Yohanes 7

Si Yesus wo sé poo-poow-Na

1Kekawus in itu, si Yesus méma' im bawayaan-Na lumi'cir in sangkum ing Galilea. Ra'ica kiim-Na maangé an sangkum in Yudea ampa'paan sé kikiiten é agama Yahudi am bitu rumaméji maté Sia. 2An tutuw itu matawio in endo wangko' é tou Yahudi si patuulen endo wangko' Terung Lalaina.#7:2 En endo wangko' Terung Lalaina esaan asé telu ngando wangko' é tou Yahudi. Ang kauré in endo wangko' itu, sé tou Yahudi méma' im pengucapan imupu' in anggor wo in zaitun, wo mento' an terung lalaina sé niema' am panga-pangana ing kayu en tuma'néi sé apo-apo' éra si menonou an tana' kapayasan epat ngapulu' ngata'un eng kauréna (Im. 23:33-36, 39-43; Ul. 16:13-16). Kelian sé tou Yahudi mangé an Yerusalem an Yudea e mewali-wali tuma'néi in endo wangko' itu. En endo wangko' Terung Lalaina pata'néien walu ngando eng kauré wo pengaémaan kekawus in enem ngaserap in endo wangko' Paska (Yoh. 6:4). 3Anaé, icua é poo-poow i Yesus ai Sia, “Lébé loor itela'u-Mu en tampa anio' wo Ko mangé an Yudea en tuma'néi in endo wangko', wosama' sé tou mengakiit ai Co ro'na suméré ka'i in tawoien sé émaan-Mu sa. 4Ampa'paan sa si esa tou masalé' katuusan é tou keli, sapake' en émaanna ra'ica ipaenep-enepna. Anaé, sa émaan-Mu en tawoien itu, ituru'o mio' en owak-Mu a sé im pakasa in tou ang kayo'baan.” 5Aicua é poo-poow i Yesus in taniitu, ampa'paan séra in esa ka'i ra'ipé' mercaya sa Sia itu ayutus i Amang Kasuruan.

6Wo icua i Yesus ai séra, “Ra'ipé' an témpona Aku maangé. Taan sa kamu kawisake' ro'na maangé. 7Sé tou ang kayo'baan anio' ra'ica masuut icamu, taan Yaku icasuut éra ampa'paan pengakua-Ku em paémaan éra léwo'. 8Icamuo taré sé maangé am pésta pata'néian in endo wangko' itu. Sa Aku ra'ipé' maangé ampa'paan ra'ipé' an témpona Aku maangé.” 9Taniitu en aicua i Yesus a sé tuari-Na, wo Sia ka'i mento' ang Galilea.

Si Yesus masusui an endo wangko' é tou Yahudi an Yerusalem

10Taan kekawus é poo-poow i Yesus mangém an Yerusalem en tuma'néi in endo wangko' itu, si Yesus mangé ka'i ang karapi i maene-enep akar ra'ica kinailekan é tou. 11Asi endo wangko' itu an Yerusalem Sia paéré-érén é kikiiten é agama Yahudi, wo séra membum-buéian, “Am bisa réén Sia?”

12Wo keli tou mengkeng-kewitan i esa wo sé walina andumoro' Sia. Awéan sé makua, “Sia itu tou sama'.” Awéan ka'i sé makua, “Ra'ica, Sia si mengasélé'kow sé tou keli.” 13Taan ra'ica wana esa tou ka'i em brani kumua andumoro' Sia an dior é tou keli, ampa'paan caindé' éra sé kikiiten é agama Yahudi.

14Wo ang karoro'an i mapésta, si Yesus muntep ang kintal im Balé Le'nas wo tumo'tolo Sia sumusui. 15Sé kikiiten é agama Yahudi mangaya-ngaya'ka' luminga in sususuien i Yesus wo icua éra, “Tambisa si Tou anio' taniitu eng kakeli eng kakailekan andumoro' ing Kitap Le'nas? Si Tou anio' ra'ica sumicola tanu icita.”

