Mbete Luk 22
22
1Ti̧hmbih-tɔk peŋ dan is, ti̧hmbih-u ku ɗi ɓa ti̧hmbih-i guy buma, namu toŋ ɗih ya ɓay laɓu. 2Ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ƴah ful ɓay i Zezu ɓayu kú-u laɓ hȩkme nzuk woyri ziɓri ké ƴo dih fal ye. 3Mbay záh tukala ba, gi rih tul Zudas nzuk Isikariyoɗ. A ye ra ke ƴo sakra nzuk-dih fal Zezu a boh falu seɗeri. 4Mí ke ti̧h si lu mberem ziŋ ŋgernzuk fe puhna Ŋgerzahri ke soze-kɔr vul kani Ŋgerzahri ɓay ndoh Zezu ndɔk woyri. 5Mí law ŋgernzukri ra rih niri. Ku lek suy lari ɓay te Zezu ziŋ ni. 6Zudas ba, yi-yih. Ke mu̧h kpɔl ɓay poŋ Zezu ndoh ndɔk woyri mí ƴo geŋ sa̧wseh a a̧y ké nzukri ɓá tu ya.
7Nam a titilu ɓil nam ti̧hmbih-su̧ peŋ dan is ɓa nam kú-u vbeh guy buma. 8Mí Zezu pih Piyer ke Za̧h ɓahri, kú si lek gel fe su̧na ti̧hmbih woyri geŋ niri. 9Ku ɓahri, fál suŋ mí Zezu yih ɓay kú lek gel fe su̧na ti̧hmbih-i guy buma woyri ké ri le ? 10-11Mí ke ɓahri : « Í ko. Sina woiri, i ƴo rih ɓil puh-u dale, i ɓay ko nzuk ké suk mbih kal keni, í dih fal ye si ka̧h kerpuh ye, í ɓah hi̧ nzuk puh-u ɓahri, metere ɓahri, vul a suŋ mí a ye ke nzuk-dih fal yeri ku sú̧ fe su̧na ti̧hmbih-i guy buma ké ri le ? 12Le nzuk puh ra ɓay sɔk wuri vul a fál síɓa ké ɓa bawu. Fe kaɓnari ku̧ ri da. Ké gelaw mí í lek ri fe su̧na ti̧hmbih wahri. »
13Kandɔkaw mí ku tɔr, ku ziŋ fe-uri ke gelu gelu kandɔk ké-e ɓah. Mí ku lek fe su̧na ti̧hmbih-i guy buma ra.
14Sa̧wseh-u ka̧h bale, Zezu kaɓ nzak fe su̧na ke gun nzak pihna yeri.
15Ke ɓah hi̧ niri ɓahri : « Law bi tasa̧y ɓay kaɓ nzak fe su̧na ti̧hmbih-ay ziŋ wuri dara koseh hul ɓá ziŋ mi ɓáy. 16Mi ƴo ɓah hi̧ wuri ɓahri se, mi ta su̧ fe su̧na sam ti̧hmbih a a̧y ziŋ wuri mba. Seh ké sa̧w ti̧hmbih-u ɓay laɓ ɔh ke gelu ɓil puh lakna Ŋgerzah dara mi sú̧ fe su̧na ti̧hmbih-u ziŋ wuri ɓáy. »
17Ke mbi koɓ yim ti̧hmbih a mbewu. Ke el ke tumbɔl hi̧ Ŋgerzah, mí ke ɓahri : « Í ya̧ wuri yimay, í nzo wuri poŋ hi̧ hani hani. 18Mi ƴo ɓah hi̧ wuri ɓahri se, mi ta nzo mbih lehna kpuh viyȩh ti̧hmbih-ay mba ur ke guri-ay. Namu ké puh lakna Ŋgerzah gi ten mun dara mi nzó mbih lehna kpuh viyȩh-ay ziŋ wuri ɓáy. »
19Ke mbi peŋ, ke el ke tumbɔl hi̧ Ŋgerzah, mí ke gɔh, ke wal hi̧ niri ɓahri : « Peŋay ɓa mun bi ké mi poŋ hi̧ hul ɓay tul woiri. Í ƴo tul laɓ fe laɓna bi-ay mbu̧h ziŋ mi ɓilu. »
20Kaŋ pi mí koɓ yim ti̧hmbih a fá-fal fe su̧na ke mbi, ke ɓahri : « Yimay ɓa sem bi ké Ŋgerzah ŋga̧h sal in a foyu keni, mí semu fer ku̧ siɓa ɓay tul woiri. 21Keni-aw kara í ko, nzuk ké ndoh mi ndɔk nzukri kaɓ nzak fe su̧na-ay ziŋ mi pi. 22Ɓay fe le hul gun nzuk pirmatul ɓá laɓ mah ke hul ye ké lek lewsa̧. Mí-aw kara koseh ƴo geŋ nzuk ké mbi pihna-aw ndoh mi ndɔk nzukri-aw. »
