Lûqa 16
16
Mesela Kehyadê Bêemelî
1Bahdo Îsa ageyra telebandê xo ew înan rê na mesel va: “Jew merdimo zengîn beno ew jewna kehyayê ney beno. Merdimo zengîn aşnaweno ki kehyayê ci hend merdimo rind nîyo, milkê begdê xo salme keno vila. 2Wexta begê ci veyndano ey ew vano: ‘Girweyê ki to kerdê, hemin ra xebera mi esta, hesabê kehyayeyda xo bidi û şo, çiki ti hinî nêşenê mi rê kehyayîn bikerê!’
3“No kehya xo bixo rê vano: ‘Ez do nika se kera, begê min o mi kar ra vejeno. Hinda ez nêşena erdî bikena ew ez şermayena ki parse zî bikera. 4Ez zana newe se kera, gerek ez xo rê embazî bivîna ki qenê wexto ki ez tîya ra qewirneyaya, ê mi gênê xo hetek.’
5“No fikra o heme deyndarê begdê xo veyndano xo hetek. O sifteyêndê ci ra pers keno: ‘Ti begdê mi rê çend deyndar ê?’
6“O zî vano: ‘Se sîtil ruwenê zeytûnan.’
“Kehya vano: ‘Ha to rê, roş ew seneda deynî pancas yazi ki!’
7“Bahdo o jewnay rê vano: ‘Ma ê to, çend deynê to esto?’
“O vano: ‘Se çuwal xele.’
“Kehya ey rê zî vano: ‘Seneda xo bigî ew heştay yazi ki!’
8“Ew begê ci ey winî aşnaweno, o wesbê ey dano, çiki ey aqila hereket kerdo.
“Xora merdimê nê dinyay, nesildê xo mîyan di, ê merdimê ki raştî yê, înan ra deha aqilî yê.#16:8 Yazî: Xora qeçekê nê dinyay nesildê xo mîyan di, ê qeçkandê roşnî ra deha aqilî yê. 9Ew ez şima rê vaja, xo rê pey maldê nê dinyaya embazî qezenc kerê ki çimhal soyinê na zengîney ame se, şima do keyeyê ki hetan û hetan bimanê, înan mîyan qebul bê.”
Qalê Merdimdê Raştî
(Matta 6:24)
10Îsay va: “Jew merdimo ki girwedo werdîkek di dirist o, o merdim girwedo gird di zî dirist beno. Hima eki jewê girwedo werdî di bêemel o, girwedo gird di zî bêemel o. 11Eki şima xezînedê nê dinyayê zûray rê diristî nîyê, kam xezîneyê raştay amanetê şima keno? 12Ew eki şima amanetdê jewnay rê diristî nîyê, wexta kam teba dano şima ki şima ey rê wihêrey bikerê?
13“Qe jew xizimkar nêşeno ki goştareya di wihêran bikero. Wexta ey rê jewdê ci do rind bo ew jewdê ci do ar bo, yazî o do zerrî ra ê jewerî bihesibno ew ê bînî zî pey goş kero. Şima nêşenê ki kiştê ra Ellay rê ew kiştê ra zî perran rê quley bikerê.”
14Senî Ferîsîyan nê qisey heme aşnawitî, Îsay huway, çiki çimê înan perran ra mirdî nêbîyê. 15Ew Îsay zî înan rê wuna va: “Şima yê xo merdiman ver di kenê rindî, hima Ella zano zerrîya şima senîn a. Çîyo ki çimdê însanî di qedr o, çimdê Ellay di ar o.”
Qanûnê Mûsay ew Wexto Newe
(Matta 11:12-13; Matta 5:18)
16“Hetanî wextdê Yehyay, Qanûnî ew qiseyê pêxemberan tenya bî. Yehyaya tepya, mijdîyana Hukumdareyda Ellaya xeber deyena ew heme yê qeyret kenê ki xo rê Hukumdareyda Ellay di ca bigîrê. 17Winî bizanê ki erd û azmînîya do deha rehat vinî bê, hima Qanûndê Ellay ra jû miskalê#16:17 Yazî: jû noxta do zî vinî nêbo. 18Yanê, jewo ki cenîyerda xo ra abiryayo ew jûnaya jewjîyayo, o yo zîna keno. Ew cenîya ki merdedê xo ra abiryaya, kamo ki a cenîyer ra bijewjîyo, o yo zî zîna keno.”
Mesela Merdimdê Zengînî ew Lazardê Feqîrî
19“Wextê di jew mêrdeko zengîn beno, no îpegdo sûra#16:19 Îpegi rê verî vatê birîsîm. çina dano xo ra ew bolixey mîyan di hirg roj kêfê xo keno. 20Kêberdê ey ver di zî jew feqîr beno, nameyê ey Lazar beno. Ganê Lazarî pêro helak beno ew hirg roj uja di roneyeno. 21O uja paweno ki çîyekê sifredê zengînî ra bikewo, ew o zî xo rê bûro. Kiştê ra zî kutikî yenê ew dirbetanê ci lêsenê.
22“Rojê no feqîr mireno ew melekî ey gênê benê saqandê Îbrahîmî sero ronanê. Hima no zengîn zî rojê mireno ew ey kenê mezel. 23Wexto ki o axret vîneno, ezabî mîyan di beno, çimê xo hewadano û dûrî ra Îbrahîmî ew ey saqa sero Lazarî vîneno. 24Wexta venga veyndano: ‘Pîyo Îbrahîm, mi rê rehim bik! Ezo nê adirî mîyan di ezab ancena. Lazarî biriş ki, wa gişta xo aw ro ceno ew tenekê ziwanê mi honik kero.’
25“Hima Îbrahîm ey rê wuna vano: ‘Lajê mi, finê bîya xo vîrî, heta soyindê emirdê xo to paya hewlîn girot, naqor Lazarî paya xirabîn girot. Nika zî o do tîya kêf bikero ew ti do ezab bancê. 26Xora aredê ma û şima di, kendalêndo bol gird esto. Eki jewê buwazo zî, ne tîya ra kes şeno bîro over, ne zî uja ra kes şeno bîro nover.’
27“Wexta merdimo zengîn vano: ‘Pîyê mi, winî yo se, to ra reca kena qenê Lazarî biriş keyeyê pêrdê mi. 28Çiki hewna panj birayê mi estê, wa înan ci aqilno ki ê zî nê cadê ezabî nîrê!’
29“Îbrahîm vano: ‘Birarandê to di Qanûnê Mûsay ew qiseyê pêxemberan estê, wa goştareya înan bikerê.’
30“O fina vano: ‘Pîyê mi, ê goştarey nêkenê! Hima eki merdan mîyan ra jew şiro, wexta ê tewbe kenê.’
31“Îbrahîm vano: ‘Eki ê yê goştareya Mûsay û pêxemberan nêkenê se, ê merdan mîyan ra jewê werzo zî, ê do emel nêkerê.’ ”
Currently Selected:
Lûqa 16: diq
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
