Mbete Za̧h 8
8
1Zezu tɔr si tul kasaw Oliveh.
Zezu ke wu̧y nunpuki
2Tipele za̧y bale, ke el si ɓil ila vul kani Ŋgerzah ra. Gun Izarayelri gbam gi mbu̧h hani ké ta̧w ye. Mí ke kaɓ siɓa ƴo sɔk niri ɓay Ŋgerzah. 3Nzuk-sɔk mbete bolkusol Ŋgerzahri ke fariziri ba, ku kɔklɔ wu̧y a hani-u gi keni ké pol Zezu. Wu̧y ra nzukri ziŋ ni ké gel-mbi wo̧ro. Ku ɓaŋ ni ƴo haŋsekle gel daɓa nzukri, 4mí ku ɓah hi̧ Zezu ɓahri : « Metere, wu̧yay ku ziŋ ni ké gel-mbi wo̧ro. 5Fe vbehna bolkusol Ŋgerzah ké Moyiz vbeh sɔk ɓahri, sam wu̧y a kandɔkayri ra náh vbuk niri ke kasaw i niri i. A wo ba, mu ɓah ani le ? »
6Ku ɓah kaŋ ƴo ndoh law ye ke ɓay. Ku ziŋ ɓay a hani ɓoɗ le, ku láɓ ɓay hul kan tul ye. Mí Zezu ɗiŋ ƴo vbeh ɓayri ké tusiɓa ke gun ndɔk ye. 7Nzuk-sɔk mbete bolkusol Ŋgerzahri ke fariziri ƴo ke ɓayu woso woso ziŋ ni bale, ke ɔr tul ma síɓa, mí ke ɓahri : « Ké haŋsekle woiri-ay nzuk ké suya mgba tul ye ya le, ké vbu kasaw a titilu ké tul wu̧yay. »
8Mí ke el ɗiŋ tul ye ƴo vbeh ɓayri ké tusiɓa ra ɓáy. 9Ku lah ɓay Zezu kaŋ, mí ku lɔm mun woyri tɔr hɔy hɔy. Ŋgereri mí tɔr pol dara nzuk a ɓoruri toŋ niri ɓáy. Ku poŋ Zezu ke wu̧y ra mí ƴo pol ye. 10Zezu ɔr tul ye ma síɓa, mí ke ɓahri : « Wu̧y, ku ƴo fál suŋ le ? Nzuk mbew laɓ ɓay hul ɓu tul wo ya le ? »
11Wu̧yu yih nzak ye ɓahri : « Ŋgernzuk, nzuk mbew ta-a. »
Kandɔkaw mí Zezu ɓahri : « A bi le, mi láɓ ɓay hul ɓu tul wo ya. Mú si. Mú laɓ suya mba#8.11 Daɓa mbete sa̧w nzak a haniri ta ke gel ki̧na 7.53 ka̧h 8.11 ya. Ur ke gel ki̧na 7.53 si ka̧h 8.11 kuŋ ɓay haŋsekle mbih-hi̧ ɔkna ke gel tehna nzukri. Ké gel ki̧na 7.37, Zezu ɓahri, ke ɓa mbih-hi̧ ɔkna. Ké gel ki̧na 8.12, ke ɓahri, ke ɓa gel tehna. Ɓayuri seɗe mbɔk ɓa ɓayri ké ziɓri ker ɓayu ké gel ti̧hmbih-pɔr vulri. Ku ɓahri, gel tehna ra ti ke mun Ŋgerzah ti̧h ke ɓil vul kani ye ƴo teh tusiɓa. Í ki̧ Mbete Esaïe 60.19-22 ke Mbete Ten sa̧wɓay 21.23-24 ɓay tu ɓay gel tehna.. »
Zezu ɓa gel tehna ké ti̧h ke vul kani Ŋgerzah
12Dale Zezu el ɓah hi̧ gun Izarayelri ra ɓahri : « A bi mí-i ɓa gel tehna tusiɓa ke nunmbam. Nzuk ké dih fal bi le, ta si sina ɓil tirima ya. Le gel tehna ra ɓa sa̧w ɔkna mí ƴo ziŋ nzuku. »