23Wara mí gun nzak pihnari fakla ɓayu. Ku vbi haniri ɓay, a ge gaŋ mí ké sakra woyri-ay ɓay laɓ fe kaŋaw le ? 24Bale fáh hani ur ké sakra woyri ɓay tu a ge mí ɓa ŋgernzuk ké haŋsekle woyri. 25Mí Zezu ɓah hi̧ niri ɓahri : « Mbay tusiɓari ƴo lak mbay tul nzuk woyri. Nzuk-sɔk huhrumunri, nzuk a garuri ɗi niri ɓa balak nzuk. 26Mí a woiri le, i na kandɔk nzuk riŋ ɗinari-aw ya. Wara le ŋgernzuk ké sakra woiri ɓá laɓ mun ye ɓa gun ké ta̧w mbaŋ yeri. Nzuk-nda pol ɓá laɓ mun ye ɓa gun-laɓ pihna hi̧ mbaŋ yeri ma. 27Ké sakra nzukri, nzuk a suŋ mí ɓa ŋgernzuk le ? Ŋgernzuk ɓa nzuk ké kaɓ ɗeŋ geŋ fe su̧na mini ɓa gun ké ƴo laɓ pihna le ? Nzukri ƴo ɓahri, ŋgernzuk ɓa nzuk ké kaɓ ɗeŋ geŋ fe su̧na, kaŋ ya le ? Mí a bi ba, ké mi ƴo sakra woiri-ay, mi laɓ mun ɓa gun-laɓ pihna.
28A woiri i ƴo fal ŋgaŋ bi ɓil koseh biri. 29-30Mi póŋ puh lakna bah bi ndoh ndɔk woiri hi̧ í su̧ fe, í nzo fe ké nzak fe su̧na ziŋ mi ké puh lakna bi kandɔk bah bi ké poŋ puh lakna ndoh ndɔk bi. I káɓ tul arŋgaw ké boh falu seɗe ɓa nzuk-nda pol hi̧ sa̧w gun Izarayelri ké vba ɓa boh falu seɗe ra#22.29-30 Í mgba gel ki̧na-ay tuh ke mbete kú-u ɗi ɓa Mbete Judges (Zuzeri). Zuzeri-aw ɓa nzuk-nda pol gun Izarayelri kandɔk guvener..
31Simu, Simu wo, mú ko. Mbay záh tukala sor mbɔl tul woiri, ke ƴah mahful ɓay tah wuri kandɔk ŋgahla kaŋ. 32A bi ba, mi leh seh ké pol Ŋgerzah rɔkɔ sal kanlaw wo ɓá ɗɔr. Bol falu ké mu el tu kanlaw wo ra mú hi̧ law mbaŋ wori ɓá ƴo ɓa kpuh-u ɓil kanlaw woyri. »
33Mí Piyer ɓahri : « Ŋgernzuk, mi ƴo ziŋ mu. Mi ƴo tul kerɓay bi. Ɓa ra mgbal, mi si-u. Ɓa ra hul kara mi hu-u pi. »
34Mí Zezu ɓahri : « Piyer, mi ƴo ɓah hi̧ mu, guri guri gaŋ dara tuhndoy mgbal ɓá ka-kah le, mu má̧y ɓay tul bi bɔk say ɓahri, mu tu mi ya. »
35Ke el ɓah hi̧ nzuk-dih fal yeri ɓahri : « Seh ké mi pih wuri dan ɓɔl lari, dan ɓɔl gahru, dan sabɔk a ɓoru ra wa, fe mbew poh wuri le ? »
Ku ɓahri : « Ta-a. »
36Mí ke ɓahri : « Aŋay ba, nzuk ké ƴo ke ɓɔl lari le, ké mbi. Nzuk ké ƴo ke ɓɔl gahru kara ké mbi. Mahwu̧y ta-a le, ké ɗam mah gar ye el lari-u yeh keni mahwu̧y#22.36 Sew kú-u ƴo ziŋ Zezu, fe mbew poh niri ya. Aŋay le Zezu ɓay hu hul. Nzuk-kɔr niri ɓay ta-a nam say. Mahwu̧y na ɓay hɔl mun dɔh dɔh. . 37Mi ƴo ɓah hi̧ wuri ɓahri se, ɓay kú-u vbeh lewsa̧ ɓil mbete Ŋgerzah ké si tul bi ra ɓá laɓ ɔh. Ɓay ra ɓahri, ku mbu̧h ni ke nzukbaa ŋgomnari#22.37 Gel ki̧na-u na ɓil Mbete Esaïe 53.12..
