Lukas Kata Pengantar
Kata Pengantar
Ni kitab ini Lukas yang da tulis. Lukas itu dokter, kong dia bukang orang Yahudi. Dia itu Paulus pe tamang for se tau tu Kabar Bae tentang Yesus (Kol. 4:14). Lukas ini bagabung deng dorang Paulus pa dong pe perjalanan playanan yang kadua, dari kota Troas (Kis. 16:9-10). Lukas so priksa bae-bae tu cirita tentang Yesus Kristus dari pa tu orang-orang yang da lia samua tu Yesus da beking deng dong pe mata kapala sandiri, kong Lukas tulis tentang itu iko de pe urutan (Luk. 1:1-3). Lukas tulis Kabar Bae ini pa samua orang, lebe khusus pa orang-orang Yunani (ato orang-orang yang bukang Yahudi). Lukas tulis ni kitab supaya jelas kalu Yesus itu Kristus tu Raja yang Tuhan Allah da janji mo datang for se slamat pa manusia dari tu hukuman dosa. Itu sama deng da tulis di Lukas 19:10, di situ da bilang kalu Yesus pe tujuan datang ka dunia for cari tu orang-orang yang ilang kong se slamat pa dorang.
Di kitab Lukas, Lukas mulai se cirita tentang Yesus pe mama tu Maria sampe Maria da se lahir pa Yesus. Dia se cirita waktu Yesus kacili deng lei tentang Yohanes Pembaptis waktu dia baptis pa Yesus. Lukas se cirita tentang 20 mujisat yang Yesus da beking deng lei 23 prumpamaan. Dia se cirita apa yang da jadi di Yerusalem sampe waktu Yesus dapa tangka, dapa adili deng mati di kayu salib, trus hidop ulang deng nae ka sorga. Kitab Lukas ini ja bilang ‘Injil’ ato ‘Kabar Bae’ lantaran sapa jo yang percaya pa Yesus Kristus sbagai Juruslamat, tu dia pe dosa-dosa dapa ampung kong bole dapa tu hidop kekal.
Currently Selected:
Lukas Kata Pengantar: MDO
Highlight
Share
Copy
Want to have your highlights saved across all your devices? Sign up or sign in
Perjanjian Baru Bahasa Manado @ Lembaga Alkitab Indonesia 2017