Mark 10
10
Akibo Küghüxa Vehu
1Tisheno Jisü ye tipau-a qhive no Judea ko-aqha lo Jordan ghoki vechesü wuve. Itaghi timi aqokitikhi no pa lau ighi, eno thosülo pa no shi chekeu toi, pa no panoqo kütsüe.
2Phariseemi khami no ighi püzü Jisü peju ghi pa vilo iniju, “Ayeza kiqi lo timi lakhi no pa nipu sasü küghüxave keu ye achipi keshea?”
3Jisü no khochile, “Moses ye nongu vilo kiu zakütsü tsü kea?”
4Panongu no pi, “Moses ye akimi pelo küghüxave keu shepe kaku yè pesü li tsüve no li puwuve pe nikeu puloza tsüpüanie.”
5Jisü no khochile, “Tiye nongu mlo no mükamüghai keu ghenguno Moses no ayeza hipau yètsü ke. 6Ikemu inahuu pulhosü ke lono Alhou no ‘pama pesü kipitimi eno totimi shi lhotsüe.’#10:6 Bothu 1:27 7‘Hi ghenguno kipitimi lakhi ye papù eno pazá qhive no pa nipu sasü kümtsa küghünauve cheni, 8eno pama ye ashi lakhi shive nani.’#10:8 Bothu 2:24 Ikehu pama ye mikini kumovae ikemu ashi lakhi shivae. 9Tighenguno Alhou no kiu kime küqhavetsüa keno khiu pelomu hexavetsü pe kevilo.”
10Itaghi kughou panongu no aki lo ngoa keno, akhopemiqo no hipau ghili Jisü vilo inijue. 11Jisü no khochile, “Timi khuu no pa nipu sasü küghüxave püzü totimi kütami sasü külakupu shini keno, pa ye li sasü shupuvae. 12Eno totimi lakhi no li kimi sasü küghüxave püzü kipitimi kütami sasü külakupu shive aye, li ye shupuvae.”
Jisü eno Itimi Kititiqo
13Timiqo no Jisü pelo itimiqo shou au be no kümgha tsüpe niye pa lau saighike. Ikemu akhopemiqo no panongu lomipi ke. 14Kughou Jisü no ti ithulu keno, pa ye aghaideve. Pa no panongu vilo pi, “Itimiqo pelo I lau ighi pelo eno panongu lakha kevilo, kughengu Alhou kükaphu ye hitoi kemiqow ke. 15Kuchou no I no nongu vilo piani, timi khuu no itimi lakhi toive püzü Alhou kükaphu ikhilumo nike no khilemu Alhou kükaphu lo ilo müla nani.” 16Tisheno pa no itimiqo khape püzü pa u pesü panongu shou betsü no panoqo kümgha tsüe.
Kiními eno Alhou Kükaphu
17Jisü no aghüzüla lo wuve niye kutò kemtsa timi lakhi pa lau po ighino iqi pa gizülo qhoqhünheluve. Eno pa no ishi iniju, “Akükütsüu akiviu, lhokta küxü ithulu nikeu ghenguno ni ye kiu shi moayesa kea?”
18Jisü no khochile, “No ye kushiye I vilo akiviu ipi ku ani kea? Alhou likhi no thono timi khumu akiviu kumoe. 19Nono azakütsü ithi anike: ‘No ye timi ghiqhi kevilo, no ye shupu kevilo, no ye püka kevilo, no ye akimiki thopi shi kevilo, no ye timi pishiqhi kevilo, O pù eno O zá gihu lo.’#10:19 Ipe 20:12-16; Zaki 5:16-20”
20Ikelo pa no Jisü vilo pi, “Akükütsüu, Ni ye itimi shi aphi lono hipaqo kümtsü pelu ighivae.”
21Jisü no pa ju no ighono pa kimiyeve, eno ishi pi, “No ye thime lakhi kupu mphie, wolo eno O mheghi kümtsü jeve no kumlhomiqo tsüvelo, eno no ye kungugha lo O kinikhuki lo akiní ania ke. Tisheno ighi püzü I papelo.”
22Atsa hi chilu kelo timi hu ye agi zümoi pishiqholuve. Pa ye amlo saqhiyi wove, kughengu pa ye amheghi kutomo akemi ke.
23Jisü no homüxa ghi ju no pa khopemiqo vilo pi, “Kiními lakhi no Alhou kükaphu lo ilo nikeu ye kiutoi kushokütsü kea!”
24Pa no hipaqo pikeu lo akhopemiqo ye akichiqhive. Ikemu Jisü no itaghi pi, “Anuliqo, Alhou kükaphu lo ilo nikeu ye kiutoi kushokütsü kela!#10:24 Kaku khami lo ye, Akiní shou pükhü chekemi ye ishi yèpüani 25Kiními lakhi no Alhou kükaphu lo ilolu nikeu ye sayeshi lakhi no ayipuki lono ipu-ipeve keu no akümláue.”#10:25 Jisü ghuloki lo Jerusalem khagho lo, khagho akitilau ayipuki ipikeu acheke
26Akhopemiqo ye alau akichiqhive, eno lakhi no lakhi vilo pi, “Tishiaye khunoqo no xalu nani kea?”
27Jisü no panongu ju no ishi pi, “Timi ghenguno hiye kushokütsüpu ke, ikemu Alhou ghengu ye kiumu kumoe; Alhou ghengu ye thowkha shikulupu anie.”
