Mbete Za̧h 18
18
1Fal ɓayawri ké Zezu ɓah ra, ke ur ke nzak fe su̧na ke nzuk-dih fal yeri. Ku tɔr si gaw kala nduh Sederoŋ. Waka ƴo gelaw, mí Zezu ke nzuk-dih fal yeri si ri. 2Zudas nzuk-te ni kara tu waka-aw pi ɓay fe le, ku ƴo mbu̧h hani ké ri. 3Zudas ra fa̧h daɓa soze rɔmri ke soze-kɔr vul kani Ŋgerzahri, mí ke nda pol woyri ƴo gina. Ku mgba fe remri gbiri gbiri. Ku suk hɔrɔ mbakari ke hɔrɔ a ɓoruri, mí ku ti̧h keni ɓil waka. Ŋgernzuk fe puhna Ŋgerzahri ke fariziri mí pih niri.
4Zezu tu fe ké ɓay kal ké tul ye tu bale, ke si nzɔh nun woyri, mí ke vbi niri ɓahri : « I ƴah ge le ? »
5-6Ku yih nzak ye ɓah : « Nah ƴah Zezu, nzuk Nasareɗ. »
Zezu ɓah : « Mi ƴo ri. »
Zezu ɓahri, ke ƴo ri bale, ku ndur mun woyri tuɗ tuɗ lih guɓ siɓa. Zudas, nzuk-te ni ra ƴo ziŋ niri pi.
7Zezu el vbi niri ra ɓáy ɓahri : « I ƴah ge le ? »
Ku ɓahri : « Zezu nzuk Nasareɗ. »
8Zezu el ɓahri : « Mi ɓahri se, mi ƴo ri. »
Mí ke el ɓahri, ku ƴah ni le, kú poŋ nzuk yeri ɓá tɔr.
9Ke ɓah kaŋ ɓay hi̧ ɓay ké-e ɓah pol ra ɓá ƴo gelu. Ke ɓahri se, nzukri ké baah hi̧ ni ye, ke zi nzuk mbew ya.
10Simu Piyer ba, lu mahwu̧y pevbȩɗ, mí ke te gaysuk gun-laɓ pihna ŋgernzuk fe puhna Ŋgerzah a fál lakna fekeɗ kuŋ. Riŋ gun-laɓ pihna-aw ɓa Malkus.
11Zezu ba, ɓah hi̧ Piyer ɓahri : « El ke mahwu̧y wo ndoh vulu. »
Ke el ɓahri se : « Koɓ ti̧hmbih-ay, ké baah hi̧ mi ra wa, mi ta nzo-u ya lo ? »
12Ŋgernzuk kumandah ke soze yeri ke soze-kɔr vul kaniri mgba Zezu, ku ŋga̧h ni, 13ku kɔklɔ ni si pol Anasi kandɔk ké-e ɓa fay Kayif. Lewsa̧, ke ɓa ŋgernzuk fe puhna Ŋgerzah dara mí Kayif soh ri ke sewu-aw ɓáy. 14Kayif ɓa nzuk ké hew ŋgernzuk ziɓri pol sa̧ ɓahri se, su-su ɓay nzuk mbew ɓá hu ɓay tul sa̧w nzuk Ŋgerzahri#18.14 Ɓay Kayif ra na ɓil Mbete Za̧h 11.49..
15Simu Piyer ra a ye ke nzuk-dih fal Zezu a hani-u mbew, ku mbehle sina si fal Zezu. Nzuk-dih fal ye a mbewu-aw ra, ŋgernzuk fe puhna Ŋgerzahri tu ni tu. Kandɔkaw mí ke ziŋ ful rih si fal Zezu ké ɓil kerpuh ŋgernzuk fe puhna Ŋgerzahri-aw. 16Piyer ba, ta̧h ƴo polkɔkɔ ké kala bale, nzuk-dih fal Zezu a mbew ké ŋgernzuk fe puhna tu ni ra el gi ɓah ziŋ wu̧y ké kɔr nzakful, mí ke poŋ Piyer rih ɓil kerpuh pi.
17Bale wu̧y ra vbi Piyer ɓay ɓahri : « A wo mu ɓa nzuk-dih fal gun wo̧ro-aw, ra ma ? »
Mí Piyer ɓah : « A bi ta-a. »
18Tel voh mbamba. Gun-laɓ pihnari ke soze-kɔr vul kaniri kaɓ nzak hɔrɔ ƴo nu̧h. Piyer kara ƴo nu̧h ziŋ niri pi.
19Anasi, ŋgernzuk fe puhna Ŋgerzah ra, vbi Zezu ɓay nzuk-dih fal yeri ke ɓay fe firma ké-e firma nzukri pi.
