Markus 9

1Yesus bilang lei pa dorang, “Kita mo bilang pa ngoni, dari antara pa ngoni tu ada di sini, ada yang blum mo mati seblum lia Tuhan Allah Berkuasa sbagai Raja deng kuasa yang basar.”

Yesus bacahaya luar biasa di atas gunung

(Mat. 17:1-13; Luk. 9:28-36)

2Serta so lewat anam hari, Yesus bawa pa Petrus, Yakobus deng Yohanes sama-sama deng Dia nae ka satu gunung tinggi, di situ cuma ada dorang. Waktu itu dorang tiga lia Yesus so bruba jadi laeng. 3Yesus pe baju jadi puti mangkilat. Di dunia ini nyanda ada orang yang bole mo cuci baju sampe jadi puti sama deng itu. 4Kong kage dorang dapa lia tu nabi Elia deng nabi Musa, dorang dua da bacirita deng Yesus. 5Trus Petrus babilang pa Yesus, “Guru, pe snang skali torang ada di sini. Lebe bae torang kase badiri akang tiga sabua: satu for Guru, satu for Musa, deng satu for Elia.” 6Petrus da bilang bagitu lantaran dia so nintau apa tu dia mo bilang, soalnya dia deng de pe dua tamang so tako skali.

7 # Mat. 3:17; Mrk. 1:11; Luk. 3:22; 2Ptr. 1:17-18 Abis itu, turung awan kong tutu pa dorang. Trus dari dalam awan itu dapa dengar suara bagini, “Ini tu Kita pe Anak, Kita sayang pa Dia. Badengar jo pa Dia!”

8Kage-kage waktu dorang lia kasana-kamari, dorang so nyanda lia orang laeng di situ, kurang Yesus tu ada di situ sama-sama deng dorang tiga.

9Kong waktu dorang samantara turung dari tu gunung, Yesus bapesan pa dorang tiga supaya dorang jang dulu kase cirita pa sapa-sapa apa tu dong da lia, nanti kalu tu Anak Manusia so mati kong hidop ulang baru dorang bole kase cirita itu. 10Jadi dorang nyanda kase cirita pa sapa-sapa, mar dorang masi da baku tanya lei apa tu de pe maksut mati kong hidop ulang.

11 # Mal. 4:5; Mat. 11:14 Kong dorang batanya pa Dia, “Kiapa tu ahli-ahli Taurat da bilang kalu nabi Elia musti datang lebe dulu dari tu Anak Manusia?”

12Yesus manyao, “Memang nabi Elia musti datang lebe dulu kong kase siap samua for Anak Manusia mo datang. Mar bagimana deng tu Anak Manusia? Kiapa nabi-nabi dulu da tulis di Kitab Suci kalu Dia musti banya mendrita deng orang mo sosere pa Dia? 13Mar Kita bilang pa ngoni, tu Elia yang torang orang Israel da tunggu-tunggu, dia itu so datang kong orang-orang so beking susa pa dia iko dorang pe mau sandiri, sama deng tu da tulis dari dulu tentang dia.”

Yesus user tu setang pa satu anak

(Mat. 17:14-21; Luk. 9:37-43)

14Waktu Yesus deng De pe tiga murit babale ulang pa tu murit-murit laeng, dorang lia pe banya orang da bakumpul pa tu murit-murit itu. Kong di situ ada ahli-ahli Taurat yang da baku ambe deng tu murit laeng itu. 15Waktu tu orang banya dapa lia pa Yesus, dorang takage kong capat-capat pi jemput pa Dia.

16Kong Yesus batanya pa dorang, “Apa so tu ngoni da baku ambe akang deng tu ahli-ahli Taurat?”

