Yohanes 10

Un aandéan tumoro si memimiara wo sé dombana

1A si Yesus kumuama, “Uli-ulit ikua-Kuma wia ni kamu: Séi uman si muntep witu um pahpiaraan sé domba zéi'kan mahkiit um pepenet, taan mahlawa'mé witu u réhén, si tou itii é maremu' wo mengangahat an anu né tou walina. 2Taan si tou mahuntepé mahkiité um pepenet, ni sia é memimiara sé domba. 3Si menénéiz um pepenet um pahpiaraan sé domba é muka um pepenet wia si memimiara sé domba wo sé domba é mahkii-kiit u nuwu'na i ni sia mahtawah u ngaran néra si esa wo si esa wo mahwali ni séra i mondolé. 4I nimakaondolomé péléng sé domba itii, si memimiara sé domba itii é mahlampanga mahpuuna im wia ni séra wo sé domba itii mahkiita ni sia pahpaan ni séra é mata'u u nuwu' ni memimiara sé domba itii. 5Ni séra é soo kumiit si zéi'kan kata'uan néra wo ni séra én tumingkas im wia si tou itii pahpaan u nuwu' ni tou itii zéi'kan kata'uan néra.”

6Si Yesus éng kimua u aandéan kenu wia sé sana réwok tou Farisi itii, taan zéi'kan katulapan néra apa un ipahkukua-Na wia ni séra.

7Niitumo si Yesus kimua kasiima, “Uli-ulit ikua-Kuma wia ni kamu, ni Akumo si pepenet wia sé domba itii. 8Péléng sé tou niméyé puunala ni Aku, ni séra é maremu' wo mengangahat taan sé domba itii én zéi'kan mahtalinga ni séra. 9Ni Akumo si pepenet. Séi uman si muntep kimiité ni Aku, ni sia én ipilot im witu un ukuman wana a singkéla'. Ni sia én tanu si domba si muntep wo mondol a makailek kakanen. 10Si maremu' é méyé uman i rumemu', munu' wo méluméwo'. Taan ni Aku é niméyé, wo sé tou makailek ung katou-touan, niitumo ung katou-touan linakez ung kamang.

11Ni Akumo si memimiara sé domba si lé'os uman. Si memimiara domba lé'os é mayo ung katou-touanna pahpaan sé dombana. 12Taan si pemamaéran uman ni makaanu sé domba wo zéi'kan makaanu sé domba itii én tumingkas tumula'u sé domba itii i mileka si serigala mahéyé. Niitumo sé domba itii é sineza' wo siniru ni serigala. 13Si tou itii én timingkas pahpaan si tou itii ém pemamaéran uman wo sé domba itii én zéi'mo pinandungnama.

14Ni Akumo si memimiara sé domba si lé'os uman wo kata'uang-Ku sé domba-Ku wo sé domba-Ku é mata'u ni Aku, 15#Mat. 11:27; Luk. 10:22; Yoh. 3:35tanu si Ama' mata'u ni Aku wo ni Aku mata'u si Ama', wo ni Aku mahwéhé ung katou-touang-Ku, wo sé domba-Ku toro menou-nou. 16Taan ni Aku kangkasii é makaanu sé domba walina sé zéi'kan wia um pahpiaraan kenu. Sé domba itii kangkasii é léwo'zéi' im pahwali-Ku wo ni séra matumalinga u nuwu'-Ku wo ni séra é maéndo sana réwok domba esa memimiara.

17Si Ama' rumaraaté ni Aku pahpaan ni Aku nimayo ung katou-touang-Ku, wo niitu toro kailekang-Ku sumaup. 18Zéi'kan siapa si toro méndo ung katou-touang-Ku im wia ni Aku, taan ni Aku mayo niitu mengiit um paaz-Ku in esa. Ni Aku é mahkawasa i mayo niitu wo mahkawasa i méndo niitu sumaup. Niiamo um perénta kinailekang-Kumé wia si Ama'-Ku.”

19Pahpaan u méikuama ni Yesus itii, sé tou Yahudi itii mahéndo-éndoano kasii. Lakez im wia ni séra sé mahkua, 20“Ni Sia é sinelazan ni sétang wo pahléla'eno! Kaa kamu mahtalinga ni Sia?”

21Sé walina é mahkua, “Niitu én zéi'kan kukuan ni sinelazan, toro wé si tou sinelazan lumé'os um weren ni letok?”

