Mbete Matiye 11
11
1Zezu hi̧ bolnzak hi̧ nzuk-dih fal ye a boh falu seɗeri ra ɔh bale, ku tɔr si ka-kah ɓay gina lák mbay Ŋgerzah ké puh gun Izarayelri. A ye kara ke si puh ke puh ƴo firma gun Izarayelri ɓay lák mbay Ŋgerzah pi. Ke ka-kah ɓayu hi̧ niri ku lah.
2-3Za̧h batisi ba, na vul mgbal, mí mberem fe laɓna Ŋgermbay toh suk ye. Dale ke pih nzuk-dih fal yeri si ta̧w Zezu, mí vbi ni ɓay ɓahri : « A wo mú-u ɓa Ŋgermbay ké Ŋgerzah wahɓay pih ni hi̧ na ziɓri ra, ké ɓay gi lák mbay tusiɓa gbam mini nah geŋ nzuk a ɓoru le#11.2-3 Vbiɓay ké Za̧h vbi ra sɔk keni kerɓay ziɓri. Ku geŋ Ŋgerzah ɓá pih Mbay ziɓri ké ɓa Ŋgermbay gi. Ŋgermbay woyri ra ɓay lak mbay ké tusiɓa gbam. Wara mí Zezu sɔk ɓahri, gina Ŋgermbay a titilu na ɓay i ŋgerna mbay záh tukala. Sa̧wu mí a ye ke ni̧h záhri ké tul nzukri, ke gah nzukri, ke hi̧ nzukri ti̧h ke puh záh. Pihna Ŋgermbay ɓa sél nzukri ké ɓil ndɔk záh tukala dara ɓáy. Aŋay ke i ŋgerna mbay záh tukala da mí nam ƴo gina ɓay ké ɔh ŋgermu-aw. Í ki̧ Mbete Ten sa̧wɓay 20 ɓay tu ɓayu. ? »
4Zezu yih nzak woyri ɓahri : « Í si ɓah hi̧ Za̧h ɓá lah ɓay feri-ay ké i lah ke suk woiri, ké i ko ke nun woiri ɓahri se, 5ra̧wri ko gel, kpereri si sina, mun nzuk ndɔɓeri teh mí saŋna-si gel kani Ŋgerzah lu ké tul woyri, mbikiri lah ɓay, hulri el kaɓ ke nun, ko̧hkori lah ɓaysuki Ŋgerzah ma law#11.5 Í mgba Mbete Esaïe 35.5-6 ke 61.1 tuh ke gel ki̧na-ay.. 6Pol tehna teh tul nzuk ké riŋ bi ti̧h ɓa ndaw lihna ye ya. »
7Nzuk-dih fal Za̧h batisiri tɔr ba, mí Zezu ɓah ɓay tul Za̧h batisi hi̧ daɓa nzukri ɓahri : « Sina woiri ɓil lawkɔraw, i si ɓay ko fe le ? I si ɓay ko sihri ké kuna laŋ mgba̧ya mgba̧ya lo ? 8Uwa. I si ɓay ko fe le ? I si ɓay ko nzuk ké ndoh gar lari a ndu̧yu mgbelek mgbelek le wo ? Í ko. Nzukri ké ndoh gar lari a kandɔkaw kaɓ kerpuh mbayri. 