YouVersion Logo
Search Icon

Mbete Marki 14

14
1Toŋ nam seɗe ɓay hi̧ nam ti̧hmbih-i guy buma kú-u tɔk keni peŋ dan is ɓá ka̧h. Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ƴah kuŋɓay ɓay mgba Zezu le, kú i ni. 2Ku ɓahri se, kú mgba ni ke nam ti̧hmbih ya rɔkɔ gun Izarayelri ɓá ur ŋgermu. »
3Zezu ƴo Beɗtani ké kerpuh Simu ké ndɔɓe nzom ké mun ye. Ku kaɓ nzak fe su̧na dale, wu̧y a hani rih si tul Zezu. Ke mbi kuh num ba̧ri kú-u zuh ke sa̧wkpuh nar. Numu ɓa num a kpakpaŋu, lari-u ŋger mbamba. Ke haw nzak kuh num ra mí ke fer ku̧ tul Zezu. 4Bale nun nzuk a haniri ké haŋsekle woyri-aw si̧h. Ku su̧h ɓay ɓahri, sam fe ɓeɓna fe mí ke ɓeɓ kaŋ le ? 5Numay ɗam le ɓay ziŋ lari mah lari pihna mbihmbam mbew mah so keni ko̧hkori. Mí ku ƴo law wu̧y ra ke ɓay.
6-7Bale Zezu ɓahri : « Í poŋ wu̧yay ɗeŋ. Ɓay fe mí i ƴo law wu̧yay ke ɓay le ? Fe ké-e laɓ ziŋ mi-ay na ɓa suki. Ko̧hkori ƴo ziŋ wuri kpatara. Gelke i yih le, i mah laɓ niri suki. Mí a bi ba, mi káɓ ziŋ wuri kpatara ya. 8Fe ké-e mah laɓu mí ke laɓaw. Ke fer numay ku̧ mun bi ɓa num-gɔr mi munu. 9Ɓa ketina, mi ƴo ɓah ɓayay hi̧ wuri, gelri riw kú-u ka-kah ɓaysuki hul bi ké ri le, ku hí̧ riŋ ɗina wu̧yay mgbe pi. »
10Zudas Isikariyoɗ nzuk-dih fal Zezu mbew ké sakra nzuk-dih fal ye a boh falu seɗeri ba, si ta̧w ŋgernzuk fe puhna Ŋgerzahri ɓay ndoh Zezu ndɔk woyri. 11Ku lah kerɓay Zudas kaŋ bale, law woyri rih niri, mí ku wahɓay hi̧ ni lari ɓa bon say. Kandɔkaw mí Zudas mu̧h kpɔl ƴo geŋ sa̧wseh a a̧y ké-e ɓay ndoh Zezu ndɔk woyri.
12Nam a titilu ɓil nam ti̧hmbih-su̧ peŋ dan is ɓa nam kú-u vbeh guy buma. Nzuk-dih fal Zezuri vbi ni ɓahri : « Fál suŋ mú-u yih ɓay náh lek gel fe su̧na ti̧hmbih-i guy buma wahri ké ri ɓay náh su̧ fe le ? »
13-14Mí Zezu pih nzuk-dih fal yeri seɗe ɓahri : « Í si wuri ɓil puh-aw. Ka̧hna woiri le, i ɓay ko nzuk ké suk mbih kal keni. Í dih fal ye si ka̧h kerpuh ye, í ɓah hi̧ nzuk puh-u ɓahri, metere ɓahri, vul a suŋ mí a ye ke nzuk-dih fal yeri, ku sú̧ fe su̧na ti̧hmbih-i guy buma ké ri le ? 15Le nzuk puh ra ɓay sɔk wuri vul a fál síɓa ké ɓa bawu. Fe kaɓnari ku̧ ri da. Ké gelaw mí í lek ri fe su̧na ti̧hmbih wahri. »
16Nzuk-dih fal yeri ra tɔr si ka̧h ɓil puh a luki-aw, mí ku ziŋ fe-uri ke gelu gelu kandɔk ké-e ɓah. Mí ku lek fe su̧na ti̧hmbih-i guy buma ra.
17Seh riŋ. Zezu gi ke nzuk-dih fal ye a boh falu seɗeri, ku kaɓ nzak fe su̧na ti̧hmbih. 18Ku ƴo su̧ fe, mí Zezu ɓah hi̧ nzuk-dih fal yeri ɓahri : « Mi ƴo ɓah hi̧ wuri ɓahri se, nzuk mbew ké sakra woiri-ay ɓay te mi. Nzuku kaɓ ziŋ mi ké nzak fe su̧na-ay »