Sé tou Yahudi soo si Yesus

22An ikaayola witu un endo mahpésta ing gumenang um Walé ni Opo Empung witi Yerusalem im wineru#10:22 Un endo mahpésta kenu ém pahkuan Hanukkah. Niia ém woo in Desember. Un endo wangko' kenu ém pahwangunen pahpaan un Walé ni Opo Empung ém winangun makati'tiren né tou Siria in teluna ta'un. sumaup. In toro niitu én oras in zaté. 23Si Yesus melampa-lampang witi lésaz um Walé ni Opo Empung witi porés nginaranan Salomo. 24A sé tou Yahudi rumimbungla wia ni Sia a mahkua wia ni Sia, “Makaz sawisa ni kai iwaya-Mu i mahzua-zua genang? Sa ni Ko é Mesias, ipakaulitomé wia ni kai.”

25A si Yesus mingkotla wia ni séra, “Mémoikua-Kula wia ni kamu taan ni kamu én zéi'kan ma'éman. Am paayangen pinaayang-Ku karia u ngaran ni Ama'-Ku, nianamo an tumuzu'mé tumoro ni Aku. 26Taan ni kamu in tou Yahudi én zéi'kan ma'éman pahpaan ni kamu én zéi'kan méikarékén domba-Ku. 27Sé domba-Ku mahtalinga u nuwu'-Ku wo ni Aku mata'u ni séra wo ni séra mahkiit ni Aku. 28Ni Aku é mahwéhé ung katou-touan makaz ing kauré-uré wia ni séra wo ni séra uli-ulit zéi'kan maléwo' makaz ing kauré-uré wo zéi'kan siapa zozo' in esa si kumahat ni séra im witu u lengen-Ku. 29Si Ama'-Ku, si niméhémé ni séra wia ni Aku, ung kawasa-Na é lumousé péléng am péléng. Wo zozo' in esa én zéi'kan siapa si toro kumahat ni séra im witu u lengen ni Ama'. 30Ni Aku wo si Ama'-Ku én esa.”

31Makasapé' kasii sé tou Yahudi niméndomé watu i merit si Yesus. 32Kuan ni Yesus wia ni séra, “Lakez am paayangen lé'os am wia si Ama'-Ku a méyé, a méipapailek-Ku wia ni kamu. Im wana am pinaayang-Ku itii, wisa u nimangun ni kamu im paaz merit ni Aku?”

33 # Im. 24:16 Wingkotela né tou Yahudi itii, “Ni kai paaz merit ni Ko én zéi'kan pahpaan am paayangen lé'os pinaayang-Mu, taan pahpaan ni Ko mahséro' wia si Opo Empung. Wo pahpaan ni Ko, zozo' in tou uman, pahpasuaten-Nu un tou-Mu karia si Opo Empung.”

34 # Mzm. 82:6 Kuan ni Yesus wia ni séra, “Wéwéhan u méipantik witu un ukum Torat niou: si Opo Empung é nimuwu'mo, ‘Ni kamu én tanu empung’. 35Kata'uantamo im péléng a méipantik witu um Pinantik Lenas én zéi'kan mata'u zéi'en makaz ing kauré-uré. Niitumo, sa si Opo Empung kimua ‘empung’ wia sé tou nimakailek u nuwu'-Na, 36kaa ni kamu mahkua ni Aku mahséro' wia si Opo Empung pahpaan mahkua ni Aku én Oki' ni Opo Empung? Ni Aku ém pinéléng ni Ama' wo nimatumé ni Aku i méyé wia ung kaayahan. 37Sa ni Aku zéi'kan mahpaayang am paayangen ni Ama'-Ku, tia'mo ma'éman wia ni Aku. 38Taan sa ni Aku nimangun niitu wo ni kamu soo ma'éman wia ni Aku, pa'émanenola am pinaayang-Ku itii, wo ni kamu toro mata'u wo makatulap i si Ama' é nimaesa karia-Ku wo ni Aku é nimaesa karia si Ama'.”

39Makasapé' kasii ni séra i mahtition ni Sia, taan ni Sia én zéi'kan kinationan néra.

40 # Yoh. 1:28 A si Yesus mangé witi leweta u so'so'an Yordan, witi tampa pahsaranian ni Yohanes im puuna, a Sia mento' witu. 41Lakez sé tou mahéyé wia ni Sia a mahkua, “Zéi'kan siapa zozo' in esa a makakompo'en winangunla ni Yohanes Menanarani, taan péléng a méipahkuamola ni Yohanes tumoro si tou kenu én ulit.” 42Im witu, lakez sé tou ma'éman wia ni Sia.

Currently Selected:

Yohanes 10: LAITOM

Highlight

Copy