Mbete Matiye 15
15
1Wara mí nzuk-sɔk mbete bolkusol Ŋgerzahri ke fariziri ur ke Zurusalem gi ta̧w Zezu. Ku ɓah ɓayay hi̧ ni : 2« Ɓay fe mí nzuk-dih fal wori zo tul fe laɓna sa̧w ziihri le ? Ku toŋ su̧ fe dan wɔ́k ndɔk woyri hi̧ ku teh ya. Lú suya dara kú su̧ fe ɓáy ra, ɓayu ko niri ya ley ? »
3Zezu ba, ɓah hi̧ niri ɓahri : « Ɓay fe mí a woiri i zo tul ɓay Ŋgerzah ɓay kaɓ tul sa̧w fe woiri le ? 4Bolkusol Ŋgerzah ɓahri : “Mú hȩk bah wo ke mah wo. Nzuk ɓah ɓay a suya-u ziŋ bah ye mini mah ye le, kú i ni.” 5-6Mí a woiri i el ɓahri, gun ta hȩk nzuk-mbuŋ ni ya, gelke gun ɓah hi̧ bah ye mini mah ye ɓahri : “Fe ziŋna-ay ké mi ɓay so wuri keni ra, mi mbi hi̧ Ŋgerzah da.” A woiri i mbi bolkusol Ŋgerzah sɔɓ ɓa fe a kɔku ɓay tul fe sa̧w woiri. 7Nzuk-mu̧h ketinari, ɓay ké Ŋgerzah ndoh ké nzak Ezay gun nzak pihna ye lewsa̧ mgba tul woiri ɓa ketina :
8-9 “Gun Izarayelri-ay, ku hȩk mi ke nzak, law woyri le ɗi-ɗih ziŋ mi.
Ku dim mi gɔr.
Fe firma kú-u firma nzukri le ɓa kerɓay nzuk pirmatulri.” »
10Mí Zezu ɗi daɓa nzukri gi ta̧w ye, ke ɓah hi̧ niri ɓahri : « Í lah ɓayay ɓa teh-u, í hi̧ ɓayu ɓá guh law woiri. 11Fe ké nzuk su̧ si rih ɓil ye ta sih law nzuku ké nun Ŋgerzah ya. Wara le ɓay ké nzuk ɓah ke nzak ye mí hi̧ Ŋgerzah ko ni ɓa fe a kala. »
12Wara mí nzuk-dih fal Zezuri loh ma ta̧w ye ɓahri : « Mu tu-tu gaŋ le ? Ɓay ké mu ɓah-aw ra mí hi̧ fariziri mgba mu ɓa kɔkɔ. »
13Bale ke ɓahri : « Kpuhri gbam ké bah bi ké nunmbam ma̧ ya le, ke ɓay lur ku̧ kpah. 14Í poŋ niri ma sa̧. Nzuk-sɔk ful Ŋgerzah hi̧ nzuk a ɓoruri-aw, ku ɓa ra̧w. Ra̧w mgba ka̧w ra̧w mbaŋ ye le, seɗe mbɔk woyri ku lih ku̧ ɓil lɔkɔ. »
15Bale Piyer ɓahri : « Mú ten sa̧w lawɓay ké mu ɓah ra hi̧ na, náh lah. »
16Mí ke ɓahri : « Ka̧h aŋay, a woiri gaŋ kara guh law woiri ya pi le ? 17I tu ya lo ? Fe su̧na a suŋ suŋ gbam ké nzuk su̧ kal rih ɓil ye mí el ti̧h ɓa vbi̧ri ku̧ kpah. 18Ɓay ké ti̧h ke nzak nzuk ba, sa̧wu ur ke law nzuk. Kaŋ mí suya ké nzuk ɓah mí hi̧ Ŋgerzah ko nzuku ɓa fe a kala. 19Sa̧w kerɓay a pipiri-uri ti̧h ke ɓil law kandɔk í nzuk, mbí wu̧y wo̧ro, láɓ nunpuki, ríh riɓa, kúŋ ɓay ku̧ nzak nzuk, ɓáh suya ke riŋ nzuk. 20Feri-aw mí hi̧ Ŋgerzah ko nzuk ɓa fe a kala. Ta ɓa sú̧ fe dan wɔk ndɔk mí hi̧ law nzuk sih ké nun Ŋgerzah ya. »
