Mbete Luk 20
20
1Nam a titilu, ke ƴo firma ɓay lák mbay Ŋgerzah hi̧ nzukri ɓil ila vul kani Ŋgerzah. Ke ka-kah ɓaysuki Ŋgerzah bale, ŋgernzuk fe puhna Ŋgerzahri, nzuk-sɔk mbete bolkusol Ŋgerzahri gi ke ŋgernzuk puh woyri gun Izarayelri ké ta̧w ye. 2Ku ɓahri : « Mú sɔk na, náh lah, ke bolkusol ge mú-u laɓ keni pihna wo-ayri le ? A ge mí hi̧ mu ŋgerna-u le ? »
3Zezu ba, yih nzak woyri ɓahri : « A bi kara mi vbi wuri ɓay mbew. Í yih vbiɓayu hi̧ mi, mí lah. 4Batem ké Za̧h soh nzukri ra wa, sa̧wu ɓa nunmbam mini ɓa nzuk pirmatul le ? »
5Mí ŋgernzukri ra fah ɓay ké sakra woyri ɓahri : « Nah ɓah ra ri se, sa̧wu ɓa nunmbam le, ke él vbi na ɓay fe mí nah sa ya̧ ɓay ké Za̧h ɓah ra ya. 6Mí náh ɓahri, sa̧wu ɓa nzuk pirmatul le, nzukayri riw ɓay vbuk na ke kasaw ɓay i na. Ku mgba ɓahri se, Za̧h ɓa gun nzak pihna Ŋgerzah. »
7Mí ku yih nzak Zezu ɓahri : « Nah tu sa̧wu ya. » 8Zezu el ɓah hi̧ niri ɓahri : « A bi kara mi ta sɔk wuri ke bolkusol ge mí-i laɓ keni pihna-ayri ya pi. »
9Wara mí Zezu ɓah lawɓayay hi̧ gun Izarayelri : « Nzuk a hani-u mbew laɓ waka kpuh viyȩh#20.9 Ké ɓil mbete Ŋgerzah, Ŋgerzah ɗi nzuk yeri gun Izarayelri ɓa viyȩh ye. I mgba Mbete Esaïe 5.1-4 tuh ke gel ki̧na-ay.. Ke ndoh waka ra hi̧ nzuk-laɓ pihna-uri, mí ke tɔr si gahru few mah fe. 10Few-hal lehna kpuh ka̧h dale, nzuk waka pih gun nzak pihna ye mbew si ta̧w nzuk-laɓ pihna wakari ɓá fa̧h lehna kpuh-u gi keni hi̧ ni. Bale nzuk-laɓ pihna wakari ra mgba ni, ku vboŋ ni, mí ku el ni̧h ni ndɔk ndikpo. 11Nzuk waka pih gun nzak pihna ye a ɓoru si. Mí nzuk-laɓ pihna wakari ra vboŋ ni. Ku laɓ ni se su̧hru, mí ku ni̧h ni el ndɔk ndikpo. 12Nzuk waka pih gun nzak pihna ye a sayu. Mí ku ɗur ni mí ku vbu ni ɓu kala waka. 13Bale nzuk waka ɓahri se : “Mi láɓ ani ɓáy le ? Mi píh gun sana bi ɓá si. Kaŋaw le, ku hȩ́k ni.”
14Nzuk-laɓ pihna wakari ɓá ko gun nzuk waka ƴo gina bale, ku lek ɓay mbew ɓahri : “A ye ké gi-aw ra, ke ɓa gun-ya̧ fe bah ye munu. Náh i wuri ni dale, waka-ay ɓay ti̧h ɓa fe wahri.”
