Mark 14
14
Bethany lo Jisü Nukishe keu
1Hechekulu ghulhu eno Kholaqhi sümo keu Sho Tiqhitini ikhiluni keu atsala kini likhi akelo achinetomi eno ayeza kükütsümiqo ye tuqhou no Jisü küghaluve no pìthíve niye kuchughu ae. 2Panongu no ishi pia, “Timiqo no muqhu ipeghive nosake tiqhitini ghuloki lo ye shikepu kumoe.”
3Jisü no Bethany lo Simon apügha kupuu ki lo kibepu lo mungupe ngo akelo totimi lakhi no alabaster bohu lono lekitemo keu xokütsüngü no mülà keu ighono amekusho axokütsüngü pesü ighi. Eno li no abohu hepho püzü axokütsüngü pesü Jisü kütsü lo lepuku tsü.
4Ikelo tile akemi khami no amloide ghi panongu dolo ishi pia, “Kushiye axokütsüngü hipau kilheve ani kea? 5Axokütsüngü hiye ampe lakhi jume#14:5 Greek tsa kiqi lo ye denarii 300 nguno akichiù ipi ani. Denarii lakhi ye atsala lakhi jume qhemi ke nguno akichiù lono jelu püzü pisa pesü athokhamiqo tsülu kepu shi ake.” Tisheno panongu no ayiküsa shi li lomipi.
6Jisü no pi, “Palokutove lo. Nongu ye kushiye li pünaqhi ani kea? Li ye I lau jukivipu kümlà lakhi shivae. 7Athokhami ye alhokuthu nongu gholo ache nani,#14:7 Zaki 5:11 eno nongu ye kugho-kughomu nongu no pulo aye panoqo kuphulu nani. Ikemu ni ye alhokuthu nongu gholo aní keu kumoe. 8Li ye li no kiu shikulupu qhemi keno shivae. Li no axokütsüngü pesü I phi lo lepuku tsü akeu ye I sükumo shiqho niye azüu no kutotsü akeu ke. 9Kuchou no I no nongu vilo pìní, atsakiviu hipau pesü ayeghiqha khilehi pikülhasü wuni keno, totimi hipau no kiu shivea keno li kümsüma mokeu shi hipau ghili piche nani.”
10Ikelo Judas Iscariot khuu chighikini dolo lakhi keno, pa ye Jisü pesü thechu shive niye achinetomiqo lau wuve. 11Achinetomiqo ye ti chilu kelo alokiqi shive eno pisa pa tsü nikeu shi tushoqhive. Ikehu Judas Iscariot ye Jisü pesü panoqo u lo phesüve tsü niye adokivi miqeauve.
Ashekhau Ghulhu
12Kholaqhi sümo keu Sho Tiqhitini tsalà atüghiu lo, kughou Hechekulu ghulhu kukhuaye lo akeu toi ambeti heqhi kepu shive keno, Jisü khopemiqo no pa vilo iniju, “No ye ningu pelo khile wu no O ghenguno Hechekulu ghulhu chuni keu kutokughoi aghí penishi ani kea?”
13Ike pa no ishi pi püzü akhopemi kini puwu, “Mishighüna lo ilolo, eno nongu no timi lakhi alikoli lo azü xapusü nokujo sasü kusho nani. Pa papesü wulo. 14Eno pa no ilo keu ki mpeu vilo ishi pilo, ‘Akükütsüu no ishi iniju anie: I no I khopemiqo sasü Hechekulu ghulhu chuni keu chebo khilehi ani kea?’ 15Pa no aki jolha kunguu achebo kijè mülaqhi püakeu nokujo pìye nani ke. Tipa-a lo ningu ghenguno kutokughoi lo.”
16Akhopemi pama ye wuve no mishighüna lo ilo, ikelo Jisü no pama vilo pikeu toi thowkha tishi ithulu. Ikehu pama no Hechekulu ghulhu kutoe.
17Kughou avela shive keno, Jisü no akhopemi Chighikini sasü ighi. 18Panongu no aghulhu lipa lo chu akelo, Jisü no pi, “Kuchou no I no nongu vilo pìní, nongu lakhi no I pesü thechu shive nanie.”
19Panongu ye amlo save, eno panongu lakhi-khi no pa vilo pi, “Kuchou no ni kumo kema?”
20Pa no khochile, “Chighikini dolo akhu lo asho pütsü püzü I gholo chu akeu no ke. 21Timi Nu ye Kuchoyesü lo yèpüa ketoi thive nani. Ikemu Timi Nu küghape thechu shive keu ghengu ye ahaküsapue! Pa ghengu ye punúmove keumu pavini cheke.”
22Panongu no chu-sho akelo Jisü no asho ikhilu, eno pa no shikimthi tsüve kethiu asho süpho püzü pa no ishi pi ghi pa khopemiqo tsü, “Ikhilu no chulo; hiye I phimpi ke.”
