Mark 8
8
Jisü no Timi 4,000 Loji
1Tipau ghuloki lo, itaghi timi kutomo ighino kumqoluve. Eno panongu ye kiumu chu kepu küha no akehu, Jisü no pa khopemiqo ku püzü ishi pi, 2“Ni ye timi hipaqo kimiyeqhiyi ani; panongu ye I gholo atsala küthü ngovea eno chu kepu kiumu kühavae. 3Panongu khami ye alà kushuwa lono ighi ani püzü I no panoqo müzüthiqhiyi aki lo puwoveni kelo panongu ye alà lo ikiqive nanie.”
4Pa khopemiqo no khochile, “Ikemu timi küghünamokeu-a hikithipu lono khuu no panongu lojílu kepu qhemi achuqupu ithuluni nani kea?”
5“Nongu gholo ashopa khijehi ani kea?” ipi Jisü no iniju.
Panongu no khochile, “Tsünì anie.”
6Pa no timi aqokitikhi vilo ayeghi lo iqavelo pi. Tisheno pa no ashopa tsünì akeu ikhiluve no Alhou shikimthive keu thiu pa no asho süpho püzü tipaqo pesü timiqo kijé tsü penike akhopemiqo tsü, eno akhopemiqo no timiqo kijé tsü. 7Panongu gholo akha kititi ghí hami ae; ikehu Jisü no tipaqo ghenguno ghí shikimthive no akhopemiqo vilo kijé tsülo pive. 8Timiqo kümtsü no aghakiqi shi chulu. Tishive kethiu akhopemiqo no chukhamove keu munomughoqo ashoghi tsünì chhitoi pekütsülue. 9Tilehi timi qhethonhe bidí kutólo ae. Jisü no panongu puwuve kethiu, 10pa no pa khopemiqo sasü ashuka lo ikuve no Dalmanutha qhalo wuve.
11Phariseemiqo no ighi püzü Jisü sasü kütsala thuve. Panongu no pa peju niye, kungugha lono amichipu kümlà shipe pìyelo pi. 12Jisü no amloghuju thuthu shè püzü ishi pi, “Kushiye tiqheli hipau ye amichipu kümlà khu acheni kea? Kuchou no I no nongu vilo pìní, amichipu kümlà kiumu tiqheli hipau tsüní chemoe.” 13Tisheno pa ye panongu qhive püzü ashuka lo ide ikuve no azü hukukuu ikuve.
Phariseemi ngò Herod’w Kholaqhi
14Akhopemiqo ye asho peighi nikeu kümsümave, eno ashuka lo ashopa lakhi likhi panongu gholo ae. 15Jisü no panongu pikichive ghi pi, “Kutokupui lo, Phariseemi’w kholaqhi eno ti Herod’w kühakügha lichhe lono nongu likhi nongu jukuto alo.”
16Akhopemiqo no panongu dolo hipau vehu küptsa kilé apüzü ishi pi, “Hiye ningu no asho küha keu ghenguno ke.”
17Panongu no küptsa akeu ithive püzü Jisü no panongu vilo iniju: “Nongu ye kushiye asho küha keu ghili kügha ani kea? Nongu ye ithumla eno vethamla aphi keshea? Nongu mlo müka kithevea keshea? 18Nongu ye anhethi apülaghi ithumlave eno akìní xapusü chimlave keshea? Eno nongu ye kümsüchile müla keshea? 19Kughou I no timi 5,000 ghenguno ashopa pungu süpho keno, nongu ye munomughoqo ashoghi chhitoi khijehi kichekütsülu kea?”
Panongu no khochile, “Ashoghi chighikini.”
20“Eno kughou I no timi 4,000 ghenguno ashopa tsünì süpho keno, nongu ye munomughoqo ashoghi chhitoi khijehi kichekütsülu kea?” ipi Jisü no iniju.
Panongu no khochile, “Ashoghi tsünì.”
21Jisü no panongu vilo pi, “Nongu ye vethamla aphi keshea?”
