DIPROVERBIA 7
7
1Mora wa ka, boloka ditaba tsa ka, o tiise dikeletso tsa ka ka pelong ho wena. 2O lotolotse dikeletso tsa ka, mme o tla phela; o boloke dithuto tsa ka jwaloka thaka tsa mahlo a hao. 3O di ngomele menwaneng ya hao, o di ngole letlapeng la pelo ya hao. 4Bolella bohlale, o re: O ngwaneso, mme masene o a bitse motswalle wa hao, 5di tle di o fapose mosadi wa sehlola le sefebe se nyekang ka leleme la sona.
6Ke ne ke eme sefensetereng sa ntlo ya ka, ka tadima ka dipaka tsa lehlafi la teng; 7ka bona ho le dithoto, hara ba batjha ka lemoha mohlankana e mong ya hlokang kutlwisiso; 8a tjhalatsa le mabala mabapa le kou ya ntlo ya mosadi eo, a nkile tsela ya teng. 9E ne e le ka shwalane, ka phirima, bosiu bo se bo tshwere, ho le lefifi le letsho. 10Mme bonang, a kgahlanyetswa ke mosadi ya ikgabisitseng ka mokgwa wa sehlola, a ikgakantse pelo; 11athe o manganga, o hlooho e thata; maoto a hae ha a dule ka tlung ya hae; 12mohlomong o eme mapatlelong, mohlomong mabaleng, o lalla koung tsohle. 13Jwale, a mo tshwara, a mo aka; ka sefahleho se se nang dihlong a re ho yena: 14Ke na le mokete wa mahlabelo a teboho hae ha ka; kajeno ke phethile dikano tsa ka. 15Ke ka baka leo ke tswileng ho tla o kgahlanyetsa, ho o batla lefifing, mme jwale ke o fumane. 16Ke adile diphate tsa ka ka masela a mebalabala le ka dikobo tse lohilweng ka ditshwele tsa Egepeta. 17Ke noneditse diphate tsa ka ka mirra, le lekgala, le sinnamone. 18Tloo, re itahe leratong ho fihlela ho esa, re thabele monate hammoho; 19hobane monna wa ka ha a yo hae, o etetse hole; 20o nkile mokotlana wa tjhelete, o tla boela hae ka kgwedi e tla thwasa. 21A mo menamena ka dipuo tse ngata tse monate, a mo hlola ka molomo o qekisang. 22Yaba mohlankana eo o mo latela ka bonolo jwaloka kgomo e buswang lekaba, leha e le kgama e tlolelang lemeneng, mme e hlajwa sebete ka teng ke lerumo; 23hape, leha e le jwaloka nonyana e thwethwelang sefing, e sa tsebe hoba se tjhehetswe ho phela ha yona.
24Ka baka leo, bana ba ka, mmameleng, le ele dipolelo tsa molomo wa ka hloko. 25Pelo ya hao e se ke ya kgelohela tseleng ya eo, o se ke wa lahleha mmileng wa hae. 26Hobane ba hlabilweng o ba dihile ba le bangata, bao a ba bolaileng ba bangata ho fetisisa. 27Ntlo ya hae ke tsela ya nqalo ya bafu, e theohela madibeng a lefu.
Currently Selected:
DIPROVERBIA 7: SSO61-SO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1961. Used with permission. All rights reserved.