17Satu dari tu orang banya itu manyao, “Guru, kita da bawa ta pe anak laki-laki ini supaya Guru bole mo kase bae akang pa dia. Dia da kemasukan setang yang beking dia jadi wowo. 18Saban kali tu setang itu srang pa dia, tu setang banting pa dia ka tana kong de pe mulu kaluar gabu, de pe gigi tabaku goso sampe babunyi, deng de pe badan jadi kejang. Kita so minta pa Guru pe murit-murit supaya dorang user akang tu setang dari pa kita pe anak, mar dorang nyanda mampu.”

19Kong Yesus bilang pa dorang, “Hei ngoni orang-orang yang nyanda percaya. Mo sampe tempo apa Kita musti tinggal di tenga-tenga pa ngoni? Kong mo sampe tempo apa Kita musti mo basabar pa ngoni? Bawa jo kamari tu anak itu!”

20Kong dorang bawa tu anak itu pa Yesus. Bagitu tu setang lia pa Yesus, tu setang iko kase goyang-goyang tu anak itu sampe taplanteng ka tana, taguling-guling kong de pe mulu kaluar gabu.

21Kong Yesus batanya pa tu anak pe papa, “So brapa lama dia bagini?”

Tu anak itu pe papa manyao, “So dari kacili kasiang. 22Kong amper slalu tu setang ja tarek pa dia ka api ato ka aer for beking mati pa dia. Mar kalu Guru bole beking sesuatu, tolong deng kasiang akang dang pa torang.”

23Yesus manyao, “Kiapa dang ngana bilang kalu Kita bole? Samua bole jadi for orang yang percaya!”

24Kong tu anak pe papa iko babilang deng suara kuat, “Kita percaya, mar tolong akang dang pa kita supaya lebe percaya.”

25Waktu Yesus lia so mulai banya orang datang bakumpul di situ, Dia togor deng kras tu setang itu. Dia bilang, “Hei setang tu da beking orang jadi wowo deng pongo. Kita prenta ngana, kaluar dari tu anak ini kong jang maso ulang pa dia!”

26Trus tu setang bataria deng goyang-goyang tu anak itu deng kuat skali kong dia kaluar. Tu anak itu dapa lia sama deng orang mati, sampe banya orang babilang, “Dia so mati!” 27Mar Yesus pegang tu anak pe tangan, Yesus kase bangong pa dia, kong tu anak badiri.

28Abis itu, Yesus deng De pe murit-murit maso ka satu ruma, kong waktu dorang sandiri di situ, Yesus pe murit-murit batanya pa Dia, “Guru, kiapa dang torang nyanda dapa user tu setang itu?”

29Yesus manyao pa dorang, “Tu setang model bagitu nyanda mo kaluar kacuali deng basombayang.”

Yesus kase tau kadua kali tu Dia pe kematian

(Mat. 17:22-23; Luk. 9:43-45)

30Yesus deng De pe murit-murit kaluar dari tampa itu kong se trus dong pe perjalanan lewat daera Galilea, 31lantaran Dia samantara da mangajar pa De pe murit-murit. Dia babilang pa dorang, “Nanti ada orang yang mo srahkan tu Anak Manusia pa orang-orang yang berkuasa, kong dorang mo bunung pa Dia. Mar katiga hari abis dorang bunung pa Dia, Dia mo hidop ulang.” 32Mar Yesus pe murit-murit nyanda mangarti apa tu Dia da bilang, deng dorang lei rasa bagitu mo batanya pa Dia.

Yesus kase tau sapa sebenarnya tu paling basar

(Mat. 18:1-5; Luk. 9:46-48)

33Abis itu Yesus deng De pe murit-murit sampe di Kapernaum. Waktu dorang sampe di ruma, Yesus batanya pa dorang, “Tadi waktu di tenga jalang, apa so tu ngoni da cirita?” 34#Luk. 22:24Mar dorang samua cuma badiam, lantaran tadi waktu di tenga jalang, dorang da baku ambe pendapat sapa tu paling basar di antara pa dorang.

