Markus 12

Ba'ada təkəra Njir Zwa Pəla'a

(Mat 21:33-46; Luk 20:9-19)

1Ngə Yesu tə ghəya na dlədləɓə nə nda ana ba'ada, cha na, “Vanya ndə da zuya fa anap ga pati, cha labiya mbwar ɓəchi anap kwa, cha latə jigəɗə dzəgaməu ka ndər ɓəla gi ta'i ti. Ngə cha nənyi nə alenya njir zwa a təkəra kwaba, ga təra kyo vanya mələm. 2Nda bəjir mər anap nda ɗa, ngə cha sə mava nyi ka cha dləutsə nyi ba nənyi na mbaɗər yayar Anap nda tsa njir zwa inda. 3Kəl ngə nji'inda səya mava nda, nda dəgə nyi ga ɓəlandə nyi twa'atwa'a chi. 4Ndə nda ɓəla sə vanya mava. Ngə nda dəgə nyi ku kəra cha ga mərtə nyi sər kuzhi. 5Cha tsakətə sə vanya mava nyi, ngə njir zwa inda tsəya nyi. Cha sə alenya mavi'i nyi ɗanghəu. Njir zwa inda dəgə alenyi ga kuɗənda alenyi.

6“Wuɗəkər ndə nda həya nyi dza, nacha ngə zər nyi nda cho nyida. Ngə cha sənyi, ana jigadəmar, ‘A kəpal dawa, nda kwa la'a səlir zər ɗa.’

7“Nda njir zwa inda la'a zər ndə nda kwa shili, nda na nə kərnənda, ‘Yawa! Janə ndər fa'aki na fa na. Anda ma mən tsəya nyi, ga sər fa'aki nyi ɗa ka nəkəmən.’ 8Ngə nda səya nyi, nda tsəya nyi ga bəzəbiya nyi ku fa nda.”

9Yesu tə jau nda, “Mi sənda tlakər fa nda kwa məra? Yo nar hi, cho shili kuɗənda njir zwa inda ba'a nənyi fa nda nə alenya nji. 10A da hya ta kəratsəntə səngə ku likatəkatə wa ya?

‘Hangu nda njir həra ngyari

nga ɗa ka sər sakəda.

11Nənna tlər Tlakə nga,

ya sər məngəl cha atə lya ea’#12:11 Ndzamar tsəu ku: Zab 118:22, 23..”

12Wawa'ar njir Yahuda gwa'a kanda səya Yesu aka a ngabiya tənda ənda a təkəra nda ngə cha mər ba'ada nga, ənda nanda ingə njir zwa pəla'a inda. Kəl ja, nda kwa ləvər dlama nji, aka ənga nda ngya nyi ga təra.

Jau təkəra Tsachi

(Mat 22:15-22; Luk 20:20-26)

13Ahir nga, njirawawa'a tə sə alenya njir Farisi ana njir nəu hir Hiridus kanda yi ngəya nyi ləbam nə Yesu cha dəkə sənda nda kwa səya nyi təkəri. 14Nda nar nyi nə Yesu, “Maləm, a zəndətə ea ənda ndər jiri ka. A da ko tazhira wa, ya a da ko takəl wa. Ko dəkə lakur Hyel na jiri. Yau, par ea, tsa'atsa'a tanyi nja ki tsachi nə Kaisar zəma, aa a da wa? Ea ki zəma, aa ngwa ea ki wa?” 15Kəl ja, Yesu zəndəbiyatə dəmənkur kənda, ngə cha na, “Mya gwa'atə hyo gwa'a ngəya ɗa ləbama? Char ɗa ma kwaba njir Roma, ya ndzamtə yo wum nə hi.” 16Nda shili na nyi kwaba, ngə cha jawa, “Səlirma wa, ana tləmər wa ngə tə kwaba na?”

Nda na, “Nə Kaisar.”

17Ngə Yesu tə nar nda, “Yau, Nənyi ma sənda njo kina nənyi nə Kaisar anə Kaisar, sənda nə Hyel tsə'u hya nənyi nə Hyel.”

Ngə nda mər məngəl ana ənda Yesu tə wum nənda.

Njir Saduki tə Gwa'a Ngəya Nyi Ləbam nə Yesu

(Mat 22:23-33; Luk 20:27-40)

18Vanya dzukə nji'inda njo nga njir Saduki inda kwa na a hya'atər nji kuɗəkuɗə da wa, tə shili da Yesu ga jau nyi, 19“Maləm, gadlagadla Musa tə nar ea, ma zamənya vanya ndə tə tah ga ngyar mala a ngulisha'a da wa, tuku cha ɓwagu tsər na malafi nda ga cha yiya nyi zər nə zamə nyi nda#12:19 Ndzamar tsəu ku: ZGadl 25:5-10.. 20Alenya nji da, məɗəfə nda tə adan nda. Ngə zə'ualə kənda həbiya mala ga tah, a ngulisha'a da wa. 21Ngə ndə nda mətləkunyi tə ɓwagu tsər ana malafi nda, nacha tsə'u cha ta a ngulisha'a da wa. Ngə ndə nda makərkunyi a ɓwagu tsər na mala nda nacha tsəu cha ta a ngulisha'a da wa. 22Ngə tə ɗa dəhə nda məɗəfa tə hə mala nda ga kuɗa a ngulisha'a da wa. Udiya nyi, ngə mala nda tah. 23Par ea ja, macha hya'atər nji kuɗəkuɗə da ya, mala wa cho da ɗa kari pəshir hya'atər nji kuɗəkuɗa? Aka dəhə nda məɗəfa hə nyi ti.”

