Ts'etta 13
13
Lutıy İbram cureepxhaynbı
1İbram xhunaşşeyka, cuka vonne karaka sacigee Misirğançe qığeç'u, Negev eyhene sahreeqa ayk'an. Lutur mang'uka ıxha. 2İbramıqa manke geed çavra-vəq'ə, nuk'rayiy k'ınəəğə ıxha. 3Negevğançe qığeç'u, İbram k'ırra-k'ırra vucee şenke çadır güvxüyne cigeeqamee qaraylena. Man ciga Bet-El eyhene şaharneyiy Ğay eyhene şaharne yı'q'nee ıxha. 4Mana, şenke vucee q'urbanbı allya'asva ali'iyne cigaysqa hirxhıl, maa'ad Rəbbis ı'bəədat ha'a.
5İbramıka sacigeene Lutuqad çavra-vəq'əbı, çadırbı vodunbıniy. 6Sacigee aaxvasdemee, manbışiqa çavra-vəq'ə havacesın cigabı k'ıldabı ıxha, mançil-allab manbışisse sacigee aaxvas vəəxəs deşdiy. 7Manbışile ğayrı mane gahıl maa'ab Kana'anbıyiy Perizbıb aaxva vuxha. İbramın syuru uxhiyxhana'anbışdeyiy Lutun syuru uxhiyxhana'anbışde yı'q'nee aldapxhıniy gexha.
8İbramee Lutuk'le eyhen:
– Hasre yizdeyiy yiğne, yişin çavra-vəq'əbı uxhiyxhan ha'anbışde yı'q'nee aldatxhuniy gimexhacen, şi sa ebanbı vob. 9Gırgın cigabı yiğne ulene ögiyl dişeene? Qora cureepxhes. Ğu solulqa ark'ınee, zı sağılqa əlyhəəs. De'eş, ğu sağılqa ark'ınee, zı solulqa əlyhəəs.
10Lutee vuk'ul ooqa qav'umee, İordanne damayne mıglekın q'adaal g'acu. Mane gahıl mane cigabışis Misireene cigabışis xhinnee, bıkırda Tsoaral eyhene cigeeqamee xhyan heles eyxhenniy. Man ciga Rəbbin bağ xhinnee ıxha. Rəbbee manke Sodomıkıniy Homoraykın hı'ı deşdiy. 11Lutee, cus İordanne damayne mıglekın q'adaal g'əyxə. Mana şargıne suralqa ayk'an. Məxüb sana-sang'uke cureebaxhenbı. 12İbram Kana'an axva, Lutme mane q'adaalilyne şaharbışee axva giyğal. Sodomılqamee cun çadırbı giyxənbı. 13Sodomee vooxhen insanar geeb yəqqı'le qığeepç'iynbı vuxha, manbışe Rəbbine ögiyl xəbna bınah haa'a vuxha.
İbram Xevron axva giyğal
14Lut İbramıke curxhayle qiyğa, Rəbbee İbramık'le eyhen:
– Vuk'ul ooqa qav'u, ulyorzulyne cigeençe şimalılqa, canubılqa, şargılqa, garbılqa ilekke. 15Vak'le g'ecen cigabı gırgıne gahbışis vasiy vake g'abıynbışis heles. 16Vake g'abıynbı ç'iyeylin tooz xhinnee geeb qaa'as. Savussemecad ç'iyeylin tooz qətqəs əxeene, vake g'abıynbıb qəpqəs vəəxəsınbı. 17Oza, ine cigabışee q'omançe k'anyaqqamee ı'ğı'ykre, in cigabı Zı vas hele.
18İbramee cuna çadır alyapt'ı, Xevron eyhene şaharısqa qarayle. Mang'vee maa'ab Mamreyne mı'qəəşine k'ane çadır güvxü, Rəbbis q'urbanbı allya'an ciga alya'a.
Currently Selected:
Ts'etta 13: YIQSUM
Highlight
Share
Copy
Want to have your highlights saved across all your devices? Sign up or sign in
