Yohanes 5

Si tou saki liné'os ni Yesus witi kolam Bethesda

1Kumawusa niitu, si Yesus mangé witi Yerusalem, pahpaan in toro niitu én endo wangko' né tou Yahudi. 2Im witi Yerusalem rété um pepenet tua'na pahkuan “Pepenet Domba” ém wéwéhan ung kolam um witu u nunuwu'en Ibrani pahkuan Bethesda. Im witu ém wéwéhan u lima loloangan. 3Im wana a loloangan itii lakez sé tou saki kimolo': sé letok, sé kénto' wo sé lailai. [Ni séra ma'ento' un zano witu ung kolam itii i mogémé. 4Pahpaan wéwéhan un orasna si malaekat ni Mahpiara tumumpama witu ung kolam itii wo mogé un zano witu. Apa uman u saki ni tou si puuna mapatahu'ma witu un zano ung karegas i mahogé é malé'os.]

5Im witu ém wéwéhan si tuama saki teluna pulu' wo waluna ta'uno ung kauréna. 6I si Yesus nimilekla si tou itii kimolo' witu wo pahpaan kata'uan-Namo i si tou itii én urémo i saki, a Sia kumuala wia si tou itii, “Paaz malé'os ko?”

7Kuan ni saki itii wia ni Sia, “Tuang, zéi'kan siapa si tou paaz sumawang in tumumpama ni aku i mahogémomé un zano witu ung kolam itii. Wo karegas ni aku mahrétéma ung kolam itii, pinuunaanoma né tou walina in timahu'ma.”

8Kuan ni Yesus wia ni sia, “Rumendaiomé, wénétenoma un tepéhmu wo lumampangoma.” 9In toro niitukan si tou itii nimalé'osa, éndonamé un tepéhna a sia lumampang.

Niitu é nimamuali witu un endo Sabat. 10#Neh. 13:19; Yer. 17:21 Pahpaano niitu sé tonaas né tou Yahudi kimuama wia si tou taré malé'osa itii, “In tarékan én endo Sabat, ni ko én zéi'kan toro ménét un tepéhmu.”

11Taan ni séra ém winingkotnala, “Si Tou limé'osomé ni aku si kimuamé wia ni aku: Wénétenoma un tepéhmu wo lumampangoma.”

12Ni séra meligau wia ni sia, “Séi si kimuama wia ni ko: Wénétenoma un tepéhmu wo lumampangoma?”

13Taan si tou taré malé'osa itii én zéi'kan mata'u séi si limé'osoma u sakina, pahpaan si Yesus én zéi'mo niileka im witu un unez né tou lakez witi tampa itii.

14Tumondongé, si Yesus nimahilekan karia ni tou itii witi Walé ni Opo Empung ang kumua wia ni sia, “Gena-genangen, ni ko é lé'oso, tia'mo ko memangu-mangunpé' kasii a singkéla', wo ni ko zéi'kan makailek an zézéha lumouspé'mé ung kawutez u nimamuali wia ni ko.”

15Si tou itii mondola a masumirita wia sé tonaas né tou Yahudi i si Yesus si limé'osa ni sia. 16Niitumo, sé tonaas né tou Yahudi mahtututu' in zumézéha si Yesus, pahpaan si tou itii liné'os-Na in endo Sabat.

17Taan ni Sia kimuala wia ni séra, “Si Ama'-Ku é mahpaayang makaz in tarékan, téntu kangkasii ni Aku é mahpaayang.”

18Pahpaano niitu sé tonaas né tou Yahudi én totoz mahtututu' i munu' si Yesus, zéi'kan uman pahpaan ni Sia i simala'mola wana an tinotoz witu un endo Sabat, taan kangkasii pahpaan ni Sia ing kimua i si Opo Empung én Ama'-Na wo karia in téntu pinasuat-Namola un tou-Na karia si Opo Empung.

Un ipahkua ni Yesus tumoro un tou-Na

19A si Yesus mingkotla wia ni séra, “Uli-ulit ikua-Kuma wia ni kamu, si Oki' ni Opo Empung én zéi'kan mata'u kumura sa zéi'kan nimilek um winangun ni Ama'. Pahpaan apa um pahpaayangen ni Ama' niitu kangkasii um pahpaayangen ni Oki'. 20Pahpaan si Ama' é rumaraaté si Oki' wo ni Sia é nimapailek wia si Oki'-Na péléng am pahpaayangen-Na in esa. Lumouspé'mé niitu si Ama' é mapailek am paayangen lumousé am paayangen itii wia ni Sia, makaz ni kamu mengusi-ngusingsing. 21Pahpaan tanu si Ama' én tumou sumaup sé tou nimatémo wo méhé wia ni séra ung katou-touan, téntu kangkasii si Oki' é méhé ung katou-touan wia si séi uman si kapaaz-Na. 22Zéi'kan siapa zozo' in esa si tou si tinotoz ni Ama' in ulit kaapa zéi'kan am pahwangunenna. Taan péléng ung kawasa in tumotoz itii é méiwéhé wia si Oki'-Na. 23Niitu ém winangun ni Ama' wo péléng sé tou é mahsigi' si Oki' tanu ni séra i mahsigi' si Ama'. Si tou zéi'kan mahsigi' si Oki', ni sia kangkasii én zéi'kan mahsigi' si Ama' si nimatumé si Oki'.

