Mbete Luk 9
9
1Zezu ɗi nzuk-dih fal ye a boh falu seɗeri, mí ke hi̧ niri huhrumun, ke hi̧ niri ŋgerna ɓay mba tul záhri, tul senari pi hi̧ kú gah nzukri. 2Mí ke pih niri, kú si ka-kah ɓay lák mbay Ŋgerzah, kú gah senari. 3Ke ɓahri se : « Sina woiri le, í si ndɔk ndikpo. Í si ke ka̧wkpuh sina ya, ɓɔl ɓay goŋ fe ya, fe su̧na ya, lari ya, gar seɗe ya pi. 4Kerpuh ké mgba wuri gahru le, í na kerpuh-u ka̧h nam tɔrna woiri. Í ti̧h si ɓil puh-aw ka-kah ɓay lák mbay Ŋgerzah. 5Puh a a̧y ké nzukri sa mgba wuri gahru ya le, tɔrna woiri ke puh-aw, í kpoh kasal bɔk woiri sɔk keni tehɓay ɓahri, salɓay suya woyri mgbahla wuri ya. »
6Kandɔkaw mí nzuk-dih fal ye a boh falu seɗeri tɔr si ka-kah ɓaysuki lák mbay Ŋgerzah ke puh puh. Ku gah nzuk senari ké gelri gbam.
7Mberem ɓay fe saŋri-aw toh suk Eroɗ mbay tusiɓa Galile dale, kerɓay zukru ni ɓay fe le, nzuk a haniri ƴo ɓahri, Za̧h batisi mí ti̧h ke puh záh. 8Nzuk a ɓoruri ba, ɓahri, Eli gun nzak pihna Ŋgerzah a lewsa̧ mí ti̧h nun nzukri. Nzuk a ɓoruri ɓáy ɓahri, gun nzak pihna Ŋgerzah a ɓoru mí ti̧h ke záh. 9Mbay Eroɗ ɓah ɓay ye ɓahri : « Za̧h ra, mi kuŋ tul ye ba wa, nzuku-aw ɓa a ge ɓáy mí-i lah ɓay fe saŋ yeri-aw le ? » Mí ke ƴah ɓay ko Zezu.
10Gun nzak pihna Ŋgermbay a boh falu seɗeri el ke gel ka-kah ɓay lák mbay Ŋgerzah gi mbu̧h hani. Ku ki̧ fal fe laɓna woyri gbam ke bamu bamu hi̧ Zezu lah, mí ke fa̧h niri tɔr si fál Beɗsayda puh a hani-u. 11Daɓa nzukri tu tɔrna woyri-aw, mí ku dih doro woyri. Mí Zezu ya̧ niri ndɔk seɗe. Ke ƴo ɓah ɓay lák mbay Ŋgerzah hi̧ niri. Senari ba, ke gah niri.
12Seh ƴo vohna. Nzuk-dih fal ye a boh falu seɗeri loh ma ta̧w ye, mí ku ɓahri : « Mú sel daɓa nzukri-ay hi̧ kú tɔr si puhri ké ɗoŋ niri-ay, kú lu ta̧hma, kú su̧ fe ɓay fe le, gelay nah ƴo ɓil suy. »
13Dale ke ɓah hi̧ niri ɓahri : « A woiri gaŋ, í hi̧ niri fe su̧na, kú su̧. »
Mí ku ɓahri : « Peŋ ɓa ndiɓi, nzuy ba, ɓa seɗe mí na-ay wa. Náh si ra yeh fe su̧na kara ɓay mah gel ɗaka nzukri-ay le wo ? »
14Ŋgi̧na wo̧rori laɓ sɔɗ sɔɗ boh gel ndiɓi (5.000). Mí Zezu ɓah hi̧ nzuk-dih fal yeri ɓahri : « Í mgba niri, kú kaɓ siɓa zuɓ zuɓ ɓa bon ndiɓi bon ndiɓi. »
15-16Kandɔkaw mí nzuk-dih fal yeri hi̧ nzukri kaɓ siɓa zuɓ zuɓ. Bale Zezu ya̧ peŋ ké ndiɓi ke nzuy ké seɗe ra. Ke ɔr nun ma síɓa, mí ke lu mgbɔkɔ ku̧ tulu. Ke gɔh peŋ ra, ke hi̧ nzuk-dih fal yeri wal hi̧ nzukri su̧. 17Nzukri riw su̧ fe mbah ɓil woyri poŋ tɔru. Ku mbu̧h tɔr fe su̧na ra mbah tɔlɔ ɓa boh falu seɗe.
