1 DIKETSAHALO 11
11
Davida o tlotswa hore e be kgosi ya Iseraele
(2 Sam. 5:1-5)
1Baiseraele bohle ba kgobokanela Heborone, ho Davida, mme ba re: “Bona, re madi a le mang. 2Mehleng ya ha Saule e ne e le kgosi ya rona, e ne e le wena ya etellang Baiseraele pele ha ba futuha. Morena Modimo wa hao, a na a re ho wena: ‘O tla disa setjhaba sa ka sa Baiseraele, mme o tla ba kgosi ya setjhaba sa ka sa Baiseraele.’ ”
3Yaba baholo bohle ba Iseraele ba ya ho kgosi e le Heborone. Davida a etsa selekane le bona moo Heborone, kapele ho Morena, mme ba mo tlotsa hore e be kgosi ya Iseraele, ho ya ka polelo ya Morena, eo a neng a e bolele ka Samuele.
Davida o hapa Sione
(2 Sam. 5:6-10)
4Yaba Davida le Baiseraele bohle ba ya Jerusalema, e neng e bitswa Jebuse, e leng moo Bajebuse, baahi ba naha eo, ba neng ba ahile teng. 5Baahi ba Jebuse ba re ho Davida: “O ke ke wa kena mona!” Leha ho le jwalo, Davida a hapa qhobosheane ya Sione, e leng yona Motse wa Davida.
6Davida a re: “Mang kapa mang ya tla bolaya Mojebuse pele, e tla ba molaodi e moholo.” Joabe, mora wa Seruya, a tlola pele, mme ya eba yena molaodi.
7Davida a aha qhobosheaneng eo; ka baka leo, ba e bitsa Motse wa Davida. 8A haha motse o potapotileng qhobosheane eo ho tloha Milo. Joabe yena a tsosa marako wohle a motse. 9Davida a nna a tswela pele ho matlafala, hobane Morena wa mabotho o ne a ena le yena.
Bahale ba Davida
(2 Sam. 23:8-39)
10Bana ke bona baokamedi ba bahale ba Davida, ba neng ba mo tsheheditse mmusong wa hae, mmoho le Baiseraele bohle, hore e be kgosi, ho ya ka polelo ya Morena, eo a neng a e bue mabapa le Iseraele. 11Palo ya bahale ba Davida ke ena: Jashobame wa Mohakemoni e ne e le yena mookamedi wa balaodi. Ke yena ya neng a fekefe banna ba makgolo a mararo ka lerumo, a ba bolaya ka nako e le nngwe. 12O ne a hlahlangwa ke Eleasare, mora wa Dodo, wa morabe wa Ahohi, e le e mong wa bahale ba bararo. 13O ne a ena le Davida ha a le Pasa-Damime, moo Bafilesita ba neng ba theile theko ya ntwa teng, tshimong ya harese. Bahlabani ba baleha Bafilesita. 14Eleasare le bahlabani ba hae ba ikema hara tshimo, ba e hapa, ba bolaya Bafilesita, mme Morena a ba tlisetsa tlholo e kgolo.
15Ba bararo ba baokamedi ba mashome a mararo ba theohela ho Davida lefikeng, ka lehaheng la Adulame. Lebotho la Bafilesita le ne le hlomme ka kgohlong ya Refaime. 16Davida o ne a le ka qhobosheaneng, ha lebotho la Bafilesita lona le ne le le Betlelehema. 17Davida a utlwa a nyorilwe, mme a re: “Eka motho a ka mpha metsi a tswang sedibeng sa Betlelehema, se pela kgoro ya motse!” 18Jwale bahale ba bararo ba phunyeletsa mabotho a Bafilesita, ba ya kga metsi sedibeng sa Betlelehema se pela kgoro ya motse. Ba ekga metsi ao, ba a isa ho Davida. Empa Davida a hana ho a nwa, a a qhalla fatshe e le nyehelo ho Morena, 19a re: “Modimo wa ka a nthuse ke se ke ka etsa ntho ena. Na nka nwa madi a banna bao ba ileng ba ipea kotsing?” Ba ne ba ile ba ipea kotsing ka ho ya kga metsi, ka baka leo, a se ke a a nwa.
