Mbete Za̧h 6
6
1Fá-falu Zezu tɔr si kala mahmbih Galile kú-u ɗi ɓa mahmbih Tiberiyaɗ. 2Daɓa nzukri ɓa ŋgi̧-u dih fal ye wuh wuh ɓay fe le, ku ko fe saŋri ké-e laɓ gah nzuk senari. 3Mí Zezu hil ke nzuk-dih fal yeri si kaɓ tul kasaw. 4Nam ti̧hmbih ziɓri ké ɓa ti̧hmbih-i guy buma toŋ ɗih mba.
5Zezu duh tul mí ko daɓa nzukri ƴo gina ma ta̧w ye bale, ke ɓah : « Filiɓ, ké gel suŋ mí nah ɓay yeh ri fe su̧na ɓay mgba keni daɓa nzukri-ay le ? »
6Ke ɓah ɓayaw ƴo leh keni law Filiɓ. Zezu ra tu fe ké-e laɓu da. 7Filiɓ yih nzak ye ɓahri : « Nah si ra yeh peŋ mah nun sak sɔɗ seɗe mí wal niri ndi̧ ndi̧ kara ta mah niri ya. »
8Nzuk-dih fal ye a ɓoru, Andere yi̧n Simu Piyer ba, ɓah : 9« Gun seke-ay ƴo ke peŋ ndiɓi ke nzuy seɗe mí na-ay wa, ɓay mah gel ɗaka daɓa nzukri-ay gaŋ le ? »
10Bale Zezu ɓahri : « Í hi̧ nzukri ɓá kaɓ siɓa. »
Ké gelaw suy loŋ ri mbula su kaɓna. Ŋgi̧na wo̧rori laɓ sɔɗ sɔɗ boh gel ndiɓi (5.000) mí kaɓ ri.
11Dale Zezu mbi peŋ ra, ke el ke tumbɔl hi̧ Ŋgerzah, mí ke wal hi̧ nzukri su̧. Ke el laɓ kaŋ ke nzuy ké seɗe-aw pi. A ge ge le su̧ fe mah ɓil ye ɓil ye. 12Ɓil nzukri mbah, ku poŋ tɔru, mí ke ɓah hi̧ nzuk-dih fal yeri : « Í mbu̧h wuri tɔr fe su̧na ra. Ndi̧ kara ɓá zi ya. »
13Mí peŋ ndiɓi ké nzukri su̧ ra ku mbu̧h tɔru mbah tɔlɔ ɓa boh falu seɗe.
14Nzukri ko fe saŋ ké Zezu laɓ kaŋ bale, ku ƴo ɓahri : « Nzukay ɓa gun nzak pihna Ŋgerzah eŋ Moyiz gaŋ wa#6.14 Ndazi ɓay gun nzak pihna Ŋgerzah ké eŋ Moyiz na diŋ Mbete Za̧h 1.21. ? »
15Zezu tu ɓahri, nzukuri-aw ɓay gi mgba ni ɓa mbay ke ŋgere, mí ke el tɔr sɔɗ si kaɓ tul kasaw ke hȩk ye.
16Seh na nzȩh bale, nzuk-dih fal Zezuri tɔr si nzak mahmbih. 17Ku hil kumbon mí mbi sina ma kala mahmbih ma Kapernayum. Seh riŋ mo̧r. Zezu ka̧h ta̧w woyri ya ɓáy. 18Ku ƴo hehre kumbon, mí baw kuna gi ku bivbiɗ bivbiɗ hi̧ mahmbih laŋ baŋlaŋ baŋlaŋ. 19Ku hehre kumbon mah salful ndiɓi mini tɔtɔklɔ ma haŋsekle mahmbih bale, ku ko Zezu si sina tul mbih. Ke ka̧h ké ta̧w woyri, mí hȩkme laɓ niri. 20Zezu ba, ɓah ɓay hi̧ niri ɓahri : « A bi munu. Í laɓ hȩkme ya. »
21Kandɔkaw mí ku hi̧ ni hil kaɓ ɓil kumbon. Kaɓna ye ba, ɓa kumbon ké ka̧h ɓel sew fál sa̧ ba.