13Fariziri ba, ɓahri : « Mu lu lakna ɓay wo ke mun wo le, ketina ta ri ya. »
14Mí Zezu yih nzak woyri, ke ɓahri : « Mi lu lakna ɓay bi ke mun bi kara lakna ɓayaw ɓa ketina ɓay fe le, mi tu gel ké mi ur keni, mi tu gel ké mi él si ma mari pi. 15A woiri ba, i tu gel urna bi ya, i tu gel sina bi ya pi. I kuŋ salɓay ke kerɓay nzukri. A bi mi kuŋ salɓay kan tul nzuk ya. 16Mi kuŋ salɓay le, ɓa salɓay a ketina ɓay fe le, mi kuŋ salɓay ke tul bi ya. Wara le baah ké pih mi gi ra ƴo ziŋ mi. 17Fe vbehna ɓil mbete bolkusol Ŋgerzah vbeh lewsa̧ ɓahri, gelke nzukri seɗe te-teh ɓay mah hani le, ɓayu ɓa ketina#8.17 Í ki̧ ɓayu ɓil Mbete Deutéronome 17.6. .
18A bi mi lu lakna ɓay bi, baah ké pih mi ra kara te-teh ɓay bi pi. »
19Bale ku ɓahri : « Bah wo ƴo suŋ le ? »
Zezu yih nzak woyri ɓahri : « I tu mi ya. Bah bi kara i tu ni ya pi. I tu ra mi le, i tu bah bi pi. »
20Ɓayawri ké Zezu ƴo sɔk ké ɓil ila vul kani Ŋgerzah, ke ƴo sɔk ɓay Ŋgerzah ké gel-fa̧h fe hi̧na in. Nzuk mbew kara mgba ndɔk ye geɓ ya ɓay fe le, nam ye ka̧h ya ɓáy.
21Zezu el ɓah hi̧ niri ra ɓáy ɓahri se : « A bi le mi ɓay tɔru dale, i ɓay ƴah mi bale, salɓay hul ɓay ta tul woiri ɓa hul. Gel a a̧w ké mi él si ri ra i mah si ri ya. »
22Mí ziɓri ƴo ɓahri : « Ke tásol lo ? A ké-e ɓahri se, gel ké-e él si ri ra nah mah si ri ya-aw ba. »
23Mí Zezu el sɔk niri ɓahri : « A woiri ra i ɓa nzuk a sa̧w tusiɓa. A bi ba, mi ɓa nzuk a sa̧w nunmbam. A woiri sa̧w woiri ur ke feri ké Ŋgerzah laɓ. A bi le, sa̧w bi ur ke fe laɓnari ya. 24Kaŋaw mí-i ɓahri se, salɓay hul woiri ɓay ta tul woiri ɓa hul. Ɓayu ké law woiri ké te tul bi ɓahri, a bi mi ƴo ri ya ra le, salɓay hul woiri ɓay ta tul woiri ɓa hul gaŋ. »
25Mí ku ɓah : « A wo mu ɓa ge le ? »
Mí Zezu ɓahri : « Sa̧wɓay fe mí-i ɓah hi̧ wuri ke titilu sa̧ ra le ? 26Mi ƴo ke ɓayri ɓa ŋgi̧-u ké tul woiri ɓay ɓah-u pi, ɓay kuŋ salɓay keni pi. Nzuk ké pih mi ra ɓah ketina. Ɓayri ké ti̧h ke nzak ye mí-i ƴo ɓah ɓayuri ké nunmbam ke tusiɓa ke gelu gelu. »
27Zezu ɓah ɓay si tul baah, mí ku tu ya.