19Nzuk-dih fal yeri lah ɓayu kaŋ dale, law woyri rih niri mba. A ge ge le ɓah hi̧ Zezu ɓahri « A bi ya, ra ma. »
20Bale ke ɓahri : « Nzuk mbew ké sakra woiri ké boh falu seɗe-ay, a ye ké kaɓ ziŋ mi ké nzak fe su̧na-ay, a ye mí ke ɓay te mi. 21Ɓay fe le gun nzuk pirmatul ɓá hu kandɔk ɓay gun nzak pihna Ŋgerzah a lewsa̧ri vbeh kaŋ. Kúy. Koseh ƴo geŋ nzuk ké te ni. Koseh ké ƴo geŋ nzuku-aw, mah le, mbuŋ ni ya mí su. »
22Zezu ke nzuk-dih fal ye a boh fal seɗeri ƴo su̧ fe, ke mbi peŋ, ke el ke tumbɔl hi̧ Ŋgerzah nzuk sa̧w mgbɔkɔ, mí ke gɔh wal hi̧ nzuk-dih fal yeri. Ke ɓahri : « Í ya̧, í su̧. Peŋay ɓa mun bi. »
23Mí ke mbi koɓ a ŋga̧h sal in#14.23 Í ki̧ gun ɓay ké si ke gel ki̧na Mbete Matiye 26.27-29 ɓay tu ɓay koɓ a ŋga̧h sal in.. Ke yih soko hi̧ Ŋgerzah, mí ke ndar hi̧ niri, ku nzo ndi̧ ndi̧ gbam woyri. 24Mí ke ɓah hi̧ niri ɓahri : « Yimay ɓa sem bi ké Ŋgerzah ŋga̧h keni sal in. Semu fer ku̧ siɓa ɓay tul daɓa nzukri. 25Ɓa ketina. Mi ƴo ɓah hi̧ wuri ɓahri, mi ta nzo mbih lehna kpuh viyȩh ti̧hmbih-ay mba. Namu ké mi ɓay mbi koɓ a a̧y ɓa a foyu ɓa nam ké mi ɓay nzo mbih lehna kpuh viyȩh-ay ziŋ wuri ké puh lakna Ŋgerzah. »
26Kandɔkaw ku ɗi siŋ pirna hi̧ Ŋgerzah fal fe su̧na ti̧hmbih, mí ku ti̧h si tul kasaw Oliveh.
27Zezu ɓahri : « Riŋ bi ɓay ti̧h ɓa ndaw lihna hi̧ wuri gbam ɓay fe le, mbete bolkusol Ŋgerzah ɓahri se, ke ɓay i nzuk-hɔl sami le, samiri ɓay zikri kparki kparki. 28Keni-aw gaŋ kara fal ti̧hna bi ke puh záh ke pa̧ymun a foyu dale, mi sí pol hi̧ wuri ma tusiɓa Galile. »
29Kandɔkaw mí Piyer ɓahri : « Nzukri gbam poŋ mu kara a bi mi ta poŋ mu ya. »
30Zezu ɓahri : « Mu ɓay poŋ mi ɓa ketina. Mi ƴo ɓah hi̧ mu ɓahri se, suŋay gaŋ tuhndoy mgbal ta ka-kah bɔk seɗe ya dih mí mu má̧y ɓay tul bi ɓa bɔk say ɓahri, mu tu mi ya. »
31Bale Piyer ger tul ɓay ye ɓahri : « Ɓa ra hul gaŋ kara mi hú ziŋ mu. Mi má̧y ɓay tul wo ya. »
Tɔr nzuk-dih fal ye a ɓoruri gbam ɓah kaŋ pi.
32Ku si ka̧h gel a hani ké tul kasaw Oliveh. Riŋ gelu ɓa Gesemani. Zezu ɓah hi̧ nzuk-dih fal yeri ɓahri : « Í kaɓ gelay geŋ mi. Mí si ɓah ɓay ziŋ Ŋgerzah dara ɓáy. »
33Mí ke fa̧h Piyer ke Zak ke Za̧h si ziŋ ni. Law ye titil luna kandɔk fe ké ɓay ku-kuŋ kaŋ. 34Mí ke ɓah hi̧ Piyer-ri ɓahri : « Law sena mbaŋ law bi mah hul. Í kaɓ ke nun geŋ mi. »
