Apostolmi 15
15
Jerusalem lo Mijekütsümi Hoho Kuho keu
1Timi khami no Judea lono Antioch lo iqighi no hitoi küpülümiqo kütsüe: “Moses no nongu kütsü keu kukhuaye kiqi lono aphighüyiko-küghá shimo aye nongu ye xamlae.” 2Hipau ghenguno Paul ngò Barnabas pama ye panongu gholo aloqhi kimpi eno kighe keu shive. Ikehu küpülümi kütamiqo gholo Paul ngò Barnabas pama kishe pesü Jerusalem lo iqho no apostolmiqo eno kichimiqo sasü hipau vehu küptsaju pe nikeu shie. 3Akukuhou no panongu puwuve, eno panongu no Phoenicia eno Samaria vechesü kicheghüzü shiche kelo Jewkumomi no kíshi Alhou lau xaideghilu ani keno panongu vilo pitsü. Asütsa kithé hipau chilu püzü küpülümiqo kümtsü no alokivishive. 4Kughou panongu no Jerusalem lo ighi keno akukuhomi, apostolmiqo eno kichimiqo no alokivishi panongu sasü, eno Alhou no panongu vechewo kiu müla tsü keno tipaqo kümtsü panoqo vilo lhepiye.
5Tishi akelo Phariseemi mqo gholo pülüluve kemi khami no puthugho no pi, “Jewkumomiqo ghí aphighüyiko ghave moayesae eno aghokulu shi Moses yeza pape moayesae,” ipi.
6Ikehu apostolmiqo eno kichimiqo no hipau vehu küptsa nike ghenguno kushoe. 7Tsaqüi küptsaju kethiu Peter no puthugho no panongu vilo pi: “Athiküzümiqo, nongu no püzüu no ithi akeu toi Alhou no nongu gholo no ningu kishelu püzü Jewkumomiqo pelo I kichí lono atsakiviu kükütsü sütsa chilu no pülülu peniye shike. 8Alhou, khuu timi mlo ithikicheu keno, pa no ningu lau shikeu toi Jewkumomiqo ikhilu ani kepi pephe-piye keu michi shi Aghungu Kimthe panongu tsüke. 9Alhou ye ningu eno panongu dolo kotha-kile keu shitsümoe, kughengu pa no aküpülü vechewo panoqo mlo shikimthe tsüke. 10Tishiaye itehi nongu ye kushiye Alhou peju ghi nipù-asü momu ningu no puqhemla keu kuokhasü pesü Jewkumomiqo kuo lo xipipe niye pükapütsa ani kea? 11Tishi kepu kumoe! Ampeu Jisü’w küpükini vechewo panongu xalu ketoi ningu ghí xalu kepu pülü cheni.”
12Tile kuho akemi kümtsü no Barnabas ngò Paul pama Alhou no pama vechewo Jewkumomiqo lau amichipu eno akümzapu mülà akeu pikeu chilu püzü iqünheive. 13Pama no pitave kelo James no ishi pi, “Athiküzümiqo, I tsa inilo. 14Simon no ningu vilo Alhou no atüghi lono chhosü püzü Jewkumomiqo gholo pa je ghenguno no timi amqo lakhi kíshi kishelu keno kishékulu pivae. 15Tungkupumiqo no pikeu tsaqo ghí hipau gholo puloküqha ani, eno tiye ishi yèpüani:
16“ ‘Hithiu I no ideighi nani
eno David’w aphiki ikiqive keu shiqhepuku kithe nani.
Ti kütsave keqo I no shiqhepukuve nani,
eno I no athoputhove tsü nani,
17tishianguno timi kümtsü no Ampeu phulu penike,
Jewkumomi khunoqo no I jeku acheni keno panongu ghí Alhou phulu penike,
hiye Ampeu khuu no thime hipaqo kümtsü mülà tsü keno pa no pie,’#15:17 Amos 9:11,12
18hiye khaghi no ithi akeu thimeqo ke.
19“Tighenguno, I no kümsü xathalu akeu no ningu ye Jewkumomi khunoqo no Alhou lau xaideghi ani keno panongu ghenguno ighono kushokütsü shitsü kepu kumoe. 20Tishini ke züqhulo ningu ye panongu lau akiyé lono ajulho lhouqo müláve keu chuqu chumo nikeu, kipito xüküpsa shimo nikeu, lhoxü tshüqhi-pìthí keu shì eno ajì chumo kepu shi pive kepue. 21Kughengu khaghinomu Moses yeza ye mishighüna kümtsü lo kütsüvea eno Synagogqo kümtsü lo Sabbath tsalà lono phisü cheke.”
