Mbete Matiye 23
23
1Wara mí Zezu el sɔɓ mun ye ɓah ɓay hi̧ daɓa nzukri ke nzuk-dih fal yeri ɓahri : 2« Nzuk-sɔk mbete bolkusol Ŋgerzahri ke fariziri, ku kaɓ gel kaɓna metere firma nzukri bolkusol Ŋgerzah ɓil mbete vbehna Moyiz. 3Kaŋaw mí ɓay Moyizri riw kú-u ɓah hi̧ wuri ra, í laɓ, í ƴo tulu. Mí í mbi siŋ sina woyri ya. Ɓay Moyiz ké ti̧h ke nzak woyri ra ku ƴo tulu ya. 4Ku ƴo ŋga̧h sukna a yih-u dik dik ɓu tul nzukri mí gun ndɔk mbew kara ku sa laŋ ɓay ɗer keni ya. 5Fe laɓna woyri-aw riw, ku laɓ ké nun nzukri hi̧ ku ko kona ma tul woyri. Ku ƴo sa̧h bolkusol Ŋgerzah ɓa gazi#23.5 Ɓay tu ɓay gazi ké ziɓri sa̧h, í ki̧ Mbete Exode 13.9-16 ke Mbete Deutéronome 6.8 ke 11.18. ah gbaɓla gbaɓla ŋga̧h nzak pol woyri hi̧ nzukri ko niri ɓa nzuk-tu ɓay Ŋgerzah. Ku hi̧ sal ké na nzak gar woyri kara na tuksa tuksa pi#23.5 Ɓay tu ɓay sal ké ziɓri sa̧h ké nzak gar, í ki̧ Mbete Nombres 15.38, 39 ke Mbete Deutéronome 2.12. . 6Ku yih kaɓ gel kaɓna riŋ ɗina ké gel ti̧hmbih. Ku yih kaɓ gel kaɓna ŋgernzukri ké vul misoŋ. 7Ku yih ɓay hi̧ nzukri ɓá vah niri ndɔk seɗe seɗe ké gel daɓa. Ku yih ɓay lah nzukri ɓá ɗi niri, “Metere bi, metere bi wo”.
8Mí a woiri ba, í hi̧ nzukri ɓá ɗi wuri ke riŋ ɗina “metere” ya, ɓayu ké metere woiri ɓa mbew yaŋ. Gbam woiri i ɓa yi̧nri, i ɓa sa̧w mbew. 9Í ɗi nzukri ke riŋ ɗina “bah” ya, ɓayu ké bah woiri mbew yaŋ ɓa a ye nzuk nunmbam. 10Í hi̧ nzukri ɓá ɗi wuri ke riŋ ɗina “nzuk-nda pol” ya ɓay fe le, Ŋgermbay mbew yaŋ mí ɓa nzuk-nda pol woiri. 11Ŋgernzuk ké sakra woiri le, ke ná ɓa gun-laɓ pihna hi̧ wuri. 12Nzuk a suŋ suŋ ké ɔr tul ye le, tul ye ɓay ik ma siɓa. Nzuk a a̧y ké ɗiŋ tul ye ba, tul ye ɓay ɔr ma síɓa.
13Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, lakele-rih ɓil lák mbay a nzuk nunmbam na ndɔk woiri, mí i dar nzakful gbik ké nun nzukri ɓayu ké a woiri i rih ri ya pi, i gboh ful rihna nzuk a ɓoruri ké yih rih ri pi. 14#23.14 Mbete sa̧w nzak a haniri ɓa ŋgi̧-u ta ke gel ki̧na-ay ya.
15Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, i ha̧rma tusiɓa gbam, mí i kal tul mahmbihri ke lawkɔr-ri ɓay ziŋ sa̧w nzuk a ɓoru ké ɓay sɔɓ mun ye ti̧h ɓa nzuk misoŋ eŋ wuri. Nzuku ti̧h ɓa nzuk misoŋ bale, ke el ti̧h ɓa nzuk-si ɓil hɔrɔ mah hani ziŋ wuri bin.
