matta 19: YIQSUM
Highlight
Share
Copy
Want to have your highlights saved across all your devices? Sign up or sign in
