DIPROVERBIA 31

1Dipolelo tsa morena Lemuele: kgothatso tseo mmae a kileng a mo ruta tsona.

2Keng, mora wa ka! keng, mora wa mpa ya ka! Oho ke tla reng, ngwana wa dikano tsa ka? 3Se neele basadi matla a hao, se latele basadi ba timetsang marena.

4Hase marena, Lemuele, hase marena a loketseng ho rata veine, leha e le mahosana ho lakatsa jwala bo tahang; 5esere mohlomong ba lebala molao, mme ba fosisa nyewe ya motshwenyehi e mong le e mong. 6Jwala bo tahang le bo nee motho ya ya timela, le veine le e nose motho ya pelo e hlomohileng; 7hore a nwe, a lebale bofumanehi ba hae, a se ke a hlola a hopola bomadimabe ba hae.

8Molomo wa hao o o ahlamisetse semumu, mme o emele nyewe tsa bohle ba lahlilweng. 9Ahlamisa molomo, o ahlole ka ho loka, o ahlolele ya madimabe le mofutsana.

10Mosadi ya kgabane ke mang ya tla mo fumana? Ke ya bohlokwa ho fetisa diperela hole. 11Pelo ya monna wa hae e a mo tshepa, mme a ke ke a hlokiswa leruo. 12O mo etsa hantle, e seng hampe, ka matsatsi wohle a ho phela ha hae. 13O ipatlela boya ba dinku le lene, mme o sebetsa ka matsoho ka thabo. 14O tshwana le dikepe tsa mohwebi, o lata bohobe ba hae hole. 15O tsoha e sa le bosiu, o abela ba ntlo ya hae dijo, le makgabunyane a hae mesebetsi. 16O kgahlwa ke tshimo, a ye a e reke; ka tseo a di sebeleditseng, o hloma tshimo ya merara. 17O itlama letheka ka matla, mme o matlafatsa matsoho a hae. 18O thabela leruo la mahlahahlaha a hae; le bosiu lebone la hae ha le time. 19Matsoho a hae a tshwara thupa ya ho ohla, menwana ya hae e tsamaisa thupa e etsang ditshwele. 20O fuparollela bafumanehi seatla sa hae, o se otlollela mohloki. 21Ha a tshohe lehlwa bakeng sa ba ntlo ya hae, hobane ba ntlo ya hae bohle ba apere dikobo tse futhumetseng. 22O itohela diphate tse ntle; ho apara ha hae ke lene le sekarelata. 23Monna wa hae o tsejwa kgorong ya motse, ha a dutse hara banna ba baholo ba setjhaba. 24O etsa masela a lene, o rekisa ka wona, le dinyepa o rekisa ka tsona ho mohwebi. 25Matla le hlompho ke seaparo sa hae, o tsheha letsatsi la hosasane. 26O ahlamisa molomo wa hae ka bohlale, molao o mosa o lelemeng la hae. 27O alosa ntlo ya hae, ha a je bohobe ba botswa. 28Bara ba hae ba tsoha, mme ba mmitsa ya lehlohonolo. Monna wa hae le yena o a mo rorisa, 29o re: Baradi ba bangata ba bile kgabane, empa wena, o ba feta bohle. 30Kgahleho e a thetsa; botle ke bosawana! Mosadi ya tshabang Jehova ke yena ya tla roriswa. 31A ke a je tholwana tsa matsoho a hae, mme mesebetsi ya hae e mo rorise kgorong tsa motse.

Currently Selected:

DIPROVERBIA 31: SSO61-SO

Highlight

Copy