18Nam a hani-u, Zezu kaɓ ke hȩk ye ƴo ɓah ɓay ziŋ Ŋgerzah. Nzuk-dih fal yeri ƴo ɗih ya ziŋ ni bale, ke vbi niri ɓayay : « Daɓa nzukri ɗi mi ɓa sam nzuk a suŋ le ? »
19Ku yih nzak ye ɓahri : « Nzukri ɗi mu ɓa Za̧h batisi. Nzuk a haniri ɗi mu ɓa Eli gun nzak pihna Ŋgerzah a lewsa̧. Nzuk a ɓoruri ba, ɗi mu ɓa gun nzak pihna Ŋgerzah a hani ké ti̧h ke záh. »
20Mí Zezu el vbi niri ɓahri : « A woiri ba, i ɗi mi ɓa sam nzuk a suŋ le ? »
Bale Piyer yih nzak ye ɓahri se : « Mu ɓa Ŋgermbay, a ye ké Ŋgerzah mbi ni ɓa Mbay. »
21Kandɔkaw mí Zezu hah niri. Ke ɓah ɓa teh-u ɓahri, kú ɓah ɓay riŋ ɗina Ŋgermbay ye ra hi̧ nzukri ya. 22Ke ɓahri se, na ani ani gaŋ kara a ye gun nzuk pirmatul ɓay ko seh kal ŋgɔŋ. Ŋgernzuk gun Izarayelri, ŋgernzuk fe puhna Ŋgerzahri, nzuk-sɔk mbete bolkusol Ŋgerzahri, ku ɓay ko ni ye ɓa kɔk fe, ke hú hul. Nam a sayu le, ke tí̧h ke puh záh ke pa̧ymun a foyu.
23Ke ƴo ɓah hi̧ nzukri riw ké ƴo dih fal ye ra ɓahri : « Nzuk yih dih fal bi le, ké poŋ kerɓay tul ye ma fal, ké mbi kpuh vbatay hul ye, ké suk nam ke nam, ké dih keni fal bi, 24ɓayu ké nzuk a a̧y ké yih su̧ tukala le, tul ye ɓay zi-u. Nzuk a suŋ suŋ ké poŋ kerɓay tul ye ɓay tul bi le, ke ɓay ti̧h ke ndɔk hul. 25Gelke nzuk su̧ tukala el kaɓ ɓa suki, mí doro-u, tul ye zi le, ɓa fe ziŋna munu lo ? 26Nzuk a a̧y ké riŋ bi ke ɓay bi ɓa fe su̧hru ké nun ye le, gun nzuk pirmatul ɓay tu nzuku-aw ɓa fe-se su̧hru ké nun ye ke seh gina ye ɓil riŋ ɗina ye, ɓil riŋ ɗina bah ye, ɓil riŋ ɗina tem nzak pihna Ŋgerzahri. 27Mi ƴo ɓah ketina hi̧ wuri, nzuk a haniri ké sakra wah-ay hul ɗi riŋ woyri ya ɓáy, mí ku kó lák mbay Ŋgerzah ke nun woyri. »
28Zezu ɓah ɓay ye, nam a toŋndɔk seɗe-u dale, ke fa̧h Piyer, Za̧h, Zak. Ke si ziŋ niri tul kasaw a hani-u si ɓáh ɓay ke Ŋgerzah. 29Ké-e ƴo ɓah ɓay ke Ŋgerzah ra, nun ye sɔɓ na ɓoɗ, gar ye su nda̧w nda̧w. 30Mí í ko. Nzukri seɗe ti̧h gi ƴo lu mberem ziŋ ni. Ku ɓa Moyiz ke Eli gun nzak pihna Ŋgerzah a lewsa̧ri#9.30 Ŋgerzah hi̧ Moyiz ten gun Izarayelri ke puh mgbal Eziɓte. Eli ba, ke pih ni hi̧ ke laɓ fe saŋri, mí ke ɗi sa̧w nzuk yeri gun Izarayelri ɓá mbi law woyri ké tul tukala ma fal el kan law woyri tul Ŋgerzah woyri.. 