24Uli-ulit ikua-Kuma wia ni kamu: Séi uman si timalinga u méikua-Ku wo ma'éman wia ni Sia si nimatumé ni Aku, si tou itii é makailek ung katou-touan makaz ing kauré-uré wo zéi'kan makailek un ukuman, pahpaan ni sia é méikapilotomé im witu um patéan wo niméramoma witu ung katou-touan. 25Uli-ulit ikua-Kuma wia ni kamu: Un orasna é méyé wo niiamo un orasna i sé tou nimatémo én tumalinga u nuwu' ni Oki' ni Opo Empung wo sé timalingama niitu é matou. 26Pahpaan tanu si Ama' si mahkawasa mahwéhémé ung katou-touan, téntu kangkasii si Ama' niméhé ung kawasa wia si Oki'-Na i mahwéhé ung katou-touan. 27Si Ama' é niméhé ung kawasa wia si Oki'-Na in tumotoz ulit kaapa zéi'kan am pahwangunen né tou pahpaan ni Sia én Oki' ni Tou. 28Ni kamu én tia'mo mengompo' in tumalingama niia, pahpaan un orasna é méyé im péléng sé nimatémo wo mémoileweng én tumalinga u nuwu' ni Oki' ni Tou. 29#Dan. 12:2 Wo ni séra é mondol im witu um woso linewengan ni séra. Sé tou nimangunomé a lé'os é matou sumaup i makailek ung katou-touan makaz ing kauré-uré, taan sé nimangunomé a léwo'an é matou sumaup i makailek un ukuman.

30Zéi'kan siapa un toro wanguneng-Ku ikiit um paaz-Ku in esa. Ni Aku i mahtotoz am pahwangunen né tou in ulit kaapa zéi'kan é mengiit an tinalinga-Ku wia si Ama'. Wo ni Aku én zéi'kan mahsanaweka i mahtotoz am pahwangunen né tou ulit kaapa zéi'kan, pahpaan ni Aku én zéi'kan mahkiit um paaz-Ku in esa taan mahkiit uman um paaz ni Ama' si nimatumé ni Aku.

31Sa ni Aku mahkua tumoro un tou-Ku in esa, un ipahkua-Ku itii én zéi'kan ulit. 32Taan si Ama' si mahkua ang kata'uan-Na tumoro ni Aku, wo kata'uang-Ku un ipahkua-Na tumoro ni Aku én ulit. 33#Yoh. 1:19-27, 3:27-30 Ni kamu é nimatumoma si tou i mahilekan karia ni Yohanes Menanarani, wo ni sia éng kimuamola an ulit tinalingana wo a niilekna tumoro ni Aku. 34Taan ni Aku én zéi'kan memandung si tou walina ing kumua an tinalinga wo a niilek néra tumoro ni Aku, taan niia én ikua-Kuma wo ni kamu toro ipilot im witu un ukuman wana a singkéla'. 35Si Yohanes Menanarani én tanu u solo mahlayas wo mahsena'ma wo u sena' itii nimangun ni kamu mahpaa-paaz zozo' in zéi'kan mauréma.

36Taan un tinalinga wo u niilek-Ku é lumouspé'mé u méikua ni Yohanes Menanarani un tinalingana wo u niilekna tumoro ni Aku. An tumuzu'mé itii ém péléng am paayangen méiwéhémé ni Ama' wia ni Aku im paayangeng-Ku. Am paayangen itii kangkasii ém pahpaayangeng-Ku in tarékan, niitumo an tumuzu'mé i ni Aku é méiatumé ni Ama'. 37#Mat. 3:17; Mrk. 1:11; Luk. 3:22 Si Ama' si nimatumé ni Aku, ni Siamo si mahkuamé ung kata'uan-Na tumoro ni Aku. Ni kamu én zéi'kan kawisa tumalinga u Nuwu'-Na kaapa nimilek ni Sia. 38U Nuwu'-Na én zéi'kan méikauntep witu un até niou pahpaan ni kamu én zéi'kan ma'éman wia ni Sia si méiatumé ni Ama'. 39Ni kamu sekezé é mahtata'u um Pinantik Lenas pahpaan ni kamu mahgenangla im witu ni kamu toro mata'umé kura i makailek ung katou-touan makaz ing kauré-uré. Zozo' in téntu, witu um Pinantik Lenas itii én tumuzu'mé tumoro ni Aku. 40Taan ni kamu é soo méyé wia ni Aku i makailek ung katou-touan makaz ing kauré-uré.

41Ni Aku én zéi'kan menéro u sisigi'an né tou. 42Taan tumoro ni kamu, uli-ulit kata'uang-Ku im witu un até niou, ni kamu én zéi'kan siapa raraatéan wia si Opo Empung. 43Ni Aku niméyé éng karia u ngaran ni Ama'-Ku taan ni kamu é soo sumungkul ni Aku. Taan sa sé tou walina méyé karia ung kawasana in esa, ni kamu ém paaz sumungkul ni sia. 44Kura kamu toro ma'éman wia ni Aku, sa kamu paaz uman i sigi'en né tou, taan ni kamu soo menéro u sigi' ni Opo Empung si Esa uman?

45Ni kamu én tia'mo mahgenangla i ni kamu ém papahsasala'-Ku witu u sinaru ni Ama'. Si mapahsasala' ni kamu é si Musa, ni sia si niéré'an niou. 46Pahpaan sa ni kamu ma'éman si Musa, tantumo ni kamu kangkasii é ma'éman ni Aku, pahpaan ni sia é nimantik tumoro ni Aku. 47Taan sa ni kamu zéi'kan ma'éman tumoro a méipantik ni Musa, kura kahuman ni kamu toro ma'éman wana a méikua-Ku?”

Currently Selected:

Yohanes 5: LAITOM

Highlight

Copy