Mbete Luk 1
1
1Soko woiri Diyofil nzuk a luki,
Nah tu ɓahri, daɓa nzukri hi̧ tul woyri ki̧ fal feri ké kal ké sakra wah-ay ɔh ke gelu gelu mí ku̧ ɓil mbete. 2Ku mbi ɓayuri ké nzak nzukri ké ƴo gelu ke titilu ké ɓa nzuk-mgba sa̧w ɓayu kú-u ko ke nun woyri, kú-u lah ke suk woyri, mí ku hi̧ na, nah lah. 3-4A bi kara mi fakla sa̧wɓay fe-uri ké kal ur ke titilu da̧y ka̧h ɔh tɔru dara mí-i vbeh mbete-ay hi̧ mu ɓay mú tu te-teh ɓahri, sa̧wɓayuri kú-u ten hi̧ mu pol ra ɓa ketina gaŋ.
5Sew ké mbay Eroɗ a ye ŋgermbay gun Izarayelri lak mbay ké Zude tusiɓa ziɓri, nzuk fe puhna Ŋgerzah a hani mbew ƴo ri#1.5 Ɓay tu ɓay kehrna nzuk fe puhna Ŋgerzahri, í ki̧ 1 Chroniques 24.10-18. Gel kehrna-uri kehr ɓa gel bon seɗe falu niŋ. Ku soh hani soh hani ƴo puh fe ɓil vul kani Ŋgerzah. Sa̧w woyri gbam ɓa mi̧hri Aroŋ.. Riŋ ye ɓa Zakari. Ke ɓa mi̧hri Aroŋ ŋgernzuk fe puhna a titilu, ke ɓa gun zih a fál nzak ndɔk Abiyah. Wu̧y ye Elizabeɗ kara ɓa mi̧hri Aroŋ pi. 6Ŋgerzah ké ɓa Gaŋ tul feri riw ko niri seɗe mbɔk ɓa sa̧w nzuk ye. Ku ƴo tul bolkusol Ŋgerzah, ku mbi sa̧w fe laɓna ye si keni sina. Zɔmna ta-a. 7Mí ku mbuŋ gun ya. Elizabeɗ ɓa tuh. Seɗe mbɔk woyri ku kpɔkrɔ da.
8Sew a hani mbew bale, pihna-puh fe ké ɓil vul kani Ŋgerzah toh tul gun zih Abiyahri ké Zakari ƴo ɓilu. 9Kandɔk ké ɓa fe laɓna nzuk fe puhnari, ku laɓ fe eŋ ɓele#1.9 Ŋgi̧na nzuk kaniri ɓa ŋgi̧-u. Kaŋaw mí ku laɓ fe eŋ ɓele ɓay ko nzuk a suŋ mí Ŋgerzah lu ni ɓay rih ɓil vul kani si gel-nzuh rekna kpuh hi̧ ni. Gelke ɓele mgba tul nzuk kani dale, nzuku rih vul kani si nzuh rekna kpuh ké gel-nzuh rekna kpuh. Pihna-u nzuku laɓ bɔk mbew yaŋ. Ɓele ta mgba tul ye bɔk seɗe ya. ɓay tu nzuk kú-u ɓay ndoh pihna-rih ɓil vul kani Gaŋ tul feri riw. Nzuku ɓá si nzuh rekna kpuh ké ba̧ri-u fu̧ Ŋgerzah buy buy ké ri. Ɓele-u mgba tul Zakari.