31Mun woyri ndu̧y ɓa fe gama riŋ ɗina a nunmbam. Mberem kú-u ƴo lu ziŋ ni si tul ɓay ti̧hna ye ke puh mgbal, a a̧w ké ɓay laɓ ɔh ke gelu ké Zurusalem. 32Piyer ke nzuk-dih fal Zezu a ɓoruri ké seɗe ra ku̧ nam mbeleŋ mbeleŋ. Ku tom bale, ku ko ndu̧yna mun Zezu ɓil riŋ ɗina ye ke ndu̧yna nzuk a seɗe-uri ké ƴo ziŋ ni ra. 33Nzukri ké seɗe-aw ɓá tɔr poŋ niri le, Piyer ɓah hi̧ Zezu ɓahri : « Mbay, gel ké nah ƴo ri-ay su-su. Nah yih pɔr vulri ɓa say hi̧ wuri, a mbewu ɓa nzuku a wo, a mbewu ɓa nzuku a Moyiz, a mbewu ba, ɓa nzuku a Eli. »
Ɓayaw, Piyer ɓah va̧h. 34Ke ƴo ɓah ɓay kɔɓ ɓáy bale, ɗikmambam gi guɓ tul woyri gbukru, mí hȩkme se niri. 35Ku ƴo ké ɓil dikmambamaw bale, ku lah kusol ti̧h ke ɓilu mí mgbe ɓeleŋ ɓahri : « A ye-ay ke ɓa gun bi, a bi mí-i lu ni#9.35 Í mgba Mbete Esaïe 42.1-7 tuh ke gel ki̧na-ay.. Í lah nzak ye. »
36Kusol ɓah ɓay ba, ku el ko ɓa Zezu ke hȩk mí toŋ. Nzuk-dih fal yeri ra tuh nzak woyri. Ku ɓah ɓayu hi̧ nzuk a ɓoru lah ke sewu-aw ya.
37Tipele-u bale, Zezu ɗer ke tul kasaw ra ke nzuk-dih fal yeri ké sayaw. Daɓa nzukri ɓa ŋgi̧-u gi nzɔh nun ye. 38Nzuk a hani-u mbew ti̧h, ke ɗi fe ɓeleŋ ɓahri : « Metere, kɔkrɔya, mú gi ko tul gun bi-ay ge. Ke ɓa gun bi ké mbew yaŋ. 39Mú ko, záh mgba ni ba, ke vba̧ nzak ziriri ziriri ba. Mun ye to kpak kpak, mbihsam ye fur tuka tuka. Záh-aw ƴo pal ni mo̧r mo̧r. Ɓay záh ra ɓá poŋ ni ɗeŋ se-se. 40Mi gi vuh ɓa seh hi̧ nzuk-dih fal wori ɓay kú ni̧h záh ra, mí ŋgerna woyri mah ya. »
41Zezu ba, ɓahri : « Uwa, gun tukala-ayri, nzukri ké i poŋ Ŋgerzah ma fal, nzuk pirmatulri ké kerɓay woiri ra̧-ra̧h, toŋ nam ka̧h ani mí-i ƴó ziŋ wuri ɓáy le ? Toŋ nam ka̧h ani mí-i ík law bi ké tul woiri ɓáy le ? Mú gi ke gun wo ra. »
42Gun ra ƴo gina ba, mí záh-u mbi ni vbu siɓa gbirik, mí ƴo laŋ ni yik yik. Bale Zezu hah záh tukala ra, mí mun gun ra gah. Kaŋ mí Zezu mgba ni el ndoh ndɔk bah ye. 43Bale nzukri riw ké ko ŋgerna Ŋgerzah a luki ra tul woyri fa̧h zikiki zikiki.