28Zezu el ɓah ra ɓáy ɓahri se : « Nam ké i ɓay ɔr gun nzuk pirmatul ma síɓa dale, i tú mi ɓahri, a bi mi ƴo ri. I tú ɓahri, feri ké mi laɓ mi laɓ ke tul bi ya. Wara le ɓa baah mí ndoh ɓayuri ké nzak bi. 29Nzuk-pih mi ra ƴo ziŋ mi. Ke poŋ mi ke hȩk bi ya ɓay fe le, mi ƴo laɓ suki ké rih law ye kpatara. »
30Zezu ƴo ɓah ɓay kaŋ, mí nzukri ɓa ŋgi̧-u kan law sa tul ye.
31Zezu ɓah hi̧ ziɓri ké kan law woyri sa tul ye ra ɓahri : « I ƴo tul ɓay bi le, i ɓa nzuk-dih fal biri gaŋ ɓa ketina. 32I ɓay tu ketina dale, ketina-aw ɓay sel wuri ke ɓil mgbal. »
33A woyri ba, ku ɓahri : « Sa̧w mi̧hri wah ɓa ziih Abaraham. Nah ɓa mgbal nzuk ya. Ani dara mú-u ɓahri, nah tí̧h ke ɓil mgbal le ? »
34Zezu yih nzak woyri ɓahri : « Ɓa ketina, i ɓa mgbal gaŋ. Mi ƴo ɓah hi̧ wuri ɓahri se, nzukri gbam ké ƴo laɓ suya le, ɓa mgbal suya munu. 35Mgbal ta kaɓ kerpuh nzuk kpatara ya. Gun puh-u mí ɓay ƴo ri kpatara. 36Kaŋaw ba, gun puh-u sel wuri ke ɓil mgbal le, i ɓa gun puh-u gaŋ. 37Mi tu-tu, sa̧w mi̧hri woiri ɓa Abaraham. Keni-aw kara i ƴah ful ɓay i mi ɓay fe le, ɓay bi kaɓ ziŋ wuri ya. 38Nzak bi ɓah ɓayri ké bah bi sɔk mi. A woiri kara ɓay ké i lah ké ta̧w bah woiri mí i ƴo laɓu. »
39Bale ku fer nzak ye ɓahri : « Bah wah ɓa Abaraham. »
Zezu ba, el ɓah : « I ɓa ra gun Abaraham le, i láɓ fe laɓna Abaraham. 40A woiri mí i ƴah ful ɓay i mi. Abaraham ba, laɓ fe a kaŋaw ya. A bi gun nzuk pirmatul mi ɓah ketina ké mi lah ké ta̧w Ŋgerzah mí law woiri si̧h tul bi. 41Fe laɓna bah woiri mí i ƴo laɓu-aw. »
Ku ɓah hi̧ ni ɓahri : « A wah, nah ɓa gun ndi̧w mbana ya. Bah wah mbew yaŋ mí ɓa Ŋgerzah. »
42Mí Zezu ɓahri : « Ŋgerzah ɓa ra bah woiri le, i ɓay sa mi ɓayu ké sa̧w bi ur ké ta̧w ye ké mi ƴo ri-ay. Mi gi ke tul bi ya. Wara le a ye mí ke pih mi gi. 43Ɓay fe wara mí i sa lah ɓay bi ya le ? I lah ya ɓay fe le, ŋgerna-lah ɓay bi ra ta-a. 44Bah woiri ɓa mbay záh tukala, mí law woiri yih mbi pihna law sena ye ɓay laɓu. A ye-aw ke ɓa nzuk-i hulri ke titilu da̧y. Ke ta tul ketina ya ɓay fe le ketina ta ta̧w ye ya. Ɓay ké nzak ye ɓah gbam ɓa kuŋɓay. Ke ɓah ɓay ke tul ye ɓay fe le, ke ɓa nzuk nzak rɔkna, ke ɓa bah nzak rɔknari. 45A bi ba, i sa kan law woiri tul bi ya ɓay fe le, mi ɓah ketina. 46A ge woiri mí ƴo ke ɓay a suya-u ɓay tuŋ mi keni le wo ? Mi ɓah ɓay a ketina ba, ani mí i kan law woiri tul ɓay bi ya le ? 47Nzuk ké sa̧w ye ur ké ta̧w Ŋgerzah le, ƴo lah nzak Ŋgerzah. Sa̧wu mí a woiri i lah nzak Ŋgerzah ya ɓay fe le, sa̧w woiri ta ɓa Ŋgerzah ya. »