15Gun ra ka̧h ba, mí nzuk-laɓ pihna wakari mgba ni, kɔklɔ ni si fal kpaŋ, mí ku i ni. »
Zezu el ɓahri : « Kaŋaw ba, nzuk waka-aw ɓay laɓ ani mí ziŋ nzukawri ɓáy le ? 16Nzuk waka-u ɓay ur, ke si-u, ke í nzuk-laɓ pihna wakari-aw, mí ke él ndoh waka ra hi̧ nzuk a ɓoruri. »
Ŋgernzukri ra ɓá lah lawɓayu ké Zezu ɓah, mí ku ɓahri se : « Kay, fe-u ɓá laɓ ya. »
17Zezu ko niri zi̧h, mí ke ɓahri se : « Kaŋaw wa, ani mí mbete Ŋgerzah ɓahri, kasaw ké nzuk-mboh vul kani Ŋgerzahri poŋ kan kpah ra, kasawu mí el ti̧h ɓa mah kasaw-mboh diŋ vulu#20.17 Ɓayay na ɓil Mbete Siŋ (Psaumes) 118.22. Í mgba Mbete Efezeri 2.20-22, Mbete 1 Piyer 2.5, Mbete 1 Kɔrenteri 3.11 tuh ke gel ki̧na-ay. ? 18Nzuk a suŋ suŋ gbam ké ɓe kasaway mí lih le, ɓay gur mun ye rukruk. Nzuk a a̧y ké kasaway toh tul ye le, ɓay naŋ nzuku ɓa som ri̧nini. »
19Kandɔkaw mí nzuk-sɔk mbete bolkusol Ŋgerzahri ke ŋgernzuk fe puhna Ŋgerzahri ƴah ful ɓay mgba ni ke seh-u, mí hȩkme nzukri laɓ niri. Ku tu ɓahri se, Zezu ɓah lawɓayaw si tul woyri.
20Kandɔkaw mí ŋgernzukri ra ko Zezu yi̧m, ku pih nzukri rih haŋsekle nzuk yeri, ku laɓ mun woyri ɓa nzukri ké ƴo mbew ziŋ Ŋgerzah. Ku pih nzukri-aw ɓay kú mgba ni ke ɓay le, ku ndoh ni ndɔk guvener nzuk ndiseŋe a luki. 21Mí nzukri ra gi vbi ni ɓay ɓahri : « Metere, nah tu ɓahri, ɓay ké i ɓah na gelu, ketina mí i ƴo firma nzukri. I lu nun nzuk ya. Wara le i ƴo firma nzukri sí siŋ sina a ketina Ŋgerzah. 22Bolkusol Ŋgerzah hi̧ na gun Izarayelri ful ɓay puh lampoh hi̧ ŋgermbay sa̧wnzuk a ɓoruri kandɔk sezar mini ani le#20.22 Í ki̧ gun ɓay ké ke gel ki̧na Mbete Matiye 22.17 ɓay lah ɓay dim mbay a luki ké sa̧w ye ɓoɗ. ? »
23Zezu tu kerlaw woyri tu, mí ke ɓah hi̧ niri ɓahri : 24« Í ten lari ké nzukri puh keni lampoh ra hi̧ mí ko. »
Ku ten lari ba, ke el vbi niri ɓahri : « Tem nzuk a suŋ mí ku vbeh kan ri-ay le ? Riŋ nzuk a suŋ mí ku vbeh ri-ay le ? »
Mí ku ɓahri : « Temu ɓa tem sezar. Riŋu kara pi. »
25Bale ke el ɓahri : « Kaŋ dale fe sezar le, í hi̧ sezar. A wo nzuk pirmatul ké Ŋgerzah laɓ mu ɓa fe tem ye le, mú hi̧ Ŋgerzah gaŋ ba#20.25 Í ki̧ gun ɓay ké ke gel ki̧na Mbete Matiye 22.21 ɓay lah ɓayay.. »
26Kandɔkaw mí mgbá ni ke ɓay ké gel daɓa ké nun gun Izarayelri mba ŋgernzukri-aw mba-mba. Gosoɓay zi niri zi-zi, mí ku el kaɓ silili.
27-28Mí sadusi a hani-uri gi ta̧w Zezu. (A woyri-aw, ku ɓahri, nzuk hu le, záh ye ta-a. Ke ta ziŋ pa̧ymun a foyu ya pi.) Mí ku vbi ni ɓay ɓahri : « Metere, Moyiz vbeh ɓil mbete bolkusol Ŋgerzah ɓahri, gelke nzuk ya̧ wu̧y mí ke hu dan mbuŋ gun le, yi̧n ye ɓá ya̧ wu̧y kaŋpele ra, ké mbuŋ keni gun ɓa mi̧hri yi̧n ye ké hu-aw.