35Ke loh tɔɓ ké ta̧w woyri, mí ke guɓ siɓa. Ke goŋ Ŋgerzah. Ko ya le, ful ƴo ra ri le, namay ɓá ziŋ ni ya. 36Ke ɓahri : « Baah, babah wo, feri riw na ndɔk wo. Mú lu koɓ haŋ fa̧hna wo ké tul bi ɓay tul suya nzukri ma fal hi̧ mí nzo ya. Wara le mú laɓ fe ké law bi yih ya. Mú laɓ fe ké mu yih ma. »
37Zezu ur el si ta̧w nzuk-dih fal yeri ké say ra, mí ke ziŋ niri ké tul nam. Ke ɓah hi̧ Piyer ɓahri : « Simu mu na-nam ley ? Ŋgerna-kaɓ ke nun sa̧wseh mbew mba mu ley ? 38Í ƴo tul bɔk. Í goŋ Ŋgerzah rɔkɔ fe-leh law ɓá ndih wuri. Tem nzuk yih ɓay laɓ suki, mí huhrumun nzuk mah ya. »
39Ke poŋ niri el si goŋ Ŋgerzah kandɔk ké-e goŋ pol ra ɓáy. 40Ke el gi ta̧w nzuk-dih fal yeri ké sayaw, mí ke ziŋ niri tul nam. Nam laɓ niri ro̧ko ro̧ko. Nzak-el ke ɓay zi niri.
41Elna ye a bɔk sayu, ke ɓahri : « I toŋ ɔk mun woiri ɓil nam ɓáy le ? Sa̧wseh ka̧h da. Í ko, ku gi ɓay ndoh gun nzuk pirmatul ndɔk nzuk suyari. 42Ur síɓa, náh si nzɔh nun woyri. Í ko nzuk-te mi ké gi-aw. »
43Zezu ƴo ɓah ɓay kɔɓ ɓáy, sa gelaw mí Zudas ké ƴo sakra nzuk-dih fal ye a boh falu seɗeri ra, nda pol daɓa nzukri gi ti̧h tul ye. Nzukuri mgba mahwu̧yri ke kpuhri ké ndɔk woyri gbiri gbiri. Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ke ŋgernzuk puh woyri gun Izarayelri mí pih niri. 44Nzuk-te Zezu ra sɔk niri fe kú-u ɓay tu ni keni#14.44 Gel ɓa suŋ. Mahful ɓay tu ɓa Zezu se-se. Gel ha̧rma Zezu a ŋgi̧-u na tusiɓa Galile pi. Ziɓri ké tusiɓa Zude tu ni ɓa suki ya.. Ke ɓahri se : « Nzuk a a̧y ké mi hu̧hru ma law bi le, ɓa a ye munu. Í mgba ni kpu-kpuh tɔr keni. »
45Zudas ɓá ka̧h, sa gelaw mí ke loh si ta̧w Zezu, ke ɓahri : « Metere bi. »
Mí ke el hu̧hru ni ma law ye. 46Bale ku mgba ni. 47Nzuk a hani ké ƴo ziŋ Zezu lu mahwu̧y, mí ke te gaysuk gun-laɓ pihna ŋgernzuk fe puhna Ŋgerzah fekeɗ kuŋ. 48Zezu ba, ɓah ɓay hi̧ niri ɓahri : « I gi wuri ke mahwu̧yri ke kpuhri ɓay mgba mi keni wa, mi ɓa nzukbaa le wo ? 49Nam ke nam mi ƴo ziŋ wuri ɓil ila vul kani Ŋgerzah ƴo firma nzukri ɓay ye, mí i mgba mi ya. Wara le guri i mgba mi hi̧ ɓay ké na ɓil mbete Ŋgerzah laɓ ƴo gelu. »
50Kaŋ mí nzuk-dih fal yeri gbam ɗuk poŋ ni.
51Seke a hani si fal Zezu#14.51 Daɓa nzuk goso fe tunari ɓahri, seke ra ɓa Marki, nzuk-vbeh mbete-ay.. Ke pɔr mun ye ke ladara. Ku mgba ni. 52Mí ke poŋ ladara ra ma ndɔk woyri ɗuk fe ye mun ndikpo.
53Mí ku maŋ Zezu si pol ŋgernzuk fe puhna Ŋgerzah. Ŋgernzuk fe puhna Ŋgerzahri ke ŋgernzuk gun Izarayelri ke nzuk-sɔk mbete bolkusol Ŋgerzahri gbam mbu̧h hani. 54Piyer ba, mbehle sina fal woyri si rih ɓil kerpuh ŋgernzuk fe puhna Ŋgerzah. Ke kaɓ ziŋ gun-laɓ pihna ŋgernzuk fe puhna Ŋgerzahri mí ƴo nu̧h hɔrɔ.