9Uwa, i si ɓay ko fe le ? I si ɓay ko gun nzak pihna Ŋgerzah le wo ? I si ɓay ko gun nzak pihna Ŋgerzah gaŋ. Mí-i ƴo ɓah hi̧ wuri ɓahri se, Za̧h ra ke mba tul gun nzak pihna Ŋgerzah a ɓoruri mba-mba. 10A ye ra Ŋgerzah vbeh ɓay tul ye hi̧ zih woiri ɓahri, í ko, ke pih gun nzak pihna ye ƴo pol woiri#11.10 Í mgba Mbete Exode 23.20 tuh ke gel ki̧na-ay. Ɓayu vbeh ɓahri : Í ko, mi pih gun nzak pihna bi si ƴo pol wo. Ŋgerzah ƴo ɓah ɓay hi̧ gun Izarayelri. Ke ɗi niri « wo » kandɔk ké-e ɗi nzuk mbew. Sa̧wu mí nzuk-sɔɓ mbete vbeh ɓahri, woiri ɓay hi̧ lahna-u ɓá se ya. ɓay lek ful geŋ ni#11.10 Í mgba Mbete Malachie 3.1 tuh ke gel ki̧na-ay. Malachie vbeh ɓahri : A ye ke ɓay lek ful geŋ mi. Matiye vbeh ɓahri : a ye ke ɓay lek ful geŋ mu. Ŋgerzah ƴo ɓah ɓay tul ye ɓil Mbete Malachie. Ke ƴo ɓah ɓay Ŋgermbay ɓil Mbete Matiye kandɔk ké-e Ŋgerzah ti̧h ɓa nzuk pirmatul mí ɓa Ŋgermbay Zezu. Sa̧wu mí nzuk-sɔɓ mbete vbeh ɓahri, ni ɓay hi̧ lahna-u ɓá se ya.. 11Ɓayaw ɓa ketina, mí-i ƴo ɓah hi̧ wuri ɓahri se, ké sakra nzuk pirmatulri kú-u mbuŋ niri ké tusiɓa gbam, nzuk mbew ké mba tul Za̧h ta-a. Mí gun a mah gelu ké ɓa gun puh lakna a nunmbam mí mba ni. 12Ur ke sew Za̧h batisi ka̧h guri-ay, lák mbay a nunmbam ra nzuk law mgbɔrɔri#11.12 Nzukri ké ka̧h ta̧w Za̧h ɓay ké soh niri mbih batem a mbi law ɓa nzukri ké tu suya woyri kandɔk nzuk-mbu̧h lampohri, wu̧y nunpukiri, nzuk suya a ɓoruri ɓa ŋgi̧-u pi. mí ƴo nah-u ke ŋgere ŋgere#11.12 Mahful-sɔɓ sa̧w nzak ké gel ki̧na-ay ɓa seɗe. Mahful a seɗe-u mí na-ay : lák mbay a nunmbam ƴo ya̧ gel ke ŋgerna. . 13Ɓay ra Ŋgerzah hi̧ Moyiz vbeh ɓil mbete lewsa̧, ke hi̧ gun nzak pihna ye a lewsa̧ri vbeh ɓil mbeteri pi gi ka̧h sew Za̧h batisi, ke hi̧ ni ka-kah ɓayu pi. 14Mí i mgba ɓahri, Za̧h ra mí ɓa Eli gun nzak pihna Ŋgerzah a lewsa̧#11.14 Ɓay tu ɓay Eli le, í mgba Mbete Malachie 4.5 ke Mbete Ten sa̧wɓay 11.3-6 tuh ke gel ki̧na-ay. Ɓay Eli na ɓil mbete Mbay 2 Rois Mah-u 2 pi. ké-e ɓay gi-u dara Ŋgermbay ɓay gi ɓáy ra le, su-su. 15Nzuk ké ƴo ke suk-lah ɓay le, ké lah.