22Tipele-u nzukri ké toŋ kala mahmbih fál gini ko kumbon a mbew yaŋ mí dah. Ku ko nzuk-dih fal yeri tɔr keni ke hȩk woyri. Zezu ba, kaɓ ɓilu ziŋ nzuk-dih fal yeri ya. 23Kumbon a ɓoruri ba, ur ke Tiberiyaɗ gi dah ɗih ya ke gel ké nzukri su̧ peŋ fal ké Zezu el ke tumbɔl hi̧ Gaŋ tul feri riw ra. 24Mí nzukuri ko Zezu ke nzuk-dih fal yeri ta ri ya ra bale, ku rih ɓil kumbonri-aw, mí ku tɔr keni ma Kapernayum si ƴah niri.
25Ku ziŋ Zezu ké kala mahmbih a ɓoru, mí ku vbi ni ɓahri : « Rabbi, seh suŋ mí mu ka̧h gelay le ? »
26Zezu yih nzak woyri, ke ɓahri : « Munu, ɓa ketina. Mí-i ƴo ɓah ɓayay hi̧ wuri, i ƴah mi ɓay tu sa̧w fe saŋri ké mi laɓ ra ya. Wara le i ƴah mi ɓay fe le, i su̧ fe mbah ɓil woiri tuɓ tuɓ. 27Í laɓ wuri pihna fe su̧na a ké zi-zi ra ya. Í laɓ pihna fe su̧na ké mah kaɓ ke ɔkna sew ke sew ɓa ŋgɔh. Fe su̧na-u gun nzuk pirmatul ɓay hi̧ wuri. Ɓayu ké baah Ŋgerzah mí ŋga̧h ɓayu kaŋ. »
28Ku vbi ni ɓahri : « Nah láɓ ani dara ɓay náh laɓ pihna Ŋgerzah ra le ? »
29Zezu yih nzak woyri ɓahri : « Pihna Ŋgerzah ɓa kán law tul nzukay ké Ŋgerzah pih ni gi. »
30Mí ku vbi ni ɓahri : « Fe saŋ fe mí mu láɓ hi̧ na, náh tu mu keni, mí náh kan law tul wo le ? A fe mí mu laɓu le ? 31Ziihri lak man ké ɓil lawkɔr kandɔk kú-u vbeh ɓayu ɓil mbete bolkusol Ŋgerzah lewsa̧ ɓahri, huru ké ur ke nunmbam mí ke hi̧ niri#6.31 Ɓay lah ɓay huru ké ur ke nunmbam í ki̧ Mbete Exode 16.4,15, Mbete Siŋ (Psaumes) 78.24 ke 105.40 pi. , ku lak. »
32Zezu ba, ɓah ɓay hi̧ niri ɓahri : « Munu, ku lak man ɓil lawkɔr ɓa ketina. Mí-i ƴo ɓah ɓayay hi̧ wuri, ta ɓa Moyiz mí hi̧ wuri huru ké ur ke nunmbam ra ya. Le bah bi mí ƴo hi̧ wuri huru ké ur ke nunmbam ké ɓa huru a ketina-ay. 33Huru ké Ŋgerzah pih keni-ay ra ɓa a a̧y ké ɗer ke nunmbam gi mí ƴo hi̧ ɔkna hi̧ nunmbam ke tusiɓa. »
34Mí ku ɓahri : « Ŋgernzuk, mú hi̧ na huru ra kpatara. »
35Zezu ɓah hi̧ niri ɓahri : « A bi mí-i ɓa huru-hi̧ ɔkna ra. Nzuk ké gi ta̧w bi le, ɗaka ta i ni mba. Nzuku kan law tul bi le, kɔkmbih kara ta i ni mba pi. 36Mí-i ɓahri se, i ko ke nun woiri ko, mí i kan law tul bi ya dih.