20Zezu ba, yih nzak ye ɓahri : « Mi ɓah ɓa teh-u ké pol daɓa nzukri. Mi ƴo ɓah kpatara ké ɓil vul misoŋ pi, ké ɓil ila vul kani Ŋgerzah pi. Gelawri, ziɓri gbam mbu̧h ri. Mi ɓah ɓay ké duh gel ya. 21Ɓay fe mú-u vbi mi ɓayu le ? »
Ke el ɓahri se, ŋgernzuk fe puhna ɓá vbi nzukri ké ƴo-ay. Nzukuri lah ɓay ɓahna ye te-teh. 22Zezu ɓah kaŋ, mí soze-kɔr vul kani a hani ké ƴo ta̧w ye vba̧ ni kpay. Ke ɓahri, ku yih nzak ŋgernzuk fe puhna Ŋgerzah kaŋ le wo ? 23Mí Zezu el ɓah hi̧ ni ɓahri, ɓay ye ƴo gelu ya le, soze ɓá ten suya-u ɓa teh-u. Ɓay ɓahna ye ƴo gelu ba wa, ani mí soze vba̧ ni ye mgbum le wo ? 24Bale Anasi ŋga̧h Zezu pih ni si pol Kayif ŋgernzuk fe puhna Ŋgerzah a sewu-aw ra.
25Simu Piyer le ƴo nu̧h hɔrɔ ziŋ gun-laɓ pihnari ra. Bale ku ɓahri : « A wo mu ƴo sakra nzuk-dih fal yeri, ra ma ? »
Mí Piyer el ma̧y ɓay ra ɓahri : « A bi ta-a. »
26Mí gun-laɓ pihna ŋgernzuk fe puhna Ŋgerzah, nzuku ɓa yi̧n nzuk ké Piyer te suk ye ra, ke ɓah : « Mi ko mu ké waka-aw, ya le ? »
27Piyer ma̧y ɓay ra ɓáy ba, tuhndoy mgbal kah koŋroŋ ba.
28Tipele teh. Ŋgernzuk ziɓri ten Zezu ke kerpuh Kayif bale, ku maŋ ni si ka̧h kerpuh guvener Pilaɗ. Ŋgernzukri ra sa rih ɓil kerpuh Pilaɗ ya rɔkɔ suya sa̧w ye ɓá rȩhke niri. Wara le mun woyri lek ɓay su̧ fe su̧na ti̧hmbih-i guy buma.
29Mí Pilaɗ ti̧h si ta̧w woyri, ke ɓahri : « Suya fe mí i sek ni keni le ? »
30Ku yih nzak ye ɓahri : « Ke ɓa nzuk-laɓ suya ya le, nah ta ndoh ni ndɔk wo ya. »
31Mí Pilaɗ ɓahri : « A woiri í mgba ni, í kuŋ salɓay kan tul ye ke bolkusol woiri. »
Ŋgernzuk ziɓri ba, ɓahri : « Bolkusol rɔmri hah na kúŋ salɓay hul kan tul nzuk. »
32Fe-u laɓ mah hani ke ɓay ké Zezu ɓah pol. Ke sɔk ɓay sam hul a ani-u ke hu-u keni.
33Bale Pilaɗ el rih ɓil kerpuh. Ke ɗi Zezu gi. Ke vbi ni ɓay ɓahri : « A wo mú-u ɓa mbay ziɓri ra le ? »
34Zezu yih nzak ye ɓahri : « Vbiɓayay ur ké ta̧w wo mini nzuk a ɓoruri mí sɔk mu ɓay bi le ? »
35Pilaɗ yih nzak ye ɓahri : « A bi mi ɓa ziɓ lo ? Nzuk wori ke ŋgernzuk fe puhna wori mí mgba mu ndoh ndɔk bi. Suya fe mú-u laɓ le ? »
36Zezu ba, ɓahri : « Sa̧w lák mbay bi ta tukala ya. Lák mbay bi ƴo ra tukala le, nzuk biri ɓay ruh ɓay tul bi ɓay rɔkɔ mí toh ɓil ndɔk ziɓri. Wara mí sa̧w lák mbay bi le ta tukala ya. »
37Bale Pilaɗ ɓahri : « Mí le, mu ɓa mbay, ra wa ? »
Mí Zezu yih nzak ye ɓahri : « Nzak wo mí ɓah-aw. Sa̧wɓay mbuŋna bi-aw munu. A bi mi gi tukala ɓay ten tehɓay ketina-aw. Nzuk ketinari riw lah nzak bi. »
38Mí Pilaɗ ɓah, ketina ɓa fe le ? Kaŋaw ke el ti̧h kala ziŋ ziɓri, mí ke ɓahri : « A bi le mi ko suya mbew ké mgba tul ye ya. 39Mí ɓay fe laɓna bi ke nam ti̧hmbih-i guy buma woiri le, mi sél mgbal mbew. Mí sel mbay ziɓri ra le ? »
40Mí ku vba̧ nzak goɗoɗo ɓahri : « A ye ya. Bar-Abba ma. »
A ye Bar-Abba ra ke ɓa nzukbaa ŋgomna.
Currently Selected:
Mbete Za̧h 18: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
