Патшалықтар 2-ж. 5

Дәуіттің бүкіл Исраилге патшалық құруы

1Кейінірек Исраилдің барлық руларының өкілдері Хеброндағы Дәуіттің қасына келіп, оған былай деді: «Сөзімізге құлақ сала көріңіз: сіздің ет жақын туыстарыңызбыз. 2Біраз уақыт бұрын, Саул патшалық құрған кезде бүкіл Исраилді жорыққа бастап жүрген өзіңіз болатынсыз! Жаратқан Ие де сізге: «Менің халқым Исраилді бағатын әрі Исраил еліне басшылық ететін сен боласың» деп айтқан».#5:2 Пат1 13:14; 18:5,13,16; 25:30.

3Осылай Исраилдің күллі рубасылары Дәуіт патшаға келіп, ол солармен Хебронда Жаратқан Иенің алдында келісім жасады. Олар Дәуітке май жағу рәсімін орындап, оны Исраилдің патшасы етіп бекітті.

4Патшалық құра бастаған кезде Дәуіттің жасы отызда еді. Ол қырық жыл бойы билік жүргізді. 5Дәуіт Хебронда Яһуда елін жеті жыл алты ай, әрі Иерусалимде бүкіл Исраил мен Яһуданы отыз үш жыл басқарды.

Жаңа астана Иерусалим

6Бір күні патша мен оның жасақшылары Иерусалимге аттанып, сол қалада тұрған ебустіктерге шабуыл жасамақшы болды. Ал ебустіктер: «Дәуіт бұл қалаға кіре алмайды», — деп ойлап, оны мазақтап: «Мұнда ешқашан кірмейсің! Кіре қалсаң, соқырлар мен ақсақтардың өздері-ақ сені қуып жібереді!» — деді. 7Алайда Дәуіт Сион төбесіндегі қорғанды басып алып үлгерді; ол қазір «Дәуіттің шаһары» деп аталады.

8Сол күні Дәуіт: «Кімде-кім ебустіктерді шабуылдаймын десе, құдық арқылы#5:8 Яки: су жүргізетін үңгір жол (туннель) арқылы. қалаға кіріп, Дәуіттің жаулары — сол «ақсақ та соқыр» ебустіктерге бас салсын!» — деген еді. «Соқыр мен ақсақ сарайға кірмес» деген мәтел осыған байланысты пайда болды.

9(Сонымен Дәуіттің адамдары су құбырымен өрмелеп, қамалға кіріп, оны жаулап алды.) Дәуіт қорған ішіне орналасып алып, оны «Дәуіттің шаһары» деп атады. Кейін ол соның саты тәрізді беткейінен бастап#5:9 Яки: Кейін ол Миллодан бастап (Пат3 9:15,24). ішке қарай айнала үйлер де салдырды.

10Әлемді Билеуші Құдай — Жаратқан Ие оған жар болғандықтан, Дәуіт барған сайын күшейе түсті. 11Тир#5:11 Тир: бүгінгі Ливан елінде орналасқан, кемежайы бар үлкен қала. Ливан тауларында мықты самырсын (балқарағай) ағаштары өсетін (Шеж2 2:3; Иш 2:13). патшасы Хирам Дәуітке елшілерін, сондай-ақ самырсын бөренелерін, ағаш ұсталары мен тас қалаушыларын да жіберді. Осы мамандар Дәуітке сарай салып берді.

12Сонда Дәуіт Исраилдің үстінен патша болуға өзін Жаратқан Иенің бекіткенін, әрі халқы Исраилдің игілігі үшін Дәуіттің патшалық мәртебесін көтергенін түсінді.

13Хеброннан көшіп келіп, Иерусалимде орныққаннан кейін Дәуіт тағы бірнеше кәнизак пен әйел алып,#5:13 Сол заманғы патшалардың көп әйел алу әдеті Құдайдың еркіне қарсы жайт болып, Дәуіттің кейінгі өміріне молынан залалын тигізді (Заң 17:17). Кәнизак: әйелдікке алынған күң. көбірек ұл-қыз сүйді. 14Оның Иерусалимде дүниеге келген балаларының аттары мыналар: Шаммуа, Шобаб, Натан, Сүлеймен, 15Ипхар, Әлишуа, Непек, Япияқ, 16Әлишама, Әлияда, Әлипәлет.

Дәуіттің елді філістірлердің қолынан азат етуі

17Дәуіттің бүкіл Исраилдің үстінен патша болып тағайындалғанын естіген соң, барлық філістір жасақшылары Дәуітті іздеуге шықты. Бұл туралы хабар алған Дәуіт астананы тастап, бекінуге ыңғайлы ылдиға қарай кетті. 18Ал філістірлер Рефаим аңғарына#5:18 (5:22; 23:13) Иерусалим қаласынан оңтүстік-батыс жақтағы аңғар (Еш 15:8; 18:16). жетіп, жан-жаққа жайылып тонады. 19Дәуіт Жаратқан Иеден:

— Філістірлерге қарсы өрлеп шығайын ба? Оларды жеңіп шығуыма қол жеткіздіресің бе? — деп сұрады. Жаратқан Иенің жауабы мынау болды:

— Өрлеп шық! Мен філістірлерді ешбір шүбәсіз сенің қолыңа тапсырамын!

20Сонымен Дәуіт Бағал-Перасимге барып, оларды сол жерде күйрете жеңді. Ол: «Су тасқыны өз жолындағының бәрін жайпайтынындай, Жаратқан Ие де алдымдағы жау саптарын бұзып-жарды!» — деді. Сондықтан сол жер Бағал-Перасим («Иенің бұзып-жарғаны») деп аталып кетті. 21Філістірлер қашқанда сол жерге өздерінің табынатын тәңірсымақтарын тастап кеткен еді. Дәуіт пен оның сарбаздары сол мүсіндерді бірге ала кетті.#5:21 Кейін олар сол мүсіндерді өртеп жіберді (Шеж1 14:12; Леу 26:1).

22Ал філістірлер тағы да өрлеп келіп, Рефаим аңғарында шашырай орналасты. 23Дәуіт Жаратқан Иенің еркін сұрағанда, Оның жауабы мынау болды: «Оларға тікелей қарсы аттанбай, айналып өтіп, арт жағынан тұт#5:23 Немесе: шырша. ағаштарының алдынан кенеттен тап бер! 24Сен тұт ағаштарының үстінен басқан қадамдардың дыбысын#5:24 Яки: үстінен сап түзеп жүргендей дыбысты. естіген кезде қозғал! Бұл, Жаратқан Иенің філістірлердің жасағын шабу үшін сенің алдыңа шыққанын білдіреді».

25Жаратқан Ие нені бұйырса, Дәуіт дәл солай істеп, філістірлерді Гибеоннан#5:25 Немесе: Ғабағоннан; яки: Гебадан. тіпті Гезерге#5:25 Еш 12:12; 21:21. дейін қырып-жойды.

Currently Selected:

Патшалықтар 2-ж. 5: КК 2010

Highlight

Copy