Mark 16
16
Jisü ye Xülethuvae
1Sabbath tsalà thiu Mary Magdalene ngò James pazá Mary eno Salome noqo ye Jisü sükumo nupe qhini ke ghenguno axokütsüngü mkhuqo qhüluve. 2Apinedo tsalà atüghiu inaqhe ithe khetsünhe ipeghive kemtsa, pano küthü ye akumoki lo wuche 3eno pano küthü dolo lakhi no lakhi vilo ishi iniju kilé che, “Khuu no akumoki hukikha lo atu akeu tukulo tsü nani kea?”
4Ikemu kughou pano küthü no pishipuwo ju keno, atu ighono kijè akeu hu ye, tukulove aghí keu ithulu. 5Pano küthü no akumoki alou iloghi kelo, apumi lakhi no chijeboboi-phi miyetsüghoi keu pepu no akumo ajeu iqa aghí keu ithulu, ikelo pano küthü ye shishe msàve.
6Pa no pi, “Msà kevilo. Nongu ye Nazareth nó ghami Jisü khuu yeda pìthíve keno pa ju niye cheni ke. Pa ye xülethuvae! Pa ye hilehi kühae. Panongu no khilehi pa qhove keno tipau-a julo. 7Ikemu wulo! Pa khopemiqo ngò Peter vilo pilo, ‘Pa ye nongu züu no Galilee lo wuvae. Pa no nongu vilo pive keu toi, tilau no nongu no pa sasü kusholu nanie.’ ”
8Msà khokhoshi eno akichiqhive püzü totimi pano küthü ye khalau ipeve no akumoki lono posü wuve. Pano küthü ye kiumu pesü khiu vilomu pimoe, kughengu panongu ye msàve ke.#16:8 Khaghi kakuqo khami lo ajò 9-20 kutólo kühae
9 Kughou Jisü no apinedo tsalà atüghiu inaqhe itheno xülethughive keno, pa no atüghishi Mary Magdalene lau ipeghi pìye. Li ye Jisü no li lolo tüghaküsa tsünì hapheve tsü keu hu ke. 10Li no wu püzü khunoqo li gholo ngo ache no mloqa eno anhezü-piji ghi akeno panongu vilo pive. 11Kughou panongu no Jisü ye xü aphi eno li ye pa ithuluva ipi keno, panongu ye ti pülümoe.
12 Tithiu pama mikini no mishiphu hokümxa lo alà cheche ke lono Jisü no aghola kütau lono pama lau ipeghi pìye. 13Pama no ideighi püzü tipau ghili pesü kütamiqo vilo pìthive; ike tishimu panongu no pama ghí pülümoe.
14 Tithiu Jisü no pano chighiqhaqhi no chuqu-kusho shi ake lono panoqo lau ipeghi pìye; panongu küpülü küküha eno amlo kuthò ghenguno pa no xülethuve kethiu khunoqo no pa ithulu keno tipaqo shou pülübemo keu ghenguno pa no panongu lomipie.
15 Jisü no panongu vilo pi, “Ayeghiqha kümtsü lo wulo eno timi kümtsü lau atsakiviu kütsü lo. 16Khunoqo no pülüluve püzü baptiz shiveni keno xaluve nani, ikemu khunoqo no pülübemoni keno kiléqhive nani. 17Eno khuno no pülübeni keno amichipu hipaqo pano gholo anani: I je lono panongu no tüghaküsaqo haphelu nani; panongu no amili kithé lono pi nani, 18panongu no au lono apighiqo ikhiqhelu momu akithipu tüghü yelu namu tiye khilemu panoqo shipüsamo nani; panongu no küsükinimiqo shou au be kelo küsükinimiqo no viluve nani.”
19 Ampeu Jisü no panongu pütsa tave kethiu, pa ye kungugha lo saikuve eno Alhou u ajeu iqave. 20Tisheno akhopemiqo no chewu püzü aqha kümtsü lo kütsüe, eno Ampeu no panoqo gholo mülà eno pa tsa shikupu akeu shi amichipu kümlàqo mülàe.#16:20 Khaghi atüghiu kakuqo lo eno khaghi thopimiqo khami kiqi lo ye ajò Mk 9:20 do ye kühae.
Currently Selected:
Mark 16: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