Jisü no Bethsaida lo Anhethi Kighichemi Lakhi Shipivi
22Panongu no Bethsaida lo ighi kelo, timi khami no anhethi kighichemi lakhi Jisü lau saighi no timi tipau bu tsü penike qhüiniju. 23Ike Jisü no anhethi kighicheu hu au lono sünhe pesü aphu nguno khalau sasü ipeve. Tisheno Jisü no pa nhethi lo amití müsüsü tsü püzü pa u pesü pa nhethi lo bu tsü no ishi iniju, “No ye kiumu ithulu ani keo mokea?”
24Anhethi kighicheu no kunguu jupuku no ishi pi, “Ni ye timiqo ithulu anie; panongu ye asüboqo no alà cheche ketoi ithulu anie.”
25Jisü no itaghi pa u pesü timi tipau nhethi lo bu tsü. Ikelo timi tipau nhethi ye khaqhive eno ithulu kitheluve, tisheno pa ye thowkha mütsümishei ithuluve. 26Jisü no aki lo pa puwove ghi ishi pi, “No ye aphu lomu ide ilo kevilo.”
Peter no Jisü ye Messiah Kepi Piphe Tsü
27Jisü eno pa khopemiqo ye Caesarea Philippi#8:27 Caeserea ye tipau ko-aqha lo mishighüna kümtsü gholo akhotou ke ko-aqha lo aphu akeqo lo wue. Alà lo che kelo Jisü no panongu vilo ishi iniju, “Timiqo ye Ni pesü khuu ipi cheni kea?”
28Panongu no khochile, “Khami no pikeu ye no ye John Baptiz kishiu, kütami no pikeu no no ye Elijah ipi cheni, eno itaghi khami no no ye tungkupumiqo dolo lakhi ipi chenie.”
29“Imaye nongu ye kíshi kea, nongu ye ni pesü khuu ipi cheni kea?” ipi Jisü no iniju.
Peter no khochile, “No ye Messiah ke.”
30Jisü no panongu vilo pa ghili pesü khuu vilomu pi kevilo pi azah tsüve.
Jisü no Pa no Thive niye akeu Ghili Pichho
31Tisheno Jisü no akhopemiqo vilo Timi Nu ye aghime jeli ithulu moayesa keu eno kichimi, achinetomi eno ayeza kükütsümiqo no pa milive nikeu eno pa ye pìthíve moayesa nikeu eno atsala küthü thiu ye xülethuve nikeu pesü kütsüe. 32Pa ye khumu küsümo no hipaqo pia, ikelo Peter no Jisü sasü ayixeu wu püzü pa lomipi thuve.
33Ikemu Jisü no tsüghǜ ighino pa khopemiqo lau jupuwo no Peter lomipi. “I lau no chevelo Satan! O kükümsü lo Alhou lau no ighi keu kükümsüqo kumo püzü timi lau no ighi keu kükümsüqo likhi anie.”
Kros Laghi
34Tisheno Jisü no pa khopemiqo gholo aqokitikhi ghí ku no ishi pi, “I khopemi shinishi kemi ye pa likhi pa milive moayesa eno paw kros xapu no I pape moayesae. 35Kughengu khuno no pano likhi pano küxü süsho nishi cheni keno pühave nani, ikemu khuno no aküxü ikhiphe pe ni eno atsakiviu ghenguno tsüveni keno xaluve nani. 36Timi lakhi no ayeghiqha kuchopu paw shive aghí namu, pa ngulho xamlave aye kiu alá ani kea? 37Momu timi lakhi ye pa ngulho theli lo kiu tsüchile kulupu kea. 38Amikucho kumo eno axiné no chhitoi akeu tiqheli hipau lo khuala no I ghenguno eno I tsape ghenguno kujomza aghí aye, ni Timi Nu ghí kughou Papù juküvü lono akimthe kungumiqo gholo ighini keno timi tipaqo je piphe tsümo nani.”
Currently Selected:
Mark 8: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
