Apostolmi 13
13
1Antioch kukuhou lo tungkupumi ngò kütsü chekemiqo ae. Tiye Barnabas, Simeon tsübui kemi ipi ku chekeu, Cyrene lono ighi keu Lucius, Manaen (khuu angh Herod gholo kümtsa saputhu keno) eno Saul ke. 2Panongu no Ampeu sheqhe mülá eno kümvü akelo Aghungu Kimthe no pi, “Barnabas ngò Saul pama ye I no ku pe püakeu kümlà shipe nike ghenguno pama kütashi qhilo.” 3Panongu no kümvü eno akighini shive kethiu panongu no au chhope pama shou betsü no puwuve.
Cyprus lo
4Pama ye Aghungu Kimthe no pama puwu püzü Seleucia lo iqi eno tilau no zükilu lono Cyprus lo wuve. 5Kughou pama no Salamis tolu keno, pama no Jewmi Synagogqo lo Alhou tsa pesü asheshu. John no akukuphuu shi pama gholo che.
6Panongu no züdo yeghiqha kümtsü lo kicheghüzü shive kethiu Paphos tolu. Tilehi Jewmi tuumi shi chekeu, eno kichileu tungkupuu Bar-Jesus ipikeu 7sasü kusholu. Pa ye angh Sergius Paulus ghinikishiu ke. Angh hipau ye alokütsümi lakhi, eno pa ye Alhou tsa chilu nishi akehu Barnabas ngò Saul pama ku puwu. 8Ikemu tuumi shi chekeu Elymas (kughengu hino pa je kiqi ke) no panongu lachile eno angh pelo pülülupe nikeu lono tsüghüve peniye pükapütsae. 9Tishikehu Saul, khuu Paul ipi che keno, pa no Aghungu Kimthe no chhitoi shi püzü thüghüi Elymas ju no ishi pi, 10“No ye tüghami nu eno achipiu kümtsü sasü aghümi shikicheu ke! No ye akimiki eno pishikiqhi no chhitoi ani. No ye Ampeu’w achipiu laghiqo shichighi chekeu lono khilemu tavemo nani keshea? 11Itehi Ampeu’w küghakütha u O shou ikughi nani. No ye anhethi icheve nani eno ado hami khetsünhe küvü ghí ithumlave nani.”
Paikhavi lono akimhi eno zümoi keu no pa nhethi küzüpholuve, eno khukhumu pa u lono sünhepe tsüpe niye phu ghi küka wuve. 12Kiu shive keno angh no ithulu kelo, pa ye pülüluve, kughengu Ampeu ghili kütsü keu lo pa ye shishe akichiqhive ke.
Pisidian Antioch lo
13Paul ngò pa küsàmiqo ye Paphos lono zükilu sasü Pamphylia lo Perga tolu, tile John ye pama qhive no Jerusalem lo idewove. 14Pama ye Perga lono Pisidian Antioch lo ighi. Pama no Sabbath tsalà lo synagog lo ilo eno iqae. 15Ayeza eno Tungkupumi kaku lo phisüve kethiu synagog lo sakiphemiqo no pama lau küsütsa puwu ghi pi, “Athiküzüu nokujo, tsalá timiqo ghenguno hakuthokütsü tsa aghí aye kimiye no pitsülo.”
16Paul no puthugho püzü pa u peqhe-pìye no ishi pi: “Israelmi aküsàmi eno nongu Alhou mülá chekemi Jewkumomiqo, I tsa inilo! 17Israelmiqo Lhou no ni pù-asüqo kishelu; pa no timiqo pelo Egypt lo ache kelo kinikülü shi xülu pe ke; pa kughushu küká vechewo pa no tipau ghakhu lono panongu saipeghike; 18ampe lhobidi kutólo pa no asayeqha lo kutuukulu shi panongu tucho-hejue; 19eno pa no Canaan yeghi lo shiye tsünì hapheve no tipaqo yeghi pesü paw timiqo pelo pa no mheghi shilu pe ke. 20Hi shikeu kümtsü ampe 450 qhalo luveke.
“Tishive kethiu, Samuel tungkupuu ghuloki kutólo Alhou no xaküthami panongu tsüe. 21Tithiu timiqo no akükau tsülo pi khu, eno pa no Benjamin lagha lono Kish nu Saul panongu tsü, eno ampe lhobidi ayè pelu. 22Saul ikhive kethiu, pa no David pesü panongu kükau shitsü. Alhou no David ghili hitoi ashepe shitsüe: ‘I no Jesse nu David phuluvae, pa ye I mlo kuchuu ke; I no shipe nishi akeu kümtsü pa no shi nanie.’
23“Alhou no tushoqhi püakeu toi, timi hipau tikughuko lono xakuluu Jisü Israelmi lau süghitsü ani. 24Jisü ighi mphi züu, John no Israelmi kümtsü lau amlo pebideve no baptiz shilu pe nikeu kütsü cheke. 25Pa kümlapù ashetove niye akelo, John no pi, ‘Niye khuu ipi nongu ye kümsü ani kea? Ni ye nongu no khe achekeu hu kumoe. Ikemu timi lakhi I thiu ighi nani, ni ye pa pukhukuqhomu kuqho nike aküzüpu kumoe.’