16Koseh ɓa nzuku a woiri, i ɗi mun woiri ɓa nzuk-mgba ka̧w ra̧wri, mí i ɓa ra̧w. I ƴo ɓahri se, nzuk hah mun ye ke riŋ vul kani Ŋgerzah le, fe hahna ye ɓa fe hahna a ndikpo. Mí nzuk hah mun ye ke riŋ lari lɔr kú-u roŋ fe pihna nzuk fe puhnari ké na ɓil vul kani Ŋgerzah le#23.16 Ɓay tu ɓay fe pihnari kú-u puh keni Ŋgerzah ɓil vul kani le, í ki̧ Mbete Exode ur ke mah-u 25., nzuku ɓá laɓ kandɔk ké-e hah gaŋ ba. 17A woiri i ɓa kɔk nzukri, i ɓa ra̧wri gaŋ. Ké sakra lari lɔr ke vul kani Ŋgerzah ké hi̧ lari lɔr pu mah nun Ŋgerzah ra wa, fe a suŋ mí mba tul a ɓoru le ? 18Mí i el ɓah ra ɓáy ɓahri se, nzuk hah mun ye ke riŋ gel kani Ŋgerzah le, fe hahna ye ɓa fe hahna a ndikpo. Mí nzuk hah mun ye ke fe puhna kú-u puh tul gel kani le, nzuku ɓá laɓ kandɔk ké-e hah gaŋ ba. 19Ra̧wri, ké sakra fe puhna ké na tul gel kani ke gel kani ké hi̧ fe puhna pu mah nun Ŋgerzah ra wa, fe a suŋ mí mba tul a ɓoru le ?
20Kaŋaw mí nzuk hah mun ye ke riŋ gel kani Ŋgerzah le, ke hah mun ye ke riŋ gel kani pi ke fe puhnari gbam kú-u puh tul gel kani pi. 21Nzuk hah mun ye ke riŋ vul kani Ŋgerzah le, ke hah mun ye ke riŋ vul kani pi ke riŋ Ŋgerzah nzuk ké kaɓ ɓil vul kani-u pi. 22Nzuk hah mbam le, ke hah mbam ke riŋ bohro mbay nunmbam ra pi, ke hah mbam ke riŋ Ŋgerzah ké kaɓ ɓa mbay bohro ra pi.
23Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, i ƴo hal gay-kar feri ké mah gelu ɓoɗ ɓoɗ#23.23 Riŋ gay-kar feri kú-u vbeh riŋuri ɓil mbete sa̧w nzak mí na-ay : A mbewu ɓa menthe, a ɓoru ɓa fenuye, a ɓoru ɓáy ɓa kumin., i ƴo ŋga̧h ke gelu gelu ɓa gel boh boh, mí i mbi mbew mbew dim keni Ŋgerzah, mí mahɓay Ŋgerzah ké ŋger mba ɓay a ɓoruri-aw le, i poŋ ma fal. Sal in ké Ŋgerzah ŋga̧h ra, i ƴo tulu ya. Mgbá in ziŋ nzukri, i sa-a. Ƴó ziŋ Ŋgerzah ke law mbew, i ƴo tulu ya. Dím Ŋgerzah ke fe ziŋna-uri su-su le, póŋ mahɓay Ŋgerzah ma fal ɓá ta-a pi. 24I ɓa ra̧w ké mgba ka̧w ra̧wri gaŋ. I ƴo ɗɔk mbih dara mí i nzo rɔkɔ kay ɓá rih ɓil woiri. Mí i ƴo tu̧h zɔŋzɔŋ#23.24 Zɔŋzɔŋ ke nzak faraŋse ɓa chameau. Bolkusol Ŋgerzah hah ziɓri sú̧ hay zɔŋzɔŋ. Ɓay tu ɓayu, í ki̧ Mbete Lévitique 11.4. ke kuɓru-u ƴɔɗ ma ɓil woiri.
25Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, i ƴo wɔk fal koɓ ke fal tasawri ɓa teh-u kaɗ kaɗ, mí fál ɓilu bale, mbah ɓa law si̧hna ke law bahu̧hmi. 26Farizi, mu ɓa ra̧w. Mú wɔk ɓil koɓ ɓa teh-u kaɗ kaɗ dara fal koɓ ɓá teh hi̧ mu ɓáy.
27Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, i na kandɔk tupal kú-u roŋ falu ke laso hi̧ pu kpa̧h kpa̧h. Falu su kona, mí fál ɓilu bale, mbah ɓa huhru a puŋuri ke sam feri ké fa̧h mun zir zir. 28Kaŋ pi mí a woiri i ƴo sɔk mun woiri ɓa nzukri ké tu Ŋgerzah ɓa záh woiri mí ɓil law woiri le, ɓay woiri mu̧h na ɓoɗ, i ɓa nzuk-poŋ bolkusol Ŋgerzah.
29Kúy. A woiri nzuk-sɔk mbete bolkusol Ŋgerzahri ke fariziri, i ɓa nzuk-mu̧h ketina. Koseh ɓa nzuku a woiri ɓay fe le, i mboh tupal gun nzak pihna Ŋgerzahri ké zih woiri i lewsa̧, i zel tupal nzukri ké tu Ŋgerzah ɓa záh woyri pi. 30I ɓahri se, i ƴo ra ziŋ ziihri ke sew kú-u i gun nzak pihna Ŋgerzahri-aw le, i ta mbu̧h ɓil ɓay woyri ɓay i nzukri-aw ya.
31Kaŋaw mí nzak woiri te-teh ɓay tul woiri ke mun woiri ɓahri se, i ɓa gun nzuk-i gun nzak pihna Ŋgerzahri ra. 32A woiri gaŋ mí í ɔh wuri pihna zih woiri ké toŋ ra. 33A woiri mi̧hri soy, i láɓ ani ɓay hi̧ salɓay hul ɓá lu ké tul woiri le ? 34Sa̧wu mí mi ƴo pih gun nzak pihnari ke nzuk nun a mgbururi ke nzuk-sɔk mbete bolkusol Ŋgerzah a ɓoruri, í ko. Ké sakra woyri, i ɓay i a haniri, i ɓay ɓar a ɓoruri ké tul kpuh vbatay. A haniri ba, i ɓay vboŋ niri ké vul misoŋ woiri. I ɓay faŋ fal nzuk a ɓoruri ke puh puh ɓay laɓ niri koseh. 35Kaŋaw mí hul nzuk a lewsa̧ri ké ƴo mbew ke Ŋgerzah ra titilu ke tul Abel ké tu Ŋgerzah ɓa záh ye kpu̧ru ka̧h tul Zakari gun Barasi nzuk a lewsa̧ ké i i#23.35 Zakari-ay ɓa Zakari ké vbeh Mbete Zacharie. ni ɓil ila vul kani Ŋgerzah ké haŋsekle gel fe puhna ke vul kani Ŋgerzah ra, salɓayu mbu̧h gbam mí mgba tul woiri. 36Ɓa ketina, mi ƴo ɓah ɓayay hi̧ wuri, ɓay hul nzukri-aw gbam mgba tul gun tukala-ayri.
37Zurusalem, Zurusalem wo, a wo puh ké Ŋgerzah hi̧ vul ye kan ri, mí gun wori ƴo i gun nzak pihnari ké Ŋgerzah pih niri, ku vbuk nzuk a ɓoruri ké Ŋgerzah pih niri ke kasaw i pi. Bɔk ka̧h ani mí-i yih ɓay mbu̧h gun wori kandɔk mah ndoy ké ƴo mbu̧h gun yeri, mí ku sa-a. 38Í ko. Ŋgerzah poŋ gel kani ye ndikpo ɓa kaŋpele wara. 39Ɓayu ké mi ƴo ɓah ɓayay hi̧ wuri, i ta ko mi mba kpu̧ru ka̧h seh ké í tu mi ɓahri, mgbɔkɔ Gaŋ tul feri riw ku̧ tul bi ké mi gi ke riŋ ɗina ye. »
Currently Selected:
Mbete Matiye 23: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