16Isowat i Yesus ai séra, “Sé ipasusui-Ku anio', ra'ica sususuien a Yaku owo in esa, taan en anio' sususuien asi Amang Kasuruan owo si mutusai Yaku. 17Sa si tou masalé' maéma' ing kasalé'an i Amang Kasuruan, kakailekanna oka en sususuien-Ku anio' asi Amang Kasuruan owo kuma'pa mai a Yaku owo in esa. 18Si tou makua mapakéke' im bewerotna in esa, sia maéré-éréke' ing kasiri'an in owakna in esa. Taan si tou si mengaéré ing kasiri'an torona Sia si mutusai si tou itu, tantu sia makua im butul wo ra'ica mengatowo. 19Ra'ica réén aiwééo i Musa en ukum Torat ai camu? Taan ra'ica wana mandé esake' asé icamu sé mengaéma' in ukum Torat itu. Kéitu réén kamu rumaméji e maté Yaku?”

20Isowat é tou keli itu a si Yesus, “Ico rinasuko i sétang akar imanganga'. Ra'ica wana tou en rumaméji e maté Ico!”

21Isowat i Yesus ai séra, “Wayake' in esa en tawoien si niéma'-Ku asi endo Sabat, wo kamu im baya mangaya-ngaya'ka'. 22Taan icamu in esa ka'i mengatawoi asi endo Sabat, ampa'paan kamu masunat sé tou kumiit in atoran sunat si aiwéé i nabi Musa. (Taan em butulna en sunat itu ra'ica atoran i Musa, taan mai ang kanaramen é apo-apo'ta Abraham, Ishak wo si Yakub.)#7:22 Sé tou Yahudi méé sé toyaang éra in sunaten asi endo kawalu kekawus in tumou, mandé ka'i si endo itu endo Sabat (Kej. 17:10; Im. 12:3). 23#Yoh. 5:9 Anaé, sa kamu sumunat in tou asi endo Sabat wosama' kamu le'tek asi ukum i Musa, kéitu réén Aku icae'bow iow asalo isumama' in owak i esa tou asi endo Sabat? 24Tioo maakim in tou kumiit sapa sé pakasérénke' ang kesot wo sé lininga miow, taan akimeno ang karapi in da'ica marapit.”

Sé tou meindoan roma' andumoro' si séi réén si Yesus

25Wo awéan piraan tou an Yerusalem sé cumua, “Ra'ica réén Sia anio' si paéré-érén é kikiitenta im patén? 26Taan séréno, Sia ra'ica wana eng kaindé'anai mapaar an dior é tou keli wo ra'ica wana sapa-sapa en icua mai é kikiiten itu ai Sia. Wona' réén kailekano éra sa Sia itu wutu-wutul Kristus, Kolano Lumolowir? 27Taan sa si Kristus maai, ulit ra'ica wana en tou e makailek am bisa owo Sia mai. Taan kailekanta si Tou anio' a Nazaret owo, anaé ra'ica wona' wutul sa si Tou itu Kristus.”

28An tutuw i Yesus ang karoro'ané' masusui am Balé Le'nas, Sia taangko' i makua, “Wutul kamu makatuus Yaku wo kailekan iow Aku am bisa owo mai. Taan Aku mai ra'ica ampa'paan ing kasalé'an-Ku in esa. Yaku mai ampa'paan si Amang Kasuruan e mutusai Yaku. Sia itu wutul, taan Sia ra'ica katuusan iow. 29Taan katuusan-Ku Sia, ampa'paan Aku mai ai Sia owo wo Siao e mutusai Yaku.”

30An tutuw i Yesus kumua in taniitu, raméjin éra in tumangka' Sia. Taan ra'ica wana mandé esake' tou e méma' in sapa-sapa ai Sia ampa'paan ra'ipé' mai en témpo si aitantuo i Amang Kasuruan. 31Taan an uner é tou keli itu kelio sé mato'tolo maéman a si Yesus, wo ipakua éra, “Sia anio' wutu-wutul Kristus, Kolano Lumolowir, ampa'paan ra'ica wana tou e ro'na méma' tuus kakaya'kaan en lébé keli mai wo sé niéma' i Tou anio'.”

32Kalingaan é tou Farisi, keli tou mengkeng-kewitan andumoro' si Yesus. Ampa'paan in ituo, iru'du' é kikiiten é imam wo sé tou Farisi sé matéir am Balé Le'nas en tumangka' si Yesus.

33Wo si Yesus makuapé' a sé tou keli, “Ra'io uré ka'i en témpo-Ku mewali-wali wo icamu, kumawus in itu Aku maréngo mangé ai Sia si mutusai Yaku. 34Pangérén iow oka Aku, taan Aku ra'io peta'up iow. Wo en tampa angéan-Ku, kamu ra'ica icaangé am bitu.”