21Zezu ur tɔr ma fál Tir ke Sidoŋ ké tusiɓa Kana#15.21 Sa̧w nzukri ké Tir ke Sidoŋ na ɓoɗ ke gun Izarayelri. . 22Mí í ko wu̧y tusiɓa-aw gi ta̧w Zezu. Ke vba̧ nzak ɓeleŋ ɓeleŋ ɓahri : « Gaŋ a luki, gun zih Daviɗ, kɔkrɔya, mú mgba in ziŋ mi ge. Gun bi a wu̧yu mí záh ƴo laɓ ni mɔr mɔr. »
23Zezu fer ɓay ya. Nzuk-dih fal yeri ba, loh ma ta̧w ye, a ge ge le, gi ke kerɓay ye kerɓay ye ɓahri : « Mú ni̧h wu̧yay ɓá tɔr ɓay fe le, ke toŋ vba̧ nzak tul wah. »
24Bale Zezu ɓahri : « Nzuk-pih mi pih mi si ta̧w sa̧wnzuk a ɓoruri ya. Ke pih mi si ta̧w sa̧w bi gun Izarayelri kú-u ɓa samiri ké zi-zi. »
25Wu̧y ra loh ma ta̧w Zezu, mí ke huk siɓa ɓahri : « Gaŋ a luki, í ya̧ ta̧hna bi ge. »
26Zezu ba, ɓahri : « Mbí fe su̧na gunri vbu siɓa hi̧ gun gayri suya. »
27Bale wu̧y ra ɓahri : « Gaŋ a luki ɓah ketina ɓayu ké gun gayri dam bukma fe su̧na ké ga̧y ku̧ siɓa ké gel fe su̧na gaŋ woyri. »
28Wara mí Zezu yih nzak ye ɓahri : « Wu̧y, soko wo. Law wo ké te sa tul bi ŋgi̧ mbamba. Fe-u ɓá laɓ kandɔk ké mu yih. »
Kaŋ mí záh ra ti̧h poŋ gun wu̧y ra hi̧ ke tu mun ye ke sa̧wseh-u-aw.
29Zezu poŋ tusiɓa ra si ke ɓel mahmbih Galile. Ke hil tul kasaw, mí ke kaɓ siɓa. 30Daɓa nzukri ɓa ŋgi̧-u fa̧h senari gi keni ma ta̧w ye. Ku gi ke kpereri, ra̧wri, nzukri ké ndɔk woyri hu yɔh, mbikiri, sam senari ɓoɗ ɓoɗ ɓa ŋgi̧-u kara ku gi keni ku̧ pol Zezu. Mí ke gah niri. 31Daɓa nzukri-aw ko mbikiri ɓah ɓay pi, lah ɓay pi, kpereri si sina, nzukri ké ndɔk hu yɔhri el kpuh kpaŋ, ra̧wri ko gel. Fe-u na niri ɓa saŋ, mí ku loŋ riŋ Ŋgerzah záh gun Izarayelri.
32Zezu ɗi nzuk-dih fal yeri gi bale, ke ɓahri : « Law bi sa̧h mi ɓay tul daɓa nzukri-ay ɓay fe le, laɓ nam say wara kú-u ƴo ziŋ mi dan sú̧ fe. Mi sa hi̧ niri kú tɔr ɓil ɗaka ya rɔkɔ kú lih ɗaka ké ful. »
33Mí nzuk-dih fal yeri ɓahri : « Gelay ɓa ɓil suy. Ké fál suŋ mí nah ɓay ziŋ peŋ ké ɓay mah gel ɗaka nzukri-ay le ? »
34Mí Zezu ɓahri : « Peŋ ka̧h ani mí na ta̧w woiri le ? »
Bale ku ɓahri : « Peŋ ɓa toŋndɔk say ke nzuy ndi̧. »
35Zezu hi̧ nzukri kaɓ siɓa. 36Ke ya̧ peŋ ké toŋndɔk say ke nzuy ra. Ke el ke tumbɔl hi̧ Ŋgerzah, ke haw, mí ke hi̧ nzuk-dih fal yeri wal hi̧ daɓa nzukri ra. 37Nzukri gbam su̧ peŋ ra mbah ɓil woyri. Tɔr fe su̧na toŋ, mí ku mbu̧h mbah tɔlɔ a baw baw ɓa toŋndɔk say. 38Tul wo̧rori ké su̧ peŋ ra ɓa sɔɗ sɔɗ boh gel niŋ (4.000) dan ki̧ wu̧yri ke gunri. 39Zezu poŋ daɓa nzukri ra tɔr ba, mí ke rih kaɓ ɓil kumbon. Ku tɔr si fál kɔr Magadan.
Currently Selected:
Mbete Matiye 15: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
