Mbete Fe laɓna Tempuki 5
5
1Nzuk a ɓoru ɓáy ƴo ri. Riŋ ye ɓa Ananiya ke wu̧y ye Safira. Ku ɗam waka woyri yeh. 2Ku lek ɓay ke wu̧y ye, ku kehr lari-u mu̧h dara mí Ananiya gi ke tɔru ku̧ ndɔk gun nzak pihna Ŋgermbayri ɓáy ɓahri, lari waka ra, gbam munu. 3Dale Piyer ɓah hi̧ ni ɓahri : « Ananiya, ɓay fe mú-u lah nzak mbay záh tukala hi̧ mú-u kuŋ ɓay hi̧ Tempuki ? Mu kehr lari waka wo mu̧h. 4Waka-aw, mu yeh ya kara, ɓa waka wo. Mú-u yeh da kara, lari-u ɓa nzuku a wo ɓay mú laɓ keni fe ké law wo yih, kaŋ ya le ? Ani mú-u lah nzak mbay záh tukala, mú-u mgba ɓayu kan ɓil law wo le ? Ɓa Ŋgerzah gaŋ mú-u kuŋ ɓay hi̧ ni-aw#5.4 Gelke i mgba gel ki̧na 3 tuh ke gel ki̧na-ay le, i tú ɓahri, Tempuki ɓa Ŋgerzah. Gelke i mgba gel ki̧nari 3 ke 4 tuh ke gel ki̧na 9 le, i tú ɓahri, Tempuki ɓa Tem Gaŋ tul feri riw. Í ki̧ Mbete Filipiri 2.11 ɓay tu ɓahri, Gaŋ tul feri riw ɓa Ŋgermbay le Ŋgermbay mí ɓa Ŋgerzah.. Le ta ɓa nzuk pirmatulri ya. »
5Ananiya ɓá lah ɓayaw kaŋ bale, ke lih gbirik ɓa hul. Hȩkme a bawu laɓ nzukri riw ké lah ɓayu. 6Gun sekeri gi pɔr hul ye, mí ku mbi si gɔr.
7Sa̧wseh say kal, mí wu̧y ye gi ta̧w gun nzak pihnari. Ke tu fe ké kal ké tul wah ye ya. 8Piyer vbi ni ɓahri : « Mú sɔk mi, mí lah. Suy lari waka woiri ké i yeh ra gaŋ mí na-ay le ? »
Wu̧y ra ɓahri : « Gelu gaŋ munu. »
9Wara mí Piyer ɓah hi̧ ni ɓahri : « Ani mí a wo ke wah wo, i lek ɓay mbew ɓay fah keni Tem Gaŋ tul feri riw le ? Mú lah tiri bɔk nzukri ké si gɔr wah wo ké kala-aw, ku ƴo gina. Ku ɓay mbi hul wo kaŋ pi. »
10Bale wu̧y ra lih guɓ mbuka ɓa hul ké pol Piyer. Gun sekeri ra el gi ka̧h, ku ndukru hul ye, mí ku mbi si gɔr ké ɓel wah ye. 11Hȩkme ɓa ŋgi̧-u laɓ sa̧w nzuk Ŋgermbayri gbam ke nzuk a ɓoruri ké lah ɓayu pi.
Tempuki hi̧ gun nzak pihnari lu lakna ɓay lak mbay Ŋgermbay
12Tempuki hi̧ gun nzak pihna Ŋgermbayri laɓ fe saŋri ɓoɗ ɓoɗ ɓa ŋgi̧-u ké sakra nzukri. Nzuk-kan law sa tul Ŋgermbayri ƴo mbu̧h hani kpatara ke law mbew ké huh tem Salomoŋ mbay a luki ké na ɓil ila vul kani Ŋgerzah#5.12 Í ki̧ Mbete Fe laɓna Tempuki 3.11 ɓay tu ɓay tem Salomoŋ mbay a luki.. 13Ké sakra nzuk a ɓoruri-aw, nzuk mbew ké lu hȩkme ké nun ye ɓay mbu̧h ziŋ niri ta-a. Mí keni-aw kara, ku pir niri ma pol pol. 14Nam ke nam, wo̧rori ke wu̧yri ɓa ŋgi̧-u kan law woyri sa tul Ŋgermbay dɔɓ tul nzuk a polri. 15Ku fa̧h nzuk senari ke hih nam woyri gi keni ɓɔk ɓel mgboŋ ɓay hi̧ Piyer ƴo kalna le, tem ye ɓá kal ké tul nzuk sena a haniri. 16Daɓa nzukri ra ɓáy ur ke puhri ké ɗoŋ Zurusalem. Ku fa̧h nzuk senari ke nzuk a a̧yri ké záh ƴo tul woyri gi dɔɓ tul nzuk sena a Zurusalemri pi. Mí ku ziŋ mun gahna kew kew. Kandɔkaw mí Tempuki hi̧ gun nzak pihna Ŋgermbayri laɓ fe saŋri ɓoɗ ɓoɗ.