35Ampa'paano in itu, sé kikiiten é tou Yahudi mengkung-kuanan, “Am bisa réén en angéan-Na akar kita ra'io ka'i meta'up wo Sia? Awéan réén em basa-Na i maangé a sé tou Yahudi sé imanangkéi an sangkum é tou Yunani? Masalé' réén Sia sumusui a sé tou Yunani? 36Sapa em basa-Na icumua in anio': Pangérén iow oka Aku, taan Aku ra'io peta'up iow wo kamu ra'ica icaangé am bitu?”

En dano si mengawéé ing katouan

37 # Im. 23:36 Asi endo kaakaran si endo penting keli asi pésta in endo wangko' Terung Lalaina itu, tumulungo mai si Yesus wo kumua in taangko' a sé tou keli, “Si séike' si maré'om, aweso taré sia mai a Yaku wo wéan-Ku oka elepen. 38#Yeh. 47:1-12; Za. 14:8 Si séike' si maéman a Yaku, tanu si aipatic ang Kitap Le'nas, an untep in aténa maroyong oka tanu salu-salu in dano e méma' isia menonou akar ing kauré-uré.” 39An tutuw i Yesus kumua andumoro' in dano itu, eng kaangéanna e Roh i Amang Kasuruan teriman oka é tou maéman. Taan e Roh itu ra'ipé' aiwéé a sé tou maéman, ampa'paan em papaté ra'ipé' pinendam i Yesus wo ra'ipé' niangkai angé an tampa-Na si parayo-rayo wo pasiri-siriin an sorga.

40Keli en tou makalinga i nunuwu' i Yesus, wo an uner éra awéan e makua, “Sia anio' wutu-wutul nabi si paento-entoonta.”

41Wo sé walina makua, “Sia anio' Mesias, Kolano Lumolowir.” Taan sé walina makua, “Ra'ica! Si Mesias ra'ica imai ang Galilea owo. 42#Mi. 5:1 Ra'ica réén ang Kitap Le'nas aipatic, si Mesias itu taranak i Daud wo imai asi roong Betlehem paento'an i Daud owo?” 43Wo sé tou itu tumo'tolo meindo-indoan roma' in andumoro' i Yesus. 44Piraan tou ai séra masalé' tumangka' Sia, taan ra'ica wana mandé esaan tou ka'i e ro'na méma' in sapa-sapa ai Sia.

Si Nikodemus mengarapit a si Yesus

45Wo sé mengatéir im Balé Le'nas mangé ka'i sumawel a sé kikiiten é imam wo a sé tou Farisi sé rumu'du'o iséra en tumangka si Yesus. Wo sé kikiiten é imam wo sé tou Farisi kumua ai séra, “Kéitu réén Sia ra'ica iwali miow maai am bia'i?”

46Wo isowat é mengatéir im Balé Le'nas itu, “Ra'ipé' wana tou en sinéré ami mai menganuwu' kaputé Sia!”

47Wo isowat é tou Farisi ai séra, “O! Aisélé'kow-Nao ka'i réén kamu? 48Awéan réén esaan asé kikiiten é agama Yahudi kuma'pa tou Farisi si mercaya ai Sia? 49Taan sé tou keli itu mercayao Sia, ampa'paan ra'ica kailekan éra en ukum Torat. Iwayao mio' séra itu kutuken i Amang Kasuruan!”

50 # Yoh. 3:1-2 An uner é tou Farisi am bitu si Nikodemus. Indior sia itu sumangkumo mai a si Yesus. Icuana ai séra in tana'i, 51“Sa kumiit in ukum Torat, ro'na réén kita mukum si esa tou an tutuw ra'ipé' liningata sia rumoma' wo ra'ipé' kailekanta sapa sé niéma'na?”

52Isowat éra ai sia, “Tou Galilea réén ka'i ko? Ti'tireno mangé sé ang Kitap Le'nas wo kakailekanmu oka, ra'ica wana nabi si mai ang Galilea owo.”

[53]#7:53–8:11 An teks Yunani si kumuno-kuno, en sisilen anio' ra'ica wana. Kekawus in itu, séra im baya maréng am balé éra i esa wo si esa.

Currently Selected:

Yohanes 7: TNT

Highlight

Copy