JOANES, NOPUKU AFASAO SORE, 12.
NOPUKU AFASAO SORE, 12.
1NOPOGE ono mokagi ta paska Iesu nimai ia Bethane, iai Lasarus neinofo, aia nimate mokagi, aia Iesu neitshicitshia ia tagata nimate.
2Iai acre neimna aia tasi tacripoga ia tefiafi; ma Martha niavere o fitshicow; kaia Lasarus tasa o acre neinofo ia afata ia aia.
3Tupora iai Mery niamo tasi pount toto o tererakou ane erefisa iamosia, nomata sore, ma niamosia avai a Iesu, ma niamosia tshan avai ia tshana ouru, ma ta fare nifonu ia neinamu o ane iamosia.
4Iai tasi o niana tagata aia nifakairo, Jutas tatane Kariot, ta nontariki o Saimona, aia kafakareresia aia neitucua,
5Tiaha ane iamosia tenei sefakamata pount mone nein, ma tufwa ia tagata niare ane jimra.
6Tenei aia neitucua ma jimra aia neicitiafakarafia tufwa ane ia tagata niare ane jimra, kaia anera aia tagata tshigo, ma niamo takato tsha mone, ma nitou ia tshana notshino iotshi acre nifou iai.
7Iesu neitucua, Natshicina aia; ia nopoge tanumea avou aia neinage tenei.
8Ma tagata niare ane jimra konofo iacowa tou ma tou; kaia avou senofo iacowa tou ma tou.
9Nalupai tagata Juteia nikeiro aia iai; ma acre niromai jimra ia Iesu ana, kaia pe acre keicitia Lasarus foci, aia IESU neitshicitshia ia tagata nimate.
10¶ Kaia fatoriki o tafare mori nitarafasao foci keitshi Lasarus komate;
11Ma ia aia nalupai tagata Juteia niroro, ma nifakarogrogo Iesu.
12¶ Ia nopoge wamuri ra, tagata nalupai niromai ia tagripoga ra, wamuri acre neirogona pe Iesu nokomai ia Jerusalem,
13Niamo anora a tererakou pam, ma niroro watafa keifapa aia, ma nitapa Hosana; Erefisa ta Teriki o tagata Isreil, pe aia nokomai ia neigo o ta Teriki sore.
14Ma Iesu, wamuri aia niamo tasi as sisi, nikoike ia tshana nopua; hepe aia neisereace,
15Natshicina kumtacu nofine o Sion, kowcitia, tshou Teriki nokomai nokoike ia tentama o ta as.
16Ane iotshi ra niana tagata aia nifakairo sekeiromana mokagi, kaia wamuri Iesu nifano taragi, acre nimentua ane iotshi ra neisereace iateia, ma pe acre neimna ane iotshi ra iateia.
17Tagata ma neinofo ia aia nopogera aia neitapa Lasarus mai watafa tupunaga o tagata nimate, ma tshicitshia aia ia acre nimate, nifasao iateia.
18Ia ane ra tagata foci nifapa aia, ma acre neirogona pe aia neimna vere sore tenei.
19Anera Afarasi neitucua acre macre, Kowcitia acowa seneimna tagata kumtacu iateia? kowcitia tagatotshi wararonei kororo wamuri aia.
20¶ Ma faru tagata o fanua Crisi niromai ia acre niromai keimori ia tacripoga.
21Acre niromai ia Filipos, aia tatane o tumrai Bethseta o Calili, ma neinogia aia nokoutucua, Teriki acime acitiafakarafia kowcitia Iesu.
22Felipos nimai ma neitucua ra ia Antreus; ma foce Antreus ma Felipos neitucua Iesu.
23¶ Iesu nifasao acrawa, nokoutucua, Ta nopoge komai, pe ta Nontariki o tagata kafano ia ta sore taragi.
24Tamari, tamari, avou koutucua iacowa, Pe tasi nohua o wit kotu ia takere ma nimate iai, aia konofo ana, kaia pe aia komate, aia amo nohua nalupai.
25Aia acitiafakarafia tshana anea mouri aia kamerigi; ma aia feimacowa tshana anea mouri ia fanua wararonei kapurutshia aia ia ania mouri tou ma tou.