35 # Mat. 20:26-27, 23:11; Mrk. 10:43-44; Luk. 22:26 Yesus dudu kong pangge tu De pe dua blas murit. Dia bilang pa dorang, “Kalu sapa suka mo jadi orang basar, de pe hidop musti sama deng orang biasa, kong dia musti jadi orang yang ja layani pa samua orang.”

36Abis itu, Yesus ambe satu anak kacili kong kase badiri di tenga-tenga pa dorang. Dia polo tu anak itu kong bilang pa dorang, 37#Mat. 10:40; Luk. 10:16; Yoh. 13:20“Sapa jo yang trima satu anak kacili sama deng ini lantaran dia percaya pa Kita, itu sama deng tu orang itu so trima pa Kita. Kong sapa jo yang trima pa Kita, bukang cuma Kita yang dia trima, mar dia so trima pa Tuhan Allah yang da utus pa Kita.”

Sapa tu nyanda malawang pa torang, dia torang pe tamang

(Luk. 9:49-50)

38Abis itu Yohanes bilang pa Yesus, “Guru, torang lia ada satu orang yang da user setang pake Guru pe nama. Trus torang da larang pa dia supaya jang pake Guru pe nama, lantaran dia itu bukang torang pe tamang.”

39Mar Yesus bilang pa dorang, “Ngoni jang larang pa dia! Sapa jo yang so beking mujisat pake Kita pe nama, nyanda mungkin dia itu lei mo beking besae Kita pe nama. 40#Mat. 12:30; Luk. 11:23Sapa jo yang nyanda malawang pa torang, dia itu torang pe orang. 41#Mat. 10:42Kita bilang pa ngoni, sapa jo yang kase minum biar lei satu glas aer pa ngoni lantaran ngoni ini orang yang ja iko pa Kristus, dia pasti mo dapa de pe upah dari Tuhan.”

Bahaya skali beking orang berdosa

(Mat. 18:6-9; Luk. 17:1-2)

42Yesus bilang lei, “Sapa jo yang beking satu dari anak-anak kacili rupa ini beking dosa kong jadi sesat, lebe bae tu orang itu pe leher kase ika akang deng batu basar kong pi kase lego ka laut.

43 # Mat. 5:30 Kalu satu dari ngana pe tangan beking ngana berdosa sampe ngana jadi sesat, potong jo tu tangan! Lebe bae ngana maso sorga cuma deng satu tangan, daripada ada dua tangan mar ngana maso neraka. Tu tampa itu de pe api nyanda mo mati. [44Di situ tu gai-gai nyanda mati, deng tu api lei nyanda mo mati.] 45Kalu satu dari ngana pe kaki beking ngana berdosa sampe ngana jadi sesat, potong jo tu kaki! Lebe bae ngana maso sorga cuma deng satu kaki, daripada ada dua kaki mar ngana dapa lempar ka neraka. [46Di situ tu gai-gai nyanda mati, deng tu api lei nyanda mo mati.] 47#Mat. 5:29Kalu satu dari ngana pe mata beking ngana berdosa sampe ngana jadi sesat, cungkel jo tu mata! Lebe bae ngana jadi Tuhan Allah pe orang cuma deng satu mata, daripada ngana ada dua mata mar ngana dapa lempar ka neraka. 48#Yes. 66:24Di tampa itu, gai-gai nyanda mo mati, deng tu api lei nyanda mo mati.

49Samua orang Tuhan Allah mo uji tu dorang ja beking, sama deng mas ja bakar deng api for beking murni.

50 # Mat. 5:13; Luk. 14:34-35 Garam memang bagus for makanan, mar kalu tu garam so jadi tawar, so nyanda mungkin lei mo beking bagaram ulang. Ngoni lei musti jadi orang bae, sama deng garam yang ja beking sadap makanan, ngoni slalu ja baku-baku bae deng orang laeng.”

Currently Selected:

Markus 9: MDO

Highlight

Copy