37Feri gbam ké ƴo ri-ay, baah ndoh ndɔk bi. Nzuk gi ta̧w bi le, mi ta ni̧h ni ya 38ɓay fe le, mi ur ke nunmbam gi ɓay laɓ fe ké law bi yih ya, wara le ɓay laɓ fe ké law nzuk-pih mi yih. 39Fe ké law nzuk-pih mi yih mí na-ay : nunmbam ke tusiɓa ke feri riw ké-e ndoh ndɔk bi ra ta zi mbew ya. Le nam a ɔh tɔru le, mi hí̧ nzukuri ɓay el kaɓ ke pa̧ymun a foyu. 40Kandɔkaw mí ɓa fe ké law baah yih. Nzukri riw ké ko gunu, mí ku kan law tul ye le, ku ƴo ke ɔkna ɓa ŋgɔh. Nam a ɔh tɔru ra mi hí̧ niri ku él kaɓ ke pa̧ymun a foyu kaŋ pi. »
41Dale ziɓri ŋgu̧hru ɓay ké tul Zezu ɓay fe le, ke ɓahri, a ye ke ɓa huru ké ur ke nunmbam gi.
42Ku ƴo ɓahri : « A ye-ay ra ke ɓa gun Zezeɓ ya le ? Mah ye ke bah ye ra, nah tu niri tu, ya lo ? Ani dara mí ke ɓahri se, ke ur ke nunmbam le ? »
43Zezu yih nzak woyri, ke ɓahri : « Í poŋ wuri su̧hɓay. 44Nzuk mbew ta gi ta̧w bi ke tul ye ya. Le baah ké pih mi, mí kɔklɔ nzuku gi ta̧w bi-aw. A bi ba, mi hí̧ ni ke él kaɓ ke pa̧ymun a foyu ke nam a ɔh tɔru-aw pi. 45Mbete vbehna gun nzak pihna Ŋgerzah a lewsa̧ri ɓahri, Ŋgerzah ɓay firma niri riw#6.45 Ɓayay na ɓil Mbete Jérémie 31.33..
Nzukri gbam ké ƴo lah nzak bah bi, mí ku tih keni le, ku gi ta̧w bi. 46Baah ra nzuk a hani ké ko ni ta-a, sa ɓa nzuk a a̧y ké ur ké ta̧w Ŋgerzah. A ye mí ke ko baah.
47Gelu munu, ɓa ketina. Mi ƴo ɓah ɓayay hi̧ wuri, nzuk ké kan law tul ye le, nzuku ƴo ke ɔkna ɓa ŋgɔh. 48A bi mí-i ɓa huru-hi̧ ɔkna ra. 49Lewsa̧ ziihri ƴo lak huru man ké ɓil lawkɔr, mí ku toŋ hu mgbum. 50Huru a a̧y ba, ur ke nunmbam mí gi ɓay hi̧ nzukri ɓá lak dale, hul ta ɗi riŋ nzukuri ya.