24Ngə Yesu tə nar nda, “Kər ngə nja shandə hi, aka a da hyo zəndə likatəkatə wa, ya a da hyo zəndə gyalkur Hyel wa. 25A da cho ɗa ka mala madawa ku pama nda wa, aka ma nji'inda kuɗə tə hya'ati, a da nda kwa hə mahi'i wa, ya a da nda kwa ɗəu wa, kəl nda nda kwa ɗa wi chama Hyel i kya huɗamələm. 26A da hya kəratsəntə sənda Musa tsəfəbiya ku likatəkatə təkəra hya'atər nji kuɗəkuɗa aku mafakə hu'u nda kwa gəɗə ku gədləla nda ma? Ahir ka Ibrahim, Ishaku, ana Jakop tə kuɗa, Hyel tə nar nyi nə Musa, ‘Naya ngə Hyel Ibrahim, Hyel Ishaku, ana Hyel Jakop.’ 27Aka ənga Hyel nji'inda na pi cha, a da cha Hyel nji kuɗəkuɗə wa. A satə hi gagaɗa.”

Gadlagadla nda Ndiya Dəhəu

(Mat 22:34-40; Luk 10:25-28)

28Zhang ku huɗa maləm gadlagadla Musa ta'i tangnda kwa səhimi da kəpal kənda. Cha ngabiya ənda Yesu tə wum nənda tsa'atsa'a, ngə cha jawa, “Aku huɗa gadlagadla dəhə ya, manə nga ndiya na sakəda?”

29Yesu tə nar nyi, “Janə gadlagadla nda ndiya dəhəu; ‘Səya himi, nakə Isra'ila! Kəl Hyel Tlakən mən ngə Tlakəu.#12:29 Ndzamar tsəu ku: ZGadl 6:4, 5. 30Aka ənga, ka nyida Hyel Tlakə ngha ana dəhə ɗufwa ka, ana dəhə pya ka, ana dəhə jigadəma ngha, ana dəhə dunama ngha.’ 31Mətləkunya gadlagadla nda ndiya nacha ngə, ‘Ka nyida alenya nji wi kərngha.’#12:31 Ndzamar tsəu ku: Liv 19:18. A vanya gadlagadla da ndiya inənnə wa.”

32Ngə maləm gadlagadla nda nar nyi nə Yesu, “Maləm, a pətə kə tsa'atsa'a. Jiri ngə pə ka ənda Hyel zhang tanyi ya a vanyi da wa. 33Ya zəndəbiyatə ya ənda sə mənakə cha gagaɗa ya nyida nyi na dəhə ɗufwa ya, ana dəhə jigadəma ɗa ana dəhə dunama ɗa, ana ya nyida kə'i təwul ɗa wi kərɗa. Nanda ingə gadlagadla inda njo kina nəubiya matsa lə ga'a nə sərshishi ka alenya sər hatəmachi nə Hyel.”

34Nda Yesu tə la'a ənda ndə nda ngabiya ti, ngə cha nar nyi, “A da kə naɗəu tsa təlkur Hyel wa.” Ahir nga a ndə nda ɓəla uya dunamar jau nyi alenya jau səkə wa.

Zər Wa ngə Kəristya?

(Mat 22:41-46; Luk 20:41-44)

35Yesu kwa dlədləɓə nə nji ku Mbwa'alə Hyel, ngə cha jawa, “Ma ngə ka maləm gadlagadla kwa na ənda Kəristi zər Dauda? 36Dauda na kərnyi natə təwa Shanguɗə Karti, ‘Hyel Tlakə tə nar nyi nə Tlakə ɗa, ngyata nghə tə chisəma ya, kəl ya fəu njir mər dawa naka a da kiɗa hya ka.’ 37Dauda na kərnyi ga nga Kəristi, ‘Tlakə ɗa,’ ya, aman ngə Kəristi kwa ɗa ka zər nyi tsəu'a?” Dlama nji ɗang tə səhimi da cha ana hirgyaɗi.

Yesu tə Labiya Kiɗa ka Maləm Gadlagadla Musa

(Mat 23:1-36; Luk 11:37-54; 20:45-47)

38Nda Yesu kwa dəkə sə nə nji, cha na, “Gəla ma hya da ba'a ɗa wi ka maləm gadlagadla ina! Nanda ingə kwa i ha ləkutə wawa'a ana nja usa nda na səli tə suku. 39Nda kwa i nda ngya tə sər ngya wawa'a biyama ku vi pətlənya, ana sər ngya tsəkəɗə tə vir ladər. 40Dəhə ka ənga, a da nda kwa ngatə kuzhir ɗiya ana dləu sər mahi'ifi wa, nda kwa mərtə kərnənda wi nji dur təwa pətlənya tərkusəu ku pama nji. Aka ənga, nəuma kənda kwa ndiya nə alenya nji.”

Sənda Malafi tə Nənyi nə Hyel

(Luk 21:1-4)

41Yesu tə ngya ləhəu dzər məɗəwa Mbwa'alə Hyel, cha har kər ga la'a ənda dlama nji kwa shili na kwaba nə Hyel. Njir gəna ɗang tə shili pəu kwaba 'ualəu. 42Ngə vanya malafi ɗaliɗali tə shili fəu sulai mətləu. 43Ngə Yesu tə nga shawa nyi ga nar nda, “Jiri yo nar hi, malafi ɗaliɗali nə fəu tə sənda ndiya nə alenya nji dəhə gu məɗəwa, a mar Hyel. 44Aka kush tanyi ngə nda uyatsə ku 'ualkura sənda tsa nda, kəl ja, mala na dəhə ka ɗaliɗalikur nyi, cha pəu dəhə sənda cho ngya kari.”

Currently Selected:

Markus 12: hbbNT

Highlight

Copy