28Tile Peter no ishi pi ithughi, “Ningu ye O pape nike ghenguno kümtsü qhikhavae.”
29Jisü no khochile, “Kuchou no I no nongu vilo piani, khuu no ni eno atsakiviu ghenguno aki qhive momu athiküzümi, achelimi, apù-aza momu atianuli momu aki-aluqo pheveni keno 30hipau küxü lono ghuthu aqhe küghüsü ithulu nani: tiye aki, athiküzümi, achelimi, azá noqo, atianuli eno aki-aluqo, tipau gholo pishi-pujuqhi keu ngò ighi nikeu ghuloki lo lhokta küxü ghí ithulu nani. 31Ikemu atüghimi kutomo no ashekhami shive nani eno ashekhami no atüghimi shive nani.”
Jisü no Ghuthu Aküthüu Pa Kithí ghili Pichho
32Jisü no atüghishi püzü panongu sasü Jerusalem lo iqho che, ikelo akhopemiqo ye akichiqhive eno khunoqo panongu pape che keno panongu ghí msàve. Itaghi Jisü no pano Chighikini ku sawo panongu vilo pa lau kiu shive niye ani keno pive. 33Pa no ishi pi, “Ningu ye Jerusalem lo iqho cheni! Eno Timi Nu ye achinetomi eno ayeza kükütsümiqo u lo phesüve tsü nani. Panongu no pa pìthíve penike pipüsa püzü Jewkumomiqo u lo pesüve nani, 34Jewkumomiqo no pa thaigha püzü amití pesü pa shou müsüte puku nani eno pa heqhi no pìthíve nani. Eno pa ye atsala aküthüu lo xülethuve nani.”
James ngò John no Qhüiniju Keu
35Tisheno Zebedee nu James ngò John pama no Jisü lau ighi. Pama no pi, “Akükütsüu, nikujo ye O pelo nino kiu-kiu qhüiniju namu shitsü penishi anie.”
36“I pelo nokujo ghenguno kiu shitsü penishi ani kea?” ipi Jisü no iniju.
37Pama no khochile, “O juküvü lo, nikujo lakhi pelo O u ajeu eno lakhi pelo O u piyiu ishi iqa pelo.”
38Jisü no pi, “Nokujo ye nokujo no kiu khu ani keno ithi amoe. Nokujo ye I no aghime jikhu lono sho niye akeu sholu nani keshea momu I no baptiz shive keu gholau no nokujo ghí baptiz shilu nani keshea?”
39“Nikujo ghí shilu nanie,” ipi pama no khochile.
Jisü no pama vilo pi, “Nokujo ye I no ye keu jikhu lono yelu nani eno I gholau no baptiz shiluve nani, 40ikemu ni ye timi lakhi pesü I u ajeu momu I u piyiu qhini ipi pilu kepu chipiu kühae. Hipaqo-a ye I pù no inahuu no khunoqo sala kutò pe qhivetsü akeno tipaqow ke.”
41Kughou pano chighí no hi chilu keno, panongu ye James ngò John pama ju aghaideve. 42Jisü no panongu ku kumqo no ishi pi, “Nongu ye Jewkumomi ayekipemiqo ipi kihi chekemiqo no panow timiqo shou ampeu shi chekeu eno panonguw kichimi hiyampemiqo no panongu shou kükagha peitha chekeu ithi anie. 43Nongu dolo ye tishi kepu kumoe. Tike kumo no, nongu dolo khuu no akijeu shinishi ani keno pa ye kütami qeu shi moayesae, 44eno khukhumu atüghiu shinishi aye kümtsü qeu shive moayesae. 45Kughengu, Timi Nu ghí kütami pelo pa qe peniye ighike kumoe, ikemu kütami qe niye ighike eno pa küxü pesü tsü no timi kutomo xaphelu niye ighike.”
Anhethi Kighicheu Bartimaeus no Ithulu Kitheluve
46Tisheno panongu ye Jericho lo ighi. Jisü ngò pa khopemiqo no timi kutomo sasü mishighüna qhive no wuche kelo anhethi kighichemi lakhi Bartimaeus (Bartimaeus kiqi ye “Timaeus nu”), ipikeu ye alaphe lo iqa no khuchu ae. 47Kughou pa no hiye Nazareth nó ghami Jisü ipi ithive keno, pa no ishi igha thuve, “David nu Jisü, I kimiyekütü tsülo!”
48Timi kutomo no pa lomipi eno pa vilo inaqhoi shivelo ipia, ikemu pa no alau shi ighamuku kithe ghi ishi pi, “David nu, I kimiye tsülo!”
49Jisü no ngove püzü ishi pi, “Pa ku saghi lo.”
Ike panongu no anhethi kighicheu ku ghi pi, “O mlo mutotoilo! Ithulo! Pa no O ku anie.” 50Paw ubephi xape peve no, pa no ilhe thuve püzü Jisü lau ighi.
51Jisü no pa vilo iniju, “I pelo O ghenguno kiu shitsü penishi ani kea?”
Anhethi kighicheu no khochile, “Akükütsüu! Ni ye ithulu nishi anie.”
52Jisü no pi, “Wovelo, O küpülü no O shipivivae.” Ikelo paikhavi pa ye ithulu kitheluve no alaghi zü Jisü papesü wuve.
Currently Selected:
Mark 10: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
