JOANES, NOPUKU AFASAO SORE, 9.
NOPUKU AFASAO SORE, 9.
1HEPE Iesu nifano fakataftafa, aia neicitia tasi tatane tshana foimata pouri ia nopoge nana nifarere aia.
2Niana tagata aia nifakairo nifakowia aia, nokoutucua, Teriki sore, akai nimaganisa, tatane tenei, mo tshana tamana ma nana nifarere aia foimata pouri?
3Iesu nifasao, Jimra tatane nei, mo tshana tamana ma nana nimaganisa, kaia pe avere o Atua tagata makacitia i aia.
4Avou kavere avere o aia nikowna avou, ia ta nopoge, ta tupo nokomai, ia aia jimra tatane tasi vere.
5Nopoge iotshi avou konofo ia fanua wararonei, Avou ta merama o fanua wararonei.
6Wamuri aia nifasao ra, aia nisavari ia takere, ma neimna perapera o ta savari, ma aia niamosia ta foimata o tatane foimata pouri ia ta perapera.
7Ma neitucua iateia; Fano kowkow ia tavai nupu Seloam, nokano neigo tero, Namu. Aia nifano tshana retu iateia, ma nikowkowce, ma nimai nokowcitia.
8¶ Tagata neinofo fakaliki, ma acre mokagi neicitia aia foimata pouri, neitucua, Tenei aia mo, neinofo ma neinogea ane?
9Faru neitucua, Tenei aia; faru foci neitucua, Aia ko hepe aia; kaia aia neitucua, Avou aia.
10Anera acre neitucua iateia, Konapecua tshou foimata kaura?
11Aia nifasao ma neitucua, Tasi tatane neigo Iesu neimna perapera, ma naimosia tshaku foimata, ma neitucua iatavou, Fano kowkow ia tavai nupu Seloam; ma avou nifano ma nikowkowce, ma nakamo tshaku foimata kuara merama.
12Iai acre neitucua iateia, Aia wehe? Aia neitucua, Avou puspusi.
13¶ Acre niarafia ia Afarasi aia neinofo mokagi foimata pouri.
14Ma ia nopoge tapu ra, Iesu neimna ta perapera, ma neimna tshana foimata kuara.
15Iai foci Afarasi ma nifakowia aia taha neimna tshana foimata kuara. Aia neitucua iacre, Aia neinagi perapera ia tshaku foimata, ma avou nikowkow, ma kowcitia erefia.
16Ianei faru o Afarasi neitucua, Tatane tenei semai o Atua, ma aia semaganerefia ia nopage tapu. Faru foci neitucua, Konapecua pe tatane isa imna avere sore hepra? Ma acre nivaia iateia.
17Acre neitucua foci ia tatane foimata pouri, Taha akoi koutucua o aia, pe aia neimna merama tshou foimata? Aia neitucua, Aia ko tasi profeta.
18Kaia tagata Juteia sefakarogrogo pe tshana foimata mokagi nipouri, mokagi acre nitapa tamana ma nana o aia nakoamo foimata merama.
19Ma care nifakowia acrawa, nokoutucua, Tenei tshorua nuntama, mo? aia akorua neitucua nifarere ia foimata pouri? konapecua aia milow kowcitia?
20Tshana tamana ma nana nifasao iacre ma neitucua, Acimawa keiro tenei tshamawa nuntama, ma pe aia nifarere ia foimata pouri;
21Kaia taha neimna aia kowcitia milow, acimawa puspusi; ma akai neimna tshano foimata kuara, acimawa puspusi; aia kosore; fakowia aia; aia katucua.
22Afasao ra tshana tamana ma nana neitucua, ma acrawa nimtacu tagata Juteia; ma mokagi ra tagata Juteia neitucua, pe tatane tasi neitucua aia ta Kristo, erefia turocina aia watafa tafare mori.
23Ianei tshana tamana ma nana neitucua, Aia kosore; fakowia aia.
24Foci acre nitapa ta tane foimata nipouri mokagi, ma neitucua iateia, Eitufwa Atua ta sore; acime keiro tatane tenei isa.
25Aia nifasao ma neitucua, Pe aia tagata isa mo jimra avou puspusi; tasi ane avou keiro, tshaku foimata nipouri mokagi, milow avou kowcitia.
26Iai acre nifasao foci iateia, Taha aia neimna iatakoi? taha vere tshana neimna tshow foimata kuara?
27Aia nifasao iacre, Avou nakatucua iacowa mokagi, ma acowa sefakarogona; tiaha acowa fakarogona foci? acowa ma niana tagata aia fakairo mo?
28Wamuri ra acre neisaciria aia, ma neitucua, Akoi tasi aia fakairo; kaia acime Moses nifakairo.
29Acime keiro Atua nifasao ia Moses, kaia acime puspusi akai nikowna aia.
30Ta tane nifasao neitucua iacre, Tiaha, tenei ane avou masaro iateia, pe acowa puspusi none aia nifeke ma mai iai, ma aia neimna tshaku foimata kuara.
31Milow acitia keiro pe Atua sefakarogona tagata isa, kaia pe tatane tasi komori Atua, ma maganerefia ia tshanafasao, aia kafakarogona aia.
32Wamuri ta neikamata o iafanua wararonei acitia sefakarogona o tasi tatane neimna kuara foimata o tasi pe aia nifarere ia foimata pouri.
33Pe tatane nei sekomai o Atua, aia kotaru vere hepra.
34Acre nifasao ma neitucua iateia, Akoi nifarere ia ane isa, ma akoi fakairo acime, mo? Ma acre nitorotshia aia watafa.
35Iesu nifakarogona pe acre nitorotshia aia watafa, ma wamuri aia neicitia aia, aia neitucua iateia, Akoi fakarogrogo ta Nontariki o Atua, mo jimra?
36Aia nifasao, ma neitucua, Akai aia, Teriki sore, pe avou fakarogrogo aia?
37Iesu neitucua iateia, Akoi neicitia aia, ma foci aia kofasao iatakoi.
38Ma aia neitucua, Teriki sore, Avou fakarogrogo. Ma aia nimori iateia.
39Ma Iesu nifasao, Ma keiioria magane avou nimai ia fanua wararonei, pe acre foimata pouri kuara ma kacitia, ma pe acre foimata merama kamna pouri.
40Ma faru o Afarasi neinofo ia aia neirogona afasao ra, ma neitucua iateia, Foimatome kopouri foci, mo?
41Iesu neitucua iacre, Pe foimatowa pouri niawa maganisa kojimra, kaia milow acowa koutucua, Acime kowcitia, anera niawa maganisa konofo.
Currently Selected:
JOANES, NOPUKU AFASAO SORE, 9.: ANT
Highlight
Share
Copy
Want to have your highlights saved across all your devices? Sign up or sign in