26“Athiküzümi Abraham nuliqo eno Alhou sükümsami Jewkumomiqo, xakulu kükütsü sütsa hipau ye ningu lau tsüpuwu keu ke. 27Jerusalem lo xüküami eno ayekipemiqo ye Jisü ikhilumove ke, tishimu pa kiléqhive keu lono panongu no Sabbath tsalà atsütsǜ lo tungkupumi no pikeu tsa phisü chekeu shikupuve ke. 28Pa pìthíve kepu akiqi kiumu phulumomu panongu no pa ghimeqhi pìthíve peniye Pilate picheveke. 29Kughou pa ghili yèpüa keu toi kümtsü panongu vechewo shikupuve keno, pa khopemiqo no kros lono pa sükumo ikhiqhive eno pesü akumoki lo qhove. 30Ikemu Alhou no akithí lono pa xüputhuve, 31eno Galilee lono Jerusalem kutólo pa gholo kicheghüzü shi kemiqo ye atsala kutomo pa ithulu ke. Panongu ye itehi niw timi lau Jisü shepemiqo shi anie.
32“Ningu no nongu vilo atsakiviu piani: Alhou no ni pù-asüqo lau kiu piqhipüa akeno 33tiye Jisü xüleputhuve tsü keu vechewo ningu panongu tikughukomi eno anuliqo lau shikupu tsüke. Tiye Leshele akiniù lo ishi yèpüani:
“ ‘No ye I nu ke;
ishí no I no O pù shiluvae.’#13:33 Leshe 2:7
34Pa ye khilemu tsümavemo kepu shi Alhou no akithí lono pa xüputhuvae. Alhou no pikeu toi,
“ ‘I no Akimthe eno mütsümishei keu kükümgha
David lau tushoqhi püakeu O tsünie.’#13:34 Isa 55:3
35Kuchoyesü lo a-a kütau lo ghí ishi yèpüa keu toi:
“ ‘No ye ow akimthemi pelo tsümave pemo nani.’#13:35 Leshe 16:10
36“Kughou David no paw tiqheli lo Alhou kimiji shikupuve keno pa ye thive, papù-asü gholo qhove eno pa sükumo ye tsümave ke. 37Ikemu Alhou no khiu akithí lono xüputhuve keno pa ye tsümavemoe.
38“Tighenguno, I thiküzümiqo, Jisü vechewo axiné qhikütsü akeu ithi penishi ye, ni ye nongu lau asheshu ani. 39Moses yeza lo nongu no achipikamla no achekeu, khukhumu pa pülü keu vechewo axiné jeli kümtsü lono khaqhikiphe ithulue. 40Tungkupumiqo no kiu pipüani keno nongu lau shikupuve pemo nike kutokupui lo:
41“ ‘Julo, nongu timi pipütha chekeqo,
akümza alo eno thia lo,
kughengu I no nongu tsalaqo lo kiuala khami shi nani,
tiye timi khami no nongu vilo pinamu
nongu ye khilemu pülümo nani.’ ”#13:41 Hab 1:5
42Kughou Paul ngò Barnabas pama no synagog qhive no wuve che keno timiqo no pama kusü no ighi nikeu Sabbath tsalà lo ghí ighino pama no pi akeqo hu alau pitsülo ipi. 43Kughou akukuho ixave keno Jewmi ngò Jewmi chineye luve no amlo tsü akemi kutomo no Paul ngò Barnabas pape wu, pama no panongu sasü küptsa eno Alhou’w küpükini lo xüache penike hakite.
44Akiniù Sabbath tsalà lo mishighüna lo akemi khami likhi thono kümtsü Ampeu tsa chilu nike ighi kumqoe. 45Kughou Jewmiqo no timi kutomo akeu ithulu keno panongu ye anhekushu no chhitoive. Eno panongu no Paul no pikeu tsa lachile eno pa shou küthakügha shie.
46Tishi kelo Paul ngò Barnabas pama no akumto shi panongu khochile: “Ningu ye atüghishi Alhou tsa pesü nongu vilo pi moayesave ke. Ikemu nongu no milive eno nongu likhi nongu ye lhokta küxü ithulu küzü kumoe ipi ikhiluve ke, itehi ningu ye Jewkumomi lau wuni ae. 47Kughengu Ampeu no hitoi ningu lau azah tsüpüani ke:
“Nongu pelo ayeghi kishekha kutólo xakulu süghi penike ghenguno
I no nongu pesü Jewkumomiqo ghenguno akulu lakhi toi shitsü ke.”#13:47 Isa 49:6
48Kughou Jewkumomiqo no hi chilu keno panongu ye alokivishi Ampeu tsa gihue; eno khunoqo lhokta küxü lo kishesüluve keno pülübeluve.
49Tipa qha kuchopu lo Ampeu tsa veküpha wove. 50Ikemu Jewmi sakiphemiqo no Alhou sükümsami totimi aqo-aho lo ampemi eno mishighüna lo ajekipi sakiphemi kipitimiqo xukuthove. Panongu no Paul ngò Barnabas pama pishi-puju nikeu xukutho no tipa qha lono hapheve penike panongu xukuthoe. 51Ikehu pama no panongu lachile keu michi shi pama pukhu lo ayeghimukhu kukhuqhive no Iconium lo wuve. 52Eno akhopemiqo ye alokivi ngò Aghungu Kimthe no chhitoive.
Currently Selected:
Apostolmi 13: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