16-17Sam nzuk a suŋri mí-i mgba tuh ke gun tukala-ayri le ? Ku eŋ gunri ké kaɓ ndiseŋe ƴo yi̧-yi̧hna. Ku ɗi haniri ɓahri : “Nah ul ti̧w, mí i sa nda nday ya. Nah ɗi siŋ rew hul, mí i sa vba̧ law woiri zaɗ zaɗ ya.” 18Kaŋaw mí Za̧h gi. Ke lak huru ya, ke nzo yim ya, mí nzukawri ɓahri, eh ɗuk ni. 19Gun nzuk pirmatul ba, gi. Ke su̧ fe, ke nzo fe le, ku ɓahri, í ko, ke ɓa bahu̧hmi, ke ɓa nzuk-ta yim. Ke mgba ya̧h ziŋ nzuk-mbu̧h lampohri ke nzuk suya a ɓoruri pi. Mí pihna laɓna sa̧w ru̧na Ŋgerzah teh ɓay ketina sa̧w ru̧na ye. »
20Wara mí Zezu tȩhre nzuk puh a a̧yri kú-u ko daɓa fe saŋri ké-e laɓ ɓay fe le, ku sa mbi law woyri ké tul suya ma fal el kan law tul ye ya ɓahri : 21« Kúy, gun Izarayelri a woiri ziɓri ké Korazin, ké Beɗsayda, koseh ƴo geŋ wuri ɓay fe le, sa̧wnzuk a ɓoruri ké Tir ke Sidoŋ#11.21 Ɓay tu ɓay Tir ke Sidoŋ í ki̧ Mbete Esaïe 23, Mbete Ézéchiel 26, Mbete Amos 1.9-10. a lewsa̧ ku ko ra fe saŋri ké ƴo laɓ ké ɓil Korazin ke Beɗsayda le, nzuk Tir-ri ke Sidoŋri-aw ɓay ndoh gar seh, ku ɓay buklu mun woyri ɓil seh hɔrɔ, ku mbí law woyri ké tul tukala ma fal el kan law tul bi. 22Keni-aw gaŋ kara mi ƴo ɓah ɓayay hi̧ wuri, nam-kuŋ salɓay a luki le, salɓay suya ké ku̧ tul woiri nzuk Korazinri ke nzuk Beɗsaydari ra ɓay kpuh mba salɓay suya ké ku̧ tul nzuk Tir-ri ke Sidoŋri mba-mba. 23A woiri nzuk Kapernayumri, i ker ɓahri, tul woiri ɓay gaŋ kal tul a ɓoruri si ka̧h nunmbam ley ? Hay. Tul woiri ɓay gɔr malak ma puh Hulri ɓay fe le, nzuk a lewsa̧ri ké Sɔdɔm#11.23 Ɓay tu ɓay Sɔdɔm ke Gɔmɔr í ki̧ Mbete Sa̧w fe 19.24-29. ko ra fe saŋri ké mi laɓ ké sakra woiri nzuk Kapernayumri le, ku ta ziŋ ɓeɓna ya, mí ku ɓay ƴo ri ka̧h guri-ay. 24Keni-aw gaŋ kara mi ƴo ɓah ɓayay hi̧ wuri ɓahri se, nam-kuŋ salɓay a luki le, salɓay suya ké ku̧ tul woiri nzuk Kapernayumri ɓay kpuh mba salɓay suya ké ku̧ tul nzuk a lewsa̧ri ké Sɔdɔm mba-mba. »
25Sa̧wseh-u bale Zezu el ɓahri : « Baah, a wo ké mu ɓa Gaŋ tul feri gbam ké nunmbam pi, ké tusiɓa pi riŋ ɗina wo mgbe ké nzak bi ɓay fe le, mu mu̧h ru̧na wo ké nun nzuk ru̧nari, ké nun nzuk kerlawri pi. Gunri ba, mu hi̧ ku tu sa̧wu. 26Riŋ ɗina wo mgbe ké nzak bi gaŋ ɓay fe le, baah, mu ko fe laɓna-u su-su ké nun wo.
27Bah bi ndoh feri riw ɓil ndɔk bi. Nzuk mbew ké tu gun tu ta-a, sa ɓa baah mí tu gun ye. Nzuk ké tu baah tu ta-a, sa ɓa gun mí tu ni. Nzukri ké gun ƴo ke law rihna ɓay kú tu baah, mí ku tu ni. 28Í gi wuri ma ta̧w bi, a woiri ké i ta̧h kpu̧y, ké sukna yih kal tul woiri. A bi mi hí̧ wuri í mgba ta̧hma. 29-30Í gi mbi zuk bi suk ziŋ mi. Í tih wuri si sina ziŋ mi ɓay fe le, law bi voh lɔm, mi ɗiŋ tul, mí i ɓay mgba ta̧hma. Zuk bi ra ɓa fe-ti̧h suk. Sukna bi yih ya tafalaw. »
Currently Selected:
Mbete Matiye 11: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