Law nzukri-aw na niri ɓa saŋ tul feri riw ké Zezu ƴo laɓu, mí Zezu el ɓah hi̧ nzuk-dih fal yeri ra ɓahri se : 44« Zah le ku ɓay ndoh ni ye gun nzuk pirmatul ndɔk nzukri dale, í hi̧ ɓayri ké i lah-ay ɓá ɓar sa̧w ké ɓil law woiri. »
45Mí ɓayu guh law woyri ya. Sa̧wɓayu mu̧-mu̧h hi̧ ku lah ya. Hȩkme vbí sa̧wɓayu kara se niri pi. 46Mí fahɓay ti̧h ké sakra woyri-aw ɓay tu a ge mí ɓa ŋgernzuk ké haŋsekle woyri le. 47-48Zezu ba, tu kerɓay woyri tu-tu, mí ke mbi gun a lele hi̧ ke ƴo ɓel ye, ke ɓahri : « Gelke nzuk mgba gun a kandɔkayri ma law ye ɓay tul riŋ bi le, a bi mí ke mgba mi-aw. Nzuk a suŋ suŋ ké mgba mi ma law ye le, mgba nzuk ké pih mi munu ɓayu ké nzuk ké ɓa gun ké haŋsekle mbaŋ yeri ra a ye mí ke ɓa ŋgernzuk. »
49Za̧h ba, el ke ɓay ɓahri : « Mbay, nah ziŋ nzuk a hani-u ƴo ni̧h záhri ke riŋ wo, mí nah gboh ni ɓay fe le, ke ɓa bɔh sina wah ya. »
50Mí Zezu ɓah hi̧ niri ɓahri : « Í gboh ni ya, ɓayu ké-e ɓa nzukbaa woiri ya le, ɓa nzuk fal ŋgaŋ woiri munu. »
51Nam ɗih ya ɓay ɔr Zezu ma síɓa bale, ke sak tul ye ko kona siŋriŋ ma Zurusalem. 52Mí ke pih gun nzak pihnari si pol ye ɓay lek gel geŋ ni. Ku si ka̧h puh a hani ké tusiɓa nzuk Samariri#9.52 Samariri ke ziɓri ku ɓa nzukbaari. Zurusalem ɓa puh kaɓna mbay ziɓri. Ŋgerzah hi̧ niri, ku mboh vul kani ye ké ri-aw. Samariri ba, sa ɓay ziɓri ɓá kal ke puh woyri ɓay si ma Zurusalem ya. Ku fah ɓay ɓahri, gel fe puhna Ŋgerzah na tusiɓa woyri Samari. Í mgba Mbete Za̧h 4.20-24 tuh ke gel ki̧na-ay. Í ki̧ ɓay Samari ɓil Mbete-ƴah tɔh riŋri pi. . 53Nzuk puh-uri ba, sa mgba ni gahru ya. Ku ɓahri se, ke ɓa ziɓ mí ke ƴo tul sina ma Zurusalem. 54Zak ke Za̧h ko fe-u, mí ku ɓah hi̧ Zezu ɓahri : « Ŋgernzuk, náh hah mbam ɓá gi mgba niri le ? »
55Zezu ba, sɔɓ nun ko niri, ke el ɓah ɓay ɓa kpuh-u hi̧ nzuk-dih fal yeri#9.55 Ké sakra mbete sa̧w nzak gerekri, mbeteri ɓa ŋgi̧-u gbu̧h gel ki̧na-ay sa sari, mí a haniri dɔɓ ɓay a ɓoru fá-fal, mí su-su ɓay gbu̧h kaŋ. . 56Mí ku kal ke puh a ɓoru.
57Ku ƴo tul ful ma Zurusalem, mí nzuk mbew ɓah hi̧ Zezu ɓahri : « Mi díh fal wo ndeŋ ndeŋ. »
58Mí Zezu ɓah hi̧ ni ɓahri : « Nzi̧wri ƴo ke lɔkɔ nam, gundoyri ƴo ke vul nam#9.58 Nzuk goso fe tuna mbete Ŋgerzah a haniri ɓahri, nzi̧wri ke gundoyri ɓa sam nzukri ɓoɗ ɓoɗ. Nzi̧wri ɓa Eroɗ ke ŋgernzuk puh lakna yeri kú-u nah puh lakna ke mahful a foh-u. Gundoyri ba, ɓa sa̧wnzuk a ɓoruri kandɔk rɔmri ké lak mbay tusiɓa gun Izarayelri.. Mí gun nzuk pirmatulay ba, gel-eh tul kara ke ta keni ya. »
59Mí ke ɓah hi̧ nzuk a ɓoru ɓahri : « Mú dih fal bi-ay. »
Nzuku ba, ɓah : « Ŋgernzuk, mú poŋ mi el si puh. Seh hul bah bi le, mí gɔr hulu dara mí dih fal wo ɓáy. »
60Bale Zezu ɓah hi̧ ni ɓahri : « Mú poŋ hulri ɓá gɔr hul mbaŋ woyri. A wo ba, mú si ka-kah ɓay lák mbay Ŋgerzah. »
61Nzuk a ɓoru ɓáy ɓah hi̧ ni ɓahri : « Ŋgernzuk, mi díh fal wo. Mú poŋ mi, mí si vbi nzuk in biri, kú poŋ mi dara mí mi díh fal wo ɓáy. »
62Mí Zezu ɓahri : « Nzukay ké mgba kpa̧h nday ƴo pa-pay, mí ke ko gel ma fal le, ke ti̧h suk hi̧ lák mbay Ŋgerzah ya. »
Currently Selected:
Mbete Luk 9: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