17Wara mí ŋgernzuk fe puhna Ŋgerzah ke nzuk fal ŋgaŋ ye sadusiri, sere mbah ɓil law woyri tuɓ tuɓ. 18Mí ku mgba gun nzak pihnari si ku̧ vul mgbal ŋgomna.
19-20Suŋ sih bale, tem nzak pihna Ŋgermbay gi mgbur nzak vul mgbal ké sozeri ƴo kɔru. Ke ten gun nzak pihnari, mí ke ɓah hi̧ niri ɓahri : « Í tɔr si ɓil ila vul kani Ŋgerzah, í sɔk gun Izarayelri riw ɓay ɔkna ké Ŋgerzah lek ɓay tul nzukri, kú lah. »
21Gun nzak pihnari laɓ kaŋ. Gel fa̧h hoh, mí ku tɔr si ɓil ila vul kani Ŋgerzah. Ku ƴo sɔk nzukri ɓay ɔkna ra. Ŋgernzuk fe puhna Ŋgerzah ke nzuk yeri ba, ɗi ŋgernzuk Izarayelri, ku mbu̧h hani a woyri nzuk-kuŋ salɓayri. Ku pih sozeri si vul mgbal ɓay kú ten gun nzak pihnari gi keni. 22Sozeri ra si ka̧h vul mgbal le, ku ziŋ niri ké ri ya. Ku el gi sɔk ɓayu hi̧ nzuk-kuŋ salɓayri ɓahri : 23« Nah si le, nah ziŋ nzak vul ke gel tuh-u. Soze-kɔr mgbalri kara, ƴo nzakful ra kȩk pi. Mí nah mgbur ful le, nah ziŋ nzuk mbew ké ɓil vul ya. »
24Kumandah soze-kɔr vul kani ke ŋgernzuk fe puhna lah ɓayaw kaŋ bale, ku mgba̧m ɓay ɓa ŋgi̧-u ké tul gun nzak pihnari ɓay tul feri ké ɓay gi-u. 25Wara mí nzuk a hani gi ɓah hi̧ niri ɓahri : « Í lah. Nzukri ké i mgba niri ku̧ vul mgbal ra, ku ƴo ɓil ila vul kani Ŋgerzah ƴo sɔk ɓay hi̧ nzukri. »
26Kumandah ur ke soze yeri si ri. Ku si maŋ gun nzak pihnari gi keni. Ku mgba niri ke ŋgere ya. Sozeri laɓ hȩkme nzukri. Ku ker ɓahri : « Nzukri ɓay vbuk na ke kasaw i na. » 27Ku ka̧h gel kuŋ salɓay, mí sozeri hi̧ niri ku ƴo pol nzuk-kuŋ salɓayri bale, ŋgernzuk fe puhna ɓah ɓay hi̧ niri ɓahri : 28« Pol sa̧ ra, nah bak wuri bak ɓahri se, í sɔk fe ke riŋ nzukaw ra ya. Mí a woiri ra, fe sɔkna woiri ya̧ gel ké Zurusalemay riw riw dara mí i yih ɓay hi̧ ɓay hul nzukaw ɓá mgba tul wah munu. »
29Gun nzak pihnari poŋ ɓay hi̧ Piyer, mí ke ɓahri : « Ƴó tul ɓay Ŋgerzah mí su mba ƴó tul ɓay nzukri. 30Ŋgerzah, a ye záh zih wahri, pih Zezu ɓa Ŋgermbay hi̧ wuri, mí i el poŋ ni hi̧ nzukri i ni ɓa hul nazi ké tul kpuh#5.30 Ɓay tu sa̧wɓay hul ké tul kpuh, í mgba gel ki̧na-ay tuh ke Mbete Galaɗri 3.10-14., mí Ŋgerzah hi̧ ni ke ti̧h ke puh záh ke pa̧ymun a foyu#5.30 Kerɓay seɗe na ké ɓil ɓay mbew ké Piyer ɓah ɓahri, ɔr. Ɔr ɓahri, ɔr nzuk kaɓ ɓa mbay mini ɔr nzuk ti̧h ke hul. Mí nzuk-kuŋ salɓayri le, ku lah ɓil ɓayu seɗe mbɔk lah. Sa̧wu mí nzuk-sɔɓ mbete ke nzak karaŋ ten kerɓay seɗe mbɔk ké gelay.. 