DIKETSO 1

Jesu o nyolohela lehodimong. — Baapostola ba kgutlela Jerusalema.

1Oho, Theofile, lengolo la pele ke le entse ka ditaba tsohle tseo Jesu a qadileng ho di etsa le ho ruta ka tsona; 2ka di fihlisa letsatsing leo a nyoloseditsweng lehodimong ka lona, hobane a laele, ka Moya o Halalelang, baapostola bao a ba kgethileng; 3e leng bao e neng ere hobane a utlwiswe bohloko, a ileng a ipontsha bona, a se a phela, ka dipontsho tse ngata tse kgodisang, ba mmona ka matsatsi a mashome a mane, a ntse a bolela tsa mmuso wa Modimo.

4Enereha a phuthehile le bona, a ba laela hore ba se ke ba tloha Jerusalema, ba mpe ba lebelle pallo ya Ntate, eo le e utlwileng ho nna, 5hobane Johanne o fela a kile a kolobetsa ka metsi; empa lona le tla kolobetswa ka Moya o Halalelang, ha ho fetile matsatsi a se makae.

6Enereha ba phuthehile le yena, ba mmotsa, ba re: Morena, na o re, e se e le jwale o tla tsosa mmuso wa Iseraele na? 7A re ho bona: Ha ho a le lokela ho tseba mehla, leha e le dinako tseo Ntate a itaoletseng tsona a nnotshi. 8Empa le tla fuwa matla mohla Moya o Halalelang o tlang ho lona, mme le tla ba dipaki tsa ka Jerusalema, le naheng yohle ya Judea, le ya Samaria, le ho isa pheletsong ya lefatshe.

9Yare hobane a bolele taba tseo, a nyoloswa ba ntse ba mo tadimile, mme leru la mo tlosa mahlong a bona. 10Ba re ba sa lelaletse lehodimong, ha a ntse a nyoloha, bonang, ha hlaha ho bona banna ba babedi, ba apereng diaparo tse tshweu, 11ba re: Banna ba Galelea, le ntse le emetseng, le lelaletse lehodimong? Jesu eo ya nketsweng lehodimong a le hara lona, o tla be a tle ka mokgwa oo le mmoneng a eya lehodimong ka wona.

12Yaba ba tloha thabeng eo, e bitswang ya Mehlwaare, bohaufi ba yona le Jerusalema bo le kale ka leeto la Sabatha, mme ba kgutlela Jerusalema. 13Yare hobane ba kene hae, ba hlwella phaposing e kahodimo, moo ho neng ho dula Petrose, le Jakobo, le Johanne, le Andrease, le Filipi, le Thomase, le Bartholome, le Mattheu, le Jakobo, mora Alfea, le Simone Selote, le Judase, mora Jakobo. 14Bao bohle ba nna ba tiisetsa ka pelo e le nngwe ho rapela le ho kopa, ba ena le basadi, le Maria, mma Jesu, le banababo.

15Mehleng eo, Petrose a ema hara barutuwa moo ba phuthehetseng teng, bongata ba bona, ha ba balwa, bo batlile ho ba lekgolo le mashome a mabedi, a re: 16Banna ba heso, ho ne ho tshwanela hore lengolo le etsahale, le porofetilweng ke Moya o Halalelang ka molomo wa Davida, le lekanyang Judase, eo e bileng motsamaisi wa ba tshwereng Jesu. 17Hobane o ne a balwa hara rona, mme o ne a abetswe tshebeletso ena. 18Empa yare hobane a ithekele tshimo ka moputso wa bokgopo, a itihela, a phatloha kalehare, mala a hae a ba a horometseha kaofela. 19Ke taba e tsebilweng ke bohle ba ahileng Jerusalema, tshimo eo ba bile ba e reile Hakeldama, ka puo ya bona, ke ho re: Tshimo ya madi. 20Hobane ho ngodilwe bukeng ya Dipesaleme, ho thwe: Boaho ba hae bo fetohe dithako, mme ho se be motho ya ahang teng; hape: E mong a nke bodisa ba hae. 21Ka baka leo, ho banna ba bileng le rona mehleng yohle eo Morena Jesu a tsamaileng le rona, 22ho qala kolobetsong ya Johanne ho fihlela letsatsi leo a nyolositsweng ho rona, e mong wa bona e ka kgona e be paki ya tsoho ya hae le rona.

23Yaba ba hlahisa ba babedi, e mong e le Josefa, ya bitswang Barsabase, ya boetseng a reilwe Justuse, e mong e le Mathiase. 24Ba rapela, ba re: Oho, Morena, wena ya tsebang dipelo tsa bohle, e be wena o supang eo o mo kgethileng ho ba babedi bana; 25hore a nke kabelo ya tshebeletso ena le ya boapostola bona Judase a bo kgelohileng ho ya sebakeng seo e leng sa hae. 26Jwale ba laola ka lotho; lotho ya ntsha Mathiase, a ba a kenngwa palong ya baapostola ba leshome le motso o mong.

Currently Selected:

DIKETSO 1: SSO61-SO

Highlight

Copy