Tsena di ile tsa etswa ke bahale bana ba bararo.
20Abishai, ngwanabo Joabe, e ne e le yena mookamedi wa ba mashome a mararo. Ke yena ya neng a fekefe ba makgolo a mararo ka lerumo, a ba bolaya, mme lebitso la hae la tuma hara ba mashome a mararo. 21A tuma ho feta bahlabani ba mashome a mararo, ya eba molaodi wa bona. Empa a se ke a tuma jwaloka balaodi ba bararo ba pele.
22Benaya, mora wa Jehoyada, ya neng a etswa Kabeseele, e ne e le monna ya tumileng ka diketso tsa bokwankwetla. A bolaya bahale ba babedi ba Moabe, ba bohale jwaloka tau. A ba a bolaya le tau e neng e le ka lemeneng, mohla lehlwa le neng le kgethehile. 23A bolaya monna wa Moegepeta, wa seqhobane, eo bolelele ba hae bo neng bo feta dimethara tse pedi. Moegepeta eo o ne a tshwere lerumo le lekaalo ka mofeng wa motjhine o ohlang, empa Benaya a ya ho yena a tshwere molamu; a hlotha lerumo letsohong la Moegepeta, a mmolaya ka lerumo leo la hae. 24Tsena ke tsona diketso tsa Benaya, mora wa Jehoyada, tse ileng tsa mo tumisa hara ba mashome a mararo. 25O ne a tumile ho feta ba mashome a mararo, empa a sa tuma jwaloka balaodi ba bararo ba pele. Davida a mo etsa mookamedi wa balebedi ba hae.
26Bahale ba bang ba Davida e ne e le Bana: Asaele, ngwanabo Joabe, le Elehanane, mora wa Dodo wa Betlelehema, 27le Shamote wa Harode, le Helese wa Mopelone, 28le Ira mora wa Ikeshe wa Tekowa, le Abiesere wa Anatote, 29le Sibekai wa Husha, le Ilai wa Ahohi, 30le Maharai wa Netofa, le Helede, mora wa Baana wa Netofa, 31le Itai mora wa Ribai wa Gibea, wa ba morabe wa Benjamine, le Benaya wa Piratone, 32le Hurai wa melatswaneng ya Gaasha, le Abiele wa Areba, 33le Asemafete wa Bahurime, le Eleaheba wa Shaaleboni, 34le bara ba Hasheme wa Gisone, le Jonathane mora wa Shage wa Harare, 35le Ahiame, mora wa Sakara wa Harare, le Elefale, mora wa Ure, 36le Hefere wa Mekera, le Ahiya wa Mopelone, 37le Hesero wa Karamele, le Naarai, mora wa Esebai, 38le Joele, ngwanabo Nathane, le Mibehare, mora wa Hageri, 39le Seleke wa Moamone, le Naharai wa Berota, mojari wa dihlomo tsa Joabe, mora wa Seruya, 40le Ira wa Jethero, le Garebe wa Jethero, 41le Uriya wa Mohete, le Sabada, mora wa Akalai, 42le Adina, mora wa Shisa wa morabe wa Rubene, eo e neng e le molaodi wa ba morabe wa Rubene, le ba mashome a mararo ba neng ba ena le yena, 43le Hanane, mora wa Maaka, le Joshafate wa Miteni, 44le Usiya wa Ashetarote, le Shama, le Jeiele, bara ba Hotame wa Arowere, 45le Jediaele, mora wa Shimeri, le Joha wa Tise, e leng ngwanabo, 46le Eleele wa Mohafa, le Jeribai, le Joshafeya, bara ba Elenaama, le Jitema wa Moabe, 47le Eleele, le Obede, le Jaasiele wa Mesobaya.
Currently Selected:
1 DIKETSAHALO 11: SSO89SO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used by permission. All rights reserved.