Ɓayu ra mgba tul bi ɓay tuŋ gbu̧h-u wara. »
38Mí ku ɓahri : « Ŋgermbay, mahwu̧y seɗe mí na-ay. »
Ke ɓahri : « Mah seeh. »
39Zezu ti̧h. Ke tɔr si tul kasaw Oliveh. Ɓa fe laɓna ye lewsa̧. Nzuk-dih fal yeri kara si fal ye pi.
40Ka̧hna woyri, ke ɓah hi̧ niri ɓahri : « Í goŋ wuri Ŋgerzah rɔkɔ fe-leh law ɓá ndih wuri. »
41Ke loh ké ta̧w woyri ɓa ɗih-u tɔɓ. Ke huk siɓa, mí ke goŋ Ŋgerzah ɓahri : 42« Baah, lekɓay a ɓoru ƴo ra ri ɓay hi̧ koɓ haŋ fa̧hna wo ké tul suya nzukri ɓá kal le, mú loh ma fal hi̧ mí nzo ya#22.42 Í ki̧ gun ɓay ké si ke Mbete Matiye 26.39 ɓay lah ɓayay.. Keni-aw kara mú laɓ fe ké law bi yih ya. Mú laɓ fe ké mu yih ma. »
43-44Tem nzak pihna ké nunmbam ti̧h nun ye mí hi̧ ni ŋgerna. Law ye mgba ni giriɓ, mí ke toŋ ri̧h si̧w ke goŋna ye. Rona ti̧h puk puk ké mun ye ku̧ siɓa kandɔk sem ké ƴo ndi-ndiŋ kaŋ. 45Ke ur ke gel-goŋ Ŋgerzah ye el si ta̧w nzuk-dih fal yeri, mí ke ziŋ niri ké tul nam ɓay law woyri ké ƴo sa̧hna. 46Mí ke ɓahri : « Í na wuri nam ley ? Í ur wuri, í goŋ Ŋgerzah rɔkɔ fe-leh law ɓá ziŋ wuri le, í el ke mun woiri ma fal. »
47Zezu ƴo ɓah ɓay kɔɓ ɓáy bale, daɓa nzukri ti̧h tul ye. Zudas ké ƴo sakra nzuk-dih fal ye a boh falu seɗeri ra nda pol nzukri-aw. Ke ka̧h ta̧w Zezu ɓay hu̧hru ni ɓa ya̧h, mí Zezu ɓahri : 48« Zudas, ke vahna a ya̧hri mú-u te gun nzuk pirmatul le wo ? »
49Nzuk-dih fal yeri ba, ko fe ké ƴo kalna, mí ku ɓahri : « Ŋgernzuk, nah te niri ke mahwu̧yay le ? »
50Nzuk a hani ké sakra woyri lu mahwu̧y, mí ke te gaysuk gun-laɓ pihna ŋgernzuk fe puhna a fál lakna fekeɗ kuŋ. 51Zezu ba, el ke ɓay ɓahri : « Í poŋ niri wo ! »
Mí ke el za suk gunwo̧ro ra mí el mbɔhlɔ kan gelu. 52Ke el ɓah hi̧ ŋgernzuk fe puhna Ŋgerzahri ke soze-kɔr vul kani Ŋgerzahri ke ŋgernzuk gun Izarayelri kú-u gi mgbá ni ɓahri : « I gi wuri ke mahwu̧yri ke kpuhri ɓay mgba mi keni wa, mi ɓa nzukbaa le wo ? 53Nam ke nam, mi ƴo ziŋ wuri ɓil ila vul kani Ŋgerzah, mí i mgba mi ya. Wara le sa̧wseh woiri ke mbay sa̧w pihna tirima mí gi da-ay. »