48Bale ziɓri fer ɓay ɓahri : « Nah ɓahri se, mu ɓa gun mbay záh tukala#8.48 Sa̧w nzak vbeh ɓahri, samaritan. Somoroni ba, sɔk ɓahri, gun mbay záh tukala. Somoroni ke samaritan, kusolu eŋ hani ké sa̧w nzak nzukuri-aw. , záh kara ƴo tul wo ri. A̧w ba, nah ɓah gelu, kaŋ ya le ? »
49Zezu yih nzak woyri ɓahri : « Záh ta tul bi ya. Wara le mi hȩk bah bi. A woiri ba, i ko mi ŋgi̧w. 50Mi taw ɓay riŋ ɗina ya. Nzuk mbew ƴo ri mí taw ɓay hi̧ riŋ ɗina bi ɓá mgbe. Nzuku mí ɓa nzuk-kuŋ salɓayu. 51Munu, ke taw ɓay hi̧ riŋ ɗina bi ɓá mgbe ɓa ketina. Mi ƴo sɔk wuri ɓayay, nzuk ƴo tul ɓay bi le, hul ta ɗi riŋ ye ya wu̧m. »
52Mí ziɓri ɓah hi̧ ni ɓahri : « Aŋay nah tu-tu, záh ƴo tul wo gaŋ. Abaraham hu lewsa̧. Gun nzak pihna Ŋgerzahri kara hu lewsa̧ pi. A wo ba, mu ɓahri se, nzuk ƴo tul ɓay wo le, ta tu hul ya wu̧m. 53Uwa, mu ɓa nzuk a luki kal tul zih wah Abaraham ké hu da ra ley ? Gun nzak pihna Ŋgerzahri kara hu da pi ra wa, mu laɓ mun wo ɓa nzuk ké na ani munu le ? »
54Zezu yih nzak woyri ɓahri : « Mi sɔk mun bi ɓa nzuk ke mun le, riŋ ɗina-u ɓa fe ndikpo. Bah bi ké i ɓahri se, ɓa Ŋgerzah woiri ra, a ye, ke tu riŋ ɗina bi ké-e kan tul bi tu. 55A woiri i tu wuri ni ya. A bi le, mi tu ni tu. Gelke mi ɓahri, mi tu ni ya le, mi tí̧h ɓa nzuk-kuŋ ɓay eŋ wuri kaŋ pi. Mi tu ni pi, mi ƴo tul ɓay ye pi. 56Ziih Abaraham zay mun zakra zakra ɓay ko nam gina bi. Ke ko gina bi ba, mí law ye rih ni. »
57Mí ziɓri ɓah hi̧ ni ɓahri : « A wo ké mbihmbam wo ka̧h bon ndiɓi ya ɓáyay, mí mu ko Abaraham ley ? »
58Zezu ɓah hi̧ niri ɓahri : « Ɓa ketina, mi ko Abaraham ko. Mi ƴo sɔk wuri ɓahri, dara mí kú mbuŋ Abaraham le, mi ƴo ri. »
59Kandɔkaw mí ziɓri fa̧h kasaw ɓay vbuk ni ɓay i ni bale#8.59 Nzuk leh tul ye ke Ŋgerzah le, ziɓri vbuk nzuku ke kasaw ɓay i ni. Í ki̧ Mbete Lévitique 24.16 ɓay tu ɓayu., ke ƴahra ti̧h ke ɓil ila vul kani Ŋgerzah, mí ke tɔr.
Currently Selected:
Mbete Za̧h 8: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