23Tisheno pa no ajikhu lakhi ikhilu püzü shikimthi tsüve kethiu akhopemiqo tsü, eno panongu kümtsü ajikhu tipau lono shoe.
24Jisü no panongu vilo pi, “I jì hipau ye puloshoqhi jì ke eno hiye timi kutomo ghenguno peleve keu jì ke. 25Kuchou no I no nongu vilo pìní, Alhou kükaphu lo akithé shi atsaizü shomo ke tsalà kutólo ni ye atsaithi lono atsaizü akiniù sholumae.”
26Tipathiu panongu no ale lakhi phe pe Alhou sheqheve no Olive naghuto lo wuve.
Peter no Milive nikeu Jisü no Pichho tsü
27Jisü no panoqo vilo pi, “Nongu kümtsü I qhive nani,” kughengu ishi yèpüani:
“ ‘I no ambe kheu ghüzave nani,
eno ambeqo ye apanaghave nani.’#14:27 Zech 13:7
28Ikemu I no xüchilethuve kethiu, ni ye nongu züu no Galilee lo wu nani.”
29Peter no ishi shuphe, “Kümtsü no O qhive namu, ni ye O qhivemoe.”
30Jisü no khochile, “Kuchou no I no O vilo pìní, ‘Ishí, tiye itiji awudu no ghuthu kini igha mphi züu, O likhi no ye ghuthu küthü I milive nani.’ ”
31Ikemu Peter no ghe-ghei pikichichi ghi pi, “O gholo no thive kepu shi aghí namu, ni ye khilemu O milimoe.” Eno kütamiqo kümtsü titoi pikhae.
Gethsemane lo
32Panongu no Gethsemane ipikeu-a lo wu, eno Jisü no pa khopemiqo vilo, “I no akighini shi ake dolo hile iqa aghílo,” ipive. 33Pa no pa gholo Peter, James eno John sasü wuve, eno pa ye shishe amloküsa eno akükümsü kütakihi thuve. 34Jisü no pano küthü vilo pi, “Ni ye amloghime no thiveni ke shivae, hilehi ngo no jukuto alo.”
35Pa no kitila chesü wu no ayeghi lo qhoqhünhe pe ngo no tsalá shikulupu shi aghí aye atüqhüdo tipau pa lau no ikhisüwuve tsü penike inikhue. 36Pa no ishi pi, “Abba,#14:36 Aramaic tsau no Apù ipi ani Apùo, O ghengu ye thowkha kümtsü shikulupu ani. Aghime jikhu hipau I lau no ikhipesü wuve tsülo. Ikemu I pulou kumo no O pulou shilo.”
37Tisheno pa no pa khopemi pano küthü lau ideighi kelo panongu ye zü aghí keu ithulue. Ikehu pa no Peter vilo pi, “Simon! No ye zü aphi keshea? No ye ayì kihedo lakhi ghenguno ghí jukuto müla keshea? 38Nongu ye ghukuju lo ikiqivemo kepu shi, jukuto eno inikhu alo. Aghungu ye puloniqhiyi ani, ikemu ashi-aji no miqemilei anie.”
39Ghuthu akiniù Jisü ye wuve no itaghi athoshi inikhu auve. 40Kughou Jisü no pano küthü lau ideighi keno, panongu ye itaghi zü aghí khave, kughengu panongu ye anhethimu tsükho müla no zümamai ake. Eno panongu ye pa vilo kiu pi kepu keno mtha no ae.
41Aküthüu ideighi kelo, Jisü no pano küthü vilo pi, “Nongu ye itehi kutólo akulhoqhi zü aphi keshea? Kughomae! Ado hu ye ighivae. Julo! Timi Nu ye axinemiqo u lo phesüve tsüae. 42Ithulo! Ningu wuveni shilo. I küghape thechu shive niye akeu hu ye hi ighivae.”
Jisü Küghaluve keu
43Jisü no atsa piaphi lono, akhopemi Chighikini dolo lakhi Judas ipikeu ighive. Pa gholo achinetomi ngò ayeza kükütsümi eno kichimiqo no puwu kemi aqokitikhi lakhi no akihizüta eno asüthaluqo khapesü ighi khave.
44Judas thechuu ye azüu no kishékulu shi timiqo vilo hitoi amqü tsüpe püa, “I no khuu müma nike no timi tipau ke; pa küghaluvelo eno pa khe sasü wuvelo.” 45Judas no vejoi Jisü lau ighino, “Rabbi!” ipi no pa mümae. 46Timiqo no Jisü tsüqüluve eno pa küghaluve. 47Ikelo panongu phivilo puthugho akeu timi lakhi no paw akihizüta süjo pesü achinetomiqo shou atou qeu shou ghipuku no pa kìní küsave tsü.
