Mark 12
12
Mishichi Chekemiqo Holetsa
1Tisheno Jisü no aholetsaqo lono panongu vilo pithu: “Timi lakhi no atsailu lakhi chie. Pa no ti homüxa aghutu shive püzü atsaithi tsüghǜ nike ghenguno aqò chhupe qhi no aqoghe lakhi mülà pukuve. Tisheno pa no atsailu pesü alukichimi khami lau mishichive pe no a-a kütau wuve. 2Ghile ghuloki lo pa no pa qeu lakhi hapesü mishichi akemiqo lau atsailu lono atsaithi hami süghi penike puwu. 3Ikemu panongu no pa tsüqüluve püzü pa kuoqhi no au kümsá pa puwuve. 4Ikelo pa no aqemi kütami panoqo lau puwu; panongu no aqeu hipau kütsü lo ghatsü no shikukujoqhi eno pa kijipüsave. 5Tishimu pa no kütami lakhi puwu, ikelo panongu no tipau pìthíve tsü. Pa no kütami kutomo puwu; ikelo panongu no khami kuoqhi eno kütamiqo pìthíve tsü.
6“Pa ye puwu nike ghenguno timi lakhi likhive, tiye pa no kimiye chekeu panu ke. Pa no ishi pi ghi kümtsü gholo ashekhau puwu, ‘Panongu ye I nu gihu kepu ke.’
7“Ikemu mishichi chekemiqo no lakhi no lakhi vilo ishi pi, ‘Hino amheghi kiyighiu ke, ningu pa pìthíveni, tishiaye amheghi ye ninguw shive nani.’ 8Ikehu panongu no pa küghape heqhipithíve, eno atsailu lono khalau vepheve.
9“Tishiaye atsailu mpeu ye kiu shi nani kea? Pa ye ighino mishichi akemiqo pìthíve nani eno atsailu pesü kütami tsüve nani. 10Nongu ye Kuchoyesü lo hipau tsajo philumo keshea:
“ ‘Aki kishimi no milive keu tuqu no
akhotou tuqu shivae;
11Ampeu no hipau shive tsüa,
eno hiye ningu nhekithe lo akümzapue.’#12:11 Leshe 118:22,23”
12Ikelo achinetomi, ayeza kükütsümi eno kichimiqo no pa küghaluve niye alaghi phuju ae, kughengu Jisü no aholetsa pikeu ye panongu vilo piani kepi panongu no ithi ake. Ikemu panongu ye aqokitikhi msà ae; ikehu panongu ye pa qhive no wuve.
Akükaqha Zame Caesar tsü keu
13Hipathiu panongu no Phariseemi ngò Herod papemiqo khami hapesü Jisü tsa lono pa meluve nike puwu. 14Panongu no pa lau ighino pi, “Akükütsüu, ningu no ithi akeu ye no ye kikhikighimi lakhi. No ye kütami no züluve chekemi kumo, kughengu panongu ye khuu keno no ye tipau akhotoshi chemo; ikemu no ye Alhou laghi kuchou ghili kütsü acheni. Imaye ningu no akükaqha zame#12:14 Rommi kumomi lau akimchi zame luche keu Caesar#12:14 Momu Rommi qhasükükau tsü keu ye achipi keo mokea?” 15Ningu ye tsü kepu keo mokea?
Ikemu Jisü ye panoqow kühakügha ithi ake. Ike pa no ishi iniju, “Nongu ye kushiye ni kitime niye pükapütsa ani kea? Ghükayi lakhi I lau süghi lo eno I pelo ti ju pelo.” 16Panongu no ghükayi peighi, ikelo pa no panoqo vilo iniju, “Hiye khuu julho kea? Eno khiu shisü püani kea?”
“Caesar’w,” ipi panongu no khochile.
17Ikelo Jisü no panongu vilo pi, “Kiu no Caesar’w keno Caesar tsüchilelo eno kiu no Alhou’w keno Alhou tsülo.”
Ikelo panongu ye pa ju pesü akümzave.
Xülekuthu lo Külakupu
18Tisheno xülekuthu kühae ipi chekemi Sadduceemiqo no Jisü lau iniju nike kutò pesü ighi. 19Panongu no pi, “Akükütsüu! Moses no ningu ayeza tsü keu lo tsalá timi lakhi no pamu thive püzü atianuli küha no pa nipu likhi qhive aye, timi hu ye achimeu luve no pamu ghenguno anuli-kughuko tsü moayesa ipie. 20Athazümi pano tsünì ache. Atüghiu no anipu lu eno anuli küha no thive. 21Akiniù no achimeu valuve, ikemu pa ghí anu küha no thive. Aküthüu ghi titoi shive. 22Eno tihutoi, pano tsünì lakhimu anuli shimo no thikhave. Ashekha lo atotiu ghi thive. 23Xülekuthu tsalà lo li ye khuu nipu shive nani kea? Kughengu pano tsünì no li lupe püani ke?”