10Zakari rih vul kani Ŋgerzah. Daɓa gun Izarayelri ɓa ŋgi̧-u ƴo kala ƴo goŋ Ŋgerzah ba#1.10 Rekna kpuh ké ba̧ri-u fu̧ Ŋgerzah ra ba̧ri-u ɓa tem fe ké sɔk ɓay goŋna sa̧w nzuk yeri. Goŋna-u mí ɓa fe ké rih law ye. Í ki̧ Mbete Exode 30.7-8 ɓay tu ɓayu.. 11Mí Zakari ƴo nzuh rekna kpuh dale, tem nzak pihna Gaŋ tul feri riw ké ƴo fál ndɔk lakna gel-nzuh rekna kpuh ra ten mun hi̧ Zakari ko ni. 12Zakari ko ni ba, tul ye fa̧h zikiki zikiki. Hȩkme se ni mbamba. 13Mí tem nzak pihna ra ɓah hi̧ Zakari ɓahri : « Zakari, mú laɓ hȩkme ya ɓay fe le, Ŋgerzah lah goŋna wo lah. Wu̧y wo Elizabeɗ ɓay mbuŋ gun wo̧ronzuk hi̧ mu. Mu tú riŋ gunu ɓa Za̧h. 14A wo ke daɓa nzukri, i záy mun woiri ɓay law rihna mbuŋna gun ra. 15Ɓayu ké-e ná ɓa nzuk a luki ké nun Gaŋ tul feri riw. Ke ta nzo yim a rih-u ya. Yim a yi̧ŋu kara ke nzó ya pi#1.15 Ɓay tu ɓay nzuk ké Ŋgerzah mbi ni ku̧ ɓoɗ hi̧ ke nzo yim a yi̧ŋu ya pi, yim a rih-u ya pi ke fe laɓna a ɓoruri pi le, í ki̧ Mbete Nombres 6.1-4. . Sa ɓil mah ye sa̧ kaŋ mí Tempuki ɓay ya̧ mun ye gbam. 16Gun Izarayelri ɓa ŋgi̧-u ɓay el gi ta̧w Ŋgerzah woyri a ye Gaŋ tul feri riw. 17Gun ra, ke sí pol Gaŋ tul feri riw ke ŋgerna Tempuki kandɔk ŋgerna huhrumun Eli gun nzak pihna Ŋgerzah a lewsa̧ ɓay hi̧ law bah gunri ɓá el gi tasa̧y gun woyri, ɓay hi̧ kerɓay nzukri ké poŋ ɓay Ŋgerzah ɓá ru̧ ɓa sa̧w Ŋgerzah. Ke sí pol ɓay hi̧ gun Izarayelri ɓá lek law woyri geŋ gina Gaŋ tul feri riw. »
18Mí Zakari ɓah hi̧ tem nzak pihna Ŋgerzah ra ɓahri : « Ké a bi ke wu̧y bi, nah kpɔkrɔ da-ay wa, ani mí-i tu ɓahri, fe-u ɓay laɓu le ? »
19Tem nzak pihna ra ɓah hi̧ ni ɓahri : « A bi mi ɓa Gabiriyel, mi ƴo pol Ŋgerzah. Ke pih mi ɓay sɔk ɓay a suki-ay hi̧ mu, mú lah. 20Elizabeɗ ɓay mbuŋ gun ra gaŋ. Mí mu sa ya̧ ɓayu ya. Mí le kusol wo ɓay mbih-u. Mu káɓ ɓa mbiki. Mu ɓah ɓay ya kpu̧ru ka̧h nam mbuŋna gunu. »
21Gun Izarayelri ƴo kala vul kani Ŋgerzah ra ɓáy. Ku geŋ Zakari ra nda̧w. Law woyri na niri ɓa saŋ ɓayu ké Zakari ƴo ɓil vul kani Ŋgerzah sal sal. 22Ke ti̧h bale, ke ziŋ ful ɓáh ɓay mba. Ke na ɓa mbiki. Mí nzukri tu ɓahri se, fe saŋ ti̧h nun ye ké ɓil vul kani Ŋgerzah, mí ke ti̧h ɓa mbiki-aw. Ke ka ɓa ndɔk wara.
23Nam gun zih Abiyahri ɓay laɓ pihna-puh fe hi̧ Ŋgerzah ɔh ba, Zakari el si puh ye. 24Mí wu̧y ye Elizabeɗ ya̧ ɓil. Elizabeɗ mu̧h mun ye few ndiɓi, ke ɓahri se : 25« Gaŋ tul feri riw ko gel ma tul bi ké ɓil namri-ay mí lu su̧hru nun bi. »
26Ɓil Elizabeɗ laɓ few tɔtɔklɔ. Ŋgerzah pih Gabiriyel tem nzak pihna ye si puh a hani ké tusiɓa Galile. Puh-u ɓa Nasareɗ. 27Ke si ta̧w wu̧y tikla a hani mbew. Riŋ ye ɓa Mari, ke ɓa mbana Zezeɓ. Zezeɓ ra ɓa gun zih Daviɗ mbay a luki a lewsa̧. 28Gabiriyel gi ta̧w Mari, mí ke vah ni kandɔkay : « Soko wo. Law Gaŋ tul feri riw rih ni ɓay tul wo. Ke ƴo ziŋ mu. »