54Kú-u mgba ni, ku maŋ ni si kerpuh ŋgernzuk fe puhna Ŋgerzah. Piyer ba, mbehle sina fal woyri. 55Nzuk kerpuh-uri nzuh hɔrɔ kaɓ nzaku ƴo nu̧h-u. Piyer si kaɓ sakra woyri. 56Gun kaɓna a wu̧yu mbew ko kona zi̧h ma tul Piyer ké kaɓ nzak hɔrɔ, mí ke ɓahri : « Gun wo̧ro-ay ƴo ziŋ ni pi. »
57Mí Piyer ma̧y ɓay ɓahri : « Wu̧y, mi tu ni ya. »
58Falu ndi̧, nzuk a ɓoru ko ni mí ɓahri : « A wo-ay, mu ƴo sakra nzuk yeri gaŋ. »
Piyer ba, ɓah nzak ye ɓahri : « Kaŋ ya, a bi ta-a. »
59Sa̧wseh mbew kal, mí nzuk a ɓoru ɓáy ŋgu̧h tul ɓayaw ɓahri : « Ketina gaŋ, gun wo̧ro-ay ƴo ziŋ ni ɓayu ké-e ɓa ziɓ a tusiɓa Galile. »
60Mí Piyer ɓahri : « Mi tu sam ɓay ké mu ɓah-ay ya. »
Piyer ɓah kaŋ ba, tuhndoy mgbal kah koŋroŋ ba.
61Gaŋ tul feri riw sɔɓ nun le, ke ko Piyer zi̧h.
Mí Piyer ker si tul ɓay ké Gaŋ tul feri riw ɓahri, dara tuhndoy mgbal ɓá kah le, a ye ke má̧y ɓay tul Zezu bɔk say ɓahri, ke tu ni ya. 62Piyer ti̧h kala nduh mahrew, ke vuh ke mbihnun vɔh vɔh.
63Nzukri ké kɔr Zezu ɓa mgbal ƴo ɗur ni el sak ni sa-sak. 64Ku ŋga̧h nun ye, mí ku ƴo vbi ni ɓay ɓahri : « Gun nzak pihna Ŋgerzah, Ŋgerzah ɓá ndoh riŋ nzukri ké ƴo vba̧ mu-ay ké nzak wo, mú ten hi̧ na. »
65Ɓay a ɓoruri ɓa ŋgi̧-u mí ku mbi riŋ ye sak ni keni.
66Gel pele bale ŋgernzuk gun Izarayelri ke ŋgernzuk fe puhna Ŋgerzahri ke nzuk-sɔk mbete bolkusol Ŋgerzahri ku mbu̧h hani ké gel-kuŋ salɓay, mí ku hi̧ Zezu si ri. 67Ku ɓahri : « A wo mú-u ɓa Ŋgermbay le, mú hi̧ nzak wo ɓah. »
Mí ke ɓahri : « Mi ɓah hi̧ wuri kara i ta ya̧ ɓayu ya. 68Mi vbi wuri ɓay kara i sa yih nzak bi ya pi. 69Ur ke aŋay gun nzuk pirmatul kaɓ ɓel Ŋgerzah nzuk huhrumun a luki ɓa ndɔk lakna ye#22.69 Í mgba gel ki̧na-ay tuh ke Mbete Daniel 7.9-10, 13-14.. »
70Gbam woyri, ŋgernzuk-kuŋ salɓayri ur ɓahri : « Kaŋ le mu ɓa gun Ŋgerzah ra ma ? »
Mí ke el ɓahri : « Nzak woiri mí ɓah, mi ƴo ri. »
71Kandɔkaw mí ku ɓahri : « Nah zɔklɔ mun wahri tul ɓay a lah-u ɓáy le ? Nah lah nzak ye da. »
Currently Selected:
Mbete Luk 22: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