Jewkumomi Küpülümiqo lau Mijetsümiw Yèsü
22Tishive no apostolmi eno kichimiqo gholo akukuhomiqo kümtsü küqha no pano likhi panow timi khami kishe pesü Paul ngò Barnabas pama gholo Antioch lo puwu nikeu shi xathalu. Panongu no küpülümiqo gholo sakiphemi, Judas (Barsabbas ipi chekeu) eno Silas pama kishelu. 23Panongu gholo ishi yèpe tsüpuwu:
Apostolmi eno kichimi, nongu thiküzümiqo,
Antioch, Syria eno Cilicia lo Jewkumomi küpülümi akemiqo lau:
Petha tsü ani.
24Ningu gholo timi khami no ningu lau no puloza lumo no wu püzü nongu pünaqhi ani, eno panongu no kiu pi keno tino nongu kükümsü püna ani ipi ningu no chilu ani. 25Ikehu ningu kümtsü puloküqha no timi khami kishe pe ningu küsàu kiviu Paul ngò Barnabas pama gholo no nongu lau puwu nikeu shie— 26timi tipaqo ye Ampeu Jisü Khristo je ghenguno aküxü pephe tsüve kemiqo ke. 27Tighenguno ningu no yèsü kiu ye ani keno akichi tsa lono mütsümishei shive niye Judas ngò Silas puwu ani. 28Aghungu Kimthe ghengu ghí eno ningu ghengu ghí aloke ipi kümsü akeu ye hi aqhou avehupu shi akeu nguno alau ye kiumu nongu pünamoni keu shivae: 29Nongu ye ajulho lhouqo lau aghashi pe müláve keu chuqu chumo nikeu, lhoxü tshüqhi-pìthí keu shì eno ajì chumo nikeu eno kipito xüküpsa shimo nikeu shivea. Nongu no hipaqo lono kutokupuiluve aye achipi shi anani.
Akivishi alo.
30Ikehu kishe pe püakeu timiqo ye puwuve no Antioch lo iqive, tile akukuhomiqo hekütsü no yèsü pesü panongu tsüe. 31Timiqo no yèsü philu kelo panongu shikumto keu kükütsü tsa ghenguno alokivishive. 32Judas ngò Silas pama ye tungkupumi ghí kehu, shikumto tsa kutomo pesü küpülümiqo hakitetsü. 33Ado hami tile ngove kethiu küpülümiqo no alokughuno kükümgha petha gholo no panongu puwu kemiqo lau panoqo kighide puwove. 34Ikemu Silas ye tilau ngo aghíni keu shi xathave.#15:34 Kaku khami lo ye ajò hipau küha eno atsa hipau peitha acheni 35Eno Paul ngò Barnabas pama ye Antioch lo ngove no tilehi pama eno kütami kutomo no Ampeu tsa pesü kütsü eno shika ae.
Paul ngò Barnabas Pama dolo Akükümsü Kiyeqüve keu
36Atsala hami thiu Paul no Barnabas vilo pi, “Nikujo idewo no ningu no Ampeu tsa pesü mishighüna khilehi kütsüvea keno tipaqo kümtsü lo wu no küpülümiqo ye kiutoi ani keno xuju wunie.” 37Ike Barnabas ye pama gholo John, Mark ipi ku chekeu, ghí sasü wuni shiqhiyi ae, 38ikemu Paul no kümsü keu no pa ye püzüu akümlà mülà khamo no Pamphylia lo pama qhive no idewove keu ghenguno sasü wumove keu pavi ipi kümsüe. 39Pama dolo aloqhi akükümsü küqha mülave no amqo kütüta shive. Barnabas no Mark sasü zükilu lono Cyprus lo wuve, 40ikemu Paul ye Silas kisheluve no küpülümiqo no pama Ampeu’w küpükini lo kulhuqhive tsü no cheve. 41Pa no Syria ngò Cilicia qhalo wu no akukuhouqo shikumto tsüe.
Currently Selected:
Apostolmi 15: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