29Law Mari lu ni gba̧y ɓay tul ɓay ké-e lah. Ke ɓahri se, a a̧w wa, ɓa sam vahna a ani mí kaŋ le ? 30Gabiriyel el ɓah ra ɓáy ɓahri : « Mari, mú laɓ hȩkme ya. Lawsuki Ŋgerzah ƴo ziŋ mu. 31Mú lah, mu yá̧ ɓil. Mu ɓay mbuŋ gun wo̧ronzuk. Mu tú riŋ gunu ɓa Zezu. 32A ye ra ke ná ɓa nzuk a luki. Riŋ ɗina gun Ŋgerzah ké deɓ ye ta-a ɓay ɗi tul ye. Ŋgerzah a ye Gaŋ tul feri riw ke mbi ni ɓa mbay hi̧ ke kaɓ tul arŋgaw zih ye ŋgermbay Daviɗ. 33Ke lák mbay tul gun Zakoɓri, a ye ké Ŋgerzah tu ni ɓa Izarayel, ka̧h sew ké tusiɓa ke nunmbam ɓay laɓ ɓa foyu. Lák mbay ye ta gbu̧h ya ɓa ŋgɔh. »
34Mari vbi Gabiriyel ɓahri : « Mi tu wo̧ronzuk ya ɓáy. Ani mí-i yá̧ ɓil le ? »
35Gabiriyel yih nzak ye ɓahri : « Tempuki ɓay ɗer gi pɔ́r tul wo. Ŋgerna Tem Ŋgerzah ké deɓ ye ta-a ɓay pɔr mu gbukru ɓay fe le, gun ké mu mbuŋu-aw ɓa Nzuk lawpuki. Ku ɓay ɗi ni ɓa gun Ŋgerzah. 36Mú lah ɓayay : Yi̧n wo Elizabeɗ a ye ké nzukri ɗi ni mahtuh, ke ƴo ke ɓil ké tul kpɔkrɔ ye, ɓilu laɓ few tɔtɔklɔ mí aŋay. 37Ɓay fe le fe ké mba Ŋgerzah mbew ta-a. »
38Mí Mari yih nzak ye kandɔkay : « Mi ɓa gun-laɓ pihna hi̧ Gaŋ tul feri riw. Ké laɓ kandɔk ké mu ɓah-aw. »
Kandɔkaw mí tem nzak pihna ra tɔr poŋ ni.
39-40Ké ɓil namu-aw mí Mari ur kalaŋ mbi mahful hil ma puh Zakari ɓay ko Elizabeɗ. Puh-u na tusiɓa Zude. Ke ka̧h, mí ke vah Elizabeɗ. 41Elizabeɗ ɓá lah vahna Mari bale, gun zay mun ké ɓil ye, mí Tempuki el ya̧ mun Elizabeɗ gbam pi. 42Elizabeɗ ɓah ɓay ɓeleŋ ɓahri : « Ŋgerzah san mu ké sakra wu̧ynzukri gbam mí lu mgbɔkɔ ku̧ tul wo. Mgbɔkɔ ye ku̧ tul gun ké na ɓil wo pi. 43Mi ɓa ge gaŋ mí mah Gaŋ bi gi ta̧w bi le ? 44Suk bi lah vahna wo, mí gun ké na ɓil bi el zay mun ke law rihna. 45Pol tehna Gaŋ tul feri riw ƴo ziŋ mu a wo ké law wo te sa tul ye ɓay fe le, ɓayaw ké-e pih hi̧ mu lah ra ɓay laɓ ɔh. »
46Mari ba, ɓahri se :
« Ɔkna bi gbam ƴo pir Gaŋ tul feri riw pi-pir.
47Tem bi zo zakra zakra ɓay tul Ŋgerzah nzuk-ya̧ mi
48ɓay fe le, ke ko kona ma tul gun-laɓ pihna ye a mah gelu-ay.
Ur ke aŋay si ka̧h sew ke sew, nzukri ɓay ɗi mi ɓa gun pol tehna ye
49ɓay fe le, Ŋgerzah nzuk huhrumun mí laɓ fe a luki hi̧ mi-ay.
Riŋ ye mbew yaŋ mí mgbe ɓa Nzuk lawpuki.
50Law in ye na sew ke sew ké tul nzukri ké hȩk ni.
51Ndɔk ye sɔk ŋgerna ye.
Ke zi̧rma nzuk-hu̧h tulri ke kerɓay woyri.
52Mbayri, ke ɗer niri ke gel kaɓna mbay woyri.
Ko̧hkori ba, ke ɔr tul woyri.
53Ke hi̧ suki mbah ɓil nzuk ɗakari tuɓ tuɓ.
Nzuk fe ziŋnari le, ke ni̧h niri ndɔk zolom.
54Ke mgba sa̧w gun Izarayelri,
in ké-e mgba ziŋ niri ra na law ye
55kandɔk ké-e wahɓayu ziŋ ziih Abaraham ke mi̧hri ye lewsa̧, mí ke ƴo tulu kpatara. »
56Mari kaɓ ziŋ Elizabeɗ few say dara mí ke el si puh ɓáy.