31A ye mí Ŋgerzah mbi ni ɓa ndɔk lakna ye, ke ɓa nzuk-ya̧ nzukri. Kaŋ le ke hi̧ gun Izarayelri ɓá mbi law ké tul fe laɓna woyri ma fal el gi kan law tul Ŋgermbay ɓay hi̧ salɓay ɓá lu ké tul woyri. 32A wahri, nah ɓa nzuk-ɓah tehɓay ye ke Tempuki ké Ŋgerzah hi̧ na ke nzukri ké hȩk ni pi. »
33Nzuk-kuŋ salɓayri lah ɓayaw kaŋ bale, ɓayu zɔr law woyri zɔr, mí ku ker ɓay i gun nzak pihnari. 34Wara mí nzuk a hani-u mbew ké haŋsekle nzuk-kuŋ salɓayri, riŋ ye ɓa Gamalyel, ke ɓa farizi, ke ɓa nzuk goso fe tuna mbete Ŋgerzah pi. Nzukri riw tu ni ɓa nzuk riŋ ɗina. Ke ur síɓa ké haŋsekle nzuk-kuŋ salɓayri, mí ke hi̧ ku ten gun nzak pihnari si kala ndi̧ dara ɓáy. 35Bale ke bak mbaŋ yeri ɓahri : « Yi̧n biri, gun Izarayelri, í ru̧ ke mun woiri ké tul fe ké i yih ɓay laɓ ziŋ nzukri-aw. 36Sew a hani, Tedas ti̧h. Ke ɗi mun ye ɓa nzuk a luki. Ke fa̧h nzukri sɔɗ sɔɗ niŋ ku̧ fal ye. Ŋgomna i ni. Gunbɔk pihna yeri gbakra hani bale, ɓay ye zi. 37Bol falu, Zuda, nzuk Galile, ti̧h ke sew ké ŋgomna pih bolkusol ɓay vbeh riŋ nzukri. Nzukri ŋgi̧-ŋgi̧ dih fal ye. A ye kara, ku i ni bale, nzuk yeri zikri keni pi. 38Kandɔkaw mí-i ƴo ɓah hi̧ wuri ɓahri se, í poŋ fal woyri, kú si. Fe laɓna woyri-aw, sa̧wu ur ké ta̧w nzuk le, ɓayu ɓay zi-u. 39Mí sa̧w fe laɓna-aw ur ké ta̧w Ŋgerzah le, i ta ɓeɓ ɓay woyri ya. Í ru̧ ke mun woiri. I ko ya le, ɓa Ŋgerzah mí i ƴo ruh ŋgermu ziŋ ni-aw. »
Bale riw woyri ku ya̧ ɓay Gamalyel.
40Ku ɗi gun nzak pihnari el gi, ku vba̧ niri ɓa se-u, mí ku el hah niri ɓáh ɓay hi̧ nzukri ke riŋ Zezu. Mí ku poŋ niri tɔr. 41Gun nzak pihnari laɓ law rihna ti̧h keni ké pol nzuk-kuŋ salɓayri ɓay fe le, Ŋgerzah ko niri ɓa nzukri ké mah hi̧ nzuk a ɓoruri ɓá laɓ fe-se su̧hru ziŋ niri ɓay tul riŋ Zezu seeh. 42Nam ke nam ké ɓil ila vul kani Ŋgerzah, ké ɓil kerpuh nzukri pi, ku toŋ ka-kah, ku toŋ sɔk ɓaysuki ɓahri, Zezu ɓa Ŋgermbay, hi̧ nzukri lah.
Currently Selected:
Mbete Fe laɓna Tempuki 5: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