55-56Ŋgernzuk fe puhna Ŋgerzahri ke ŋgernzuk-kuŋ salɓay a ɓoruri gbam ba, ku ƴah nzukri ké ɓay goh Zezu ke ɓay le, ŋgernzukri ɓá kuŋ salɓay hul kan tul ye. Mí ku ziŋ ful ya, ɓayu ké daɓa nzukri gi kuŋ ɓay ku̧ nzak ye kara ɓay woyri si mah hani ya. 57-58Mí nzuk a haniri ur kuŋ ɓay ku̧ nzak ye ɓahri se : « Nah lah ɓay ké ti̧h ké nzak ye ɓahri, a ye ke ɓay haw vul kani Ŋgerzah ké nzukri mboh-aw. Ɓil nam say mí ke él mboh vul a ɓoru ké nzukri mboh ya ƴo gelu. »
59Mí keni-aw kara ɓay woyri mah hani ya pi.
60Ŋgernzuk fe puhna Ŋgerzah ur síɓa ké sakra ŋgernzuk-kuŋ salɓayri. Ke vbi Zezu ɓahri : « Ɓay ké nzukri laɓ kan tul wo-ay ra wa, mu fér nzak woyri ya le wo ? »
61Zezu ƴo ɗeŋ. Ŋgernzuk fe puhna Ŋgerzah el vbi ni ɓay a ɓoru ɓáy ɓahri : « A wo mú-u ɓa Ŋgermbay, gun Ŋgerzah a ye ké nah ƴo dim ni ra le ? »
62Bale Zezu ɓahri : « Miƴori-ay. I ɓay ko gun nzuk pirmatul kaɓ ɓel Ŋgerzah nzuk huhrumun a luki ɓa ndɔk lakna ye. I kó gina ye ɓil ɗikmambam ur ke nunmbam. »
63Bale ŋgernzuk fe puhna Ŋgerzah gɔh gar mun ye tir. Ke ɓahri se : « Nah zɔklɔ mun wahri ɓay tul ɓay a lah-u ɓáy le ? 64I lah nzak ye, ke fah Ŋgerzah. I kúŋ salɓay ani le ? »
Bale riw woyri ku kuŋ salɓay hul kan tul ye. 65Nzuk a haniri titil sa-sam ku̧ nun ye. Ku ŋga̧h nun ye, ku mbal ni, mí ku el ɓahri : « Gun nzak pihna Ŋgerzah, mú ɓah ɓay ké-e ndoh ké nzak wo hi̧ náh lah. »
Gun-laɓ pihna ŋgernzuk fe puhna Ŋgerzahri kara vah ni ke vba̧na pi.
66-67Piyer ba, ke kaɓ fál siɓa ɓil kerpuh ŋgernzuk fe puhna Ŋgerzah ra bale, gun kaɓna a wu̧yu mbew gi. Ke ko Piyer ké ƴo nu̧h hɔrɔ zi̧h, mí ke ɓahri : « A wo ra mu ɓa bɔh sina nzuk Nasareɗ, a ye Zezu ra pi. »
68Mí Piyer ma̧y ɓay ɓahri : « Mi tu ɓay ké mu ɓah-ay ya. »
Mí ke loh si ƴo nzak ila [ba, mí tuhndoy ka-kah]. 69Gun kaɓna a wu̧yu ko Piyer, mí ke el ɓah ra ɓáy hi̧ nzukri ké ƴo ri-aw ɓahri : « Gunwo̧ro-aw ƴo sakra nzukawri pi. »
70Bale ke ma̧y ɓay ra ɓáy. Bol falu ndi̧ nzukri ké ƴo ta̧w Piyer ra ɓahri : « A wo mu ƴo ke nzukaw gaŋ ɓayu ké tusiɓa wo ɓa Galile. »
71Dale ke hah hul ɓahri : « Bɔk mbew bi gel-tu nzuk ra ya. »
72Sa gelaw mí tuhndoy mgbal el ka-kah a bɔk seɗe-u, mí Piyer ker si tul ɓay ké Zezu ɓahri, tuhndoy mgbal ta ka-kah bɔk seɗe ya dih, mí a ye ke má̧y ɓay tul Zezu bɔk say ɓahri, ke tu ni ya. Piyer ker ɓayu kaŋ, mí ke ɗer rew.

Currently Selected:

Mbete Marki 14: SIAFNK

Highlight

Share

Copy

None

Want to have your highlights saved across all your devices? Sign up or sign in