29Kandɔkaw mí nzuk ɓil mahri ɓa toŋndɔk say ƴo ri. Ŋgernzuk ya̧ wu̧y, mí ke hu dan mbuŋ keni gun. 30Toŋnafal el ya̧ wu̧y kaŋpele ra, ke hu dan mbuŋ keni gun. 31Nzuk a sayu ya̧ wu̧y ra, ke hu dan mbuŋ keni gun pi. Kaŋ mí nzukri ké toŋndɔk sayaw, ku ya̧ wu̧y ra ke gel woyri mbew mbew gbam, mí ku hu dan mbuŋ gun ɓa mi̧hri yi̧n woyri. 32Ɔh tɔru bale, wu̧y ra hu pi. 33Kaŋaw ba, seh ké záhri ɓay ziŋ pa̧ymun a foyu ra wa, wu̧y ra ɓay na ɓa wu̧y nzuk a suŋ le wo ? Ɓayu ké nzukri ké toŋndɔk sayaw ya̧ ni ke gel woyri mbew mbew gbam. »
34Mí Zezu ɓah hi̧ niri ɓahri : « Gun tukala-ayri ƴo ya̧ hani, ku ƴo hi̧ gun woyri ya̧ hani pi. 35-36Nzukri ké Ŋgerzah ki̧ riŋ woyri ké sakra gunri a sew ké nunmbam ke tusiɓa laɓ ɓa foyu kú-u ziŋ pa̧ymun a foyu ra, ku ta ya̧ hani ya, ku hi̧ gun woyri ya̧ hani ya pi ɓayu ké hul ta ɗi riŋ woyri ya. Ku káɓ mah ke tem nzak pihnari kaŋ. Ku na ɓa gun Ŋgerzah kandɔk kú-u ɓa gunri ké ti̧h ke puh záh mí el kaɓ ke pa̧ymun a foyu. 37Sɔk ɓahri se, záhri ɓay ti̧h ke pa̧ymun a foyu. Moyiz ten ɓayu te-teh ɓil mbete Ŋgerzah. Gel ki̧na a a̧y ké Ŋgerzah ti̧h nun ye ké ɓil rim hɔrɔ ké gay kpuh, mí hɔrɔ-u se gay kpuh ra ya, Moyiz ɗi Miƴori ɓahri se : “A wo Ŋgerzah, záh ziih Abaraham, Isak, Zakoɓ.” 38Kaŋ dale ziihri ƴo ri. Ŋgerzah ta ɓa záh nzuk a huluri ya, wara le ke ɓa záh nzuk a ƴo ke ɔknari ɓayu ké gbam woyri ku kaɓ ke pa̧ymun a foyu ɓay ye. »
39Nzuk-sɔk mbete bolkusol Ŋgerzah a haniri yih tul Zezu ɓahri : « Metere, mu yih nzak woyri-aw su mbamba. »
40Kandɔkaw nzuk ké hi̧ tul ye ɓay vbi Zezu ɓay a ɓoru ta mba.
41Zezu ba, el ke ɓay a ɓoru ɓahri : « Ŋgermbay kú-u mbuŋ ni ɓa gun zih ŋgermbay Daviɗ ra wa, laɓ ani dara mí ke ɓa ŋgermbay tul zih ye ɓáy le ? 42A ye ŋgermbay Daviɗ gaŋ mí ke ten siŋ vbeh kan ɓil Mbete Siŋ kandɔkay : Miƴori ɓah hi̧ Ŋgermbay bi ɓahri, mú kaɓ ɓel bi ɓa ndɔk lakna bi, 43mi ƴo ɔh ŋgerna nzukbaa wori hi̧ kú ti̧h ɓa gel-ku̧ bɔk wo#20.43 Ɓayay na ɓil Mbete Siŋ 110.1..
44A a̧w ké ŋgermbay Daviɗ ɗi gun zih ye ɓa “Ŋgermbay” ye ra ba wa, ani mí Ŋgermbay ɓa mi̧hri ye ɓáy le ? »
45Ɓay ké Zezu ɓah, ke ɓah ké suk gun Izarayelri gbam wara mí ke el ɓah hi̧ nzuk-dih fal yeri ɓahri : 46« Í ko tul woiri ger rɔkɔ í mbi siŋ sina nzuk-sɔk mbete bolkusol Ŋgerzahri. Ku yih ɓay ndoh mah gar a peh-u tul tul ha̧rma keni. Ku yih ɓay hi̧ nzukri ɓá vah niri ndɔk seɗe seɗe ké gel daɓa. Ké ɓil vul misoŋ, ku yih kaɓ gel kaɓna ŋgernzukri. Ku yih kaɓ gel kaɓna riŋ ɗina ké gel ti̧hmbih pi. 47Ku ƴo su̧ fe wu̧y sehri wuruk wuruk. Ku ƴo goŋ Ŋgerzah ɓa peh-u sɔk keni mun woyri. A woyri ra salɓay suya woyri ŋgi̧ kal ŋgoŋ. »
Currently Selected:
Mbete Luk 20: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