51A bi mí-i ɓa huru a sa̧w ɔkna ké ur ke nunmbam gi. Nzuk lak huru-ay le, ɓay ɔ-ɔkna ɓa ŋgɔh. Huru ké mi ɓay hi̧-u-aw ɓa mun bi ɓay tul ɔkna nunmbam ke tusiɓa. »
52Mí ziɓri ur ke ɓala, ku ɓah ké sakra hani ɓahri : « Ke ŋgerna fe mí nzukay ɓay hi̧ na haymun ye náh su̧ le ? »
53Dale Zezu sɔk niri ɓahri : « Munu, ɓa ketina. Mi ƴo ɓah ɓayay hi̧ wuri, i su̧ haymun gun nzuk pirmatul ya, i nzo sem ye ya le, ɔkna-u ta ta̧w woiri ya. 54Nzukay ké ƴo su̧ haymun bi, ké ƴo nzo sem bi le, nzuku ƴo ke ɔkna ɓa ŋgɔh. A bi ba, mi hí̧ ni ke él kaɓ ke pa̧ymun a foyu ke nam a ɔh tɔru, 55ɓayu ké haymun bi mí ɓa fe su̧na a kpakpaŋu, sem mun bi kara ɓa mbih nzona a kpakpaŋu pi. 56Nzukay ké ƴo su̧ haymun bi, ké ƴo nzo sem bi ra, nzuku kaɓ ziŋ mi, a bi kara mi kaɓ ziŋ ni pi. 57Kandɔk baah, a ye Ŋgɔhnzuk ké pih mi, mí-i ɔ-ɔkna ɓay tul ye, mí nzuk ké ƴo su̧ haymun bi ra, ɓay ɔ-ɔkna ɓay tul bi kaŋ pi. 58Kandɔkaw mí huru a a̧y ké ur ke nunmbam mí gi. Huru ra ta na kandɔk huru ké ziihri lak lewsa̧ kú-u toŋ hu mgbum ra ya. Nzuk ké ƴo lak huru-ay, ɓay ƴo ke ɔkna sew ke sew ɓa ŋgɔh. »
59Zezu ɓah ɓayaw ké ɓil vul misoŋ woyri ƴo firma nzukri ɓay Ŋgerzah ké Kapernayum.
60Nzuk-dih fal Zezuri ɓa ŋgi̧-u lah ɓay ɓahna ye kaŋ bale, ku ɓahri : « Ɓayaw kpuh mbamba. Suk ge mí mah lah-u le ? »
61Zezu tu ɓay kú-u ƴo ŋgu̧hru-u, mí ke ɓahri : « Ɓayaw ra zi̧rma law woiri ké tul bi le ? 62Nam ké i kó gun nzuk pirmatul el si kaɓ ma sa̧w gel ye le, i láɓ ani ɓáy le ? 63Tempuki mí ƴo hi̧ nzuk ɔ-ɔkna. Mun nzuk pirmatul a som siɓa ba, ti̧h nzuku suk ya. Ɓayri ké mi ɓah hi̧ wuri ɓa ɓay Tempuki, mí ɓa ɔkna pi. 64Keni-aw kara nzuk a haniri ké haŋsekle woiri-ay kan law woyri tul ɓay bi ya. »
Zezu ɓah kaŋ ɓayu ké-e tu nzuk a a̧yri ké to suyɓay ye ma fal tu. Ke tu nzuk ké ɓay te ni pi. 65Mí Zezu el ɓah : « Sa̧wu mí-i ɓah hi̧ wuri ɓahri se, nzuk mbew ta gi ta̧w bi ke tul ye ya. Le baah ɓá hi̧ nzuku ŋgerna gi ta̧w bi dara ɓáy. »
66Kandɔkaw mí ŋgi̧na nzuk-dih fal yeri el ke mun woyri ma fal poŋ ni. Ku mgba bɔh sina ziŋ ni mba. 67Zezu ra el ɓah hi̧ nzuk-dih fal yeri a boh falu seɗe ra ɓahri : « A woiri kara i yih ɓay poŋ mi pi le ? »
68Mí Simu Piyer yih nzak ye, ke ɓahri : « Ŋgernzuk, nah ɓay si ma fál suŋ le ? Mu ƴo ke ɓayri ké hi̧ ɔkna ɓa ŋgɔh. 69Nah kan law wah sa tul wo. Nah tu mu ɓa nzuk lawpuki ké Ŋgerzah mbi mu ɓa nzuku a ye. »
70Zezu ba, el yih nzak ye ɓahri : « A bi mí-i lu wuri ɓa boh falu seɗe-aw, kaŋ ya le ? Mí nzuk mbew ké sakra woiri ɓa nzukbaa ke mbay záh tukala. »
71Zezu ƴo ɓah ɓay tul Zudas gun Simu ké Isikariyoɗ. Ke ƴo sakra nzuk-dih fal yeri a boh falu seɗe-aw pi. A ye mí ke ɓay te Zezu.
Currently Selected:
Mbete Za̧h 6: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
