Kisah Rasul-rasul 2

Si Roh Lenas timumpa wia sé tou ma'éman

1 # Im. 23:15-21; Ul. 16:9-11 Im witu un endo wangko' Pentakosta#2:1 Un endo Pentakosta ém pahkuan néra endo Pitu Duminggu wo endo i Mahupu' wo endo né tou Yahudi i rumagés wia si Opo Empung., péléng sé tou ma'éman wia si Yesus é nimaréwok witu um walé. 2Kumompo'mé talingané ém wéwéhan un zani witi langit un tanumokan a reges repet, taka-takazan um walé rinéwokan néra itii é mawuta-wuta karia un zani itii. 3An ileken nérama an api tanumokan a lila' a méikasera mahta'sama i mahtumpama wia ni séra. 4A si Roh Lenas kumawasala wia ni séra péléng. Tumondong niitu, a séra méhé i mahnuwu' karia a nunuwu'en walina, mengiit a méiwéhémé ni Roh Lenas wia ni séra.

5In endo mahpésta itii, lakez sé tou Yahudi sé uli-ulit mahragés wia si Opo Empung, sé siméngkot wana péléng am wanua wia ung kaayahan é niméyé witi Yerusalem. 6In timalingamé un zani itii, a maréwoké sé tou lakez. Ni séra é mengompo' pahpaan si esa wo si esa é mahtalingamé u nunuwu'en néra ém pahnuwu'mo né tou ma'éman itii. 7Ni séra péléng é menganga-nganga wo mengusi-ngusingsing, ang kuan néra, “Zéi'kankuaa péléng sé tou mahnuwu' itii én tou Galilea? 8Kura kahuman ni kita si esa wo si esa é mahtalingamé ni séra i mahnuwu' karia a nunuwu'en witi wanua kinatouanta? 9Ni kita én tou: Partia, Media, Elam, Mesopotamia, Yudea wo Kapadokia, Pontus wo Asia, 10Frigia wo Pamfilia, Mesir wo an tana' witi Libia u nimarétéan wo ung Kirene, tou Roma sé limepuhmé, 11tou Yahudi wo zéi'kan tou Yahudi taan mahkiito um pa'émanen né Yahudi. Wo wéwéhan kasii sé tou Kreta wo tou Arab. Ni kita péléng é mahtalingamé ni séra i mahnuwu' karia a nunuwu'enta tumoro am winangun ni Opo Empung am wangko'.”

12Péléng ni séra é mengusi-ngusingsing wo menganga-nganga a mahkuaala, “Apa kahuman ung kalakoan péléng ang kenu?”

13Taan sé walina én akaz uman i mahlungkuza, “Ni séra én tewelen pahpaan nimelep un anggor tombal.”

Si Petrus mahnuwu' wia sé tou lakez

14A si Petrus wo sé mapulu' wo esa aatu ni Yesus rumendaié. Karia i rimez si Petrus mahnuwu'ma wia sé tou lakez itii, “É kamu sé tou Yahudi wo ni kamu péléng sé mahento' wia u Yerusalem! Totoz pahwéhanla genang an ipahkuaku wo kata'uan nioula. 15Sé tou kenu ndootuu én zéi'kan tewelen tanu um pahgenangen nioula. Pahpaan in tarékan én taré jam kasiou im woondo. 16Taan apa un taré tinalinga nioua, im puuna é méipapata'umo ni Opo Empung wia si Yoel si nabi-Na, téntii u méikua-Na,

17 # Yl. 2:28-32 ‘Wana an endo kamurian, si Roh-Ku én iwéhé-Ku wia péléng sé tou.

Wo sé oki' niou sé tuama wo wéwéné é mapata'u wia sé tou a méikua-Ku wia ni séra.

Sé tarétumou wo sé raraha niou ém wéwéhan un ipapailek ni Opo Empung, wo sé tu'a ém wéhan ni Opo Empung un ipi.

18Téntu kangkasii sé ata-Ku tuama kaapa wéwéné

é mawéhang-Ku si Roh-Ku im wana an endo itii

wo ni séra é mapata'u wia sé tou a méikua-Ku wia ni séra.

19Ni Aku é mangun a makakompo'en witi langit wo an zéi'kan kakuaan wia ung kaayahan: wéwéhan an zaha', an api wo an teremuz zemdem an tanumokan ninahak.

20Si endo é marimbengbeng wo si loloho'en é marangdang tanu un zaha'. Péléng niana é mamuali puunala un endo ni Opo Empung.

Un endo itii én endo wangko' zéi'mo kakuaan.

21Wo séi uman si mahaléi wia si Opo Empung in ipilot im witu un ukuman wana a singkéla', ni sia én ipilot.’ ”

22Ang kuan ni Petrus kasii, “É katuari-katuariku tou Israel! Talingana lé'os un ikuakuma kenu: Si Yesus tou Nazaret itii én tinotoz ni Opo Empung. Niitu én toro pa'ileken im wana a makakompo'en wo an zéi'mo kakuaan wo an tumuzu'mé ung kawasa ni Opo Empung. Niana péléng ém winangun ni Opo Empung wia ni kamu mengiité si Yesus, tanu ung kata'uan niou. 23#Mat. 27:35; Mrk. 15:24; Luk. 23:33; Yoh. 19:18 Si Yesus si méiayola ni Opo Empung wia ni kamu mengiit un tinotoz wo ung ginenang-Na é sinalip wo winunu' niouola, mengiité sé tou sé mahsaru si Opo Empung. 24#Mat. 28:5-6; Mrk. 16:6; Luk. 24:5 Taan ni Sia é méitoumé sumaup ni Opo Empung wo nimiloté ni Sia im witu un zéha um patéan, pahpaan ni Sia én zéi'kan mamuali i memitu-mitu ung kawasa um patéan. 25#Mzm. 16:8-11 Im puuna si Daud éng kimuamo in téntii tumoro ni Sia,

‘Sekezé si Opo Empung ém pengile-ngilekengku witu u sinaru-Ku.