57Nam-kaɓ peŋe Elizabeɗ ka̧h bale, ke mbuŋ gun wo̧ronzuk. 58Bɔh puh Elizabeɗri ke yi̧n yeri lah ɓahri, Gaŋ tul feri riw mgba in ziŋ ni ɓa bawu, mí ku laɓ mun rihna ziŋ ni. 59Nam toŋndɔk seɗe-u ka̧h ɓa nam-kuŋ ndi̧w gun ba, nzukri gi mbu̧h hani ɓayu, mí ku yih ɓay tu riŋ gunu ke riŋ bah ye Zakari. 60Mí mah gun sa-a. Ke ɓahri : « Riŋ gunay ɓá tu kaŋ ya. Riŋ ye ɓa Za̧h. »
61Ku ɓahri : « Riŋ nzuk a suŋ ké sakra in woiri mí ɓa Za̧h lo ? »
62Bale ku laɓ ndɔk vbi bah gunu ɓay ɓahri, riŋ gun ra ɓá tu ɓa fe le ? 63Ke vbi gbekre fe vbehna, mí ke vbeh kandɔkay : « Za̧h mí ɓa riŋ gun ra. »
Nzukri gbam kaɓ silili. 64Sa gelu-aw mí nzak Zakari mgbur, mí ke ɓah ɓay yororo yororo el ke tumbɔl hi̧ Ŋgerzah. 65Hȩkme se bɔh puh yeri gbam. Mberem fe ké kal ra ya̧ gelri ké tusiɓa Zude ya̧h ya̧h. 66Nzukri gbam vbi law woyri ɓah se : « Mí-aw ba, Gaŋ tul feri riw ɓaŋ ndɔk ye kan tul gun ra wa, gunu ɓay na ani munu le ? »
67Ké nzak Zakari mgbur ra, Tempuki ya̧ mun ye gbam hi̧ ni a ye bah gunu ɓah ɓay kandɔkay :
68« Tumbɔl hi̧ Ŋgerzah a ye Gaŋ tul feri riw, záh gun Izarayelri
ɓay fe le, ke ɗer gi ko gun yeri, mí ke puh mbɔl hul soh tul sa̧w nzuk yeri.
69-70Ke mbi gun mbew ké haŋsekle gun zih Daviɗ mbay a luki a ye ké-e ɓa gun-laɓ pihna Ŋgerzah.
Gunu ɓa huhrumun ye Ŋgerzah ɓay ya̧ na
kandɔk ké-e pih gun nzak pihna yeri sɔk ɓayu ke titilu da̧y ra.
71-72Ke yá̧ na ké ndɔk nzukbaari, ke yá̧ na ké ndɔk nzuk-fu̧y nari,
sɔk keni law in ké-e mgba ziŋ ziihri,
ke ker ɓay si tul sal in ké-e ŋga̧h ziŋ zih wahri.
73Salɓay ké-e wah ké-e hah mun ye gbaɗ gbaɗ hi̧ ziih Abaraham ra, ke yȩkre ya.
Mí ke ƴo tulu ziŋ na.
74Ke ya̧ na ké ndɔk nzukbaa wahri dan hȩkme,
ɓay náh dim ni ɓa nzuk kani ye,
75ɓay náh dim ni ke law a teh-u,
ɓay náh dim ni ɓa záh wah,
ɓay náh dim ni ké ta̧w ye ɓa ŋgɔh.
76A wo gun bi ba,
nzukri ɓay tu mu ɓa gun nzak pihna Ŋgerzah ké deɓ ye ta-a
ɓayu ké mu sí pol hi̧ Gaŋ tul feri riw ɓay hi̧ nzukri ɓá geŋ gina ye.
77-78Mu hí̧ sa̧w nzuk yeri tu ɓahri, suya lu ké tul woyri, Ŋgerzah gi sel niri ké ndɔk hul
tumbɔl law in ké-e ker seh woyri keni.
Ke ɗer gi ko niri,
ke ɓa gel tehna ké ti̧h ke síɓa.
79Ndu̧yna mun ye teh gel hi̧ sa̧w nzuk yeri,
ku ƴo ɓil tirima, ku kaɓ huh tem hul,
ke hí̧ ku mbí mahful sina ké ɓil ɗeŋ. »
80Gun Zakari ra hu̧h. Tem mun ye ŋger ma pol pol. Ke kaɓ ɓil lawkɔr kpu̧ru ka̧h nam ké-e sɔk mun ye hi̧ gun Izarayelri.
Currently Selected:
Mbete Luk 1: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