26Pe tatane tasi kavere iatavou, erefia aia komai wamuri avou, ma ia ta none avou konofo, iai foci tshaku fetshicow kanofo; pe tatane tasi vere iatavou, aia tshaku Tata kabisa iateia.
27Milow tshaku nokano komai, ma taha avou katucua? Tata kapare avou ia nopoge tenei, kaia ia vere tenei avou nimai ia nopoge tenei.
28Tata imna tshow neigo ta sore, Iai tasi noreo nimai ia taragi, nokoutucua, Avou nakamna aia ta sore, ma avou kamna aia ta sore foci.
29Tagata nitu itata, ma neirogona, neitucua aia tafatshiri, faru foci neitucua, Tasi agelo nifasao iateia.
30Iesu nifasao, ma neitucua, Tenei noreo semai iatavou ana kaia keitufwa iacowa fakarogrogo.
31Milow ta ioria o fanua wararonei komai, milow, ta teriki o fanua wararonei katatuce watafa.
32Ma avou, pe tshicitshia avou iluga takere, katarotshia mai tagatotshi iatavou.
33Tenei aia neitucua kefakairo ia taha ta mate, aia kamote.
34Tagata nifasao iateia, Acime neirogona ia afasao tapu pe Kristo konofo tou ma tou; ma tiaha akoi koutucua, Ta Nontariki o tagata tshicitshia aia iluga? Akai tenei Nontariki o tagata?
35Iai Iesu neitucua iacre, Nopoge toru ana wamuri nei ta merama konofo iacowa, roro acowa ia nopoge ta merama konofo iacowa, mo apouri komai iacowa, ma aia katakoro ia apouri puspusi aia konofo wehe.
36Ia nopoge to merama konofo iacowa, fakarogrogo ta merama; pe acowa konofo ta erecriki o ta merama. Ane iotshi ra Iesu nifasao ma nifeke, ma nimuni aia iacre.
37Kaia acre neicitia avere sore nalupai aia neimna, acre sefakarogrogo aia;
38Pe acre neimna magane hepra ta fasao o Aisea ta profeta, aia neitucua, Teriki sore, akai nakafakarogrogo tshome fakairo? ma iatakai nakacitia ta norima o Ihova?
39Anera acre nitaru fakarogrogo, ma Aisea neitucua foci.
40Aia neimna foimatorea pouri, ma arotorea mukei, pe acre secitiamana ia foimatorea, ma sekeiromana ia arotorea, ma katufwa Atua arotorea, ma avou kapenpena acre.
41Ane iotshi ra Aisea neitucua, nopoge ra neicitia tshana ta sore, ma nifasao o aia.
42¶ Kaia ia fatoriki sore ma nalupai nifakarogrogo aia; kaia acre nimtacu Afarasi ma sekoutucua acre nifakarogrogo aia, ma nimtacu acre towaki acre watafa ta fare mori.
43Ma acre neicitiafakarafia ta kokanini o tagata, mokagi ta kokanini o Atua.
44¶ Iesu nitapa ma neitucua, Aia fakarogrogo avou, sefakarogrogo avou ana, kaia ia aia nikowna avou.
45Ma aia kowcitia avou, kowcitia aia nikowna avou.
46Avou nakamai ta merama ia tafanua wararonei, pe tagata fakarogrogo avou senofo ia apouri.
47Ma pe tatane tasi fakarogona tshaku fasao, ma sefakarogrogo, avou, sekoutucua ioria tshana; ma avou semai koutucua ioria o fanua wararonei, kaia keipare fanua wararonei.
48Aia natshicina avou, ma seamo tshaku fasao, nakoamo tasi koutucua ioria tshana; tafasao avou nakatucua, acre katucua ioria tshana magane ia nopoge wamuri.
49Ma avou sekoutucua afasao o avou ana, kaia ta Mana aia nikowna avou, nifakairo avou mukei, taha avou kofasao, ma taha avou koutucua.
50Ma avou keiro tshan afasao aia komouri tou ma tou; anera ane iotshi avou koutucua, hepe ta Mana neitucua iatavou, hepe ana avou koutucua.
Currently Selected:
JOANES, NOPUKU AFASAO SORE, 12.: ANT
Highlight
Share
Copy
Want to have your highlights saved across all your devices? Sign up or sign in