Markus 11

Yesu tə Gu Urshalima wi Təl

(Mat 21:1-11; Luk 19:28-40; Yoh 12:12-19)

1Nda Yesu ka shawa nyi tə ɗa ləhə dza Urshalima, nda shili vu Baitafaji ana Baitanya a dza Dəgəl Zaitun, Yesu tə sə mətlə ku huɗa shawa nyi, 2cha nar nda, “Ma'i ma gwa ku zər mələm ngə biya manə hi nga. Gwakura hi, hyo la'a dalnjiɓa tə mba, a ndə da ta gyatə ya cha wa. Hya pələya hya shili ni. 3Ma kala ndə tə jau hi, ‘Ka mi hyo pəl nya?’ Hya nar nyi, ‘Tlakə ngə kwa gwa'a nə bəji kushiu, ya cho ɓəlandə nyi shili.’ ”

4Ngə nda təra, nda la'a dalnjiɓa nda tə mba, anya laku, anya nyaki. Nda nda kwa pəla, 5ngə alenya nji tə ta'i tangnda tə jau nda, “Mi ngə hyo məra? Mangə hyo pəl kwara nga?”

6Ngə nda ɓəlakə nda tang wi nda Yesu tə nar nda, ngə nji'inda ngya nda nda təra na kwara nda. 7Manda nda shili na dalnjiɓa nə Yesu, nda sətə ləkutə kənda tə ya cha ngə Yesu tə gi ngya ti. 8Nji ɗang tə səya ləkutə kənda ku laku, alenya nji tsəu tə ɓəltsə heli ku fa i ga səya ku laku. 9Nji'inda təra biyamar Yesu ana nji'inda a hi nyi, kwa pə kurakə nda kwa na, “Fala a nə Hyel! Ndər papa'akur ngə ndə ngə kwa shili ku tləmər Tlakə nga! 10Papa'akur ngya tə təkəra təlkur nda kwa shili nda pabiya da nə adan mən Dauda! Fala a nə Hyel nda kya huɗamələm.”

11Nda Yesu tə dzəva Urshalima, ngə cha təra gu ta Mbwa'alə Hyel ga ndzamtə dəhə səu. Manda akə a ɗati ngə cha ɓəl yi Baitanya ka Shawa kwabəmətlə inda.

Yesu tə Shu'unda Wur Kanda

(Mat 21:18-19)

12Vanya zəkəu nda ndo ngyar Baitanya, ngə huɓa tə Yesu. 13Cha la'a wur kanda naɗəu ana heli, ngə cha təra yi cha la'a nda cho uya yayar kanda nda. Macha yi kəl heli, aka a bəjir yar kanda da ɗa wa. 14Ngə Yesu tə nar nyi nə wur Kanda nda, “A ndə da kwa tsakətə səmə nguli nghə pa'a wa!” Ya shawa nyi ngatə tə sənda cha na.

Yesu tə Gədləbiya Njir Shafəli ku Mbwa'alə Hyel

(Mat 21:12-17; Luk 19:45-48; Yoh 2:13-22)

15Nda Yesu ka shawa nyi tə ɓəla gwa Urshalima, Yesu tə gwa ku babal Mbwa'alə Hyel ga gədləbiya njir shafəli. Ngə cha mbəlmbəl nda tyaɓər njir bəla kwaba ana hwakə njir ɗəlnda mbətla Masar,#11:15 Njo ɓəla ku mbwa'alə ka sə mətləu: 1. Ka ga nja uya nja ki tsachi Mbwa'alə ni; 2. Ga nja uya nda ɗəlbiya sərshishi nə ka hatəmachi, aka a njir Yahuda da kwa i kwaba njir Roma wa ka səlirma inda ti. 16Ga katə madawa tsa tərabiya tahə Mbwa'alə Hyel, ana sər shafəli. 17Ngə cha ghəya dlədləɓə nə nji cha na, “Tsəfətsəfə nyi,

‘Njo nga ki ɗa

ki pətlənya nə dəhə nji.’#11:17 Ndzamar tsəu ku: Ish 56:7.