48Ikelo Jisü no pi, “Ni ye ayeza hekibidemi mqo sache ghí kepu toi nongu ye kushiye akihizüta ngò asüthaluqo pesü I kügha niye ighi ani kea? 49Ni ye tsalà kipetsü nongu gholo ache eno achineki khala lo kütsü ache, tishimu nongu ye I küghamoe. Ikemu Kuchoyesü lo akeu ye shikupuve moayesae.” 50Ikelo kümtsü no pa qhive no pokhave.
51Apumi lakhi, kumu pepumo no phephei keu hekuuphi likhi usü Jisü papesü che. Kughou panongu no pa tsüqüluve keno, 52paw hekuuphi qhive no aphimpi kümsá pove.
Jewmi Hoho Zülo Jisü sawu
53Panongu no Jisü sasü achinetomiqo shou atou lau wu, ikelo achinetomi, kichimi eno ayeza kükütsümiqo kümtsü ighino kumqoe. 54Peter ye putou no achinetomiqo shou atou ki khalau kutólo Jisü papesü ighi. Tilehi pa ye aghükhemiqo gholo iqa no pa likhi pa vapülü ghi ami pügha ae.
55Ikelo achinetomiqo eno Jewmi hoho lo akemiqo kümtsü no Jisü pìthíve niye akipimí shepe phuju ae, ikemu panongu ye lakhimu phumlae. 56Kutomo no kichileu shepe pesü pa nguku ae, ikemu panongu no pi akeqo lakhimu pulo kulupu shilumoe.
57Ikelo khami no puthugho püzü kichileu shepe hitoi pesü pa nguku: 58“Pa no ishi pi aghí keu ningu no chilue, ‘I no timi u no mülà keu chineki hipau kütsave nani eno atsala küthü dolo no timi u no mülàmo keu kütau mülaqhive nani.’ ” 59Tishimu panongu dolo ghí atsa lakhi shimlave.
60Ikelo achinetomiqo shou atou no panoqo zülo puthugho no Jisü vilo iniju, “No ye kiumu khochileni chemo keshea? Timi hipaqo no O ngukube ghi ashepe hipau peighi akeu ye kiu kea?” 61Ikemu Jisü ye inaqhoi ngo auve eno kiumu khochilemo.
Itaghi achinetomiqo shou atou no pa vilo iniju, “No ye Messiah, kükümgha Nu Lakhi hu keshea?”
62Ikelo Jisü no pi, “Tihu Ni ke! Eno nongu no Timi Nu hu ye Akughushu Lhou u ajeu iqave no atsütsǘ lo khüngküsü lono ighi keu ithulu nani.”
63Achinetomiqo shou atou no pa phiküzü süxüve püzü ishi iniju, “Ningu ye kushiye hinguno alau thopimiqo avehupu shini kea? 64Alhou pipütha keu nongu no chiluvae. Nongu ye kíshi kümsü ani kea?”
Panongu kümtsü no pa ye thive küzüpu kepi pipüsaqhi. 65Tisheno khami no pa shou müsüte puku thuve; panongu no pa nhethi khave tsü no au pesü pa he püzü ishi pi, “Tungkuptsa pilo!” Tisheno aghükhemiqo no pa sawuve püzü pa heqhi.
Peter no Jisü Milive keu
66Peter no achinetomiqo shou atou kikhala aqhou ngo akelo, achinetou qelimi dolo angá lakhi no tilehi ighi. 67Kughou li no Peter no ami pügha akeu ithulu keno, li no aphivi lono pa ju.
Li no pi, “No ghi Nazareth nó ghami Jisü hupau gholo cheke.”
68Ikemu Peter no ti milive ghi ishi pi, “Ni ye nono kiu piani keno ithi amoe eno vethalu amoe,” ipive püzü ilokighi là küdau no khalau ipeve.
69Kughou aqeliu hu no tile pa ithulu keno, li no itaghi tipau hokümxa lo akemiqo vilo pi, “Timi hipau ghí hupaqo gholo lakhi ke.” 70Ikelo Peter no itaghi ti milive.
Ado hami thiu, Peter phivilo puthugho akemiqo no pa vilo pi, “Kuchou nomu no ye panoqo gholo lakhie, kughengu no ye Galileemi lakhi ke.”
71Ikelo Peter no I pelo angsü shipelo ipi thuve eno panongu lau ashoqhi shi, “Nongu no timi hipau ghili piakeu ni ye ithi amoe.”
72Paikhavi awudu no ghuthu akiniù ighave. Ikelo Peter ye Jisü no pa vilo ishi pipüa keu tsa kümsüchilelu: “No ye awudu no ghuthu kini igha mphi züu no ghuthu küthü I milive nani.” Eno Peter ye kunotshütshü shi qa auve.
Currently Selected:
Mark 14: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
