Kisah Rasul-rasul 11

Si Petrus simirita wia sé jamaat witi Yerusalem

1Sé aatu ni Yesus wo sé katuari esa pa'émanen witi Yudea én timalinga i sé tahsasana wanua walina sé zéi'kan tou Yahudi kasii é nimakailekola u nuwu' ni Opo Empung. 2Niitumo, i si Petrus nimawurimomé sumaup witi Yerusalem, sé sana réwok tou Yahudi sé ma'émano si Yesus é mahzéi-zéi'an kariana. 3Kuan néra, “Kaa ko mahangé wana am walé né tou zéi'kan Yahudi sé zéi'kan sinunat wo mahkan karia néra?” 4Taan tina'samé ni Petrus i simirita wia ni séra, péléng a nimamuali. Kuana, 5“Karegas ni aku mengaléi im witi Yope, kumompo'mé ém wéwéhan u méipapailek wia ni aku. Ilekengkuma u langit é nimawukama an tumumpamé un tanu a roko' lempaz. U roko' itii é méitontoné witu u sinaruku karia un epat tali u méiapus wana an zuhuna u roko' itii. 6Im pahnana'ungku am witu u roko' itii, an ilekengkuma sé binatang epat a'é wo sé liontana' wo sé binatang mahlangkou wo sé tumétéwél. 7An talingangkumé u nuwu' kimuamé wia ni aku in téntii, ‘Petrus, rumendaiomé, kerizenola wo seza'enola!’ 8Taan winingkotku umanla, ‘Zéi'kan, Opo Empung. Ni aku én zéi'kampé' nimahseza-seza'la sé binatang sinéro' im pahseza'en wo makati'tiren.’

9Taan ni aku kasii én timalingamé u nuwu' um witi kasendukan a méyé ung kimuamé ing kazua, ‘Apa ung kinuamo ni Opo Empung in toro seza'en, tia' pahkuanu sinéro' im pahseza'en!’

10Niia é nimakatelu i nimamualima. Ing kamurian niitu péléng é nimawénéta sumaup mangé witi langit. 11In toro niitukan ém wéwéhan sé telu tou rimendai witu u loloangan um walé pahento'an nai. Ni séra ém witi Kaisarea a méyé méiatumé i méyé wia ni aku. 12A si Roh Lenas kumuala wia ni aku, ‘Mangémo karia néra. Tia'mo mahzua-zua genang pahpaan ni séra in zéi'kan tou Yahudi.’ Kaitalingamé niitu, ni aku wo sé enem katuari esa pa'émanen kenu kangkasii é nimangé witi Kaisarea. Ikaayola witu, a ni kai muntepa witu um walé ni Kornelius. 13An isiritala ni Kornelius wia ni kai kura sia i nimilek si malaekat makarendai witi waléna ang kumuala wia ni sia in téntii, ‘Matuma tou mangé witi Yope i mangémé si Simon si pahkuan Petrus. 14Wéwéhan un ikuana wia ni ko. Wo un ikuana itii é mangun ni ko karia né sana awumu ipilot im witu un ukuman wana a singkéla'.’ 15I ni aku mahnuwu'ma wia ni séra, an tumumpamé si Roh Lenas wia ni séra tanu u nimamuali wia ni kita i makasa. 16#Kis. 1:5 Ang kagenangangkula u méikua ni Yesus Mahpiara, ‘Si Yohanes Menanarani é mahsarani sé tou karia un zano, taan ni kamu é saranin karia ni Roh Lenas.’ 17Niitumo, sa si Opo Empung timambéré si Roh Lenas wia ni séra sé zéi'kan tou Yahudi, masuat wo si méitambér-Namé wia ni kita in taré ma'émanla wia si Yesus Kristus Mahpiara, kura kahuman ni aku i suméro' ni Sia?”

18Kaitalingamé niitu, ni séra é méikapenes. Tumondongla niitu a séra mahlooz si Opo Empung karia i mahkua, “Niitumo, maan wia sé tou walina sé zéi'kan Yahudi kangkasii én tinambérano ni Opo Empung un oras in tumula'u a singkéla' wo séra toro makailek ung katou-touan makaz ing kauré-uré.”

Sé jamaat witi Antiokhia

19 # Kis. 8:1-4 Kumawusa si Stefanus im winunu', sé katuari esa pa'émanen ém pahzézéhan, a séra tumingkas méikasera wayaan u niangéan. Wéwéhan sé timingkas witi tana' Fenisia, Siprus wo witi Antiokhia. Sé tou timingkas itii é mahwoka' u Nuwu' Lé'os tumoro si Yesus, taan wia uman sé tou Yahudi.

20Taan im wia sé méikasera itii, wéwéhan sé woopira tou Siprus wo Kirene sé nimangé witi Antiokhia. Im witu, ni séra kasii é nimahwoka'mé u Nuwu' Lé'os tumoro si Yesus Mahpiara wia sé tou zéi'kan Yahudi. 21Ung kawasa ni Opo Empung é memali-mali karia néra taka-takazan totoz lakez sé tou nima'éman wo mahkiito si Yesus Mahpiara.

22U sirita tumoro u nimamuali kenu éng kinatalingaana né jamaat witi Yerusalem. A sé jamaat itii matuma si Barnabas mangé witi Antiokhia. 23I si Barnabas méikaayomola witu, an ilekennala kura si Opo Empung in timambér ung kamang wia ni séra, ni sia én totoz mahpaa-paaz. A séra sésaanala in zéi'kan toro mazéi' i ma'éman wia si Yesus Mahpiara. 24Pahpaan si Barnabas itii én tou totoz lé'os, ni sia én totoz kinawasa ni Roh Lenas wo totoz ma'éman wia si Mahpiara, niitumo lakez sé tou timalinga ni sia é nima'éman wia si Mahpiara.

25Tumondong niitu, a si Barnabas mangé witi Tarsus i mamenéro si Saulus. I ni sia nimahilekanola wo si Saulus, an ipahwalinama si Saulus mangé witi Antiokhia. 26Ni séra zua é mahento' mahwali-wali karia né jamaat witu, sana ta'un ung kauréna. Im witu ni séra é mahtuzu' tumoro si Yesus wia sé tou lakez. Im witi Antiokhia itiimo ing kataré-taré sé tou ma'éman si Yesus im pahkuan tou Sarani.#11:26 Witu u nunuwu'en Yunani ‘Christianous’ ung kalakoana sé tou mahkiito an tutuzu' ni Kristus.

27In toro niitu, sé woopira nabi witi Yerusalem é niméyé witi Antiokhia. 28#Kis. 21:10 Si esaané im wia ni séra é makangaran Agabus. I sé tou nimaréwok, si Agabus si kinawasa ni Roh rumendaié ang kumuama, “Un oras ung kaahreman zéi'kan kakuaan é méyé wia ang kaayahan.” Ung kaahreman itii é nimamuali i si Klaudius si Kaisar. 29Tumalingamé niitu, sé tou ma'éman si Yesus én timotozla i ruméwok a sasawang mengiit ung kawawaan ni esa wo ni esa im pahalin wia sé katuari esa pa'émanen sé mahento' witi tana' Yudea. 30Am pakaréwoken nérala a sasawang, an totozen nérala si Barnabas wo si Saulus i mahali niana wia sé penatua witi tana' Yudea.

Currently Selected:

Kisah Rasul-rasul 11: LAITOM

Highlight

Copy