“Kəl ja, jan hya shandə tə ka ‘Tləl njir fa'avi.’#11:17 Ndzamar tsəu ku: Irm 7:11. ”

18Nda wawa'ar fərist ka maləm gadlagadla Musa tə ngatə sənda Yesu tə məra, nda ghəya gwa'a lakur tsa nyi, aka nda kwa ləvər nyi, ənda njir nəu nyi kwa tsaka ya dəhə dlama nji kwa mər məngəl ana dlədləɓə nyi.

19Nda akə tə ɗa, Yesu ka shawa nyi tə ngyar ta mələm nda.

Wur Kanda nda Yesu tə Shu'unda nda

(Mat 21:20-22)

20Vanya zəkəu, tsəɗakə mbudla, nda Yesu ka shawa nyi kwa ma'i ngə nda la'a wur kanda nda Yesu tə shu'unda nda uləti hwa'a bətə səya ku ngilangha cha. 21Bitrus tə ɗənghatə sənda Yesu tə pəa, ngə cha nar nyi nə Yesu, “Maləm, ndzama! Jan wur kanda nda ka shu'unda nda uləti!”

22Ngə Yesu tə nar nda, “Ɗa ma na jirikur ku Hyel! 23Jiri yo nar hi, ko nau nar nyi nə mə na, ‘Hya'atə ka bəzəu kərnghə gwatə fa'a,’ ya cho ɗa ənda, maka nənyi jiri nə Hyel ya a kəpal da ku ɗufwa ka a təkəra sənda ka na wa. 24Aka ənga yo nar hi, dəhə sənda hya gədi ku pətlənya, hya nənyi jiri ənda hyo uya, ya cho ɗa ka nəkə hi. 25Ma hyo pətlənya, tangərma, hya ghəya na farbikər ndə nda huɗa kə tlatlanyi tsari, ga Adan nə hi nda kya huɗamələm farbikə kəhi tsəu.”#11:25 Alenya tsəfə inda nja mər na chi tə tsakətə 26 Macha a da hya farbikər nji wa, a Adan nə hi nda kya huɗamələm da kwa farbikə kəhi tsə'u wa.

Jau təkəra Gyalkur Yesu

(Mat 21:23-27; Luk 20:1-8)

27Ngə Yesu ka shawa nyi tə ɓəla gwa Urshalima, Nda Yesu kwa zhuli ku Mbwa'alə Hyel nda, ku sakanda cho dlədləɓa nə nji, ka wawa'ar fərist ana ka maləm gadlagadla ka njirawawa'a tə shili da cha. 28Ngə nda jau nyi, “Ana gyalkur manə nə ko mər sə'ina? Wa nənghə gyalkur nə mər sə'inga?”

29Yesu tə nar nda, “Yo nar hi ana gyalkur manə ngə ya kwa mər sə'ina. Ma hya wum na'a təkəra jau zhang nda yo jau hi. 30Par ɗa ma, gyalkur mər baɓtisma Yohana ya, atsa Hyel uya cha zəma, aa tsa ndəu?”

31Nda ɓwanya ku pama kərnənda, “Ma məna na, ‘Hya'atə tsa Hyel,’ cho nar mən, ‘Ya kami hya ngyar nənyi jira?’ 32Ya a da mən kwa nau na hya'atə tsa ndə wa. Aka məno ləvər sənda njo mərtə mən, aka madawa tangnə nənyi tə jiri, ənda Yohana, ndər mətakər cha.” 33Ngə nda nar nyi nə Yesu, “A da eo zəndə wa.”

Yesu tə nar nda, “Naya tsəu, a da yo par hi nda ana gyalkur manə ngə yo mər sə'ingə wa.”

Currently Selected:

Markus 11: hbbNT

Highlight

Copy