24Jisü no khochile, “Nongu ye Kuchoyesü mu Alhou küká ghilimu ithi amoke nongu ye shipimi anike kumo keshea? 25Kughou kithimi xüputhuveni keno, panongu ye külakupu shike kumo no külakupu tsü keu ghi shimo nani; panongu ye kungugha lo kungumiqo toive nani. 26Itehi kithimi xüputhu keu tsa lo nongu ye Moses kaku lo philumo keshea, asüminipho iqü keu ghili lo Alhou no kíshi pa vilo pi kea? ‘Ni ye Abraham Lhou, Isaac Lhou, eno Jacob Lhou ke.’#12:26 Ipe 3:6 27Pa ye kithimi Lhou kumoe, ikemu küxümi Lhou ke. Nongu ye ighono shipimi anie.”
Azakütsü kümtsü nguno Akijeu
28Ayeza kükütsümi lakhi no ighi püzü panongu no kütsala akeu chilu. Eno Jisü no khokichile kivi panoqo tsü keu ithulu no, pa no Jisü vilo iniju, “Azakütsü dolo khipau no kümtsü nguno akhotou kea?”
29Jisü no khochile, “Kümtsü dolo akhotou ye hipau ke: ‘Inilo, O Israel: Ningu mpeu Alhou likhi no Ampeu ke. 30O mlo, O ngulho, O kükümsü, eno O kumto kümtsü pesü O Mpeu O Lhou kimiye lo.’#12:30 Zaki 6:4,5 31Akiniù no hipau ke: ‘O likhi O toi O kisüghümi kimiye lo.’#12:31 Achine 19:18 Hinguno azakütsü akijeu ye küha ke.”
32Timi hu no khochile, “Akükütsüu, achipi shi pivae. Nono Alhou ye lakhi eno alhou kütau ye kühae ikemu pa likhie ipi akeu ye achipie. 33Nongu mlo kümtsü, nonguw vethakulu kümtsü eno nongu kumto kümtsü pesü Alhou kimiye nikeu, eno O likhi O toi O kisüghümi kimiye nikeu ye akipti kümlagho eno aghakishiqo kümtsü nguno akhotou ke.”
34Kughou pa no alokütsü shi khochileve keu Jisü no ithulu keno, Jisü no pa vilo pi, “No ye Alhou kükaphu lono putosümovae.” Eno tipathiu timi kümtsü no pa vilo iniju nikeu ighüve.
Messiah ye Khuno pú kea?
35Jisü no achineki khala lo kütsü akelo, pa no ishi iniju, “Kiu shike ghenguno ayeza kükütsümiqo ye Messiah ye David nu ipi cheni kea? 36David ampi no Aghungu Kimthe vechewo no ishi shuphe ke:
“Ampeu no I mpeu vilo pi:
I no O ghümiqo pesü
O pukhu qholo qhitsümo ke kutólo
I u ajeu iqalo.#12:36 Leshe 110:1
37David ampi ghí pa vilo, ‘Ampeu,’ ipi ku ke. Imaye kíshi no pa ye David nu ipini kea?”
Timi kutomo no alokivishi pa tsa inie.
Ayeza kükütsümiqo lau Pikichi keu
38Jisü no kütsü akelo ishi pi, “Ayeza kükütsümiqo lau no kutokupui lo. Panongu ye chijeboboi-phi kushuwa usü iqho-iqi nishi cheni eno alhikishi-a lo panongu gihu ghi petha tsüpe nishi cheni. 39Eno panongu ye synagog lo ghí kümtsü nguno akhotou lakhüqo lo iqanishi cheni, eno aghulhu-a lo ghí akhoto-a phu cheni. 40Panongu ye chimemiqo ki süxaluve cheni eno timi shipe pìye nike ghenguno akighini kushuwa shi cheni. Timi hipaqo ye aghime kitikhi shi ghimeqhi nani.”
Achimeu Kümlagho
41Jisü no akümlagho tsü chekeu-a ghüngü lo iqa püzü aqokitikhi no achineki kinibohu lo pisa sǘ akeu chhejua. Ikelo kinímiqo kutomo no aküakini kutomo pesü akiníbohu lo vesü ae. 42Ikemu athokhau chimemi lakhi ye ighino asapuyi no mülà keu ghükayi kititi kini pesü akiníbohu lo sǘe, tiye pisa kitila me qhemi ke.
43Jisü no pa khopemiqo ku no ishi pi, “Kuchou no I no nongu vilo pìní, athokhau achimeu hipau no kütamiqo kümtsü nguno alau akiníbohu lo süvae. 44Panongu kümtsü pütüta no kupukuno shi akeu lono pesü tsüe, ikemu li ye athokha shiamu li no akeu kümtsü pesü tsüve ke.”
Currently Selected:
Mark 12: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
