Mark 3
3
Jisü no Sabbath Tsalà lo Shipivi
1Itaghi Jisü no Synagog lo ilo kelo ye au ithamlave kemi lakhi tilehi aghí. 2Timi khami ye akipimí Jisü tsü niye ajeku phuju akehu Jisü ye timi hipau Sabbath tsalà lo shipivi nani keo shipivimo nani keno tsaqüi chheju ae. 3Jisü no au ithamlave keu vilo ishi pi, “Timi kümtsü gizülo puthugho lo.”
4Tisheno Jisü no panongu vilo iniju, “Ayeza kiqi lo Sabbath tsalà lo khikhiu shikeu no achipi kea: akivi kümlà shikeu no keo küsakügha kümlà shikeu no kea, aküxü xalu keu no keo pìthíve keu no kea?” Ikemu panongu ye kiumu khochile mülave.
5Jisü no pa mlo ide ghi ighowo panongu jupuwo, eno panoqo mlo kuthò ithulu no pa mloküsa shive püzü timi tipau vilo pi, “O u xachholo.” Pa no pa u xachho eno pa u ye kupukülai athoputholuve. 6Ikelo Phariseemiqo ye khalau ipeve no Herod papemiqo sasü kíshi no Jisü pìthíve nike no kuchughu thuve.
Aqokitikhi no Jisü Pape
7Jisü ye pa khopemiqo sasü ayizükucho lo wuve, ikelo Galilee lono timi kutomo no panongu pape ighie. 8Judea, Jerusalem, Idumea lono, Jordan ko-aqha hechesü Tyre eno Sidon lono timiqo no Jisü no mülà keqo ghili chilu püzü timi kutomo no pa lau ighie. 9Aqokitikhi pelo pa küzüpholuve pemo nike ghenguno Jisü ye pa khopemiqo vilo pa ghenguno ashuka aghulo lakhi kutò lo pi. 10Kughengu pa no timi kutomo shipivive kehu aküsǜ jeli xapu akemiqo no pa bu niye tuhakilesü azüu ighi ae. 11Kughou mithekumo ghunguqo no Jisü ithulu keno, panongu no pa gizülo ikiqive no, “No ye Alhou Nue,” ipi ighamuku. 12Ikemu pa ghili pesü kütamiqo vilo pipemo nike tsatsái azah panongu tsüve.
Jisü no Chighikini Kishesülu
13Jisü no naghuto küdau iqho püzü pa no khunoqo ku nishi keno tipaqo ku, eno timi tipaqo no pa lau ighi. 14Pa no timi chighikini#3:14 Kaku khami lo ye timi chighikini pesü apostolmiqo ipi aje shukiphe shive tsü ipi yèpüani süküsü shi, tiye panoqo pelo pa gholo ngo pe, aqha lo kütsüwu pe, 15eno tüghaküsaqo haphelu nikeu kükagha ape niye ke.
16Pa no timi chighikini süküsü shilu keu ye hipaqo ke:
Simon (pa no Peter ipi kuve tsü keu),
17Zebedee nu James eno John pama (Jisü no pama je pesü Boanerges ipi kuve tsü, tipau kiqi ye “Tsütsüpha nuliqo”),
18Andrew,
Philip,
Bartholomew,
Matthew,
Thomas,
Alphaeus nu James,
Thaddaeus,
Simon azá yeghi kimiye kicheu
19eno Jisü jekuchuu Judas Iscariot.
Jisü Kibolomi eno Ayeza Kükütsümiqo no pa Nguku
20Tipathiu Jisü no aki lakhi lo ilo, ikelo itaghi aqokitikhi no kumqoluve püzü pa eno pa khopemiqo ye chu-sho nikeu ghí shimlave. 21Kughou pa kibolomiqo no hipau ghili chilu keno, panongu no pa saluve niye wu eno panongu no ishi pia, “Pa ye izüwuvae.”
22Jerusalem lono ayeza kükütsümi iqighi kemiqo no ishi pi, “Pa phi lo Beelzebul ilovae! Eno pa ye tüghaküsaqow kükapuu küká vechewo tüghaküsaqo haphe anie.”
23Tishikehu Jisü no panongu ku saighi püzü aholetsaqo lono ishi panongu vilo pi: “Satan ye kíshi no Satan haphe luni kea? 24Akükaphu lakhi lono kijetha keu ipeghive aye akükaphu tipau ye ipove nani. 25Akibo lakhi lono kijetha keu ipeghive aye, akibo tipau ye ipove nani. 26Eno Satan no pa likhi pa mjochile no kijethave aye, pa ye ngopushumlave no ashekha lo ye pa kükaqha kühave nanie. 27Kuchou lo ye, akumtomi lakhi ki lepu wuni ke ghenguno atüghishi pa tsüghape qhivemo kelo ye aki tipau lepu wumlae. 28Kuchou no I no nongu vilo pìní, timi no axiné shikeu eno pipütha keu jeli kümtsü kipimí qhivetsülu nani, 29ikemu Aghungu Kimthe pipütha kemiqo ye khilemu akipimí qhitsümo nani; timi tipaqo ye lhokta xiné shivae.”
30Ayeza kükütsümiqo no, “Pa lolo mithekumo ghungu ani,” ipikeu ghenguno Jisü no hi pike.
31Ikelo, Jisü pazá ngò pa thiküzümiqo ighie. Panongu ye khalau puthugho püzü timi khami pelo Jisü ku peniye puloe. 32Aqokitikhi no Jisü vehope iqa akelo Jisü ku peniye ipulo kemiqo no pa vilo ishi pi, “O zá ngò O thiküzümiqo ye khalau O phu chenie.”
33“Khuu no I zá eno I thiküzümiqo kea?” ipi pa no iniju.
34Tisheno tilehi pa homüxa pesü iqa akemiqo lau ju no ishi pi, “Timi hipaqo no I zá eno I thiküzümiqo ke! 35Khuno no Alhou pulou shi cheni keno tipaqo no I thiküzüu, I chepu eno I zá ke.”
Currently Selected:
Mark 3: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