Pahpaan ni Sia ém witu ung kakanku, niitumo zéi'kan siapa si kumala ni aku.

26Pahpaano niitu, un atéku é mahpaa-paaz wo u sumahku é meloo-looz uman ni Sia.

Wo un awakku kangkasii é mahéré' uman wia ni Sia.

27Pahpaan zéi'kan méiwaya-Mu si Roh-Ku i memiti-miti pahwéha-wéhan né tou nimatémo,

wo zéi'kan iwaya-Mu un awak ni Tou Linenas-Mu kenu i mawuul.

28Ni aku én tinuzu'an-Nu u lalan kura in uli-ulit menou-nou.

Ni aku én uli-ulit mahpaa-paaz pahpaan ni Ko memali-mali karia-Ku.’

29Katuari-katuari, ipakaulitkuma wia ni kamu tumoro si kolano Daud, si nimaopota. Ni sia é nimatémo wo u linewengan sia ém wiapé' makaz in tarékan wia um wanua kenu. 30#Mzm. 132:11; 2Sam. 7:12-13 Taan ni sia é nabi wo kata'uanna si Opo Empung én timaaz wia ni sia karia in timiwa' i si esaané wia sé suzuna é maéndo Kolano. 31Pahpaan kata'uano ni Daud u mamuali wo ni sia kimua i si Mesias én itou sumaup ni Opo Empung. Niitu éng kata'uannamo i ni sia kimua, si Roh-Na én zéi'kan iwaya i memiti-miti tampa né tou nimatémo wo un awak-Na én zéi'kan iwaya i mawuul.

32Si Yesus kenumo si méitoumomé sumaup ni Opo Empung. Wo tumoro niitu, ni kai péléng sé nimilek u nimamuali itii. 33Tumondongla niitu, ni Sia é méirakék ni Opo Empung a makaileké si Roh Lenas si méitaaz ni Ama'. An itumpa-Namé si Roh itii tanu a niilek wo tinalinga niou wia un tampa kenu. 34#Mzm. 110:1 Pahpaan zéi'kan si Daud si winénéta mangé witi kasendukan, taan lumouspé'mé niitu ni sia éng kimua in téntii,

‘Si Opo Empung éng kimua wia si Tuangku:

35Rumumezomé witu ung kakan-Ku, makaz sé kakoro'-Mu iwéhé-Ku witu u léléék-Mu.’

36Niitumo, ni kamu péléng in tou Israel é léwo'zéi' in totoz mata'ula i si Yesus si salip niouola itii ém winangunola ni Opo Empung maéndo Mahpiara wo Kristus.”

37In timalingala niitu péléng, ni séra én totoz mene'sel a meligau wia si Petrus wo sé aatu walina, “Katuari-katuari, apa u léwo'zéi' im wangunen nai?” 38A mingkotla si Petrus wia ni séra, “Itula'umola a singkéla' niou wo iwéhémola un tou niou i saranin witu u ngaran ni Yesus Kristus wo ni kamu makailek un ampungan ni Opo Empung wana a singkéla' niou. Karia in téntu ni kamu é makailek un tatambér. Un tatambér itii é si Roh Lenas. 39Pahpaan u méitaaz ni Opo Empung itii méiwéhé wia ni kamu wo wia sé suzu niou, wo kasii wia sé tou sé mahento' witi tampa zou'ma, kalakez né tou sé tawahen-Na.”

40Lakezpé' kasii a méikua ni Petrus wia ni séra i mahkua am pina'ilekna wo menutu' ni séra, kuana, “Sa kamu paaz in zéi'kan ukumen ni Opo Empung, tia'mo mahkari-karia sé tou memua-muali a singkéla' kenu.”

Ung katou-touan né tou ma'éman

41Sé tou niméhé genang witu u méikua ni Petrus é niméhéla un tou néra i sinarani. Im witu un endo itiikan, sé tou ma'éman wia si Yesus éng kinaawesan woo teluna riwu tou. 42Ni séra én uli-ulit mahtalinga an tutuzu' ipahtuzu' né aatu ni Yesus wo meréwo-réwok. Wo ni séra kasii sekezé é mahkan wo mahmengaléi mahwali-wali.

43In toro niitu, péléng sé tou é mengusi-ngusingsing wo maindé' pahpaan lakez a makakompo'en wo an zéi'mo kakuaan am winangun né aatu ni Yesus. 44#Kis. 4:32-35 Péléng sé tou ma'émano itii sekezé é nimaréwok mahwali-wali. Wo péléng a sangkum ni esa wo ni esa é nimaéndomo anu néra péléng. 45Wo sekezé im wia ni séra ém wéwéhan sé mahwangkér a sangkum néra, an zoitna én ipahwéténg wia sé tou mengiit am pemandungen ni esa wo ni esa. 46Wo sekez in endo ni séra én zéi'kan kumana' i meréwo-réwok witi Walé ni Opo Empung wo ni séra én esa genang. Um walé ni esa wo ni esa é mahsasawel im pahangéan néra i mahkan mahwali-wali karia i mahpaa-paaz wo ung genang lé'os. 47Ni séra é mahlooz si Opo Empung wo ni séra kasii éng kapaaz né tou lakez. Wo sekez in endo ung kalakez né tou méipilot im witu un ukuman wana a singkéla' ém pahawesan ni Opo Empung.

Currently Selected:

Kisah Rasul-rasul 2: LAITOM

Highlight

Copy