Шежірелер 2-ж. 16
16
Асаның Арама патшасымен одақтасуы
1Ал Асаның патшалық құрған отыз алтыншы жылы Солтүстік Исраилдің патшасы Бағаса#16:1 Пат3 15:27-28,32-34; 16:1-4. Яһуда еліне қарсы аттанып, өрлеп барды. Бағаса Аса патшаның жеріне ешкім кіріп-шыға алмау үшін екі елдің шекарасындағы Рамақ#16:1 Еш 18:25; Бил 19:13. қаласын қамалмен бекітіп қойды.#16:1 Ондағы мақсаты, Жаратқан Иеге ғибадат етпек болған Солтүстік Исраилдің адамдарының (11:16-17; Бил 19:13,18) және басқа елдерден сапарлап келген саудагерлер керуендерінің Иерусалимге апаратын жолын бөгеп тастау болған шығар (9:1,9-15). 2Сонда Аса патша Жаратқан Иенің киелі үйінің және өз сарайының қазыналарынан алтын-күміс алып шықты. Оларды Арама елінің Дамаск қаласында тұратын патшасы Бен-Хададқа жіберді. Аса патша оған мынадай сәлемін жолдады: 3«Екеуіміздің әкелеріміздің арасында келісім#16:3 Яки: одақ. болғанындай, енді біз де сондай келісім жасасайық!#16:3 16:7; 19:2; Иш 31:1. Міне, мен сізге күміс пен алтын жіберіп отырмын. Өзіңіздің Солтүстік Исраилдің патшасы Бағасамен жасасқан келісіміңізден бас тарта көріңіз. Ол менің шекарамнан кері шегініп кетсін!»
4Бен-Хадад Аса патшаның өтінішіне құлақ асып, өзінің қолбасшыларын Солтүстік Исраилдің қалаларына қарсы аттандырды. Олар Ион, Дан, Әбел-Маим қалаларын әрі Нафталим руының жеріндегі азық-түлік пен қару-жарақ қорлары сақталатын қалалардың барлығын басып алды. 5Бағаса патша бұл туралы естігенде, Рамақ қаласын бекітуін тоқтатып, сол жұмысынан бас тартып, кері шегінді. 6Сонда Аса патша Яһуда елінің барлық ер адамдарын ертіп алып, Рамаққа аттанды. Олар Бағаса салып жатқан қамалдың тастары мен бөренелерін тасып алып кетті. Аса патша солармен өзіне қарасты Геба және Миспа қалаларын#16:6 Еш 18:24,26. бекітті.
Жаратқан Иенің Асаның сенімсіздігін айыптауы
7Сол кезде Ханани пайғамбар#16:7 (19:2) Яки: (Құдайдың аянын) көретін Ханани (9:29; Пат1 9:9). Яһуда патшасы Асаға барып, оған былай деді: «Сіз Құдайыңыз Жаратқан Иеге емес, Арама елінің патшасына сенім арттыңыз.#16:7 Құдай Өзінің таңдаған халқына Оған мойынсұнбаған басқа халықтармен келісім жасауға тыйым салған еді. Олардың жалғыз Құдайға ғана сенім артулары қажет болды (14:11-12; 15:1-2; Заң 7:2,6-9; 28:1-3,7; Жыр 83:10,12-13). Сондықтан Арама патшасының әскері сіздің қолыңыздан құтылып кетті, ал сіз оны өзіңізге бағындыру мүмкіндігінен айырылып қалдыңыз. 8Есіңізге түсіріңіз, құштықтар мен либиялықтар көптеген соғыс күймелері мен салт атты сарбаздары бар үлкен қол жинап, аттанып келмеп пе еді?! Бірақ сіз Жаратқан Иеге сенім артқандықтан, Ол соларды қолыңызға түсірді ғой.#16:8 14:8-13.
9Себебі Жаратқан Ие Өзіне шын жүректен бағышталып, адал болып жүргендерді күш-қуат беріп қолдау үшін, бүкіл жер жүзін назарында ұстап отырады.#16:9 6:20; Жыр 33:16; 112:5-9; Ерм 32:19; Зәк 4:10.
Осы істегеніңіз үлкен ақылсыздық болды. Сол үшін де бұдан былай соғыстан көз ашпайтын боласыз!»
10Осыны естігенде Аса патша пайғамбарға қатты ашуланды. Ашуының күшті болғаны сонша, пайғамбарды бұғаулатып, қамап қойғызды. Аса сол кездері халқының басқа да бірқатар адамдарына қысымшылық көрсетіп, жәбірледі.
Асаның қатты ауырып, қайтыс болуы
11Асаның іс-әрекеттері басынан аяғына дейін «Яһуда мен Солтүстік Исраил патшаларының кітабында» баяндалған. 12Патшалық құруының отыз тоғызыншы жылы Аса аяқ ауруына шалдықты. Ауруы одан бетер асқына берсе де, Аса Жаратқан Иеге емес, тек дәрігерлерге ғана бет бұрып, сауықтыруын сұрады.#16:12 16:9; Шеж1 10:14; Ерм 17:5. 13Содан ол патшалық құруының қырық бірінші жылы көз жұмып, ата-бабаларының қасына жөнелді. 14Асаның мәйіті Дәуіттің шаһарындағы өзі жартастан үңгіп дайындатқан қабірге, ондағы түрлі хош иісті заттар мен иісмайларға толы жайылған төсекке қойылды.#16:14 Жар 50:2. Патшаның құрметіне үлкен от жағылды.#16:14 21:19.
Currently Selected:
Шежірелер 2-ж. 16: КК 2010
Highlight
Share
Copy
Want to have your highlights saved across all your devices? Sign up or sign in
© Киелі Кітап, Қазақша аудармасы және көркемделуі «Орта Азия баспасы ЖШС», 1993, 1996, 2000, 2010, 2015, 2021.