MATHIUS, NOPUKU AFASAO SORE, 4.
NOPUKU AFASAO SORE, 4.
1NOPOGERA Nokano Tapu niarafia Iesu ilugia ia tugogau Tiapolo keiresia aia iai.
2Iai aia nipari nopoge forte ma tupo forte, aia wamuri nitshetogi.
3Nopogera aia karesia nimai iatei, aia neitucage, Pe akoi ta nontariki o Atua koutucua afatu tira kofuri ia ta bret.
4Kaia aia nifasao neitucage, Aia neisereace, Tatane, jimra kamouri ia bret ana, kaia ia iotshi tafasao komai watafa nofafa o Atua.
5Wamuri tira Tiapolo niarafia aia iluga ia tumrai sore erefia, ma nifecetshia aia ia nopito iluga ana o tafare tsha Ihova.
6Neitucage iateia, Pe akoi ta Nontariki o Atua, akoi koto iraro, ma aia neisereace, aia kafakairo niana agelo iatakoi; i arimore acre katakoia akoi pe akoi jimra koupesia tshow novai ia ta fatu.
7Jesu neitucage aia, Aia neisereace foci, Akoi kanatshicina togafia Ihova tshou Atua.
8Foci Tiapolo nikarafiakace aia ia ta ora tasi iluga ana neikeimata aia iotshi avaka o iafanua wararonei aniamane tshare ma;
9Neitucage iateia, Ane iotshi tira avau katufwa akoi, pe akoi koto ma mori iatavau.
10Iai Iesu neitucage iateia, Fano natshicina avau Satana; ma aia neisereace, Akoi kamori Ihova tshow Atua, ma aia ana akoi kavere iateia.
11Nopogera Tiapolo feke natschicina aia, ma agelo niromai iai nivere mana iateia,
12Wamuri Iesu nifakarogona pe acre nagi Joanes ia tafare mukei, aia nifano ia fanua Calili.
13Nokofeke Nasareth, aia nimai neinofo ia Kaperneum tumrai tira watai, ia nuntafa Sebulon ma Naftalai;
14Tira nimai hepe tafasao neitucua ia ta profeta Aiseia nokoutucua,
15Ta fauna o Sebulon, ma ta fauna o Naftalai, ia teretu o tatai, nofokagi Jortan, ta fanua Calili o tagata pouri;
16Tagata neinofo ia tapouri neicitia merama sore; ma ia acre neinofo ia tafanua noata o ta mate merama konace.
17¶ Wamuri anapogera Iesu neikamata keifakairo ma keitucua Natshicina ma feimacowa amaganisa; ma ta vaka o Atua koitata.
18¶ Iesu nikatakaro itata tatai o Calili, neicitia erua noso, Saimona neitapa neigo Pitrus, ma Antrius tsho noso, nokofakarerece takowpiga ia tatai, ma acrawa tagata fagota.
19Aia neitucage iacrawa, Romai ma muri avau, ma avau kamna akorua fagota tagata.
20Milowa acrawa natshicina takowpigarawa, ma niroro wamuri aia.
21Niteke nokotakaro foci iai, aia neicitia erua noso foci, Jacobus ta nontarika o Sebetaius, ma Joanes tsho noso ia tavaka ia Sebetaius tamanarawa, nokowcia niare takowpiga; ma aia nitapa acrawa.
22Milowa acrawa natshicina ta vaka ma ta manarawa, ma niroro wamuri aia,
23¶ Iesu nifano kofori iotshi fanua o Calili, nokofakairo ia tafare mori tshare, nokova tafasao erefia o ta vaka o Atua, nokopenpena iotshi amace, ma iotshi amy o tagata.
24Afasao ia tshana vere nifano kofori iotshi ta fanua o Siria; acre niarafia iateia iotshi tagata nimace o amace iotshi ma ane isa takaroiai tagata, acre ma agelo isa neinofo ia acre, ma acre kokali, acre ma niamo ta palse; ma aia neipenpena acre.
25Niroro wamuri aia tagata nalupia su niroce Calili, ma Tikapolis, ma Jerusalem, ma Juteia, ma ia nofakagi Jortan.
Currently Selected:
MATHIUS, NOPUKU AFASAO SORE, 4.: ANT
Highlight
Share
Copy
Want to have your highlights saved across all your devices? Sign up or sign in